Kupa Botërore e Futbollit dhe qasja kulturore

kupa boteroreNë kulmin e festimeve që shoqërojnë Kampionatin Botëror të Futbollit, tifozë nga e gjithë bota vazhdojnë të mbërrijnë në Rusi. Shumë prej tyre e vizitojnë këtë vend për herë të parë dhe vijnë nga vende të largëta si Amerika e Jugut, Afrika dhe Azia. Vendasit thonë se tifozët i kanë transformuar tashmë qytetet e tyre.

Moska ngjan me një mozaik botëror festimesh. Rrugët rreth Kremlinit, nën masa të rrepta sigurie, janë transformuar në skena të shfaqjes së pasionit latin dhe ritmit afrikan.

“Gjithçka është e re për ne, kulturë e re, gjuhë e re dhe është shumë e vështirë të komunikosh. Por ne jemi shumë të ngazëllyer”, thotë Catarina Tejada tifoze e Kolumbisë.

“Njerëzit janë shumë të mirë dhe gjithçka duket shumë bukur”, thotë Salah tifoz i Egjiptit.

“Jemi të gjithë të bashkuar, amerikanë, evropianë, aziatikë. Të gjithë bashkë!”, thotë Jorge, tifoz i Meksikës.

Vendasit po shohin për herë të parë një gjë të tillë.

Të gjithë janë shumë miqësorë me njëri-tjetrin. Kjo është një atmosferë feste, një ngjarje e jashtëzakonshme, më e bukur se festimet për Vitin e Ri!, thotë Natalya tifoze e Rusisë.

Disa kanë ardhur në Rusi, edhe pse vendet e tyre nuk janë kualifikuar për në botëror, sikurse 12-vjeçari Abdul Jabar nga Sudani.

“Përshëndetje! Jemi këtu në Moskë, koha është e mrekullueshme!”

Nigerianët që jetojnë në Rusi, organizuan një festë mikpritëse për tifozët udhëtues.

“Do ta fitojmë kupën, jam optimist!”, thotë Ennie Charles tifoze e Nigerisë.

“Ata festojnë në maksimum. Ky është rezultati kur nigerianët bëhen bashkë. Atyre u pëlqen të kërcejnë”, thotë Anthony Abugu, nigerian që jeton në Moskë.

Pas festës, pak kulturë. Sistemi i dekoruar i metrosë së Moskës është një kaleidoskop i ngjyrave të ekipeve, ndërsa vizitorët eksplorojnë qytetin. Rusia është e etur të tregojë atraksionet e saj kulturore, prej galerive të artit të Shën Petërburgut, tek trashëgimia islame më pak e ekspozuar, në qytetin pritës të Kazan-it.

Mijëra vullnetarë janë në dispozicion për të ndihmuar vizitorët, sikurse Julia, e cila flet spanjisht dhe do që gjithçka të shkojë qetë.

“Nuk ka situata të pamundura. Duhet vetëm të qetësohesh një sekondë, të mendohesh dhe ta zgjidhësh”, thotë Yulia nga Shën Peterburgu.

Por nëse humbisni, këshilla ndoshta më e mirë do të ishte: ndiqni zhurmat e gëzueshme. (voa)

Marëveshja e Detit, tjetër takim Bushati-Kotzias

BushatiNë Shqipëri, ministri i Jashtëm Ditmir Bushati tha sot se bisedimet me Greqinë për marrëveshjen për përcaktimin e kufirit detar me Greqinë janë në një pikë ku ekzistojnë të gjithë mundësitë për gjetjen e një zgjidhjeje të përbashkët.

“Nga analiza që i kemi bërë këtij procesi mund të thuhet që jemi në një rrugë pa kthim dhe shpresoj që në një të ardhme jo të largët ne ta mbyllim këtë marrëveshje, e cila nuk është e vetmja pikë siç e kam thënë e paketës që ne negociojmë e diskutojmë me palën greke, sepse paketa është shumë me e gjerë se kjo marrëveshje”, deklaroi ministri i Jashtëm.

Zoti Bushati njoftoi se gjatë kësaj jave ai do të ketë një tjetër takim me homologun e tij grek, Nikos Kotzias, ku në qendër të bisedimeve do të jetë sërish kjo çështje, ndërkohë që paralelisht do të zhvillohet dhe raundi i tretë mes ekipeve të negociatorëve të të dy vendeve.

Ministri i Jashtëm shqiptar nuk dha ndonjë afat për përmbylljen e bisedimeve, duke theksuar se “që të dyja palët kanë nevojë për kohën e tyre, në mënyrë që të shkojnë drejt një marrëveshje të pranueshme, të drejtë dhe një marrëveshjeje të zbatueshme”.

Bisedimet zyrtare mes palëve nisën në fund të muajit prill, pas një procesi të gjatë mes Presidencës së Republikës dhe Ministrisë së Jashtme, për marrjen e autorizimit nga kreu i Shtetit. Marrëveshja e mëparshme e vitit 2009 u rrëzua nga Gjykata Kushtetuese në 2010, për shkak se u gjet në shkelje të kushtetutës dhe konventave ndërkombëtare.

Shqipëria dhe Greqia kanë kaluar një periudhë të gjatë marrëdhëniesh me shumë ulje ngritje. Asnjëherë më parë, siç ka ndodhur prej më shumë se 5 vitesh, nuk ka patur shkëmbime vizitash në nivel kryeministrash. Dialogu i nisur që vjeshtën e kaluar duket se ka sheshuar shumë çështje, përjashtuar atë çame, divergjencat rreth së cilës mbeten ende të thella. (voa)

Pavlopoulos: Zgjidhja e çështjes së emrit dhe ndryshimet kushtetuese parakushte për anëtarësim të IRJM-së në BE dhe NATO

Prokopis-PavlopoulosZgjidhja e çështjes së emrit nuk do të përhap irredentizëm dhe ndryshimet kushtetuese janë parakushtet për përparimin e Maqedonisë në NATO dhe BE, sipas Kryetarit grek Prokopis Pavlopoulos.

Ashtu siç deklaroi korrespondentja e AIM në Athinë, edhe pas nënshkrimit të marrëveshjes, për Pavlapoulos parakushtet për integrimet euro-atlantike janë të njëjta. Qëndrimet e tij i tha pas takimit me Kryetarin e Indisë Ram Nath Kovind, përcjell Telegrafi Maqedoni.

Parakusht për përparim në raport me NATO-n dhe Baskimin Evropian për Ish Republikën e Jugosllavisë Republika e Maqedonisë është zgjidhja e çështjes së emrit. Dihet që emri i këtij shteti, emri kushtetues, përhap irendentizëm. Duhet të zgjidhjet çështja e emrit, ashtu që nuk do të përhapet irredentizmi. Për të ndodhur kjo, do të duhet të ketë ndryshime kushtetuese. Kjo është e pranuar nga vet ky shtet, ashtu siç theksohet në marrëveshje, e cila u nënshkrua në Prespë, tha Kryetari i Greqisë në fillimin e takimit me Kryetarin e Indisë.

Prokopis Pavlopoulos ripërsëriti se Greqia është për marrëdhënie fqinjësore të mira, përkrah integrimet euro-atlantike të Maqedonisë, vetëm nëse plotësohen kushtet e ndryshimeve kushtetuese.

Për çdo ftesë të këtij shteti, për integrim në NATO , si dhe fillimin e bisedimeve me BE-në, parakushtet për janë ndryshimet kushtetuese që rrjedhin nga marrëveshja e arritur, atëherë mund të flasim për perspektive, gjë që është bërë me vet marrëveshjen, theksio Pavlopoulus./Telegrafi/

Programi “100 fshatrat”, Rama: Binjakëzim me fshatra europianë

ramaNë kuadër të programit “100 fshatrat”, Kryeministri Rama zhvilloi një takim ditën e sotme me përfaqësuesit europian në vendin tonë, duke i ftuar të bëhen pjesë e këtij programi.

Edi Rama hodhi idenë e binjakëzimit të këtyre fshatrave me të tjerë në Europë, duke thënë se kjo do të ishte një ndihmesë e madhe. Rama u shpreh se fshatarët duket ta kuptojnë që nuk janë vetëm.

“Nëse do të bënim binjakëzime midis fshatrave me ata në vendet tuaja, të zhvillojmë modele për qasjet e përbashkëta midis zonave të ndryshme urbane, për të mbështetur edhe traditën. Iniciativa për partneritetin mund të jetë shumë e thjeshtë për secilin nga ju për të transformuar gjërat, që ndoshta ju po i bëni edhe në vendet tuaja. Ne duam t’i themi këtyre fshatarëve që nuk janë vetëm”, tha Kryeministri.

Më tej, Rama tha se këto do të jenë 100 fshatrat e parë që do të pësojnë transformim, por synimi është të shkohet edhe në fshatra të tjerë.

“Të bëjmë të pamundurën të mundurën. Të ecin në një drejtim dhe në koordinim të plotë, në mënyrë të bëjmë maksimumin. Synimi është që në të krijojmë 100 pika të ndryshme graviteti në vende të ndryshme dhe fshatra që mund të jenë pas tyre, në mënyrë që të kemi potencial edhe për fshatrat e tjera. Ne jemi të përqendruar në zhvillimin e agroturizmit, si një instrument shumë efikas për të luftuar varfërinë, përmes përdorimit të mirë të aseteve që mbizotëron Shqipëria. Në këto qasja janë të të nevojshme paratë, por më të rëndësishme janë njohuritë dhe ndërveprimet. Ne besojmë që mund të ndajmë informacione me të gjithë ju dhe mund të arrijmë maksimumin, por kjo nuk ka të bëjë vetëm me investimet, por edhe me shkëmbimin e kapitalit njerëzor”, tha Kryeministri.

Top Channel

Brukseli ende nuk e ka caktuar datën për vazhdimin e dialogut

BEZyrtarët në Bruksel thanë për Radion Evropa e Lirë se ende nuk ka një datë të caktuar se kur do të mbahet takimi i ardhshëm ndërmjet delegacioneve të Kosovës dhe Serbisë. Takimi i radhës, pritet që të jetë në nivelin teknik, për t’i paraprirë takimit në nivelin politik.

Maja Kocijançiq, zëdhënëse e Përfaqësueses së Lartë të Bashkimit Evropian, Federica Mogherini, tha se është duke u punuar për caktimin e një date.

“Unë nuk mund ta përmendi ndonjë datë në këtë moment. Në momentin kur ta kemi datën dhe të gjithë pajtohen, unë do ta bëj publike datën si dhe agjendën. Gjithmonë do ta bëj një gjë te tillë, por për momentin nuk mundem”, tha Kocijançiq.

Përderisa nuk dihet data e takimit të radhës, delegacioni i Kosovës ka udhëtuar për në Bruksel. Koordinatori i Qeverisë së Kosovës për dialogun me Serbinë, Avni Arifi, tha për Radion Evropa e Lirë se delegacioni kosovar do të bëjë prezantimin e të arriturave në procesin e dialogut me Serbinë, para përfaqësuesve të vendeve anëtare të Bashkimit Evropian.

Ai tha se delegacioni i Kosovës do t’i njoftojë zyrtarët e BE-së për të arriturat, por edhe për ngecjet që pala serbe është duke i shkaktuar procesit.

“Ne jemi të përgatitur, do të flasim për angazhimet tona, por njëkohësisht do të flasim edhe për bllokadat që kemi. Ne nuk kemi njohuri se a është pala serbe në atë takim, por për hir të informimit të opinionit, ne nuk kemi takim me palën serbe”, tha Arifi.

Arifi tha se pala nga Kosova i ka parashtruar kërkesat për takimin dhe temat që pritet të diskutohen, por sipas tij, ende nuk ka ndonjë përgjigje.

“Dy kërkesa i kemi bërë edhe në prill edhe në maj, për të rifilluar bisedimet dhe në rend të parë duhet të jetë energjia. Nuk kemi marrë përgjigje ende. Ne kemi pasur një ofertë për të dëgjuar prezantimin se deri ku kanë arritur rezultatet në hartimin e statutit, nuk kemi treguar interesim sepse ka prioritete më të mëdha. Për ne nuk ka marrëveshja më pak të rëndësishme dhe më shumë të rëndësishme, të gjitha marrëveshjet janë me rëndësi dhe jemi serioz në këtë aspekt”, tha Arifi.

Nga ana tjetër, njohësja e procesit të dialogut Kosovë – Serbi, Jeta Krasniqi, analiste nga Instituti Demokratik i Kosovës, duke folur Radion Evropa e Lirë thekson se dialogu mes palëve duhet të vazhdojë. Ajo thekson se për krijimin e një atmosfere më të mirë në këtë proces, fillimi i zbatimit të marrëveshjeve do të krijonte një klimë më të mirë për takimet në vazhdim.

“Brukseli duhet të kërkojë nga të dyja palët që të zbatojnë marrëveshjet të cilat i kanë arritur edhe të sanksionojë palët të cilat nuk i zbatojnë ato marrëveshje. Sanksionimi mund të vijë me anë të mjeteve të cilat BE-ja i ka, siç është rrugëtimi palëve drejt BE-së. Është absurde të mendosh që mund të kemi një proces përmbyllës të dialogut ende pa e ditur se çka është duke ndodhur me marrëveshjet që janë arritur në vitin 2011″, tha Krasniqi.

Ajo tha se, përderisa Serbia, tashmë ka ndërtuar një pozicion më stabil për dialogun, Kosova nuk e ka bërë një gjë të tillë.

Sipas saj, Kosova duhet të ketë një konsensusi politik karshi procesit të dialogut .

“Ne nuk jemi duke parë që ka një konsensus në palën kosovare rreth së ardhmes së këtij procesi. Nuk e kemi parë platformën e Qeverisë e cila është dërguar në Kuvend e më pas është tërhequr. Ndërsa nga ana e Kuvendi nuk kemi parë asnjë nismë konkrete drejt ndërtimit të një konsensusi politik apo qoftë edhe të diskutimit, mbajtjes së organizimit të një seance ku do të adresoheshin qëndrimet e ndryshme të partive politike rreth këtij procesi”, tha Krasniqi.

Sidoqoftë, sipas zyrtarëve të Qeverisë së Kosovës, ftesa e ardhshme e Brukselit për vazhdimin e dialogut me Serbinë, do të duhej të përmbante temat për ngecjet në zbatimin e të gjitha marrëveshjeve të arritura. Në të kundërtën, sipas tyre, ftesa për vazhdimin e dialogut nuk do të kishte kuptim.

Institucionet e Kosovës po këmbëngulin në zbatimin e marrëveshjeve të arritura, të cilat sipas Prishtinës janë bllokuar nga Beogradi. Para së gjithash, përmenden marrëveshjet për energjinë, ajo për hapjen e urës mbi lumin Ibër, kthimi i dokumenteve kadastrale, njohja e diplomave dhe lejimi i funksionimit të objekteve të marra me qira në veri të Kosovës. Pala serbe, në anën tjetër, insiston në formimin sa më të shpejtë të Asociacionit apo Bashkësisë së komunave me shumicë serbe. (rel)

Thran: Ne duhet të ndalojmë së bëri punën e kosovarëve

EulexMisioni për ndërtimin e shtetit ligjor në Kosovë, EULEX, vazhdon punën me një mandat të ri në rolin konsultues. Për arritjet dhe të ardhmen e këtij misioni flet për DW, zëvendësshef i EULEX-it, Bernd Thran.

Deutsche Welle: Më 15 qershor iu dha fund, respektivisht filloi misioni i ri i, si quhet ai…?

Bernd Thran: Ende quhet EULEX.

Deutsche Welle: Vazhdon të quhet ende EULEX ?

Bernd Thran: Po, emri nuk ka ndryshuar.

Deutsche Welle: Po sidiqoftë, fillon tani një epokë e re. Edhe me rastin e 10 vjetorit të EULEX-it u bënë bilance të ndryshme, që mund t‘’i quash edhe negative. Shumë media shkruajtën „Janë bërë vetëm shpenzime”. Çfarë bilanci keni bërë ju?

Bernd Thran: Unë do thoja se bilanci në fakt është pozitiv. Natyrisht që varet se si e shikon. Nëse e shikoni si kosovar, mund të qëllojë që bilanci të jetë negativ. Nga ana tjetër bilanci është pozitiv nëse mendon se shteti i Kosovës ka 10 vjet që ka filluar të ekzistojë dhe filloi pothuajse nga zeroja. Nga zeroja filloi edhe Misioni i EULEx-it. Ai ka qenë misioni më i madh, që BE ka pasur dhe për herë të parë një mission me një mandat ekzekutiv.

Deutsche Welle: Megjithatë kur bëhet bilanci thuhet pikërisht për mandatin ekzekutiv, se ai nuk është zbatuar si duhet. Se u identifikuan persona, dhe u bënë arrestime por nuk ndodhi shumë edhe në rastet kur ka pasur akuza konkrete?

Bernd Thran: Po. Ne duhet të kemi parasysh se flasim për një mision të shtetit të së drejtës. Edhe në Gjermani ka raste kur flitet shumë dhe në fund nuk jepen dënime. Si duhet matur suksesi? Kemi të bëjmë me dhënien e dënimeve kur mendohet se dikush është fajtor, apo kemi të bëjmë me ngritjen e një sistemi ku duhet ngritur shteti juridik, ku drejtësia të ketë rrugën e vet normale deri në dhënien e gjykimit, i cili mund të jetë dënim por edhe lirim? Problemi kryesor i misionit ka qenë që në fillim si ngrihet strategjia e komunikimit. Nëse për shembull shpesh u fol për peshqit e mëdhenj, EULEX-i do vijë të kapë peshqit e mëdhenj dhe do t’i dënojë. Këto thënie, që kanë ardhur nga jashtë EULEX-it, nuk janë komunikuar mirë. Sepse në një fushë të tillë nuk mund të flasësh për “Peshq të mëdhenj” që do nxirren para gjyqit dhe do të dënohen. Dënimi ka të bëjë me atë se a ka dëshmi, a ka fakte për rastet që të jenë të mjaftueshme për të dhënë dënimin. Ky ka qenë problemi më i madh i EULEX-it, që ne nuk kemi qenë komunikativ me atë ç’ka pritej prej nesh. Pasi kanë ndodhur gjërat, gjithnjë mund të thuash çfarë mund të ishte bërë më mirë. Por gjërat kështu ndodhën. Ishte hera e pare që u krijua një mission i BE-së, i cili u pajis me një mandat ekzekutiv. Gjë që me kalimin e kohës solli që të krijoheshin përvoja pjesërisht edhe negative. Dhe për t’i ndaluar ato duhej ristrukturuar misioni: Dhe tani më 15 qershor filloi një mission me një mandat të ri, gjë që nuk ishte bërë në 10 vjetët e tij.

Deutsche Welle: A nuk mund të vazhdohej mandati siç ishte për t’i mbyllur shumë çështje dhe për t’u marrë edhe me peshqit e mëdhenj? Ose nga ana tjerër, a nuk mund t’i jepej fund krejt misionit?

Bernd Thran: Kjo është një pyetje e vështirë. Pyetja e pare që bëhet është çfarë ndryshimi mund të bëjmë në Kosovë, nëse vazhdojmë me të njëjtin mandat? Ose çfarë do të ndodhë nëse e ndryshojmë? Unë mendoj se ne kemi pasur 10 vjet këtë mandat ekzekutiv dhe gjykatësit tanë, prokurorët dhe policët kanë bërë punë shumë të mirë. Sidoqoftë në sektorin e drejtësisë penale janë dhënë 479 dënime për çështje korrupsioni, kriminalitet të organizuar, larje parashë, krime lufte dhe në sektorin civil ka pasur 42 mijë raste. Pra në pjesën ekzekutive të misionit është bërë diçka, dhe kjo duhet vlerësuar. Sidoqoftë ne kemi ardhur në një pikë ku duhet t’i dorëzojmë detyrat më shumë tek autoritetet lokale, që do të thotë, institucionet lokale të drejtësisë duhet t’i përpunojnë rastet dhe t’i mbyllin.

Deutsche Welle: A mendoni se institucionet lokale dhe organet ekzekutive të drejtësisë në Kosovë janë në gjendje të punojnë në mënyrë profesionale dhe të pavarur?

Bernd Thran: Ato duhet të vendosen në gjendje që të veprojnë në atë mënyrë. Në të kaluarën organet ekzekutive gjithnjë thonin për rastet e vështira që mund t’i kalojnë EULEX-it. Ky rast është kritik, i rrezikshëm ne nuk duam të merremi me këtë. Është më mirë nëse e bën EULEX-i. Kur diçka nuk shkon në rregull atëherë është EULEX-i, që është marrë me të dhe asnjëherë institucionet lokale. Përgjegjësia mund t’i lihej EULEX-it. Ne mendojmë se shtetet anëtare duan të thonë me mandatin e ri që kemi ardhur në një pikë ku duhet të mos vazhdojmë të bëjmë punën e kosovarëve. Kështu që tani puna kalon në institucionet kosovare dhe ne do të vazhdojmë me mbështetje dhe aty ku është e nevojshme me ndihmë në mënyrë që kjo gjë që është arritur të mos marrë drejtim të gabuar.

Deutsche Welle: Zoti Thran, a mund të tregoni si do të jetë misioni në të ardhmen, volumi dhe si do të pajiset ai?

Bernd Thran: Me vendimin e Këshillit Evropian, ne kemi marrë një mandat që deri nga 15 qershori i këtij viti deri më 14 qershor 2020, pra një mandat dyvjeçar. Misioni do të ristrukturohet për here të parë krejtësisht. Ne do të tërhiqemi nga pjesa ekzekutive, ne nuk do të angazhojmë më gjykatës, prokurorë dhe polici për të përpunuar rastet ekzistuese ose për të marrë raste të reja. Ne do të kemi mandat në përforcimin e punës në mbështetje të institucioneve kosovare në punën e tyre.

Deutsche Welle: Mbështetje në kuptimin e këshillimit?

Bernd Thran: Po, ashtu është. Në kuptimin e këshillimit në sektorët e drejtësisë penale dhe kryerjes së dënimit, sepse atje janë parë deficite të mëdha. Këto janë sektorët e vetëm ku ne do të ushtrojmë aktivitetin tonë. Monitoruesit tanë do të shkojnë në burgje dhe do të japin këshilla. Pastaj do të merremi me rastet që jemi duke dorëzuar tani dhe janë raste delikate për Kosovën. Kjo është një nga arsyet pse gjykatësit dhe gjykatëset e EULEX-it janë përfshirë në to. Ne do të vazhdojmë t’i shoqërojmë këto raste. Dhe me të ashtuquajturën „exchange of letters”, kemi bërë të mundur që këshilltarët tanë të mund të shkojnë edhe në zyrat e gjykatësve dhe prokurorëve, të shohin faktet për rastet dhe në rast nevoje dhe të këshillojnë gjykatësit dhe prokurorët se ku mund të bëhen përmirësime, ku ka gabime. Pra kjo bëhet me monitorim, gjë që ne e njohim dhe çfarë për shembull bën OSBE, me vëzhgim dhe përpunim të rasteve në sallat e gjyqit, që janë të hapura për publikun.

Deutsche Welle: Rastet delikate janë rastet e krimeve të luftës?

Bernd Thran: Ato janë kryesisht krime lufte, por edhe raste korrupsioni në nivel të lartë.

Deutsche Welle: Atëherë do  të kemi vazhdimin ose në fakt fillimin e punës së Gjykatës Speciale? Kjo për shembull ka qenë një nga gjërat që është zhvilluar ngadalë.

Bernd Thran: Kjo Gjykatë është ngritur sipas ligjeve kosovare. Aty punojnë gjykatës ndërkombëtarë, por ligjet janë kosovare. Në mandat bën pjesë sigurisht edhe mbështetja e Gjykatës në Hagë në detyrat e saj kryesore, që janë sigurisht në fushën e mbështetjes operacionale, që është po ashtu e lidhur me aktivitete ekzekutive. Kjo do të thotë se nëse është e nevojshme ne do të kryejmë edhe operacione në kuadër të gjykatës në Hagë të ngritur sipas ligjeve kosovare.

Deutsche Welle: Zoti Thran, cili është kontributi gjerman në misionin e ardhshëm?

Bernd Thran: Shpresoj që Gjermania ta mbështesë misionin si deri tani. Unë do të vazhdoj në këtë detyrë deri në fund të vitit. Ne jemi 18 punonjës policie dhe 12 civilë nga Gjermania. Kështu që pas Polonisë, ne jemi kontigjenti i dytë më i madh që mbështet misionin në Kosovë.

Deutsche Welle: Polonia ka kontigjentin më të madh në EULEX?

Bernd Thran: Po, Polonia ka kontigjentin më të madh. Kjo për faktin që sektori operacional, pra masat operacionale ofrohen nga Polonia. Polonia pra ka një trupë me 100 forca policore, që kryejnë rolin e „second responder”. Që do të thotë ne kemi ngritur një sistem sipas të cilit policia kosovare reagon e para kur ka shkallëzime të dhunës. Nëse ajo nuk do të ishte në gjendje të merrej me incidentin, atëherë vjen trupa nga EULEX-i. Nëse edhe ajo nuk është në gjendje atëherë ne thërrasim KFOR.

Deutsche Welle: A ka EULEX-i prezencë në kufirin e Kosovës me Serbinë në veri?

Bernd Thran: Prezenca e EULEX-it do të jetë sporadike në sektorët e mbështetjes së dialogut midis Prishtinës dhe Kosovës. Nëse nevojitet ndihma jonë, ne do të dërgojmë monitoruesit tanë në pjesën veriore në të dy pikat e kalimit. Përndryshe, deri sa zyra e BE-së në Prishtinë ka si detyrë mbështetjen e dialogut, tre monitorues do të qëndrojnë në stacionin policor në Mitrovicë, për të mbështetur krijmin e kësaj njësie.  (dw)

Hakërrim

Që nga Korça gjer te Shkodra mbretëron një errësirë,
nëpër fusha, nëpër kodra, vërshëllen një egërsirë!
Pra, o burra, hani, pini, hani, pini or’ e ças,
Për çakallin, nat’ e errët, është ras’ e deli ras’!

Hani, pini dhe rrëmbeni, mbushni xhepe, mbushni arka,
të pabrek’ ju gjeti dreka, milionier’ ju gjeti darka!
Hani, pini e rrëmbeni, mbushni arka, mbushni xhepe,
gjersa populli bujar t’ju përgjigjet: peqe, lepe!

Ai rron për zotrinë tuaj, pun’ e tija, djers’ e ballit,
ësht’ kafshit për gojën tuaj. Rroftë goja e çakallit!
Shyqyr zotit, s’ka më mirë, lumturi dhe bukuri,
dhe kur vjen e ju qan hallin, varni buz’ edhe turi!

Hani, pini dhe rrëmbeni, është koha e çakenjvet;
hani, pini e rrëmbeni, ësht’ bot e maskarenjve;
Hani, pini, vidhni, mblidhni gjith’ aksione, monopole,
ekselenca dhe shkëlqesa, tuti quanti come vuole!

Nënshkrim i zotris suaj nëpër banka vlen milion,
ju shkëlqen në kraharuar dekorata “Grand Cordon”!
Dhe kërkoni me ballhapur (!) komb i varfër t’ju thërres’
gjith me emrin tingëllonjës: Ekselenca e Shkëlqes’
dhe të quheni përhera luftëtar’ e patriot’,
në ka zot dhe do duroj’, posht ky zot, ky palo zot!

Grand Kordon i zotris’sate, që në gji të kan’ vendosur,
ësht’ pështyma e gjakosur e atdheut të veremosur;
dhe kolltuku ku ke hipur, duke hequr nderin zvarr’,
ësht’ trikëmbshi që përdita varet kombi në litar!
Dhe zotrote kullurdise, diç, u bëre e pandeh,
kundër burrit të vërtetë zë e vjell e zë e leh!

E na tunde, na lëkunde, nëpër salla shkon e shkunde,
mbasi dora e armikut ty me shok’ të heq për hunde.
Rroftë miku yt i huaj, që për dita los e qesh,
të gradoi katër shkallë, pse i the dy fjal’ në vesh!

Koha dridhet e përdridhet, do vij’ dita që do zgjidhet
dhe nga trasta pem’ e kalbur doemos jasht’ do hidhet!
Koha dridhet e përdridhet, prej gradimit katër shkallë
nuk do mbetet gjë në dorë veç se vul’ e zezë në ballë!

Mirpo ju që s’keni pasur as nevoj’ as gjë të keqe,
më përpara nga të gjithë, ju i thatë armikut: “Peqe!”
Që të zinit një kolltuk, aq u ulët u përkulët,
sa në pragun e armikut vajtët si kopil u ngulët!
As ju hahet, as ju pihet, vetëm titulli ju kihet…
Teksa fshat’ i varfër digjet… kryekurva nis e krihet!

Sidomos ju dredharakë, ju me zemra aq të nxira,
ju dinakë, ju shushunja, ju gjahtar’ në errësira!
Ç’na pa syri, ç’na pa syri!… Hunda juaj ku nuk hyri:
te i miri, te i ligu, te spiuni më i ndyri!

Dallavera nëpër zyra, dallavera në pazar,
dallavera me të huaj, dallavera me shqiptar’
Vetëm, vetëm dallavera, dhe në dëm të këtij vendi
që ju rriti, që ju ngriti, që ju ngopi, që ju dendi!

Nëse kombi vete mbarë, nesër ju veproni ndryshe,
dylli bëhet si të duash, kukuvajk’ dhe dallëndyshe…
kukuvajka gjith, me lajka, nesër silleni bujar,
nënë dorë e nënë maska, shkoni jepni një kapar!

Dhe kujtoni tash e tutje me të tilla dallavera
kukuvajka do përtypi zog e zoga si përhera…
Ja, ja grushti do të bjeri përmbi krye të zuzarve,
koha është e maskarenjve, po Atdheu i shqipëtarve!

Edhe ju të robëruar, rob në dor’ të metelikut,
fshini sofrat e kujtdoj’, puthni këmbën e armikut!
Që ta kesh armikun mik e pandehni mençuri,
mjafton bërja pasanik, pasanik dhe “bej” i ri,
dhe u bëtë pasanik, me pallate, me vetura,
kurse burrat më fisnikë, japin shpirtin në tortura!

Vendi qenka sofr’ e qorrit, vlen për goj’ e për lëfytë,
bëni sikur veni vetull’, shoku-shokut kreni sytë…
Dhe për një kërkoni pesë, po më mir’ njëzet e pesë.
Le të rrojë batakçiu dhe i miri le të vdesë!

Po një dit’ që nis e vrëret do mbaroj’ me bubullimë,
ky i sotmi zër’ i errët, bëhet vetëtimë
dhe i bije rrufeja pasuris’ dhe, kësi lloj,
nuk ju mbetet gjë në dorë, vetëm një kafshit’ për goj’!

A e dini që fitimi brenda katër vjet mizor’
nuk ësht’ yti, nuk ësht’ imi, është i kombit arbror,
ësht’ i syrit në lot mëkuar, ësht’ i vendit djegur, pjekur,
Ju do thoni si të doni… po e drejta dërmon hekur!

Ali Asllani

Pengesat e integrimit të Ballkanit Perëndimor në B.E.

analistatKorrupsioni, sundimi i ligjit dhe reformat vazhdojnë të jenë vështirësitë kryesore të Ballkanit Perëndimor në rrugën e tyre të integrimit në Bashkimin Evropian, thanë pjesëmarrësit në një diskutim për Ballkanin të mbajtur ditët e fundit në Universitetin Johns Hopkins në Uashington. Sipas tyre, ndikimi negativ rus është një sfidë tjetër për vendet e Ballkanit Perëndimor. Ekspertët gjithashtu theksuan se vendet e rajonit duhet të përqëndrohen më shumë në përmbushjen e kushteve teknike të anëtarësimit në BE, si reformimi i sistemit të drejtësisë, transparenca dhe lufta kundër korrupsionit.

Ekziston një optimizëm jo realist në mesin e miliona njerëzve në Ballkanin Perëndimor për anëtarësim të shpejtë në Bashkimin Evropian, tha Thomas Countryman, ish Zëvendës Ndihmës Sekretar i Shtetit për Evropën, gjatë një diskutimi në Universitetin Johns Hopkins. Sipas tij, vendet e Ballkanit duhet të përqëndrohen më shumë në përmbushjen e kushteve teknike të procesit të integrimit.

“Është e rëndësishme për vendet e rajonit që ta kuptojnë se nuk ekziston një rrugë e pastër politike drejt anëtarësimit në Bashkimin Evropian. Në të kaluarën disa vende kanë qenë të suksesshme në përpjekjet e anëtarësimit në Bashkimin Evropian përmes një rruge të pastër politike, pavarësisht se nuk i kishin përmbushur kushtet teknike. Krijimi i miqësive me vendet e Bashkimit Evropian, promovimi i kandidaturave për anëtarësim është gjë e mirë, por argumenti politik do të ishte njëqind herë më i fortë nëse ju i keni përmbushur kushtet teknike, përfshirë sundimin e ligjit.”

Zoti Countryman theksoi se sundim i ligjit nuk përfshin vetëm miratimin e ligjeve të mira, por zbatimin e tyre të plotë.

“Kjo nënkupton funksionimin e plotë të prokurorëve të pavarur të anti-korrupsionit, funksionimin e gjyqësorit të pavarur dhe një media e pavarur që lejohet të investigojë dhe të zbulojë se çfarë po bëjnë qeveritë, cilët politikanë po përfitojnë. Këto janë thelbësore për një vend që dëshiron ta quaj veten anëtar demokratik i Bashkimit Evropian”.

Balkani mbetet përparësi e politikës së jashtme ruse dhe Moska e sheh praninë e saj në rajon, përfshirë në Mal të Zi, si një përpjekje për të balancuar praninë e Perëndimit atje, tha ish Ndihmës Ministri malazez i Shëndetësisë Nebojsha Todoroviç. Sipas, tij synimi i Moskës është destabilizimi i rajonit për të parandaluar zgjerimin e mëtejshëm të NATO-s dhe Bashkimit Evropian.

“Strategjia e Rusisë në Ballkan është përçarja e rajonit në sfera të privilegjeve dhe interesave Perëndimore dhe Lindore, në bazë të fesë, historisë dhe faktorëve të tjerë. Për shembull, Rusia po shfrytëzon lidhjet historike dhe fetare me Serbinë dhe ndërhyrjen e NATO-s në vitin 1999 për ta përdorur atë si një platformë për shtrirjen e ndikimit të saj në rajon”.

Në lidhje me këtë çështje, ish diplomati i lartë, Thomas Countryman theksoi se Rusia dëshiron të ushtrojë ndikim dhe të nxisë vendet e Ballkanit që të imitojnë modelin e saj të një qeverie plotësisht të korruptuar, jo transparente që kontrollon median.

“Kjo nuk është një rrugë e mençur për asnjë vend në Ballkan. Putinizmi me fytyrë njerëzore nuk është formulë për anëtarësim në Bashkimin Evropian”.

Analisti Daniel Serwer nga Universiteti Johns Hopkins i tha Zërit të Amerikës se vendet e Ballkanit nuk duhet të injorojnë përpjekjet e Rusisë për të ndikuar në proceset e integrimit euroatlantik të rajonit.

“Serbia ende flirton me Rusinë, sepse Rusia ka ndikim. Rusia ushtron ndikimin e saj në mënyrë legjitime përmes diplomacisë dhe në rrugë të tjera që mund të mos jenë legjitime. Asnjë politikan në Ballkan nuk mund të injorojë faktin që Rusia bëri komplot për vrasjen e Gjukanoviçit. Kjo do marrë seriozisht në konsideratë”.

Një prani më e fortë e Shteteve të Bashkuara dhe Bashkimit Evropian është e rëndësishme për përparimin e vendeve të Ballkanit në procesin e integrimit euro-atlantik, thanë pjesëmarrësit, por sipas tyre vendet e Ballkanit duhet të intensifikojnë përpjekjet për forcimin e institucioneve të tyre demokratike. Në fund të diskutimit, Universiti Johns Hopkins nderoi ish Zëvendës Ndihmës Sekretarin e Shtetit Brian Hoyt Yee për arritjet e tij gjatë karrierës diplomatike në Departamentin e Shtetit. (voa)

Athina dhe Shkupi nënshkruajnë marrëveshjen historike për emrin e Maqedonisë

tcipas ZaevMaqedonia dhe Greqia e kanë zgjedhur më në fund – pas 27 vitesh – problemin me emrin e kësaj ish-republike të Jugosllavisë. Në Psarades u nënshkrua marrëveshja për emrin e ri.

Marrëveshja historikë është nënshkruar në fshatin Psarades, në zonën kufitare të Prespës. Emri i ri i Ish-Republikës Jugosllave të Maqedonisë është North Macedonia (Maqedonia e Veriut apo në maqedonisht “Severna Makedonija”).

Marrëveshjen e kanë nënshkruar ministrat e jashtëm të Maqedonisë së Veriut dhe Greqisë Nikolla Dimitrov dhe Nikos Kotzias, të cilët kështu i dhanë fund mosmarrëveshjeve që zgjatën më shumë se 27 vite. Të gjitha negociatat e mëparshme kanë dështuar. Ndërsa marrëveshja e tanishme i hapë

Maqedonisë së Veirut mundësinë e hapjes së negociatave për anëtarësim në Bashkimin Evropian. Marrëveshja është nënshkruar në praninë e kryeministrave Zoran Zaev dhe Alexis Tsipras, ministrave të shumtë si dhe përfaqësuesve të BE-së, OKB-së dhe Komisionit Evropian.

Vendim i guximshëm

Kryeministri grek Alexis Tsipras foli për një vendim të “guximshëm, historik dhe të domosdoshëm për popujt tanë”. “Marrëveshja i hapë rrugë paqës, vëllazërisë dhe rritjes ekonomike në vendet tona, në Ballkan dhe në Evropë”, tha ai.

Ndërsa Zoran Zaev u shpreh se vendi i tij dhe Greqia do të jenë partnerë dhe miq. “Të dy vendet do të largohen nga e kaluara dhe do t’i përkushtohen të ardhmes”, tha ai.

Vendimi i sotëm duhet të miratohet në parlamentet e këtyre vendeve dhe në referendum. Marrëveshja e sotme është kundërshtuar nga disa forca politike në Greqi dhe Maqedoni. Konflikti për emrin ka filluar në vitin 1991, pas shkatërrimit të Jugosllavisë dhe shpalljes së pavarësisë në Shkup. Athina nuk e ka pranuar k

urrë emrin e Maqedonisë, që ka qenë pengesa kryesore në rrugën e saj drejt anëtarësimit në NATO dhe BE. (dw)

Si do ta luftojë Kenia korrupsionin?

keniaPresidenti i Kenias Uhuru Kenyatta ka intensifikuar luftën kundër korrupsionit duke deklaruar se të gjithë punonjësit e sektorit shtetëror do t’i nënshtrohen një vetingu të detyrueshëm lidhur me burimin e pasurisë e zotërimeve. Njoftimi i presidentit pason një numër skandalesh të bujshme për zhdukjen e miliona dollarëve nga fondet e agjencive të ndryshme qeveritare nga afere korruptive të disa zyrtarëve qeveritarë.

Presidenti Kenyatta ofroi të bëhet udhëheqësi i parë që i nënshtrohet vetingut, me synimin për të penguar shpërdorimin e fondeve publike. Ai tha se punonjësve të sektorit shtetëror do t’u kërkohet të shpjegojnë burimet e pasurisë me qëllim që të përjashtohen ata që kanë vjedhur fonde të qeverisë.

“Duhet të na tregosh: këtë shtëpi ke, këtë rrogë merr, si arrite ta paguash shtëpinë? Makinën që ke, mos u përpiq ta regjistrosh në emër të gruas, të djalit, ne e dimë se është e jotja, si arrite ta blesh? Duhet ta shjegosh. Unë do të jem i pari që analizohem nga ky proces,” tha presidenti.

Gjatë muajve të fundit janë bërë publike një numër skandalesh me tendera dhe kompani furnizuese për nevojat qeveritare, që kanë treguar përvetësimin e miliona dollarëve nga zyrtarë në institucione qeveritare.

Deri tani më shumë se 40 zyrtarë, si dhe biznesmenë janë arrestuar lidhur me skandalet.

Këtë javë, Kenyatta nxori një urdhër ekzekutiv ku kërkon nga zyrtarët dhe institucionet qeveritare të bëjnë publike të gjitha të dhënat e tenderave dhe kontratave të dhëna që nga 1 korriku 2018.

Më 1 qershor, Presidenti Kenyatta dha urdhër për përsëritjen e vetingut për të gjithë krerët e agjencive të prokurimit dhe të auditimit. Ai tha se vetingu do të përfshijë edhe teste me poligraf për të vërtetuar nëse zyrtarët po deklarojnë të vërtetën. (voa)