All posts by V.F.

15 prokurorët e SPAK/ Pikëzimi skualifikon Prelën, Hajdarmatajn, Prençin dhe Marën

SparkAnëtarët e Këshillit të Lartë të Prokurorisë zgjodhën dhe pikëzuan 15 më të mirët e atyre që do të jenë pjesë e SPAK.

Mes tyre tre vendet e para i zunë Altin Dumani kryeprokuror i Apelit për Krimet e Rënda, zoti Anton Martini prokuror i Krimeve të Rënda dhe zonja Elisabeta Imeraj kryeprokurore e Tiranës.

Mes të pikëzuarve spikasin emra prokurorësh që kanë qenë pjesë e njësive task force në hetimin e korrupsionit në vite. Miratimi i kësaj liste tashmë do të thotë se do të pritet vettingu për shumicën prej tyre.

“Miratimin i kësaj liste nga KLP nuk e krijon automatikisht Prokurorinë e Posaçme vetëm kur kandidatët tanë shpresojnë t’i kalojnë të dyja shkallët e vettingut ne do të jemi në gjendje t’i emërojmë ata, t’i ngremë në përgjegjësi në detyrë, secilin prej tyre në Prokurorinë e Posaçme”, tha Gent Ibrahimi.

“Të kalojnë me sukses procesin e vettingut, t’i rikthejnë nderin prokurorisë shqiptare atje ku i takon, të rikthejnë besimin e shqiptarëve te drejtësia”, tha Aldred Balla, anëtar i KLP.

Prej atyre 15 kandidatëve të pikëzuar nga KLP si më të mirët e pretendentëve janë konfirmuar në detyrë shtatë prej tyre, mes të cilëve vetëm Arben Kraja ka marrë vendim të formës së prerë nga vettingu.

Ndërkohë që të tjerët që kanë kaluar me sukses procesin e rivlerësimit presin që vendimi mos të apelohet. Ndërsa për Prokurorinë e Krimëve të Rënda Besnik Muçi vendimi i konfirmimit në detyrë është apeluar në Kolegjin e Posaçëm të Apelimit. Tetë të tjerë presin që Komisioni i Pavarur i Kualifikimit t’i njoftojë për seancë dëgjimore.

” Kjo është një iniciativë shumë e guximshme e atyre që kandidojnë për këtë strukturë kaq të rëndësishme dhe për të futur shtetin shqiptar në shinat e ligjit”, tha Nurihan Seiti, anëtar i KLP.

Në listën me 22 kandidatë nuk munden të marrin pikë maksimale prokurorët Dritan Prenci dhe Vladimir Mara të cilët janë konfirmuar në detyrë, por që gjatë intervistimit pavarësisht dosjeve të forta që ata kanë, ata ishin prezantuar para KLP me çështje që nuk kishin marrë vendim të formës së prerë.

Nuk u kualifikuan edhe emra të tjerë sikurse kryeprokurorja e komanduar Donika Prela apo Besim Hajdarmataj.

Top Channel

Jehona e vizitës së presidentit francez në Beograd

Macron VucicPresidenti francez, Emmanuel Macron, përmbylli vizitën dyditëshe në Beograd, duke paralajmëruar një nismë të re për ripërtëritjen e bisedimeve për normalizimin e marrëdhënieve ndërmjet Kosovës dhe Serbisë.

Ai tha gjatë qëndrimit në Beograd se do të organizojë një takim në Paris ndërmjet palëve bashkë me kancelaren gjermane Angeka Merkle, dy javë pasi që një nismë e tillë e të dy udhëheqësve të lartë evropian, dështoi për shkak të qëndrimeve tërësisht të kundërta të palëve.

Serbia kushtëzon vazhdimin e bisedimeve të pezulluara që nga nëntori i vitit të kaluar me heqjen e tarifave ndaj mallrave serbe që i vendosi qeveria e Kosovës, në përgjigje të sic është thënë, fushatës agresive të Serbisë ndaj shtetësisë së Kosovës.

Presidenti serb, Aleksandër Vuçiç, tha të martën se pret që në muajin shtator të organizohet një takim në Paris, ngjashëm me atë që ishte planifikuar të mbahej më 1 korrik.

Kryeministri i Kosovës, Ramush Haradinaj, tha në Prishtinë se Kosova nuk do të ulet më në tryezën e bisedimeve me Serbinë pa një kornizë marrëveshje për njohje të ndërsjellë në kufijtë ekzistues dhe kritikoi Serbinë dhe një pjesë të bashkësisë ndërkombëtare, për siç tha, hezitim për ta përfshirë këtë parim në një kuadër të marrëveshjes së mundshme.

“Kjo po i bie që po na këshillojnë të blejmë ‘mistrala” (sistem raketor francez). Serbinë po e armatosin me ‘Mistral’. Për shembull, Serbia po shkon po blen armë në Rusi. Edhe Franca bëri një kontratë me Serbinë për sisteme raketore e neve po na thuhet nuk mund t’i vendosim emër marrëveshjes që është njohja reciproke në kufijtë ekzistues. Mirë çfarë të bëjmë ne pra? Ne jemi shtet i pavarur, ne nuk kërkojmë asgjë në dialog pos njohjes reciproke, nëse nuk jeni gati për këtë, është porosi për ne që të armatosemi, pra nuk ka shumë hapësirë këtu në mes, kërkesa në këtë rast e kryetarit të qeverisë ose e Kosovës është shumë bazike nuk ulemi në tavolinë më pa një kornizë marrëveshje që ka emrin njohja reciproke në kufijtë ekzistues, pra nuk kemi pse të ulemi”, tha kryeministri Haradinaj.

Ai tha se roli i Francës dhe presidentit Macron po rritet dhe një angazhim i tillë “mund ta kthej Serbinë në tavolinë edhe pa u larguar tarifa, pra mund ta kthejë dhe shpresoj që do të jetë kështu”.

Zoti Haradinaj i cilësoi si këshilla të mira thirrjet e presidentit Macron për kompromis mes palëve.

Presidenti serb, Vuçiç, tha ndërkaq në Beograd se presidenti Macron e kupton “peshën e problemit kur flitet për Kosovën dhe se gjërat nuk mund të zgjidhen asisoj që asnjëra palë të mos lëshojë pe në asgjë”.

Presidenti serb kërkon një zgjidhje kompromisi dhe ai me bashkëpunëtorët e tij thonë se nuk do ta njohin Kosovën në kufijtë aktual duke vënë theksin tek veriu i Kosovës, ndërsa presidenti i Kosovës, Hashim Thaçi, sërish ngulë këmbë në kërkesat për bashkimin me Kosovën të Luginës së Preshevës, një rajon më shumicë shqiptare në jug të Serbisë.

Idetë e tilla që në fakt u hodhën një vit më parë kanë nxitur ndarje të thella në Kosovë e në Serbi por edhe në komunitetin ndërkombëtare, ndërmjet atyre që do të pranonin çfarëdo marrëveshjeje që arrijnë të dyja palët dhe atyre që druajnë nga efektet që do të kishte një prekje e kufijve në rajonin e Ballkanit.

Normalizimi i marrëdhënieve ndërmjet Kosovës dhe Serbisë, është kusht për integrimin e të dyja vendeve në Bashkimin Evropian. Por, presidenti Macron ndonëse tha se të dyja “shtetet janë evropiane”, nuk bëri asnjë premtim për të ardhmen e tyre në bllokun, që sipas tij duhet fillimisht të reformohet para se të zgjerohet më tej.

voa

Kryeministri Zaev, një burrë shteti reformator dhe paqësor, apo vazhdimësi e politikës së vjetër!?

ZaevNjë gjë është e sigurt, kurthi i përgatitur nga dy komedianët rus Vovan dhe Leksus (nëse janë thjesht komedianë),  nuk kishte për synim thjesht humorin, vënien në lojë të kryeministrit naiv  Zaev, i cili u tregua aq mendjelehtë, sa që ra dakord të korruptojë me 100.000 Euro (dhe atë me ulje çmimi!) patriarkun ekumenik Bartolomej.  Por, dy komedianët, të informuar mire për rrethanat politike, me shumë kujdes e tërhoqën kryeministrin Zaev nga kurthi në kurth, për të nxjerrë atë në dritën e vërtetë, jo ashtu siç paraqitet, por si një politikan i korruptuar po aq sa paraardhësi i tij. Një intrigant, spekulator, manipulator dhe antishqiptar po aq sa paraardhësi i tij.  Dhe për të nxjerrë edhe “shtetin e tij”, ish IRJM, në dritën e vërtetë – po aq jo stabël dhe rrezik për regjionin sa që ishte edhe gjatë qeverisjes së mëparshme. Prononcimet e tij lidhur me shqiptarët në rajon, nuk janë aspak për të qeshur.

Pas publikimit të bisedave telefonike në mes të kryeministrit Zaev dhe dy komedianëve rus, disa shqiptarë naiv, në mes te tyre dhe ca analistë dhe politikanë, nxituan ta falënderojnë z. Zaev për, gjoja denoncimin e planeve për ndarjen e Kosovës, duke injoruar faktin që këto bisedime qenë bërë publike me kohë dhe hasën në reagimin e menjëhershëm dhe të vendosur të të gjithë shoqërisë shqiptare dhe faktorit ndërkombëtar, pa patur nevojë për ndihmën e tij.

Vërtet kryeministri Zaev, gjatë bisedës telefonike me “presidentin Petro Poroshenko”, dhe “sekretarin e përgjithshëm të NATO-s z. Jens Stoltenber” denonconte me zell të madh marrëveshjen e fshehtë për ndryshimin e kufijve, por jo se shqiptarëve u kërkohej që të japin territore të tyre për të marrë përsëri territore të tyre, por për shkak të rrezikut që kjo të bëhej “praktikë ndërkombëtare”.  Nuk e kishte as hallin që kjo “praktikë ndërkombëtare” të përdorej nga Rusia për Abkhazinë dhe Krimenë, gjë me të cilën mundohej të interesonte “presidentin Poroshenko”. Por shqetësimi i tij i vetëm ishte që kjo “praktikë ndërkombëtare”, në një të ardhme mund të rrezikojë gjysmën e shtetit të tij të banuar me shumicë shqiptare, i vetëdijshëm për faktin që, për të ndërtuar shtetin e ish IRJM nuk është respektuar kurrë vullneti i lirë politik i shqiptarëve.  E nuk u respektua as me Marrëveshjen e Prespës, e as me ndryshimet e fundit të kushtetutës, kur shqiptarët thjesht u trajtuan si pakicë e ardhur.  Ndaj dhe nga paniku, në mënyrë histerike, me dhjetëra here gjatë bisedave telefonike, përsërit rrezikun e “praktikës ndërkombëtare” .

Ndërkohë, pyetjes me kunj të “presidentit Poroshenko” se cili është qëndrimi i shqiptarëve të ish IRJM për këtë, kryeministri “i zgjuar”, e “informon” atë gjithë kënaqësi, se shqiptarët e ish IRJM janë kaq të dashuruar pas tij dhe partisë së tij, saqë në asnjë mënyrë nuk duan të ndryshojnë kufijtë absurdë që kalojnë mes përmes territoreve të banuara në të dy anët me shqiptarë, dhe të jetojnë bashkë në një shtet si të gjithë popujt tjerë të Evropës, por vdesin të jetojnë në shtetin unitar të  kryeministrit Zaev si pakicë me të drejta të kushtëzuara me përqindje.  Sipas kryeministrit Zaev, shqiptarët autokton në territoret e tyre, me “vullnetin e tyre të lirë” të përfaqësuar në parlament dhe pushtet nga shqiptarë me dosje kriminale, zgjodhën shtetin e ASNOM-it, të Goce Delçevit, me histori të përbashkët me Bullgarinë! Por jo vetëm kaq, nuk kanë nevojë më as për partitë e tyre shqiptare, ndaj dhe në të ardhmen, shqiptarët do të votojnë vetëm për partinë multietnike të kryeministrit Zaev!

Dhe për gjithë këtë parajsë që kryeministri Zaev u ofron shqiptarëve, i duhen vetëm pak kushte – sistemi qeverisës unitar, përfaqësuesit e kriminalizuar të shqiptarëve, të cilët sistemi unitar i prodhon me bollëk,  dhe një opozitë që hesht për gjithë këtë dhe pret me durim të futet në pushtet.

Kryeministrit “reformator”, i cili morri pushtetin  nga paraardhësi i tij duke e akuzuar atë për korrupsion dhe abuzim me pushtetin, pranon pa asnjë ngurrim këshillën e “presidentit Poroshenko” për falsifikim të rezultatit të referendumit  (“nuk është me rëndësi se si votojnë njerëzit, por kush numëron votat”); bie dakord të korruptojë me para në dorë patriarkun Bartolomej, për të siguruar autoqefalin e Kishës, dhe fton “investuesin Poroshenko” për “bisedë private” lidhur me ndërtimin e fabrikës së çokollatave në ish IRJM. Fakte që do të ishin të mjaftueshëm jo vetëm për dorëheqjen e menjëhershme të tij si kryeministër, por edhe për ngritjen e padisë penale për abuzim me funksione shtetërore.

Gjithë kësaj, shijen e fundit, atë te hidhur, e lë opozita aktuale, e cila gjithë zell angazhohet për të demaskuar partitë shqiptare në pushtet, por hesht me këmbëngulje për partinë sllave në pushtet dhe sistemin qeverisës unitar, që u mundëson partive sllave rolin e marionetistit që tërheq fijet ndërsa partive shqiptare rolin e marionetës!

Afrim Fanda

Ushtari fluturues mbi Paris

ushtari fluturues ParisNdërsa parada e përvitshme e Francës në Ditën e Bastijës gjithmonë shërben si një vitrinë për teknologjinë ushtarake të vendit, një shpikës dhe sipërmarrës francez u bë heroi i paradës kur u ngrit mbi Champs-Elysees me një motor me turbinë.

Ish-kampioni i sportit të jet-ski Franky Zapata u shfaq me një pushkë në dorë mbi turmën që ndiqte paradën, ku merrte pjesë edhe presidenti Emmanuel Macron dhe udhëheqës të tjerë të Bashkimit Europian.

Ministri i Forcave të Armatosura, Florence Parly, tha se fluturime të tilla mund të shërbejnë për detyra të ndryshme logjistike madje edhe për misione sulmi.

Zapata thotë se mjeti fluturues mund të arrijë shpejtësi deri në 190 kilometra në orë, me një afat kohor prej 10 minutash.

Agjensia franceze e lajmeve thotë se shpikësi, i cili e krijoi pajisjen e tij duke fluturuar fillimisht mbi ujë, tani po shikon mundësinë e një kalimi mbi La Mansh, gjë që do të kërkonte furnizim me karburant në mes të fluturimit.

Zapata synon ta bëjë kalimin e La Manshit më 25 korrik, 110 vjet nga dita kur avioni i Louis Bleriot bëri fluturimin e parë me avion mbi ngushticën që ndan Francën me Anglinë.

voa

BE sanksione Turqisё pёr shkak tё grindjes pёr gazin

gazi ne mesdheTurqia i pretendon pёr vete rezervat e gazit nё pjesёn lindore tё Mesdheut. Por BE mbёshtet qartazi vendin anёtar Qipron – qё i ka vet nё fokus kёto rezerva. Grindja territoriale pёr gazin po ashpёrsohet.

Duke reguar ndaj kёrkimeve tё diskutueshme turke pёr gazin natyror para brigjeve tё Qipros, ministrat kanё reaguar: Konkretisht do tё shkurtohen paratё e BE-sё pёr Ankaranё dhe bisedimet pёr marrёveshjen mbi hapёsirёn ajrore do tё ndёrpriten. Kjo mёsohet nga teksti i miratuar, tё cilin e citon agjencia gjermane e lajmeve DPA.

“Provokimet e Turqisё janё pёr ne tё papranueshme dhe ne tё gjithё mbёshtesim Qipron”, deklaroi ministri gjerman pёr Europёn Michael Roth gjatё takimit nё Bruksel. Nёse Turqia nuk tёrhiqet, mund tё mendohen edhe sanksione tё tjera. Kёto sanskone sipas vendimit tё ministrave mund tё kenё nё shёnjestёr firmat pjesёmarrёse nё procesin e shpimeve ose persona tё caktuar.

Vёshtrim kritik ndaj kredive 

Masat e miratuara ndёshkuese parashikojnё gjithashtu, qё deri nё njё afat tё pacaktuar tё mos zhvillohen mё bisedime nё nivel tё lartё pёr tema si ekonomia dhe tregtia. Bankёs Europiane tё Investimeve do t’i kёrkohet qё tё verifikojё mundёsitё e kufizimit tё kredive.

BE do ta verё nё lёvizje qeverinё nё Ankara, qё tё ndёrpresё kёrkimet pёr gaz natyror para brigjeve tё vendit anёtar, Qipros. Turqia ndёrkohё i hedh poshtё akuzat pёr shpime ilegale. Ajo mbron pozicionin, se ujёrat ku ajo ёshtё aktive janё brenda territorit tё saj. Ankaraja e konsideron Veriun e Qipros si territorin e Turqisё, pasi e mban atё tё pushtuar qё nga viti 1974. Me shpimet aktualisht synohet qё tё sigurohen edhe pjesё nga biznesi i gazit pёr turqit e Qipros. Por Veriu i Qipros nuk ёshtё njohur ndёrkombёtarisht.

jj/HF (dpa)

Përhapja e mesazhit kundër vaksinimit

VakcinaAutoritetet e shëndetit publik përballen me përhapjen e fruthit në komunitetet me norma të ulëta vaksinimi. Korrespondenti i Zërit të Amerikës Mike O’Sullivan njofton nga qyteti Los Angeles në Kaliforni se menjanimi i vaksinimit në Shtetet e Bashkuara është nxitur kryesisht nga një lëvizje në rritje e njerëzve që i shohin vaksinat si të rrezikshme. Siç na njeh materiali në vazhdim, kjo betejë po zhvillohet si në internet ashtu edhe në legjislaturat e shteteve amerikane.

Ndërsa fruthi ekziston në pjesë të tjera të botës, kryesisht për shkak të varfërisë, në Shtetet e Bashkuara është e kundërta, shumë njerëz hezitojnë të vaksinojnë fëmijët sepse druhen se vaksinat janë të rrëzikshme. Dr. Arthur Reingold është ekspert në Universitetin e Kalifornisë në Berkley.

“Kemi të bëjmë me shtim të zonave ku ka dyshime për vaksinat, që nuk vaksionohen. Pra kur dikush udhëton nga një vend në tjetrin, kemi të bëjmë me rrezikun e një përhapjeje më të madhe të fruthit.”

Aktualisht fruthi është përhapur në 15 shtete amerikane, përfshi Nju Jorkun dhe Uashingtonin. Kalifornia, Misisipi dhe Virxhinia Perëndimore nuk lejojnë mosvaksinimin, përveçse kur ka aryse mjekësore. 47 shtete lejojnë përjashtime. Dr. Peter Hotez punon në Kolegjin Mekësor Baylor.

“Prej 47 shteteve, 18 lejojnë përjashtime jo-mjekësore për arsye personale ose besime filozofike, dhe këtu është edhe fushëbeteja.”

Shumica e njerëzve shërohen nga fruthi, por në Shtetet e Bashkuara 1 në 1 mijë të prekur humbet jetën. Një lëvizje kundër vaksinimit mori vrull pas një studimi të vitit 1998, të tërhequr më pas, që e lidhte autizmin me vaksinën MMR kundër fruthit, shytave dhe rubeolës duke armatosur kështu kritikët e vaksinave. Ja ç’thotë Robert F. Kennedy Jr. i grupit kundër vaksinimit Mbrojtja e Shëndetit të Fëmijëve.

“Askush nuk mund të thotë shkencërisht nëse është vaksina MMR apo fruthi, shytat ose rubeola që shkakton më shumë dëm.”

Por agjencitë publike të shëndetit dhe organizatat kryesore mjekësore thonë se pas disa dekadash përdorimi, vaksina MMR është provuar të jetë e sigurtë dhe shumë efektive.

Lidhja me autizmin vazhdimisht është hedhur poshtë, thotë studiuesi i vaksinë Dr. Peter Hotez, vajza e të cilit ka autizëm. Ai thotë se keqinformimi është përhapur në median sociale me mesazhe të shënjestërura në bazë të rajonit.

“Në Teksas, keqinformuesit shfrytëzojnë mbështetjen që ka ai vend për djathtën, ‘Tea Party’ dhe përdorin gjuhën e tyre. Ndërsa në Paqësor, në shtetin Uashington, apo Oregon, ata përdorin gjuhën e së majtës radikale.”

Beteja vazhdon nga një shtet në tjetrin.

“Prindërit e dinë më mirë se çfarë është e mirë për fëmijët e tyre se sa agjencitë e korruptuara rregullatore dhe kompanitë e mëdha farmaceutike”, thotë kritiku i vaksinimit Robert F. Kennedy Jr.

Ekspertët thonë se vaksina është me rëndësi thelbësore për shëndetin publik sepse fruthi është sëmundje që përhapet shumë.

“Edhe nëse nuk je në të njëjtën kohë në një dhomë me individin e infektuar, virusi mbijeton në ajër për disa orë”, thotë Dr. Arthur Reingold.

Në këtë mënyrë përhapet fruthi dhe në disa raste shkaktohen shpërthime vdekjeprurëse, sikurse shumë sëmundje të tjera në botë.

Zaevi kërkon që SHBA ta arrestojnë El Chekën, ja çfarë theksoi në Klan Maqedoni

zaevKryeministri Zoran Zaev mbrëmë në Klan Maqedoni ka folur edhe për përgjimet që po publikohen nga Sheqerim Ahmeti – El Cheka nga SHBA-të, që sipas tij nuk janë sikur ato “bomba” përgjimesh që kishte publikuar ai para ardhjes në pushtet.
“Ajo që tani po pulbikohet, ato që një person po i publikon nga Amerika, është dëshmi se nuk janë tërë materialet e përgjuara, që janë përgjuar gjatë asaj kohe. Kjo do të thotë se ka pasur edhe më tepër përgjime nga porositësit. Andaj ne do të kërkojmë nga Amerika arrestimin e tij, për shkak se atë që ai po e bën janë biseda private, ato nuk janë ligjore”, ka thënë Zaev për Klan Maqedoni.

 

Roli i të ushqyerit në rimëkëmbjen nga sëmundja

pacientiKur njerëzit janë duke marrë veten nga një sëmundje apo lëndim, atyre nuk u shkon mendja shpesh tek mënyra e të ushqyerit. Por siç njofton korrespondentja e Zërit të Amerikës, Carol Pearson, çelësi i rimëkëmbjes mund të jetë pikërisht ky aspekt.

Kur Monika McComb u kthye në shtëpi nga spitali, asaj nuk i shkoi mendja tek ushqyerja si diçka thelbësore për shërimin e saj të plotë.

“Isha jashtëzakonisht e dobët. Mezi ecja edhe me bastun”, thotë ajo.

Zonja McComb nuk e lidhi dobësinë e saj me mungesën e ushqyerjes derisa bëri një vlerësim mjekësor.

“Kequshqyerja është e pakapshme me sy dhe prandaj mbetet e padiskutuar dhe e patrajtuar”, thotë Dr. Suela Sulo, studiuese në kompaninë Abbott.

Zonja McComb u regjistrua në një program për kujdes shëndetësor në shtëpi dhe iu dha një plan i detajuar ushqimi.

Shumë amerikanë kanë qasje tek ushqimi, por një ndër tre pacientë që marrin kujdes shëndetësor në shtëpi, janë të kequshqyer ose kanë mungesa ushqimore që vë në rrezik shëndetin dhe rimëkëmbjen e tyre.

“Ushqyerja nuk është arsyeja kryesore se pse pacientët përdorin shërbimet shëndetësore në shtëpi. Por, është e rëndësishme që t’i kushtojmë rëndësi në mënyrë që të rimëkëmben më shpejt”, thotë Katie Riley, e kompanisë “Aurora Health”.

Studiues të kompanive “Abbott” dhe “Advocate Health Care” donin të gjenin një mënyrë për të reduktuar shtrimet në spital dhe për të nxitur shëndetin e pacientëve.

Në një studim të financiar nga “Abbott”, studiuesit arritën në përfundimin se kur pacientët informohen për ushqyerjen, ata kanë 20 për qind më pak gjasa të shtrohen apo të kthehen në spital, në 90 ditët pas një lëndimi ose sëmundjeje.

“Duke identifikuar pacientët që rrezikojnë kequshqyerjen, duke u dhënë atyre pijet e duhura me elementë ushqyes, rriten shanset që ata të shërohen më shpejt, madje as të mos shtrohen në spital”, thotë dr. Sulo.

Një nga synimet e studimit, ishte që të krijohej një program që pacientët ta ndiqnin vetë, një nga arsyet që pacientët u edukuan lidhur me ushqyerjen.

“Shëndeti i tyre përmirësohet, kanë më shumë fuqi, shërohen më shpejt, rrëzohen më rrallë, dhe kthehen më pak në spital”, thotë specialistja e dietave, Gretchen VanDerBosch.

Studiuesit shpresojnë se programe të tjera të kujdesit shëndetësor dhe spitalet mund ta përdorin studimin për të ndihmuar pacientë të tjerë.

Zonja McComb thotë se ndjehet më e fortë dhe ka më shumë energji sesa në fillim të programit. Ajo ia atribuon përmirësimin e shëndetit mbështetjes nga infermierja që kujdeset për të në shtëpi dhe kujdesit në ushqyerje.

voa

DASH: Shqipëria, vend i vështirë për të bërë biznes

Departament of StateDepartamenti amerikan i Shtetit publikoi të enjten raportin mbi klimën e biznesit në botë për vitin 2019.

Në pjesën për Shqipërinë, thuhet se investitorët e huaj përmendin korrupsionin, veçanërisht në gjyqësor, mungesën e transparencës në prokurimin publik dhe zbatimin e dobët të kontratave si probleme që vazhdojnë në Shqipëri.

Në vitin 2016, qeveria shqiptare miratoi ndryshime gjithëpërfshirëse kushtetuese për të reformuar sistemin gjyqësor të vendit dhe për të përmirësuar sundimin e ligjit. Zbatimi i reformës së gjyqësorit është në vazhdim e sipër, duke përfshirë edhe verifikimin e gjyqtarëve dhe prokurorëve për pasuri të pashpjeguara.

Ndërsa gjyqtarë dhe prokurorë të shumtë janë shkarkuar nga një komision verifikimi për pasuri të pashpjeguara ose për lidhje me krimin e organizuar, investitorët e huaj e perceptojnë si problem klimën e investimeve dhe thonë se Shqipëria mbetet një vend i vështirë për të bërë biznes.

Investitorët raportojnë shqetësime të vazhdueshme për faktin që rregullatorët përdorin legje dhe rregullore që janë të vështira për t’u interpretuar ose jo konsistente si mjete për të larguar investitorët e huaj dhe për të favorizuar kompanitë e lidhura me politikën, thuhet në raport.

Rregulloret dhe ligjet që rregullojnë veprimtarinë e biznesit, vijon raporti, ndryshojnë shpesh dhe pa konsultime me komunitetin e biznesit; pronarët e bizneseve dhe shoqatat e biznesit shpesh theksojnë se nuk kanë marrë njoftim, kohë ose mundësi të mjaftueshme për angazhim në ndryshimet e rregulloreve dhe ligjeve. Investitorët e mëdhenj të huaj njoftojnë për presione për të punësuar nënkontraktorë të lidhur me politika specifike dhe shprehin shqetësimin rreth përputhshmërisë me Aktin e Praktikave të Korruptimeve të Huaja gjatë operimit në Shqipëri.

Raportet për korrupsion në prokurimet e qeverisë janë të zakonshme, thuhet në raportin e DASH. Përdorimi në rritje i kontratave të partneritetit publik privat (3P) ka ngushtuar mundësitë për konkurrencë, duke përfshirë edhe investitorët e huaj, në infrastrukturë dhe sektorë të tjerë. Analizat e dobëta kosto-përfitim dhe mungesa e ekspertizës teknike në hartimin dhe monitorimin e kontratave 3P janë shqetësime të vazhdueshme. Deri në fund të vitit 2018, qeveria kishte nënshkruar më shumë se 200 kontrata 3P.

Të drejtat e pronës, vijon raporti i DASH, mbeten një sfidë tjetër në Shqipëri, pasi është vështirë marrja e titullit të qartë të pronësisë. Ka pasur raste të individëve që manipulojnë sistemin gjyqësor për të marrë tituj të paligjshëm të tokës. Kompensimi për tokën e konfiskuar nga regjimi i mëparshëm komunist është i vështirë për t’u arritur dhe jo i mjaftueshëm. Agjencia e ngarkuar me prishjen e ndërtesave të ndërtuara në mënyrë të paligjshme shpesh vepron pa konsultime të plota dhe nuk ndjek procedurat.

Për të tërhequr investimet e huaja direkte dhe për të nxitur investimet vendase, qeveria pritëse miratoi një ligj mbi investimet strategjike në vitin 2015. Ligji përcakton stimujt e investimeve dhe ofron procedura administrative të shpejta për investitorët strategjikë vendas dhe të huaj, varësisht nga madhësia e investimeve dhe numri i vendeve të punës krijuar. Qeveria gjithashtu miratoi legjislacionin që krijon fusha të zhvillimit ekonomik teknik (TEDA), si zona të tregtisë së lirë. Zhvillimi i TEDA-s së parë, në Spitallë të Durrësit, iu dha një konsorciumi të kompanive lokale në gusht 2017, por vetëm pasi tenderi dështoi tre herë. Zhvillimi i TEDA-s ende nuk ka filluar, pasi një nga ofertuesit e ka kundërshtuar vendimin në gjykatë.

Treguesi i Transparency International për Perceptimin e Korrupsionit në 2018 e renditi Shqipërinë në vendin e 99 mes 180 vendeve, një rënie prej tetë pikë nga viti 2017. Rrjedhimisht, Shqipëria tani perceptohet si vendi më i korruptuar në Ballkanin Perëndimor. Ndërkohë që Shqipëria është përmirësuar me dy vende, duke e çuar në 63, në sondazhin e Bankës Botërore “Doing Business” për vitin 2019, ajo vazhdoi të jetë dobët në fushat e zbatimit të kontratave, regjistrimit të pronës, dhënies së lejeve të ndërtimit dhe sigurimit të energjisë elektrike.

Sistemi ligjor shqiptar nuk duket se bën diskriminim ndaj investitorëve të huaj, thuhet në raport. Traktati i Investimeve Dypalëshe SHBA-Shqipëri, i cili hyri në fuqi më 1998, siguron që investitorët e SHBA të trajtohen sipas klauzëlës së kombit më të favorizuar. Ligji për Investimet e Huaja përshkruan mbrojtje specifike për investitorët e huaj dhe lejon 100 përqind pronësi të huaj në të gjithë sektorët, përveç disave sektorëve.

Në bazë të vlerësimeve të FMN-së, thuhet në raportin e DASH, Prodhimi i Brendshëm Bruto në shifra reale u rrit me 4.2 për qind në vitin 2018 dhe rritja pritet të bjerë gjatë vitit 2019 por mbetet në rreth 4 për qind për periudhën afatmesme.

Në raport thuhet se vendi mori statusin e kandidatit të Bashkimit Evropian (BE) në qershor 2014 dhe që atëherë ka kërkuar të hapë negociatat e pranimit. BE-ja e ka inkurajuar Shqipërinë që të vazhdojë përparimin në reformat lidhur me pesë përparësitë kryesore: reformën e administratës publike, reformën e drejtësisë, luftën kundër korrupsionit, luftën kundër krimit të organizuar dhe mbrojtjen e të drejtave të njeriut, duke përfshirë të drejtat e personave që i përkasin pakicave si dhe të drejtat e pronës.

voa

Ballkani Thaçi: Zaev shfajësohet për deklaratat për ndryshim kufijsh

ThaciPresidenti i Kosovës, Hashim Thaçi tha, se kryeministri i Maqedonisë së Veriut, Zoran Zaev, i ka telefonuar për t’i kërkuar falje lidhur me deklaratat, ku ai e përmend presidentin Thaçi në një plan për ndryshim kufijsh.

Presidenti i Kosovës, Hashim Thaçi, tha se kryeministri i Maqedonisë së Veriut, Zoran Zaev, i ka kërkuar falje për disa deklarata që u bënë publike nga dy komedianë të njohur rus Vovan dhe Leksus, ku Zaev kishte rënë pre në një telefonatë të rreme. Zaev në këtë telefonate e kishte përmendur emrin e Presidentit të Kosovës, si i përfshirë në bisedime me Presidentin e Serbisë Aleksandër Vuçiq për ndarje të Kosovës. Kryeministri i Maqedonisë së Veriut e kuptoi se ishte pre e një mashtrimi, kur dy komedianët rus e publikuan inçizimin e telefonatës në kanalin e tyre në youtube. Zoran Zaev kishte rënë pre e komedianëve rus, të cilët përmes telefonit i janë prezantuar si ish-presidenti ukrainas Petro Poroshenko dhe Sekretari i Përgjithshëm i NATO-s, Jens Stoltenberg.

Në këtë bisedë telefonike është folur edhe për bisedimet Kosovë-Serbi dhe kryeministri Zaev kishte shprehur shqetësimin që “Presidenti i Kosovës Hashim Thaçi dhe ai serb Aleksandër Vuçiq, po përpiqen të shkëmbejnë territore”, duke theksuar se këtu mund të ketë ndikim edhe Rusia, plan ky që mund të ketë pasoja negative në Ballkan.

Presidenti i Kosovës, Hashim Thaçi, pas publikimit të këtij incizimi tha se ai është telefonuar nga kryeministri i Maqedonisë së Veriut Zoran Zaev për të sqaruar deklaratat e tij. “Kam biseduar në telefon me kryeministrin Zaev. Ai më ka thirrur mua që të sqarohet për deklaratat e tij dhe çfarë ka biseduar me dy komedianët rus duke menduar që po flet me ish-presidentin Poroshenko. Me ka thënë shumë qartë që ka qenë një rrethanë, në të cilën ka rënë pre e mashtrimit dhe gjithçka që ka folur për komunat e Kosovës që do t’i jepen Serbisë ka folur duke u bazuar në thashetheme në dezinformata dhe të dhënat dhe lansimet e gazetës ruse Sputnik dhe thashethemeve ruse. Më ka kërkuar falje mua dhe Kosovës. Në të njejtën kohë ka theksuar se gjërat për të cilat ai ka folur me mashtruesit janë gjëra që nuk qendrojnë në raport me Kosovën”, tha në një deklaratë për medie Presidenti Thaçi.

Edhe presidenti Thaçi dhe kryeministri Haradinaj në shënjestër të telefonatave

Ai tha se disa muaj më parë ka pasur përpjekje që edhe ai vetë të bëhet pre e mashtrimit të komedianëve rusë, por që kabineti i tij e ka kuptuar rrengun dhe e kanë shmangur telefonatën. Publikimi i deklaratave të kryeministrit maqedonas Zoran Zaev, që “Thaçi e Vuçiq kanë plane për shkëmbim territori”, nxitën reagime në Kosovë. Kryeministri Ramush Haradinaj, në një postim në facebook, pa e përmendur emrin e Presidentit Thaçi, shkroi se “askush nuk do të na ndajë. Sovranitetin, integritetin dhe paprekshmërinë e Kosovës, do ta mbrojmë me çdo çmim”. Këtë reagim, Haradinaj e bëri pas publikimit të telefonatës së Zoran Zaev, ndërsa, sot në një konferencë për medie edhe kryeministri kosovar e pranoi që edhe ai vetë ka qenë pre e një telefonate nga komedianët rus, pas një telefonate të vërtetë që ka zhvilluar me ish-presidentin ukrainas Petro Poroshenko.

“Me presidentin Petro Poroshenko kam folur, por edhe me komikët pastaj. Një ose dy biseda kam pas me të nga një linjë e sigurt. Ndërsa, ka ndodhur një bisedë nga një linjë e hakeruar, që kanë thirrur prej tij. Për fat të mirë biseda ime nuk ka dalë nga shablloni dhe nuk e kanë publikuar”, tha Ramush Haradinaj.

Reagimet e opozitës
Ndërkohë, partia opozitare Lëvizja Vetëvndosja, vazhdon të besojë që Presidenti i Kosovës Hashim Thaçi dhe ai i Serbisë Alaksandër Vuçiq kanë plane të fshehta për ndarje të Kosovës. Argument sipas tyre është edhe publikimi i telefonatës së Zoran Zaev, prandaj, ky subjekt politik kërkon zgjedhje të jashtëzakonshme, për siç thonë, “ta larguar Thaçin nga pozita e Presidentit”. “Ky njeri i shantazhuar me dosje të reja e të vjetra nuk mund ta përfaqësojë Kosovën në bisedime me Serbinë. Si i shantazhuar nga Serbia, ai po vepron në interes të Serbisë edhe nëse eventualisht  nuk e dëshiron një gjë të tillë. Ju bëjmë thirrje forcave politike që të shkojmë sa më parë në zgjedhje të jashtëzakonshme dhe ta largojmë këtë person nga kjo pozitë. E gjithë kjo vjen kur në vend kemi një qeveri të korruptuar. Ne e dimë që Thaçi nuk jep dorëheqje as kur kapet nga skandalet e as kur kapet si shkelës i kushtetutës”, tha në një konferencë për medie deputeti i Vetëvendosjes Rexhep Selimi.
Sidoqoftë, dialogu Prishtinë-Beograd tash e një vit po mbahet i bllokuar për shkak që Prishtina dhe Beogradi ia hedhin fajin njëra-tjetrës. Aktiviteti diplomatik i Serbisë kundër Kosovës dhe si kundërpërgjigje e kësaj, vendosja e taksës nga qeveria e Kosovës ndaj produkteve të Serbisë, janë dy faktorët që po mbajnë të bllokuar dialogun. Për shkak të këtyre zhvillimeve u anulua edhe takimi i Parisit (vazhdimësi e Samitit të Berlinit), që planifikohej të mbahej me një korrik në Paris dhe ku do të flitej vetëm për mundësinë e arritjes së një marrrëveshjeje Kosovë-Serbi, që do të përmirësonte raportet ndërmjet dy vendeve.

dw