All posts by V.F.

‘Bomba IX’, dëshmitë për falsifikimin e zgjedhjeve në qendër

Kryetari i Komunës Qendër Andrej Zhernovski publikoi dëshmi të reja për falsifikimin dhe manipulimin e procesit zgjedhor në Komunën Qendër dhe përsëritjen e zgjedhjeve në 3 raunde. Në disa nga bisedat e publikuara, sipas Zhernovskit dëshmohen presionet ndaj administratorëve, sjelljen e votuesve të Pustecit, shpalljen e një numri të madh fletëvotimesh të pavlefshme dhe parregullsi të tjera në procesin zgjedhor. Megjithatë, sipas Zhernovskit, me përfundimin e zgjedhjeve nuk kanë përfunduar punët e paligjshme të partisë në pushtet. Ai publikoi një bisedë telefonike mes Drejtorit për Siguri dhe Kundërzbulim Sasho Mijallkov me ministrin Mile Janakievski, duke planifikuar ofrimin e ryshfetit prej 200 mijë eurove për njërin nga këshilltarët e opozitës në Komunën Qendër, nëse ai pajtohet që të kalojë në radhët e VMRO DPMNE-së.

Në një bisedë tjetër telefonike të Mijallkovit me kryeredaktorin e televizionit Sitell Dragan Pavlloviq Llatas, shefi i DSK-së thotë se ka 3-4 këshilltarë opozitarë në Komunën Qendër, për të cilët shpreson se mund ti bind t’ia kthejnë shpinën Zhernovskit dhe ti bashkëngjiten VMRO DPMNE-së.

Në një nga bisedat e publikuara, kryeministri Gruevski kërkon nga Janakievski të dorëzojnë sa më shumë ankesa në Komisionin Shtetëror të Zgjedhjeve, me qëllim që të fitojnë kohë për të pastruar gjurmët në Komunën Qendër. Edhe një nga njerëzit e VMRO DPMNE-së, gjatë bisedës me ministren e brendshme Jankullovska, e thotë qartë se të punësuarit në Komunën Qendër kanë pastruar materialet nga kompjuterët e Komunës.

Zhernovski nuk u përgjigj nëse opozita posedon telefonata edhe për rastin Mirosllav Shipoviq. Përkujtojmë se Shipoviq u arrestua për aferën “Mashinopromet” derisa ishte kryesues i këshillit të Komunës Qendër, ndërsa pas lirimit lejoi që VMRO DPMNE-ja të miratojë disa projekte në Këshillin komunal, për ndërtime të reja në malin Vodno. Benjamin Arifi

Edhe Branko Cërvenkovski ka bërë pazare me Mijallkovin, kundër kandidatëve të tij!

Edhe Branko Cërvenkovski ka bërë pazare parazgjedhore me Sasho Mijallkovin në zgjedhjet e fundit lokale! Një pjesë e bisedës mes Mijallkovit dhe Llatasit që nuk u publikua në konferencën e sotme të Zhernovskit, por që gazetarët e morën në CD, dëshmon se Branko Cërvenkovski i ka ofruar Mijallkovit të votojë kundër Andrej Zhernovskit në Qendër, në këmbim të votave të VMRO-së për Andrej Petrovin në Karposh.Sipas Mijallkovit, me këtë marrëveshje Cërvenkovski ka dashur të vret dy miza me një goditje, ta eliminojë Stevço Jakimovskin i cili e tradhtoi në prag të zgjedhjeve lokale, dhe të pengojë faktorizimin e Zhernovskit.
Mijallkov: Unë mendoj se ata mund të grinden mes vete. A e di çfarë? Branko më ofroi që ta tradhtojmë! Branko thoshte të votoni ju kundër Stevços, ndërsa ne të votojmë kundër Zhernovskit. Ai dëshironte ta lëshonte në ujë, e di këtë?
Llatas: Po është logjike që ai ta merr Karposhin. Për atë është më i interesuar.
Mijallkov: Dhe me një shuplakë të vrasë dy miza, ta vrasë Stevçon dhe Andrejin. Sepse Andreji e di tani, vetëm Andreji fitoi, ky asgjë nuk fitoi.
Kjo bisedë nuk është komentuar deri tani as nga LSDM-ja, as nga aktorët e përfshirë. Cërvenkovski nuk ka bërë asnjë koment publik që nga fillimi i publikimit të bombave, por njerëz të afërt me të, përfshi edhe ish kandidatin opozitar për kryetar të Komunës së Karposhit Andrej Petrov, në paraqitjet e tyre publike tentonin ti relativizojnë bombat e Zaevit. Për këtë shkak, shpërndarja e kësaj bisede në rrethet politike, interpretohet si porosi e qartë e Zaevit ndaj Cërvenkovskit që të mos mundohet të pengojë projektin e opozitës për zbardhjen e së vërtetës. Benjamin Arifi

Skenarë për shlyerjen e adresave të mërgimtarëve në Maqedoni

Qeveria e Maqedonisë përmes dy propozim ligjeve, njëri për ndryshimin dhe plotësimin e Ligjit për letërnjoftim dhe tjetri për ndryshimin dhe plotësimin e Ligjit për paraqitje të vendbanimit dhe vendqëndrimit synohet të fshihen mërgimtarët si banorë rezident të Maqedonisë.Me ndryshimet e propozuara në Ligjin për paraqitje të vendbanimit dhe vendqëndrimit, shtetasi i cili do të qëndron jashtë vendit për periudhë më gjatë se 3 muaj, me automatizëm MPB-ja do t’ia fshijë vendbanimin e përhershëm në Maqedoni, shkruan sot gazeta e përditshme Koha.

Sipas ndryshimeve ligjore, qytetari i cili ka ndërmend të qëndrojë jashtë shtetit më shumë se tre muaj obligohet që qëndrimin ta paraqesë në Ministrinë e Punëve të Brendshme, në vendkalimin kufitar nga i cili e ka lëshuar vendin ose në përfaqësinë diplomatike në vendin ku shkon, edhe atë në afat prej 30 ditëve. “Nëse pas kontrollin në teren nga e pjesëtari i MBP-së konstatohet se shtetasi nuk banon në vendbanim me shumë se tre muaj, atëherë me automatizëm fshihet vendbanimi i tij”, tha Anastasia Ilievska, sekretare shtetërore në MPB gjatë arsyetimit të propozimeve në Komisoni për sistem politik dhe marrëdhënie midis bashkësive.

Të dy ligjet janë kundërshtuar në lexim të parë në komision nga deputetët e Bashkimit Demokratik për Integrim, ndërkaq për miratimin e këtyre dy ligjeve në lexim të parë në seancë plenare nevojiten votat e dy të tretave të deputetëve respektivisht parimi i Badenterit. (INA)

Gruevski: Nuk e jap dorëheqjen

Kryeministri i Maqedonisë, Nikolla Gruevski, ka refuzuar dy kërkesat e liderit të opozitës Zoran Zaev, i cili kërkoi dorëheqjen e tij dhe formimin e qeverisë së re kalimtare për të zgjidhur krizën e thellë politike në të cilën u përfshi Maqedonia pas publikimit të aferës së përgjimeve. “Lidhur me atë se kush do të jetë apo nuk do të jetë në qeveri, vendosin qytetarët përmes zgjedhjeve. Qytetarët japin vlerësimin, besimin dhe votën për partinë që duan t’i përfaqësojë në qeveri dhe vendosin kush duhet të jetë kryeministër, jo Zaevi”, tha Gruevski.

Nga ana tjetër, opozita ka vazhduar të nxjerrë dëshmi të reja për parregullsi të shumta në zgjedhjet lokale të vitit 2013 në komunën Qendër të Shkupit, ku fitoi kandidati i opozitës. Kryetari aktual i kësaj komune, Andrej Zhernovski, publikoi disa biseda të përgjuara, ku sipas tij dëgjohen kryeministri Gruevski dhe ministrat e tij duke dhënë urdhëra për anulimin e qendrave të votimit dhe për fikjen e ashensorëve nëpër ndërtesat e larta për të bllokuar njerëzit e moshuar të votojnë për kandidatin e opozitës.

Andrej Zhernovski tha: “Komuna Qendër për Gruevskin dhe bashkëpunëtorët e tij ka qenë betejë që me çdo kusht janë përpjekur ta fitojnë, sidomos për shkak të projektit “Shkupi 2014” që kushtoi rreth gjysmë miliardë euro dhe për të fshehur krimin që është bërë që ne e konstatuam në fillim të mandatit.”

Sipas opozitës, këto biseda të përgjuara mes Gruevskit dhe ministrave të tij, zbulojnë edhe përfshirjen joligjore të banorëve nga Pusteci i Shqipërisë në zgjedhjet lokale të vitit 2013, që ishin pajisur me dokumenta personale të Maqedonisë për të votuar për kandidatin e partisë maqedonase në pushtet VMRO-DPMNE në komunën Qendër.

/ Top Channel

Raketa e Nasa-s

Motori më i madh në botë për raketa është vënë në provë sot për dy minuta gjatë një testimi në shtetin Utah, duke shënuar kështu një tjetër arritje në sistemin e ri të NASA-s për lëshimin e raketave në hapësirë.Raketa e re do të përdoret për të lëshuar në hapësirë mjete të reja të teknologjisë së ardhëshme për eksplorime, si përshembull fluturimet drejt planetit Mars.

Inxhinierët nga kompania kontraktuese e NASA-s Orbital ATK, që ndërtuar dhe testuan motorin, thanë se ishin të kënaqur me rezultatet. Fuqia e përftuar nga ky motor është e barabartë me 14 avionë Boeing të tipit 747 gjatë ngjitjes së avionit në ajër.

Fluturimi i parë me këtë motor është parashikuar në vitin 2018 ndërkohë që udhëtimet e para me ekuipazh drejt hapësirës pritet të fillojnë në vitin 2021. (voa)

Koment: Vonesë simbolike

Kancelarja e ka vendosur: Angela Merkel nuk do të marrë pjesë më 9 Maj në Moskë në paradën me rastin e fundit të Luftës së Dytë Botërore. Një vendim i vështirë, por i domosdoshëm, mendon Christian F. Trippe.Në fund ishte befasues vetëm çasti kur u mor vendimi: madje edhe bashkëpunëtorët e ngushtë të kancelares prisnin, që Angela Merkel do t’i linte vetes kohë për këtë vendim. Që ajo së pari do të priste të shihte se si do të zhvillohen ngjarjet më tej në Lindje të Ukrainës. Që ajo këtë kartë të bisedimeve me një vlerë jashtëzakonisht të lartë simbolike do ta ruante sa më gjatë të ishte e mundur. Dhe që ajo do t’i peshonte në qetësi të plotë argumentat pro dhe kundër.
“Dita e fitores” ka për Rusinë një rëndësi të jashtëzakonshme. Nuk ka asnjë ditë tjetër feste në Rusi, furia emocionale e së cilës t’i afrohet sado pak asaj që shkakton 9 Maji. Dita e kapitullimit gjerman është një ditë, që për rusët ka domethënie konstitutive – më shumë se dita e Kushtetutës, më serioze se 1 Maji, e pa asnjë mënydshje edhe se të gjitha festat fetare.
Lufta e Dytë Botërore ishte për Rusinë një luftë për ekzistencë
Bashkimi Sovjetik ka luftuar në Luftën e Dytë Botërore për më shumë se sa për fitore a humbje. Rusët kanë luftuar për mbijetesën e tyre si popull, Rusia për mbijetesën si hapësirë kulturore. Edhe sot 70 vjet më pas shoqëria ruse kudo mban gjurmët e kësaj lufte me Gjermaninë naziste, e cila u kushtoi jetën mbi 20 milionë qytetarëve sovjetikë.

Të gjitha këto i di Angela Merkel, të gjitha këto ajo i ka përjetuar vet gjatë udhëtimeve si studente përmes Rusisë. E megjithatë ajo tani e refuzon ftesën, për të shkuar më 9 Maj në festën zyrtare në Moskë. Nuk mund të përjashtohet, që në Sheshin e Kuq të kalojnë në paradë edhe njësi, për të cilat mund të konstatohet, se këto trupa kanë marrë pjesë në luftën e pashpallur të Rusisë në Lindje të Ukrainës apo në goditjen e shpejtë ndaj Krimesë.
Rusia në Luftën e Dytë Botërore është mbrojtur prej fashizmit gjerman. Ky fakt historik dhe rezultati po zhvleftësohen këto ditë prej vet propagandës ruse: e cila agresionin e Moskës kundër Ukrainës gjithashtu e cilëson si ‘luftë kundër fashizmit’ – kësaj here gjoja kundër ‘juntës’ në Kiev. Edhe këto mendime ndoshta kanë luajtur një rol, që Angela Merkel tani e refuzoi ftesën për të dalë në tribunë në Sheshin e Kuq. E meqënëse ra fjala kjo tribunë ndodhet piëkrisht përballë vendit, ku në fund të shkurtit u vra politikani i opozitës Boris Nemcov.
Sot Rusia për shumë është një kërcënim
E megjithatë refuzimi i Merkelit dallon prej refuzimeve të mëdhenjve të tjerë europianë: polakëve, lituanezëve, estonezëve dhe letonezëve, që nuk duan të marrin pjesë në festën e fitores, sepse me avancimin e Ushtrisë së Kuqe për ata nisi koha e re e shtypjes dhe – ajo që është edhe më e rëndësishme – sepse ato sot ndihen të kërcënuar prej politikës neo-imperialiste të Putinit.
Merkel në të kundërt përballet me kujtimin ndaj vuajtjes, që kanë shkaktuar trupat gjermane në Rusi. Një ditë pas festës zyrtare me pompozitet ushtarak, ajo bashkë me Putinin do të vendosë një kurorë në varrin e ushtarit të panjohur në murin e Kremlinit. Një kujtim në heshtje pra atje, ku çdo lloj toni i lartë këto ditë shumë shpejt mund të shkaktojë disharmoni diplomatike. Rusët do të dinë ta vlerësojnë këtë gjest të kancelares gjermane.
Eshtë ende e paqartë, se ç’qendrim do të mbajnë Obama, Cameron dhe Hollande, nëse ata do të shkojnë ose jo në festën e fitores si përfaqësues të aleatëve të dikurshëm të Bashkimit Sovjetik. Në të kundërt është e qartë, se diktatori koerano-verior Kim Yong-un do të shkojë në paradë. Se ç’kërkon ai atje, kjo mbetet një enigmë. Angela Merkelit tani nuk i duhet më ta zgjidhë këtë. (dw)

Konflikti greko-gjerman për reparacionet e luftës

Greqia kërkon nga Gjermania që të paguajë dëmshpërblime nga Lufta e Dytë Botërore. Pala greke thekson, se dëmet nuk janë shlyer, ndërsa Berlini mendon se kjo është një çështje e mbyllur.Greqia kërkon nga Gjermania që të paguajë dëmshpërblime nga Lufta e Dytë Botërore. Pala greke pohon se dëmet nuk janë paguar, ndërsa Berlini mendon se kjo është një çështje e mbyllur.
Dëmet e pësuara janë bërë para 70 vitesh. Nën pushtimin gjerman janë vrarë shumë grekë gajtë Luftës së Dytë Botërore. Gjatë luftës është shkatërruar edhe infrastruktura, ndërkohë që gjermanët e kishin detyruar Bankën Qendrore greke t’i shesë me dhunë letrat me vlerë. Megjithatë kjo temë për qeverinë gjermane është e përfunduar. Zëdhënësi i saj Steffen Seibert, përsëriti edhe njëherë të mërkurën (11.03) se çëshjta e dëmshpërblimit “është mbyllur përfundimisht juridikisht dhe politikisht”. Edhe Martin Jäger, zëdhënës i Ministrisë së Financave, bëri të qartë: “Ne nuk do të zhvillojmë kurfarë negociatash me grekët”. Qeveria federale ka pohuar shpesh se në vitin 1960, në kuadër të marrëveshjeve me shumë qeveri evropiane, janë paguar 11 milionë marka. Ndërkohë që ka pasur edhe shumë masa të tjera për dëmshpërblim, nga të cilat ka përfituar edhe Greqia.

Por Greqia pohon se kjo temë ende nuk është hequr nga rendi i ditës. A thua Athina mund të ketë sukses kësaj radhe?Juristi nga Berlini, profesori Ulrich Battis, thotë për DW: “Ata janë përpjekur shpesh para gjykatave vendase dhe ndërkombëtare, jo vetëm qeveria e tanishme, por edhe të mëparshmet, për t’i ngritur këto pretendime. Deri tani nuk kanë pasur sukses. Por shanset në tërësi nuk duhen përjashtuar.”
Marrëveshja për borxhe
Marrëveshja e Londrës për borxhe ka parashikuar në vitet 50-të që marrëveshja paqësore të kushtëzohet me pagesën e borxheve. Në kuadër të ribashkimit të Gjermanisë, pala gjermane, sipas Battis, i është shmangur qëllimisht arritjes së një marrëveshjeje paqeje. “Si rrjedhojë është menduar: nuk ka marrëveshje paqeje, ndaj nuk ka as dëmshpërblime”, pohon Battis. Këtë e ka menduar edhe kryeministri Alexis Cipras, kur në pralementin grek deklaroi: “Pas ribashkimit të Gjermanisë, në vitin 1990 janë krijuar bazat politike dhe juridike për ta shpjeguar këtë çështje. Por qysh atëherë qeveritë gjermane kanë heshtur dhe kanë reaguar me truke juridike dhe shtyrje.” Cipras nuk ka përmendur shifra, por gazeta greke “To Vima” të dielën e kaluar ka cituar një raport të cilësur si top sekret nga viti 2013, ku flitet për një kërkesë të përgjithshme prej rreth 300 miliardë eurosh. Rastësi apo jo, por kjo shifër është gati në përputhje të plotë me borxhet e tanishme greke në vlerën prej 320 miliardë euro.

Uzurpimi i pronave
Ministri i Drjetësisë Nikos Paraskevopoulos mendon se për disa pagesa mund të merren peng madje pasuritë e patundshme gjermane në Greqi. Sipas një vendimi të Gjykatës Supreme greke nga viti 2000, pagesat në vlerën prej 28 milionë do të ishin në rregull. Mendohet se këto pagesa mund të bëhen përmes mabjtjes peng të godinave gjermane në Greqi, si ato të Institutit Goethe dhe Institutit Arkeologjik Gjerman. Paraskevopoulos tha se “sipas ligjit, ministri duhet të japë urdhër për zbatimin e ligjit”. Zëdhënësi i qeverisë gjermane tha se “paralajmërimet e ministrit grek nuk do t’i komentojë”. Europarlamentari liberal Alexander Graf Lambsdorff e ka quajtur mundësinë e mbajtjes peng të pasurisë gjermane si “të palejueshme dhe kundërligjore”. “Një drejtësi e pavarur nuk duhet të lejojë të tërhiqet prej karvanit të fushatave politike”. Edhe ai mendon se Gjermania i ka shlyer të gjitha detyrimet e saj nga lufta. “Në vend që të vazhdojë betejat nga e kaluara, më mirë do të ishte që qeveria greke të përqendrohet tek lufta për të ardhmen”. (dw)

BE: EULEX-i nuk ka agjendë politike në Kosovë

Përfaqësuesit e Bashkimit Evropian në Prishtinë mohuan të ketë pasur ndërhyrje në një proces gjyqësor kundër kryetarit të Nismës për Kosovën, Fatmir Limaj.Në Kosovë, Misioni i Bashkimit Evropian për sundimin e ligjit mohoi të ketë pasur çfarëdo ndërhyrjesh në një proces gjyqësor kundër kreut të Nismës për Kosovën, Fatmir Limaj.

Përfaqësuesi i posaçëm i Bashkimit Evropian, Samuel Zhbogar, dhe shefi i misionit të BE-së për sundimin e ligjit në Kosovë, Gabriele Meucci, diskutuan të enjten me udhëheqësit e Nismës për Kosovën, pohimet se Partia Demokratike në bashkëpunim me ish-shefin e këtij misioni, Bernd Borchardt dhe disa zyrtarë të Brukselit, mund të kenë ndërhyrë në Gjykatën e Apelit në shtator të vitit të kaluar që të dënoheshin zoti Limaj dhe nëntë të tjerë të akuzuar për krime lufte.

E përditshmja Koha ditore, citon një burim të paidentifikuar nga EULEX-i sipas të cilit dënimin e zotit Limaj e kishte garantuar gjyqtari portugez i EULEX-it, Manuel Soares. Dënimi, shkruan gazeta, ishte parë si mundësi ideale për prishjen e koalicionit të atëhershëm ndërmjet Lidhjes Demokratike, Aleancës për Ardhmërinë e Kosovës dhe Nismës për Kosovën.

Në shtator u hap rigjykimi ndaj zotit Limaj dhe nëntë të akuzuarve të tjerë për torturimin dhe keqtrajtimin e civilëve shqiptarë në një burg në fshatin Kleçkë në Kosovën qendrore në vitin 1999. Ata ishin liruar si të pafajshëm në shtator të vitit 2013.

Partia Demokratike nuk i komentoi shkrimet, ndërsa partia e zotit Limaj bëri thirrje që sa më shpejt të nis një hetim i plotë dhe i gjithanshëm ndaj të gjithë atyre që janë përfshirë në këtë rast brenda dhe jashtë EULEX-it. Këtë kërkesë Nisma e ka shtruar edhe në takimin e së enjtes.

Në një njoftim të zyrës së Bashkimit Evropian në Prishtinë, zoti Zhbogar citohet të ketë thënë se “EULEX-i nuk është në Kosovë për të ndjekur asnjë agjendë politike, por është për drejtësi dhe sundim të ligjit” dhe se sipas tij “ekzistojnë mekanizma për gjetjen e parregullsive të mundshme”.

Ndërsa shefi i EULEX-it Gabriele Meucci, i ka cilësuar pohimet për ndërhyrje si jo faktike.

Çështja ka nxitur shumë reagime në Kosovë, përfshirë edhe presidenten Atifete Jahjaga e cila i kishte dërguar shefit të EULEX-it vënien e drejtësisë në rastin e zotit Limaj.

Hetime ka kërkuar edhe Këshilli për Mbrojtjen e të Drejtave dhe lirive të njeriut. Këshilli, siç thuhet në një komunikatë, “dyshon dhe është i shqetësuar pse këto informata po rrjedhin pas përfundimit të misionit të një pjese të personelit ndërkombëtarë të EULEX-it dhe pse ata nuk po flasin gjatë mandatit të tyre?!”

Nuk është hera e parë që shfaqen pohime për parregullsi në radhët e EULEX-it. Në nëntor të vitit të kaluar, shefja e politikës së jashtme të Bashkimit Evropian Federica Mogherini emëroi francezin Jean Paul Jacqué, si ekspert të pavarur për të shqyrtuar zbatimin e mandatit të EULEX-it me përqendrim në dyshimet e hedhura për korrupsion në radhët e këtij misioni.

Vendimi i zonjës Mogherini, pasoi dyshimet e publikuara në një seri shkrimesh të së përditshmes Koha Ditore, se zyrtarë të tij mund të kenë marrë para në këmbim të lirimit të disa të akuzuarve për vepra penale. Zyrtarë të EULEX-it besojnë se dokumentet kanë rrjedhur nga prokurorja britanike e këtij misioni Maria Bamieh.

Hedhja e dyshimeve të tilla nxiti shume reagime dhe zyrtarë të Bashkimit Evropian thanë se ishin shqetësuar me mundësinë që ato të dëmtojnë imazhin dhe besimin e EULEX-it, i cili u vendos në Kosovë pas shpalljes së pavarësisë së saj nga Serbia në shkurt të vitit 2008.

Misioni ruan ende fuqi ekzekutive dhe trajton rastet e krimeve te luftës por edhe krimin e organizuar dhe korrupsionin në rastet që vlerësohen me të ndjeshme për t’u trajtuar nga prokurorët dhe gjykatësit vendas. (voa)

Shumë kushte për Kosovën – Rezoluta e Parlamentit Europian

Parlamenti Europian i ka bërë thirrje qeverisë së Kosovës për forcimin e shtetit juridik, luftimin e korrrupsionit dhe krimit të organizuar. Europarlamentarët kanë bërë edhe kërkesa të tjera.Parlamenti Europian (PE) edhe një herë i ka bërë thirrje pesë vendeve të cilat nuk e kanë njohur pavarësinë e Kosovës që ta bëjnë këtë. Në rezolutë thuhet se njohja e Kosovës, do të ndikonte në normalizimin e mëtejshëm të raporteve mes Kosovës dhe Serbisë si dhe në afrimin e Kosovës me BE. Kjo do të ndihmonte edhe në zgjidhjen e disa problemeve të tjera. Sekretarja letoneze e shtetit për Evuopën, Kalinina Lukashevica ka theksuar në emër të Këshilit të Ministrave të Bashkimit Europian se rezultatet e arritura në dialog me Serbinë dhe reformat në Kosovë janë parakushte kryesore për futjen në fuqi të Marrëveshjes për Stabilizim dhe Asociim mes Kosovës dhe BE. Lukashevica dhe komisioneri europian Johannes Hahn nënvizuarn, se autoritetet në Kosovë kanë bërë përparime të dukshme në miratimin e ligjeve. Por ligjet dhe rregullat e miratuara duhet të zbatohen. Një prej sfidave kryesore është funksionimi i shtetit juridik dhe pavarësia e organeve juridike, si dhe luftimi i korrupsionit, krimit të organizuar dhe krijimi i gjykatës speciale për krime lufte në Kosovë.
Përballja me të kaluarën
“Kosova duhet të angazhohet fuqishëm për normalizimin e raporteve me Serbinë, sepse kjo është me rëndësi për afrimin me Bashkimin Europian, theksoi udhëheqësja e radhës e BE. Raportuesja e posaöme për Kosovën Ulrike Lunacek theksoi se autoritetet në Prishtinë duhet të fitojnë luftën kundër korrupsionit, edhe në raport me personat që janë në pozicione të larta të shtetit. Në këtë rezolutë thuhet se Kosova duhet t’i japë përparësi vendosjes së raporteve të mira me vendet fqinje dhe bashkëpunimit me gjykatën speciale për krime lufte. “Kjo do ta ndihmojë Kosovën që të përballet me të kaluarën e saj.”

Europarlamentarët e kanë përshëndetur raportin e ekipit të EULEX-it të bërë publik në gusht të vitit 2014 për zbardhjen e akuzave për krime lufte. Në këtë raport janë hedhur akuza për disa përfaqësues të lartë të UÇK-së, por jo edhe për UÇK-në në tërësi. Për të mos penguar drejtësinë dhe hetuesinë, në raport nuk janë bërë publik emrat e personave që dyshohen për krime lufte. Është bërë e ditur se gjykata do të veprojë në kuadër të organeve juridike të Kosovoës, por e zhvendosur në Holandë, për shkaqe sigurie.

Keqardhje për mosrealizimin e Marrëveshjes së Brukselit

Në rezolutë shprehet keqardhje për shkak të mos realizimit në tërësi të marrëveshjeve të arritura në dialogun Prishtinë-Beograd, gjatë negociatave në Bruksel. Por nga qeveria e Kosovës kërkohet edhe zbatimi i denjë i reformave ekonomike, që duhet të mundësojnë hapjen e vendeve të reja të punës. Eurodeputetët janë të mendimit se duhet vazhduar edhe me kalimin e plotë të kompetencave nga EULEX-i në duart e organeve kosovare. Megjithatë qeveria dhe institucionet duhet të japin sinjale të qarta për vendosmëri në luftën kundër korrupsionit dhe krimit të organizuar, në të gjitha nivelet. Europarlamentarët kanë përshëndetur përfshirjen e Kosovës në luftën kundër terrorizmit dhe kanë shprehur shqetësim për shkak të “radikalizimit të të rinjve atje”, sepse disa prej tyre kanë shkuar për të luftuar në Siri dhe Irak.

Në dokumentin e PE thuhet se në Kosovë është shënuar përparim në lirinë e lëvizjes, por Serbia dhe Kosova duhet të vazhdojnë negociatat për kodin telefonik të Kosovës. Sa i përket forcave të sigurisë, thuhet se një prej prioriteteve të qeverisë së Kosovës është që këto forca të mund të ruajnë integritetin territorial dhe sovranitetin. Këto forca duhet të “jenë në përputhje me rregullat e BE”, thuhet në dokument.

Përparime edhe në veri

Në dokument thuhet se përparime janë shënuar edhe në veri të Kosovës, në veöanti pas zgjidhjes së kryetarëve të bashkive në zgjedhjet e organizuara nga institucioneve kosovare. Por janë nisur edhe disa projekte të tjera që kanë të bëjnë me veriun. Këto projekte financohen nga paratë e BE. PE pohon se duhet vazhduar përpjekjet edhe për krinjimin e bashkësisë së komunave me shumicë serbe si dhe për afrimin e bashkësisë etnike shqitpare dhe serbe. Në rezolutë bëhet thirrje edhe për respektimin e lirisë së mediave dhe të drejtave të minoriteteve të tjera. në dokument u bëhet thirrje autoriteteve që të lutojnë me vendosmëri rrjetet kriminale për trafikim me njerëz. (dw)

Tiranë, opozita në protestë

Manifestimi kundër qeverisë për Cështjen Doshi. Kryetari demokrat Basha: Ne nuk ndalemi derisa Rama e Meta të largohenNë Tiranë opozita zhvilloi sot një protestë në bulevardin qëndror të kryeqytetit për të kërkuar largimin e qeverisë dhe dorëheqjen e kryetarit të parlamentit Ilir Meta, pas debateve të forta që ka shkaktuar prej disa ditësh cështja e deputetit Tom Doshi i cili ka akuzuar drejtpërdrejt zotin Meta si organizator i një plani për vrasjen e tij dhe të deputetit tjetër demokrat Mhill Fufi.

Një orë përpara se të niste protesta, përplasjet mbi këtë temë nisën që në hapje të punimeve të parlamentit, kur sekretari i Përgjithshëm i PD-së, Arben Ristani kërkoi sërish dorëheqjen e zotit Meta. Përfaqësuesit e opozitës u grumbulluan rreth foltores së parlamentit, ndërsa deputetët e majtë miratuan me shpejtësi disa ndryshime të një ligji dhe ratifikuan dy marrëveshje duke mbyllur në një kohë rekord seancën. Një veprim që sipas opozitës ishte “dëshmi e frikës së shumicës ndaj manifestimit të qytetarëve”.

Pak pas orës 11.00 përkrahësit e opozitës ju drejtuan bulevardit qëndror. Kryetari demokrat Lulzim Basha u bashkua me ta pasi doli nga selia e partisë i shoqëruar nga një tjetër grup protestuesish, duke ecur në këmbë deri përpara selisë së Qeverisë dhe zyrave të parlamentit, ku ishte vendosur dhe skena nga ku drejtuesit demokrat ju drejtuan mbështetësve të tyre të grumbulluar nga qytete të ndryshme të vendit. Në fjalën e tij zoti Basha nënvizoi fillimisht situatën e rëndë ekonomike në të cilën sipas tij gjendet vendi, “varfërinë që thellohet dhe papunësinë që shtohet”, tha ai. Më tej, ai përmendi “gjendjen problematike” të rendit dhe sigurisë, “tritoli e krimi që godasin cdo ditë. Nuk mund të ketë rend e siguri kur vjen në pushtet me krimin e qeveris me krimin”, deklaroi kreu i opozitës.

Lidhur me akuzat e deputetit Doshi ai u shpreh se kjo “është ngjarja më e rëndë e 25 viteve të fundit”. Zoti Basha tha se sot kërkesa është “Meta ik! Jep dorëheqjen, dhe përballu me akuzat. I kërkojmë Ramës, ndal trysninë ndaj Prokurorisë. Jep llogari para drejtësisë dhe të cojë ministrin e Brendshëm për ndjekje penale”. Ai akuzoi drejtuesit e shumicës se “për 6 muaj kanë mbajtur të fshehtë krimin, u përpoqën që t’ja faturojnë opozitës, 6 muaj të zhytur në krim, në zyrën e kryetarit të parlamentit, kryeministrit e ministrit të Brendshëm është bërë pazar me jetën e deputetëve”, u shpreh zoti Basha.

Ai theksoi se opozita është “e gatshme t’i dalë për zot me cdo mjet demokratik, vendit, fateve të shqiptarëve dhe demokracisë së cuar në buzët ë humnerës nga dyshja Rama – Meta. Eshtë koha e një zgjimi të vrullshëm e një kushtrimi të madh, për të zbritur pa dallim në rrugët e sheshet e protestës për të demonstruar sovranitetit e drejtpërdrejt ndaj një qeverie që ka devijuar nga rruga e ligjit. Ne nuk ndalemi derisa të ketë ligj e drejtësi, derisa krimi të mposhtet dhe qytetarët të kontrollojnë qeverinë dhe jo qeveria ata, derisa të shporrim të keqen, derisa Rama e Meta të largohen”, deklaroi zoti Basha.

Për manifestimin e sotëm policia kishte marrë masa të shumta, duke ushtruar kontrolle në akset rrugore që cojnë drejt kryeqyteti. Një numër i madh forcash dhe mjetesh, ishin vendosur dhe në zonën pranë qeverisë aty ku u zhvillua dhe mitingu, i cili kaloi pa asnjë incident. (voa)