All posts by V.F.

Nuk ka dhunë që na ndalë – e mërkurë, 4 shkurt, ora 12:00

Pas një mbledhje të përbashkët të Kryesisë dhe Grupit Parlamentar së Lëvizjes VETËVENDOSJE!, u vendos që data e protestës së ardhshme të jetë të mërkurën, më 4 shkurt, në ora 12:00, i njoftoi Albin Kurti mediet e mbledhura në konferencën e sotme për shtyp. Ai shpjegoi se protestuesit, po ashtu si të martën, do të mblidhen në sheshin “Zahir Pajaziti”, prej nga do të marshojnë drejt sheshit “Skënderbeu”, para Qeverisë së Kosovës.

“Pra, vazhdon protesta përderisa vazhdon të qëndrojë në Qeveri Jabllanoviqi”, tha Kurti, duke sqaruar se kërkesat e protestës mbesin të njëjta – shkarkimi i Ministrit Jabllanoviq dhe mbrojtja e Trepçës përmes një ligji të veçantë, i cili e definon Trepçën si ndërmarrje publike të veçantë.

Ai po ashtu falënderoi të gjithë qytetarët për ndihmën dhënë protestuesve të martën, ku solidaritet i veçantë është shprehur me të lënduarit, duke i ndihmuar ata pa rezervë me ujë qumësht e qepë.

Ndërkaq, deputetja Aida Dërguti tha se Figurat kryesore të partive politike që tani janë në Qeveri, rrugëtimin e vet në politikë e nisën qoftë me protesta si LDK, qoftë me luftë çlirimtare si PDK, të cilët e braktisën dhe sakrifikuan për pushtet. Nënshtrimi ndaj kushteve të Listës Serbe dhe fyerjeve të Jabllanoviqit për qytetarët e Kosovës, tregon gatishmërinë e këtyre qeveritarëve që të nënshtrohen. Ajo tha se qytetarët janë themeli i Republikës dhe Republika pa qytetarët nuk mund të ekzistojë. Prandaj, çdo qytetar veç e veç dhe të gjithë së bashku, kanë obligim që të mbrojnë dinjitetin e dëshmorëve e viktimave, që u fye nga Jabllanoviqi. Ndërsa, të sotmen si mundësi dhe të ardhmen si zhvillim e mirëqenie, qytetarët mund ta sigurojnë vetëm përmes mbrojtjes së Trepçës.

Në fund, kryetari, Albin Kurti, duke iu përgjigjur pyetjeve të gazetarëve mbi dhunën policore tha: “Nuk ka dhunë që na ndal neve. Nuk ka brutalitet policor që na bën neve të mos dalim në protestë apo të mos marshojmë përpara. Sepse nuk mund të bëjmë kompromis me Republikën, me jetën e dinjitetshme, me lirinë, me atë që na bënë subjekt e subjektivitet njerëzor”.

Lëvizja VETËVENDOSJE!

Telefonat inteligjentë si mjet diagnostikimi të malaries

Mjekët që luftojnë malarjen, një ndër sëmundjet më vdekjeprurëse në planet, mund të kenë së shpejti në dispozicion një mjet ndihmës – një aplikacion në celularët e tyre inteligjentë. Shkencëtarët kanë zbuluar një mënyrë që përdor kamerën e celularit për gjurmimin në gjakun e pacientëve të mikroorganizmave që shkaktojnë këtë sëmundje.Sipas Organizatës Botërore të Shëndetësisë, rreth 600 mijë njerëz vdiqën nga malaria në vitin 2013, një shifër që e klasifikon këtë sëmundje të përcjellë nga mushkonjat si një ndër më vdekjeprurëset në botë.

Aspekti më i hidhur i kësaj katastrofe është se prek më së shumti fëmijët e vegjël.

Zbulimi i hershëm i sëmundjes është i rëndësishëm për një trajtim të suksesshëm. Por, duke qenë se simptomat fillestare i ngjasojnë gripit të zakonshëm, një mikrobiologu i duhet të ekzaminojë një pikë gjaku të pacientit me mikroskop për të bërë diagnostikimin e duhur.

Shkencëtarët në Britani kanë prodhuar një pajisje, të quajtur Xrapid, e cila i bashkohet celularit duke e shndërruar atë në një mikroskop të fuqishëm. Ndërsa një aplikacion, i bazuar në teknologjinë e identifikimit të fytyrës, identifikon me shpejtësi parazitët protozoarë në njollën e gjakut.

Jean Viry-Babel është drejtor i kompanisë IanXen, e cila prodhoi aplikacionin. Ai thotë se kushton shumë pak dhe funksionon menjëherë.

“Marrim pra një pamje me rezolucion të lartë të një kampioni gjaku. Ndajmë rruazat e kuqe të gjakut nga pjesa tjetër, nga rruazat e bardha dhe pllakëzat e gjakut, dhe fillojmë të shqyrtojmë individualisht secilën prej rruazave të kuqe.”

Viry-Babel thotë se aplikacioni ka çmim të ulët, është i lehtë në përdorim dhe ofron besueshmëri në masën 98%. E vetmja paisje shtesë që kërkohet është një xham i zakonshëm laboratorik.

“Ka vetëm një buton, që emërtohet ‘Diagnostiko’. Pra, thjesht e pozicionon mbi xhamin dhe gjakun e përtharë, dhe shtyp butonin që jep diagnozën ‘po’ ose ‘jo’.”

Shkencëtarët thonë se paisja do të fillojë të testohet në terren gjatë muajve janar dhe shkurt në Tanzani, Benin dhe Indonezi, ndërsa përdorimi në shkallë të gjerë mendohet të fillojë nga fundi i muajit mars.

Ata gjithashtu synojnë të zgjerojnë përshtatshmërinë e paisjes së re, duke e mësuar të njohë edhe sëmundje të tjera, si p.sh. turbekulozin etj. (voa)

Grevë në arsim dhe shëndetësi

Në shumicën e institucioneve parauniversitare dhe ato shëndetësore në Kosovë po zhvillohet greva një ditëshe e organizuar nga sindikatat përkatëse.Greva e të dy sektorëve ka për qëllim realizimin e Kontratës Kolektive, të nënshkruar në mars të vitit të kaluar, ndërmjet Qeverisë se Kosovës dhe përfaqësuesve të bizneseve dhe punëtorëve.

Kontrata Kolektive, marrëveshja mbi të cilën është arritur në bazë të Ligjit të Punës, ligjërisht rregullon të drejtat e punëtorëve në sektorin publik dhe privat.

Rexhep Sadiku, nënkryetar i Sindikatës se Bashkuar për Arsim, Shkencë dhe Kulturë, (SBASHK) për Radion Evropa e Lirë, tha se shumica e mësimdhënësve në nivel shtetëror kanë hyrë në grevë.

“Greva ka filluar dhe gjithçka është duke u zhvilluar sipas skenarit të paraparë të SBASHK-ut. Sipas informacioneve që kemi, po zbatohet vendimi”, tha Sadiku

Kërkesat e SBASHK-ut kanë të bëjnë me pikat e parealizuara deri më tash nga Kontrata Kolektive, siç janë: shujta 2 euro për çdo ditë pune, kompensimi prej 0,5 për qind për çdo vit të shërbimit, kompensimi prej 70 për qind për biletat e udhëtimit për mësimdhënësit me rastin e pensionimit dhe tre paga mesatare për mësimdhënësit me rastin e pensionimit.

Por, zyrtarë të Ministrisë se Arsimit, Shkencës dhe Teknologjisë kanë kërkuar mirëkuptim nga SBASHK-u dhe mësimdhënësit, në mënyrë që të jepet kohë për gjetjen e një zgjidhje të qëndrueshme.

Azem Guri, këshilltar i ministrit të Arsimit, Arsim Bajrami, për Radion Evropa e Lirë, tha se nga pikat e Kontratës Kolektive si pikë më e ndjeshme është çështja e sigurimit të shujtës ditore për të punësuarit në këtë sektor.

“Kjo pikë kap shumën prej10.5 milion euro, po ashtu kërkon kohë, kërkon hapësirë dhe menaxhim të buxhetit. Prandaj ne kemi kërkuar nga SBASHK-u mirëkuptim në këtë pikë”.

“Kurse sa i përket çështjes se biletave të udhëtimit, që është e paraparë në 70 për qind të transportit urban, në takimin që ka pasur më kryetarët e komunave ministri i Arsimit Arsim Bajrami, kryetarët e komunave kanë shprehur gatishmëri që këtë pikë të përmbushin, madje disa komuna e kanë të përfunduar këtë çështje, kurse disa janë në proces e sipër”, tha Guri.

Në anën tjetër edhe punëtorët shëndetësorë në gjithë territorin e Kosovës kanë filluar grevën 24 orëshe, ka thënë për Radion Evropa e Lirë, Blerim Syla, kryetar i Federatës Sindikale të Shëndetësisë.

“Sot, Federata e Sindikatave të Shëndetësisë, gjegjësisht punëtorët shëndetësorë kanë filluar grevën nga ora 7:00 e mëngjesit. Fillimisht kërkojmë ndjesë nga qytetarët dhe i lusim ata të na mirëkuptojnë”, tha zoti Syla, duke njoftuar se greva do të zgjasë deri në orën 7 të mëngjesit të së shtunës.

Punëtorët shëndetësorë kërkojnë zbatimin e Kontratës Kolektive dhe të fillohet dialogu për rritjen e pagave.

Izet Sadiku, këshilltar i ministrit të shëndetësisë, Imet Rrahami, shprehet se sa i përket Kontratës Kolektive, pritet zbatimi i pikave të kërkuara nga punëtorët shëndetësor, por që kjo çështje kërkon kohë.

Sa i përket fillimit të dialogut për rritjen e pagave, Sadiku thotë se janë të gatshëm të diskutojnë për këtë çështje, por që rritja e pagave duhet të jetë vendim i qeverisë.

“Ata (punëtorët shëndetësorë), kanë kërkuar që të hyjmë në diskutime për këtë çështje, këtë e ka premtuar edhe Ministria e Shëndetësisë edhe kryeministri i Kosovës, Isa Mustafa. Mirëpo, nuk mund të premtohet pa ditur zhvillimin ekonomik dhe faktorë të tjerë të cilët përcaktojnë rritjen e pagave”, tha Sadiku.

Sidoqoftë, në funksion janë shërbimet emergjente në klinikat shëndetësore, transfuzioni, hemodializa dhe lindjet. (rel)

Parlamenti shqyrton Gjykatën e Lartë dhe KQZ-në

Deputetët e majtë rrëzuan mbrëmë në parlament dekretet e presidentit Bujar Nishani për ligjin e Gjykatësë së Lartë dhe të ligjit tjetër për Kontrollin e Lartë të Shtetit. Ata pohuan se ligji i ri për Gjykatën e Lartë, që presidenti e ktheu për rishqyrtim, rrit transparencën dhe zgjedhjen me meritë të gjyqtarëve.Ligjvënësit e shumicës theksuan se aktualisht nuk dihet se si dhe mbi çfarë vlerësimesh presidenti zgjedh antarët e Gjykatës së Lartë. Por opozita deklaroi se ligji i ri është antikushtetues, sepse këtë kompetencë ia heq presidentit dhe ia kalon qeverisë, pra, ligji synon kapjen e Gjykatës së Lartë nga ekzekutivi.

Partia Demokratike shprehu shqetësimin se duke ia hequr presidentit kompetencën kushtetuese shumica po vonon integrimin në Bashkimin Europian. Opozita tha se ishte e gatshme për të bashkëpunuar për një reformë gjithëpërfshirëse në drejtësi, por shumica me hapin e njëanshëm sot e fragmentoi këtë proces, duke synuar thjesht ta uzurpojë sistemin gjyqësor.

Përfaqësues të shumicës thanë se ngritja e Këshillit për emërimin e gjyqtarëve të Gjykatës së Lartë nuk prek kompetencat e Presidentit. Megjithatë edhe më parë socialistët rrëzuan kandidatët e propzuar nga presidenti Nishani për antarë të Gjykatës së Lartë. Po me votat e shumicës rrëzoi edhe dekretin presidencial për të rishqyrtuar ligjin për organizimin e Kontrollit të Lartë të Shtetit.

Parlamenti miratoi në mbrëmje edhe 3 antarët e rinj të Komisionit Qendror të Zgjedhjeve, vende të mbetura të mbetura bosh prej një viti, pas dorëheqjeve qysh nga zgjedhjet e kaluara. Edlira Jorgaqi dhe Gëzim Veleshnja janë dy antarët më të rinj, ndërsa për Denar Bibën betimi mbrëmë shënoi një kthim të dyfishtë në të njëjtin post, si antar dhe si nënkryetar i KQZ, nga ku dha dorëheqjen.

Votimi dhe betimi u kryen në të njëjtën seancë, ndaj ata mund t’i bashkohen KQZ-së menjëherë për të administruar përgatitjet e zgjedhjeve vendore, të cilat tashmë kanë filluar.

Parlamenti u përfshi dje në një seancë maratonë, ku u diskutua gjatë për disa korigjime me akt normativ brenda një muaji në buxhetin e sapoaprovuar të shtetit, të cilat në fund u miratuan me votat e shumicës. (voa)

Lidhjet e Syrizas me radikalët e Rusisë

Vëzhguesit e zhvillimeve në Evropë e kanë kuptuar menjëherë se Qeveria e re e Greqisë, e udhëhehqur nga partia e majtë, Syriza, mund të thyejë solidaritetin e brishtë të Bashkimit Evropian në ndëshkimin e agresionit rus në Ukrainë.Emailet që kanë rrjedhur së fundi, kanë zbuluar disa lidhje të gjata të Syrizas me ideologun e Lëvizjes Euroaziatike, Aleksandr Dugin, i cili ka lidhje me Kremlinin, si dhe me oligarkun rus, Konstantin Malofeyev, i cili besohet se ka financuar pjesën më të madhe të lëvizjes separatiste në Ukrainë.

Lëvizja Euroazatike e sheh Rusinë më afër me Azinë se me Perëndimin dhe pretendohet se për synim ka rikthimin e Bashkimit Sovjetik.

Anton Shekhovtsov, studiues i politikave të ekstremit të djathtë në Evropë, thotë se simpatia për Rusinë e Syrizas dhe e partnerit të saj të koalicionit, Partisë së Grekëve të Pavarur, shkon përtej normës për Greqinë.

“Ndjenja pro-ruse është mjaft e përhapur në përgjithësi në Greqi. Por, te këto dy parti, politika e jashtme është haptazi pro-ruse. Fakti se kontaktet e para të kryeministrit të ri, Alexis Tsipras, kanë qenë me ambasadorin e Rusisë në Greqi, tregon se ata, me gjasë, do të bëjnë përpjekje që të krijojnë një bashkëpunim më të rëndësishëm me Rusinë”, thotë Shekhovtsov.

Në dhjetor të vitit 2014, një grup i hakerëve rusë, i quajtur Shaltai Boltai, ka publikuar disa emaile të marra nga Georgy Gavrish, mik i afërt me Duginin dhe zyrtar në Lëvizjen euroaziatike të Duginit. Shumë nga emaliet lidhen me përpjekjet e Duginit dhe Malofeyev për të krijuar një rreth të politikanëve dhe intelektualëve evropianë, të dashur me Rusinë.

Dhjetëra emaile kanë zbuluar bisedat midis Gavrishit dhe njerëzve brenda Syrizas, thotë Christo Grozev, specialist në çështjet e informimit në Evropën lindore.

Mesazhet tregojnë “bashkëpunim shumë të ngushtë për strategji”, thotë Grozev. Ai thotë se këshilltarët e Syrizas kanë dërguar “memorandume strategjike” për qëndrimet dhe politikat e partisë te Dugin dhe Gavrish, për të marrë komentet dhe sugjerimet e tyre.

Gavrish ka jetuar në Greqi për disa vjet, deri më 2013.

“Gjatë atyre pesë vjetëve, ai (Georgy Gavrish) ka shërbyer, me sa duket, si delegat për Duginin për të gjetur politikanë dhe figura publike në Greqi, që do të angazhohen në ideologjinë e Duginit”, thotë Grozev.

Një nga njerëzit e përfshirë në shkëmbime është Nicolas Laos, intelektual grek dhe këshilltar i Syrizas, që ka lidhje biznesore me Rusinë. Ai është partner i kompanisë ruse të sigurisë, R-Tekhno.

Në një nga emailet që kanë rrjedhur, Laos i ka shkruar Duginit: “E di shumë mirë se si funksionon armiku dhe, nën patronazhin tuaj, unë mund të sulmoj në mënyrë efektive dhe të rëndë”.

Një mesazh me sa duket i referohet Panos Kammenos, kreut të Partisë së Grekëve të Pavarur dhe tani ministër i Mbrojtjes i Greqisë. Në mesazhin e 25 tetorit, 2014, të shkruar nga blogeri me ndikim, Dimitris Konstantakopoulos, i cili me sa duket ishte duke bërë konsultime për strategjinë e Syrizas, flitet për Institutin e Studimeve Gjeopolitike, me seli në Athinë, të cilin Kammenos e ka themeluar me mikun e tij, profesorin e Universitetit të Trakës, Filippos Tsalidis.

“Panos është shfaqur pothuajse një muaj më herët, plot entuziazëm, duke kërkuar bashkëpunim të rregullt. Më pastaj, ka shkuar në Moskë për arsye personale – siç na ka thënë, për martesën e një miku – dhe më pas është zhdukur nga faqja e Tokës në njëfarë mënyrë mbresëlënëse. Jam shumë kurioz të di se çfarë arsyesh do të japë për zhdukjen”, thuhet në mesazh.

Një muaj pasi mesazhi është shkruar, instituti i Kammenos ka nënshkruar një “memorandum mirëkuptimi” me Institutin e Rusisë për Studime Strategjike. Ky i fundit ka qenë pjesë e Shërbimit të Jashtëm të Inteligjencës ruse derisa është sjellë nën zyrën e presidentit rus, më 2009. Drejtori i tij, Leonid Reshetnikov, është gjeneral i pensionuar i Shërbimit të Jashtëm të Inteligjencës ruse.

Dugin është po ashtu i lidhur me ministrin e Jashtëm të Greqisë, Nikos Kotzias. Në prill të vitit 2013, Kotzias, atëherë profesor i Universitetit të Pireut, ka ftuar Duginin që të mbajë një ligjëratë për politikat ndërkombëtare. Gjatë asaj ligjërate, Dugin ka thënë se Greqia nuk duhet t’i bashkohet Unionit Euroaziatik, të udhëhequr nga Rusia, por duhet të luajë rol në “rikrijimin e arkitekturës së Evropës” dhe të formojë “një pol lindor të identitetit evropian” brenda Bashkimit Evropian, së bashku me Serbinë e të tjerët.

Dugin ka qenë i angazhuar në një veprimtari të tillë në Evropër për disa vite, thotë Andreas Umland, profesor në Akademinë Mohyla të Kievit.

“Ai është i lidhur ngushtë, për më shumë se 20 vjet, me të gjithë intelektualët e krahut të djathtë në Francë, Itali, Belgjikë e Britani të Madhe. Ai i lexon ata dhe ata e lexojnë atë. Disa nga librat e tij janë përkthyer”, thotë Umland.

Përpjekjet e tilla kanë fituar pak tërheqje derisa Dugin ka bashkuar forcat me miliarderin Konstantin Malofeyev, një nacionalist rus konservator. Më 20 shkurt të vitit 2014, Dugin i ka shkruar Malofeyev një memo, duke identifikuar partnerët e mundshëm kyçë në Evropën Perëndimore.

Grozev thotë se Dugin ka nxitur Malofeyev që të angazhohet me këto figura, me qëllim krijimin e një klubi elitar të politikanëve – siç e ka quajtur Dugin – që mbështet vijën ruse.

Në fund të majit 2014, Dugin dhe Malofeyev kanë pritur përfaqësuesit e këtyre lëvizjeve – përfshirë Syrizan – në një konferencë sekrete në Vjenë. Kjo, sipas raporteve të disa 35ve.

Në atë takim, studiuesi Shekhovtsov thotë se Dugin dhe Malofeyev “janë takuar me përfaqësuesit e Partisë së Lirë të Austrisë, të Partisë Ataka të Bullgarisë dhe të Frontit Kombëtar të Francës. Të gjitha këto janë parti të ekstremit të djathtë”.

Grozev thotë se nuk ka referime direkte se Dugin ose Malofeyev kanë financuar ose mbështetur materialisht Syrizan apo parti të tjera. Megjithatë, ai thotë se Dugin dhe Gavrish shpesh kanë përfshirë njerëz të afërt me Malofeyev në listat e marrësve të emaileve të tyre.

Një nga miqtë e Malofeyevit, emri i të cilit shfaqet më së shpeshti, është Aleksei Komov, një biznesmen ortodoks, i cili është përfaqësues i Rusisë në Kongresin Botëror të Familjeve. Në shkurt të vitit 2014, Komov ka mbajtur një fjalim në Klubin e Shtypit Kombëtar në Uashington, ku ka fajësuar “bankierët e Wall Street”-it për vendosjen e komunizmit në Rusi.

Grozev po ashtu thotë se ka qenë i befasuar me shkallën e “misticizmit” që sheh në korrespondencën midis grekëve dhe njerëzve të Duginit. (rel)

Feka doli më 20 janar nga Rinasi, hetim lëvizjeve, pyeten eprorët

Efektivi i Forcave të Armatosura ka lënë Aeroportin e Rinasit në datën 20 janar të këtij viti. Këtë informacion u kanë dhënë specialistët e Policisë Kufitare ekspertëve që po merren me hetimet rreth aktivitetit të Sokol Fekës.Nga ana tjetër, prokuroria është shprehur se momentalisht ndodhet në pritje të palës spanjolle dhe nëse ajo do të kërkojë nisjen e hetimeve në Shqipëri, për sa i përket trafikut të drogës, do të nisin edhe veprimet. Më tej edhe Ministria e Brendshme ka nisur hetimet, gjë e cila u bë e ditur nga ministri i Brendshëm, Saimir Tahiri, gjatë një konference për shtyp.

Tahiri është shprehur se “ajo është një çështje në hetim, policia shqiptare me të marrë informacione ka nisur hetimet paraprake. Është herët që të prisni prej meje të dhëna”. Sipas Shefit të Shtabit të Përgjithshëm të Forcave të Armatosura, Jeronim Bazo, majorit Feka i është dhënë leja nga data 12-31 janar të këtij viti, nga baza ajrore në Farkë, por në asnjë rast atë të daljes jashtë vendit. Një tjetër veprim i palës shqiptare, për sa i përket rolit të Fekës pranë Forcave të Armatosura dhe implikimit të tij në trafikun e drogës, është ai i marrjes në pyetje të eprorëve dhe kolegëve të tij në Farkë. Jo vetëm dhënia e lejes, por edhe lëvizjet e kohëve të fundit të 41-vjeçarit janë pikat ku është përqendruar vëmendja e policisë shqiptare.

Më tej, Policia Ushtarake, nga ana e saj, ka nisur hetimet për të përcaktuar rolin e majorit Feka në linjën e trafikut të drogës nga Afrika në Spanjë, teksa oficerë ushtarakë janë duke verifikuar edhe lëvizjet e tij brenda dhe jashtë vendit. Edhe sektori i Antidrogës në Policinë e Shtetit, është duke kryer hetimet paraprake në lidhje me efektivin e ushtrisë, teksa nga të dhënat paraprake mësohet për gazetën “Shqip” se deri më tani nuk është hasur në ndonjë indicie apo të dhënë që ai mund të ishte përfshirë në aktivitete kriminale, në të kaluarën. Referuar edhe origjinës së tij, pasi babai, Alushi, ishte gjithashtu pilot në Forcat e Armatosura, të gjithë personat që kishin pasur njohje pune dhe shoqërore me Fekën, kanë deklaruar se ai ishte pilot i zoti dhe familjar shembullor.

Për sa i përket pjesës së familjes, policia ka marrë deklarimet përkatëse të bashkëshortes, e cila jetonte me qira, bashkë me Sokolin, në lagjen e njohur si “Fresku”, në Tiranë, teksa zotëronte edhe një biznes. Të dhëna janë marrë edhe nga familjarët e tjerë që ndodhen në Kuçovë. Nga të gjitha deklarimet e tyre, nuk ka rezultuar ndonjë informacion i vlefshëm që do të ndihmonte në hetime, pasi nuk është mësuar ndonjë emër shoku a bashkëpunëtori. Familjarët nuk kishin dyshuar ndonjëherë se Feka ishte implikuar në aktivitet kriminal dhe kanë deklaruar se ai ishte familjar i rregullt dhe i përkushtuar në punën e tij, të cilën e kryente prej dhjetëra vitesh. Më tej, përmes një shkrese, janë lajmëruar të gjitha pikat kufitare në vend, për të sjellë listën me datat e hyrje-daljeve të Fekës nga Shqipëria dhe destinacioneve përkatëse, pasi ka dyshime se ai kishte kryer lëvizje të shumta kohët e fundit, që mund të kenë lidhje me organizimin e fluturimit me helikopter, për të organizuar trafikun e drogës. Ndërkaq, prokuroria ndodhet në pritje të kërkesës nga spanjollët, për të kryer më pas veprimet e nevojshme procedurale.
/ Top Channel

Frikë nga efekti domino i Athinës

Shumë qeveri në Evropën veriore kanë frikë se fitorja e Syriza në Greqi mund të shkaktojë një valë anti-kursimesh në vende të tjera. Në këtë rast është në rrezik e gjithë politika evropiane e kursimeve.Zgjedhja e Aleksis Tsipras në Greqi është për shumë qeveri evropiane një aksident dhe madje mjaft i rëndë. Në zgjedhjet e kaluara, në vitin 2012, kur hyri Syriza, udhëheqës evropianë me orientime politike të ndryshme, si kancelarja kristiandemokrate gjermane Angela Merkel, presidenti francez socialist François Hollande dhe ish-kryeministri italian i pa parti Mario Monti patën paralajmëruar nga Syriza.
Si Hollande ashtu edhe Monti qenë revoltuar me politikën evropiane të konsolidimit, që e perceptonin si diktat gjerman kursimi dhe mund ta kishin patur të lehtë që ta shikonin Tsipras si aleat. Por Tsipras u dukej atyre së pari shumë radikal. Dhe së dyti Franca dhe Italia janë gjithashtu kreditorë të Greqisë. Të dy vendet, ashtu si huadhënësit e tjerë, kanë frikë se Greqia nuk do t’ua paguajë borxhet. “Zotimet që bëhen, duhet tani edhe të respektohen”, bëri të qartë edhe një herë Hollande pas zgjedhjeve në Greqi.

Por Tsipras bëri të ditur menjëherë se do t’i japë fund politikës së kursimeve dhe jo vetëm se do t’i ndërpresë reformat, por edhe do t’i kthejë ato mbrapsht. Megjithatë Janis Emmanouilidis, njohës i Greqisë nga instituti studimor i Brukselit European Policy Centre, beson se “ekziston hapësirë për një kompromis.”Fillimi i gabuar” i qeverisë së re do të “çojë në konkluzionin se disa gjëra shkojnë shumë larg.” Dhe me gjithë mohimet nga Berlini dhe Brukseli shumë politikanë mund ta imagjinojnë një farë lehtësimi të borxhit për Athinën.
Nëse mbetet apo jo marrëveshja bazë: kredi në këmbim të kursimeve dhe reformimeve, do të varet nga ato, që mund të ofrojë Syriza”, thotë Emmanoulidis. Nëse Tsipras për shembull mund të ofrojë diçka lidhur me oligarkët, apo në luftën kundër evazionit fiskal”, që shkon përtej asaj që kanë ofruar, apo zbatuar paraardhësit e tij”, mund të ketë në fund një kompromis.
Shumëkush e ndjen se i ka ardhur dita
Por nuk është fjala vetëm për Greqinë. Ajo që i shqetëson vendet e orientuara drejt stabilitetit si Gjermania, është përfytyrimi i një valë proteste mbarëevropiane, që mund ta hidhte poshtë konsensusin e deritanishëm të arritur me mundim në politikën fiskale. Për shembull në Spanjë partia e re e majtë Podemos (Ne mundemi) shpreson tani për një fitore në zgjedhjet parlamentare në vjeshtë. Sipas sondazheve Podemos ndodhet momentalisht pak para partisë popullore në pushtet dhe socialistëve. Në Portugali po formohet ndërkohë një lëvizje sipas modelit të Syriza. Italia dhe Franca, të dyja me qeveri socialiste, e kanë miratuar me gjysëm zemre kursin e deritanishëm dhe janë përpjekur vazhdimisht t’i shmangen reformave. Mund të “marrin si pretekst zgjedhjet greke, për të arritur kompromise në lidhje me kursimin”, mendon Emmanouilidis.

Por konsensusi nuk kërcënohet vetëm nga e majta, por edhe nga e djathta: Në Francë Marine Le Pen e Frontit National përzgjedh deklaratat e qeverisë së re greke, që i përshtaten asaj. Këtu bën pjesë jo vetëm sjellja e guximshme përballë Brukselit, por edhe mirëkuptimi për politikën e presidentit rus Vladimir Putin. Në mënyrë të ngjashme e sheh çështjen edhe Lega Nord në Itali. Gazeta moskovite “Nezavisimaja Gazeta” shkruan e kënaqur: “Qeveria e re greke mund të jetë stacioni më i rëndësishëm i rezistencës ndaj sanksioneve antiruse të BE-së.”
Politika e kursimeve sjell fryte
Përsa i përket politikës fiskale, për ironi të fatit konsensusi i deritanishëm mund të vihej në rrezik pikërisht në një kohë, kur pothuajse kudo duken frytet e konsolidimit. Ekonomia në Spanjë dhe Portugali është përsëri në rritje. Ndryshe nga Greqia, Portugalia mund të dalë sërish prej ombrellës së shpëtimit.
Edhe më e suksesshme është Irlanda, e cila gjithashtu ka mundur të largohet nga programi i ndihmës dhe paraqet shifra fantastike rritjeje. Atje nuk duket në horizont asnjë lëvizje e ngjashme me Syriza-n. Edhe në Greqi vetë po përmirësohet gjendja. Një rast interesant është përsëri Franca. Ku qeveria pas hezitimit të gjatë më në fund ka nisur disa reforma, që meritojnë të quhen të tilla, edhe pse të dhënat ekonomike janë më keq se kurrë. Në mënyrë të kujdesshme dhe të vonuar Parisi ka hyrë megjithatë në kursin e Berlinit, natyrisht jo pa theksuar, se kjo bëhet vullnetarisht dhe nuk ka të bëjë aspak me kërkesat gjermane. (dw)

Jacobson: Dhuna në protesta – e papranueshme

Ambasadorja amerikane në Prishtinë, Tracey Ann Jacobson, u bënë thirrje organizatorëve të protestave të shmangin dhunën, ndërsa qeverisë të punojë drejtpërdrejtë me qytetarëtAmbasadorja amerikane në Prishtinë, Tracey Ann Jacobson, në një intervistë për Zërin e Amerikës dënoi dhunën që përfshiu protestat e kësaj jave në Kosovë dhe bëri thirrje për dialog politik ndërmjet subjekteve politike. Opozita paralajmëroi sërish protesta për të mërkurën më 4 shkurt, me kërkesat për shkarkimin e një ministri serb në qeverinë e Kosovës dhe qartësimin e fatit të kompleksit të minierave Trepça. Ambasadorja Jacobson tha në bisedë me korrespondentin tonë Besim Abazi, se këto dy çështje janë pretekste por jo edhe arsyeja kryesore e protestave në të cilat janë përfshirë edhe njerëz që janë të pakënaqur me zhvillimin ekonomik, luftën kundër korrupsionit dhe përmirësimin e sundimit të ligjit.

Zëri i Amerikës: Zonja ambasadore si e shihni situatën në Kosovë pas protestave të fundit?

Tracey Jacobson: Protesta paqësore është një e drejtë e rëndësishme demokratike. Është mundësi për qytetarët që të nxisin qeverinë që të ngritë çështje që janë të rëndësishme për ta. Është jashtëzakonisht për të ardhur keq që protestat të shtunën dhe të martën u bënë të dhunshme. Kam biseduar me shumë njerëz këtu në Kosovë që janë shumë të shqetësuar me dhunën. Natyrisht, as mbulimi nga shërbimet ndërkombëtare të lajmeve nuk i bënë aspak mirë autoritetit ndërkombëtarë të Kosovës. Nuk e bën Kosovën të duket si një vend që është në rrugën e saj evropiane. Ne e dënojmë dhunën dhe u bëjmë thirrje të gjithë atyre që janë të përfshirë, posaçërisht organizatorëve të protestave të jenë të përgjegjshëm dhe të distancojnë veten nga dhuna që shpërtheu.

Zëri i Amerikës: Kishim qëndrime të ndryshme ndërmjet qeverisë që thotë se organizatori i protestave ishte fajtor dhe opozitës që thotë se ishin qeveria dhe policia fajtore. Kush është fajtor në fakt për dhunën?

Tracey Jacobson: Faji për dhunën atyre që njerëzve që hodhën gurë, që thyen xhamat në ndërtesën e qeverisë, që dëmtuan sheshin Skenderbej, sulmuan restorantin dhe sulmuan pronarin e tij, ata individë. Unë mendoj se ishin 200 -300 syresh që duhet fajësuar për dhunën. Vëzhguesit ndërkombëtarë që ishin në qendrën komanduese gjatë protestës, gjykuan se përgjigja e policisë ishte tërësisht e përshtatshme për kushtet. Kudo në botë kur turma bëhet e dhunshme dhe hedh gurë, policia duhet të përdorë metodat e saj për shpërndarjen e turmës. Mendoj se duhet të përqendrohemi tek ata njerëz që ushtruan dhunë.

Zëri i Amerikës: Zonja ambasadore, çfarë duhet të bëjë qeveria për ta tejkaluar situatën?

Tracey Jacobson: Çdo qeveri duhet të përfshijë popullatën e saj. Kjo është kështu madje edhe për qeveritë si kjo që ka filluar punën tash një muaj e gjysmë. Ata duhet ta përfshijnë popullatën drejtpërdrejtë, ndërmjet medieve, t’ia bëjnë me dije asaj se çfarë planesh kanë, se çfarë po bëjnë saktësisht për çështjet që njerëzve u interesojnë, siç janë zhvillimi ekonomik, vendet e punës, luftën kundër korrupsionit dhe vendosjen e sundimit të ligjit. Po ashtu ata duhet ta dëgjojnë publikun. Çdo qeveri duhet ta bëjë këtë.

Zëri i Amerikës: Publiku, pra protestuesit në këtë radhë, partitë opozitare dhe shoqëria civile kërkojnë shkarkimin e ministrit për komunitete dhe kthim, Aleksandër Jablanoviç, i cili pati një qëndrim ofendues ndaj protestuesve në Gjakovë. Si duhet të zgjidhet kjo situatë? A duhet të shkojë ministri Jablanoviç?

Tracey Jacobson: Pikë së pari, mund të thoni se ministri Jablanoviç apo Trepça ishin arsyeja paraprake apo preteksti, por nuk mendoj se ky është i gjithë rrëfimi. Mendoj se ka shumë njerëz që janë ndjerë të frustruar para së gjithash me gjashtë muaj mosveprimi gjatë procesit të ngritjes së qeverisë dhe ka njerëz që besojnë sikurse unë, se zhvillimi ekonomik, krijimi i vendeve të punës, lufta kundër korrupsionit dhe përmirësimi i sundimit të ligjit, janë gjera që duhet të lëvizin shumë më shpejtë. Nuk do të thosha që këto protesta janë vetëm për Jablanoviçin. Unë do të thosha se deklarata e tij ishte e pamatur dhe fyese për shumë njerëz. Unë e vlerësoj fyese. Kërkim falja e parë nuk ishte e mire dhe pastaj ai kërkoi falje me të vërtetë. Por, ministri Jablanoviç është emëruar nga qeveria, është votuar në Parlament. Ky është një proces demokratik dhe ai mund të largohet nëpërmjet një procesi në qeveri. Ky është vendim që duhet të merret nga qeveria. Nuk besoj që ndonjë qeveri merr vendime për personelin në bazë të protestave në rrugë ku njerëzit hedhin gurë.

Zëri i Amerikës: Por a ka kjo qeveri një fuqi të tillë që të shkarkojë ministrin Jablanoviç duke pasur parasysh që Lista serbe mund të kushtëzojë pjesëmarrjen në parlament dhe kjo mund të çojë në krizë politike?

Tracey Jacobson: Nuk dua të përfshihem në situata hipotetike. Mendoj se koalicioni qeverisës po qëndron dhe ende po punon. Ata po komunikojnë dhe kanë shumicën në parlament, bazuar në zgjedhjet demokratike të vitit të kaluar. Tani kemi qeverinë e partive fituese që u jep njëfarë fuqie. Por, sa u përket çështjeve të brendshme të personelit, janë çështje të tyre të brendshme.

Zëri i Amerikës: Trepça ishte shkaku i dytë për protestat. Opozita akuzon qeverinë se u zmbraps para trysnisë që erdhi nga Beogradi për Trepçën. Ju ishit e përfshirë në debatet rreth kësaj çështjeje, Si e shihni këtë proces?

Tracey Jacobson: Ajo që qeveria u përpoq të bëjë ishte shmangia e likuidimit të Trepçës. Dhe kjo ndodhi për shkak të vendimit te Dhomës së posaçme të Gjykatës së lartë e cila tha që nëse Trepça nuk riorganizohet nga Agjencia e Privatizimit të Kosovës deri më 2 shkurt, ajo do të likuidohet, që do te ishte përfundimi më i keq për të gjithë. Me fjalë të tjera, ajo do të falimentonte, punëtorët nuk do të kishin punë dhe paga. Prandaj, qeveria u përpoq të gjej rrugë për të shmangur një skenar të tillë. Një nga idetë ishte shtetëzimi, që u paraqit në parlament dhe pastaj u tërhoq. Unë mendoj se shtetëzimi është ide e keqe. Pikë së pari do të vinte buxhetin e qeverisë para pretendimeve të kreditorëve, përfshirë ata nga Serbia dhe Greqia që mund të arrinin në 1 miliardë e 400 milion dollarë. Ne e dimë që buxheti i qeverisë është nën trysni dhe qartazi nuk ka mundësi që taksapaguesit e Kosovës të paguajnë një borxh të tillë. Së dyti, shtetëzimi i një ndërmarrje të rëndësishme si Trepça, do të dërgonte një sinjal rrëqethës tek investitorët për drejtimin e ekonomisë së Kosovës. Ekonomia e Kosovës është e orientuar në rrugën evropiane, në ekonominë e tregut, rritjen ekonomike të udhëhequr nga sektori privat. Dhe kthimi në komunizëm apo socializëm jo vetëm nuk do të ndihmonte Trepçën, por as nuk do të tërhiqte investimet për të cilat ka nevojë Trepça për të aktivizuar tërë mundësitë e saj. Mendoj se investuesit tashmë janë të frikësuar nga zhvillimet e së shtunës dhe të martës. Mendoj se vendimet ekonomike duhet të merren asisoj që të nxisin në vend që të shkurajojnë investuesit.

Zëri i Amerikës: Ambasadore, Beogradi kërkon që çështja e Trepçës të shtrohet në tryezën e bisedimeve në Bruksel që pritet të vazhdojnë me 9 shkurt, ndërsa në Prishtinë ka reagime kundër një mundësie të tillë. Si mendoni ju a mund të jetë Trepça pjesë e këtyre bisedimeve?

Tracey Jacobson: Dialogu është vendosur duke u lehtësuar nga Bashkimi Evropian, por çështjet mund të vihen në rend dite nëse pajtohen të dyja palët. Kjo qartazi nuk ndodhë sa i përket Trepçës. Sa i përket bisedimeve, kemi një takim tjetër më 9 shkurt, që do të jetë i pari në pothuaj një vit. Shpresoj të shohim përparim. Ka shumë gjera në pritje nga marrëveshja e prillit të vitit 2013. Palët ishin afër marrëveshjes për drejtësinë para një viti, por nuk e përmbyllën. Janë edhe çështjet e energjisë, telekomunikimeve, sigurimeve. Këto janë të gjitha gjëra të rëndësishme që duhet të zgjidhen dhe mund të zgjidhen nëse të dyja palët ulen në tryezë të gatshëm që të punojnë shumë, të dëshmojnë fleksibilitet maksimal dhe të ecin përpara. Do doja të shihja përmbylljen e këtyre çështjeve para se të hidhen gjëra të reja në tryezë, sepse do të ishte mirë të ketë rrëfime suksesi nga bisedimet, posaçërisht kur kemi një lehtësues të ri, përfaqësuesen e re të lartë të BE-së.

Zëri i Amerikës: Por jo Trepça?

Tracey Jacobson: Trepça me sa e di unë nuk është në tryezën e bisedimeve më 9 shkurt, sepse, siç thashë, ata duhet të përfundojnë çështjet që janë në rendin e ditës për të cilën tashmë janë pajtuar dhe nuk ka marrëveshje për asnjë çështje të re në bisedime dhe mendoj se përqendrimi duhet të jetë në përfundimin e punës së filluar.

Zëri i Amerikës: Zonja ambasadore, janë paralajmëruar protesta të reja nga lëvizja Vetëvendosje dhe partitë tjera opozitare. Nesër janë paralajmëruar greva njëditëshe në shëndetësi, në arsim, pra ka një grumbullim problemesh përballë qeverisë. Çfarë duhet te jetë qasja e qeverisë por edhe opozitës në këtë situatë?

Tracey Jacobson: Është me rëndësi gjithmonë që qeveria dhe opozita te kenë dialog mes vete. Nuk jam e sigurt që kjo po ndodhë. Por, unë i trimëroi të dyja palët që të ulen, të bisedojnë dhe të zgjidhin dallimet. Protestat janë rrugë e mire për qytetarët që të përfshihen dhe të ngritin shqetësimet, por, në fund të fundit, politika bëhet në institucionet e Kosovës, jo në rrugë. Ata duhet të takohen në kuadër të kushtetutës dhe institucioneve të Kosovës. Sa i përket protestës së javës së ardhshme, do t’u bëjë thirrje të gjithë organizatorëve që të marrin të gjitha masat për të shmangur dhunën dhe kjo përfshinë dërgimin e mesazheve të qarta tek pjesëmarrësit se ata nuk e pranojnë dhunën, të distancohen nga dhuna dhe dëmet që kanë ndodhur në dy protestat paraprake. Shpresoj se do të shohim protestë paqësore, që nuk frikëson banorët e Prishtinës dhe nuk dërgon mesazhe të këqija për Kosovën si shtet bashkëkohor në pjesën tjetër të botës.

Zëri i Amerikës: Ju jeni takuar me zotin Ramush Haradinaj, a keni marrë siguri për një gjë të tillë?

Tracey Jacobson: Ne kishim një takim shumë te mirë. Nuk i diskutoj hollësitë e takimeve të mia private diplomatike, por sigurisht që i kam bërë thirrje që të jetë më i qartë për faktin që partia e tij nuk pranon dhunën. Ai foli për dhunën e policisë, por jo për dhunën nga protestuesit. Ai tha se do të jetë më i qartë për këtë në të ardhmen. Ndava me të po ashtu vlerësimet tona se policia është sjellë në mënyrë të përshtatshme. Ka pasur disa gabime nga individë të policisë, por inspektorati policor i Kosovës dhe EULEX-i po shohin pamjet dhe nëse vërtetohet se policët kanë përdorur forcë të tepruar apo që kanë vepruar në mënyrë të papërshtatshme, do të përballen me procesin e zakonshëm disiplinor. Mendoj që është me rëndësi për të gjithë udhëheqësit politik, që të bëjnë thirrje për qetësi dhe të refuzojnë dhunën. Nëse duan që mesazhet e tyre të dëgjohen, kjo do të ndodhë më mirë në protestë paqësore. Kemi pasur protesta të mëdha që kanë çuar në ndryshime, po mendoj, në vendin tim për të drejtat qytetare në vitin 1964, Mahatma Gandhi në Indi, ishin protesta paqësore dhe këto janë ato lloj protesta ku ankesat mund të zgjidhen në dialog politik.

Zëri i Amerikës: Organizatori kryesor është lëvizja Vetëvendosje dhe zoti Albin Kurti. Pse nuk takoheni me të, të bisedoni me të dhe t’i bëni edhe atij të njëjtat kërkesa?

Tracey Jacobson: Nuk jam takuar me zotin Kurti për arsyet e njëjta që i kam shpjeguar shumë herë dhe kjo për shkak së po pres që Vetëvendosje të heq dorë nga dhuna si taktikë. Jo vetëm dhunës që ka ndodhur në qershor të vitit 2013 ndaj disa deputetëve të parlamentit dhe disa vëzhguesve ndërkombëtarë, por dhunës në përgjithësi. Qartazi nuk kam dëgjuar askënd nga Vetëvendosja të jetë distancuar nga dhuna që ndodhi të shtunën apo të martën. Ishte një grup prej 200-300 vetash. Nuk e di me kë janë të lidhur apo nga kush marrin urdhra. Por, mendoj se është me rëndësi që organizatorët ta distancojnë veten nga veprimet e tilla. Ne kemi parë se për dallim nga e shtuan, të martën kishim shumë më pak protestues. Grupet e shoqërisë civile vendosën që nuk duan të përfshihen në organizimin e tyre. Po ashtu edhe sindikatat e minatorëve nuk ishin atje, pavarësisht se Trepça ishte një nga pretekstet për protestë. Mendoj se kjo është njëfarë shenje se njerëzit nuk duan të jenë të njëjtësohen me dhunën.

Zëri i Amerikës: Sido qoftë, është thënë shpesh edhe nga personalitete politike në botë është thënë se qeveria është përgjegjëse meqë ajo ka edhe autoritetin edhe përgjegjësinë. Çfarë duhet të bëjë qeveria në afat të shkurtër për të shtendosur situatën në Kosovë?

Tracey Jacobson: Gjithmonë pas një zhvillmi si këto të fundit ka një raport që shërbimet e sigurisë e bëjnë, policia e bën për të parë nëse janë nxjerrë mësimet. Marr vesh që qeveria po i zgjatë dorën opozitës. Nuk jam e sigurt nëse ka dalë gjë nga kjo, por ata duhet ta bëjnë këtë. Sigurisht unë i kam nxitur të dy, zotin Mustafa dhe zotin Haradinaj dje që të angazhohen në dialog brenda institucioneve. Dhe, siç thashë, çdo qeveri duhet të jetë e gatshme të punojë me publikun. Nga ajo çfarë kamë parë ditëve të fundit nga paraqitjet e qeverisë në intervista në televizione, mendoj se ata po përpiqen të angazhohen më shumë në mënyrë të drejtpërdrejtë me qytetarët. (voa)

Uniteti i brishtë i BE-së

Vëzhguesit druhen, se kundërshtimi i Athinës për sanksione të reja ndaj Rusisë, mund të shënojë fundin e unitetit në BE. Siqodoftë në Bruksel u arrit kompromisi dhe u evitua një përplasje edhe më e madhe.Diskutimet nuk ishin dhe aq të lehta, tha ministri i Jashtëm gjerman Frank-Walter Steinmeier, pas takimit të posaçëm me homologët e tij evropianë në Bruksel. “Ishte shumë e vështirë të ruhej uniteti”, shtoi ai. Në takimin me dyer të mbyllura ka pasur një grindje serioze me ministrin e Jashtëm grek Nikos Kotzias, pranoi edhe e ngarkaura e posaçme e BE për Politikën e Jashtme dhe Sigurinë, Federica Mogherini. Por në fund u arrit megjithatë një marrëveshje e përbashkët. Lista aktuale e sanksioneve që përfshin 132 persona dhe 28 organizata e sipërmarrje duhet të zgjerohet me disa emra të tjerë të mbështetësve të rebelëve pro-rusë në Ukrainë. Emrat e rinj kanë mbetur deri tani sekretë, me qëllim që personat e prekur të mos e sigurojnë pasurinë e tyre. Ndërkohë që sanksionet e aktuale, afati i të cilave skadonte në mars, do të shtyhen deri në shtator 2015.
Konsultime të mundimshme
Steinmeier shpjegoi se ai ka folur edhe me homologun e tij grek. As vendet e tjera në tryezën e bisedimeve nuk e kanë pasur lehtë të gjejnë një kompromis dhe një linjë të përbashktë. Fjala është për Austrinë, Slloveninë dhe Sllovakinë, të cilat dyshojnë në logjikën dhe efikasitetin e sanksioneve ndaj Rusisë. Në fund Steinmeier mundi ta bindë edhe homologun Nikos Kotzias për domosdoshmërinë e unitetit.

Më parë ministri gjerman pati zhvilluar edhe një bisedë kokë më kokë me homologun e tij grek. Steinmeier i ka përdorur të gjitha mundësitë, edhe ato njerëzore, për të evituar një përçarje edhe më serioze brenda BE-së, sa i përket sanksioneve kundër Rusisë. Më parë Greqia kishte paralajmëruar veton ndaj kërkesave për sanksione të reja dhe për vazhdimin e sanksioneve aktuale ndaj Rusisë.
Qëllimi nuk është arritur
Athina në fund e ndryshoi qendrimin, por sanksionet e reja të rëndësishme ekonomike kundër Rusisë ishin të pamundura. Minsitri i Jashtëm gjerman u detyrua të kënaqet me një zgjidhje minimale. Kjo vlen edhe për vendet baltike dhe Poloninë, të cilat angazhohen për një kurs më të ashpër ndaj Rusisë. “Vetëm kur të ndodhë ndonjë ofensivë e re në Mariupol apo në rajonet e tjera do të bëhet e qartë se duhen ndërmarrë masa më të ashpra”, thotë Steinmeier. Ai shtoi se homologu i tij grek do të ketë “hapësirë të mjaftueshme që në debatet e ardhshme të vendoset ashtu siç mendon Europa”. Nga mesi i shkurtit do të zhvillohet samiti i radhës i kryeministrave të BE-së. Pra mosmarrëveshjet me Greqinë për çështjen e Rusisë nuk kanë përfunduar.
Putin i fitues i zgjedhjeve në Greqi?
Shumë vëzhgues në Europë kanë qenë në Bruksel të alarmuar, për shkak të shtimit të influencës ruse në BE, përmes Greqisë. Por mendimet ndahen sa i pëkret rolit të Athinës.
“Këtë politikë e shohim më shumë se një kërcënim për Greqinë, nëse ajo vazhdon të mos jetë solidare me vendet e tjera. Kjo mund të rezultojë në fund të shkurtit me shkurtimin e paketës për ndihma, thotë Elmar Brok, kryetar i Komisionit të politikës së Jashtme në Parlamentin Europian. Kjo mund të rrezikojë pra stabilitetin financiar të Greqisë. Brok beson se veprimi i përbashkët është në interesin e Greqisë.
Vëzhguesit kanë frikë se presidenti i Rusisë Vlladimir Putin dotë vazhdojë me presione dhe mjete të ndryshme të influencës ndaj partive ekstremiste, për të fituar mbështetës brenda familjes europiane. Në këtë radhë bën pjesë edhe partia Syriza. Tani po dëshmohet se mosmarrëveshjet nuk kanë të bëjnë vetëm me Ukrainën. Moska do që mosmarrëveshjet ideologjike t’i fusë në Euorpë. Ndërsa BE-ja duhet të gjejë përgjigje ndaj kësaj sfide. (dw)

Majori shqiptar në trafik droge

Instruktori i bazës ajrore të Farkës në Tiranë, Sokol Feka, dyshohet të ketë mbetur i vdekur në Spanjë ku dje është rrëzuar një helikopter i cili transportonte sasira të mëdha marijuhanë. Feka ishte në radhët e ushtrisë prej 18 viteshNjë major i ushtrisë shqiptare, dyshohet të jetë i përfshirë në një trafik droge. Instruktori i bazës ajrore të Farkës, Sokol Feka, rezulton të jetë, sipas të dhënave të deritanishme, një nga dy personat që kanë humbur jetën dje në Spanjën jugore, ndërsa një helikopter i cili transportonte sasi të mëdha marijuhanë nga Maroku, ka rënë pasi është përplasur me një shtyllë elektrike. Helikopteri i cili mendohet se drejtohej nga Feka, po ndiqej nga një tjetër mjet ajror i Guardia Civil spanjolle.

Lajmi është bërë nga kryeministri Edi Rama në sallën e parlamentit, i cili tha se njoftimi kishte mbërritur në rrugë zyrtare nga Spanja. Ushtaraku Feka ishte që prej 18 vitesh pjestar i forcave të armatosura të Shqipërisë, dhe në vitin 2009 ai kishte marrë gradën major. Ministria e Mbrojtjes njoftoi se majori ishte me leje të zakonshme që prej datës 12 janar, por se ai nuk kishte njoftuar, sikundër kërkon rregullorja, se do të dilte jashtë vendit. Ministria saktësoi më tej se i ka kërkuar policisë të verifikojë hyrje daljet e tij në kufi.

Për momentin mbetet ende e paqartë se si ushtaraku shqiptar ishte përfshirë në një aktivitet të tillë, ndërsa rasti nuk kaloi pa replika edhe gjatë seancës së parlamentit. Nga ana e tij, përmes një statusi në Facebook, kryetari i opozitës Lulzim Basha, deklaroi se sipas tij “përfshirja e efektivit të Forcave të armatosura në trafikun ndërkombëtar të drogës, ashtu si avionët e drogës një vit më parë në aeroportin ushtarak të Gjadrit, njollosin rëndë emrin e Ministrisë së Mbrojtjes dhe të Shqipërisë në arenën ndërkombëtare. (voa)