Kategoritë: Sport

Cana s’ndryshon qëndrim: Kombëtarja? Kemi vetëm një

cikaQë prej të dielës, “Kuqezinjtë” janë vendosur në Bad Waltersdore në Austri për fazën përgatitore për Europianin francez.

Në konferencën e parë për shtyp nga Austria, kapiteni i kombëtares, Lorik Cana foli për fazën përgatitore, sfidën më të rëndësishme dhe kundërshtarin më të fortë.

Cana thotë që pjesëmarrja në këtë event kaq të rëndësishëm bën krenarë jo vetëm futbollistët, por të gjithë shqiptarët. Ai shpreh bindjen në një përfaqësim dinjitoz.

“Jemi rritur shumë dhe niveli i futbollit tonë është rritur. Sot ka shumë talente shqiptare dhe ne kemi dëshirën që të kemi akoma më shumë talente si nga Shqipëria ashtu edhe nga Kosova”, thotë Cana.

Ndeshja më e rëndësishme?

“Ndeshja e parë është më e rëndësishmja dhe ajo e para është që ne jemi përqendruar me një kundërshtar të vështirë. Ne jemi rritur dhe ajo përballje do të jetë ndeshja më e rëndësishme e kompeticionit tonë”, shton kapiteni “kuqezi”.

Kur vjen puna tek një apo dy “kombëtare”, Loriku nuk ka ndryshuar qëndrim.

“Të gjithë e dinë mendimin tim dhe kam vite që e them. Që nga krijimi i FSHF, Shqipëria ka patur gjithmonë përfaqësuese dhe asnjëherë kombëtare. Kemi vetëm 4 vite që kemi një kombëtare mbarëshqiptare me lojtarë nga Kumanova, Presheva, Shqipëria, Kosova, Maqedonia dhe diaspora. Është hera e parë që e kemi këtë kombëtare të bashkuar dhe shihet që të bashkuar arrijmë gjëra të mëdha”, thotë ai.

Për kapitenin e Kombëtares njohja e Kosovës nga FIFA dhe UEFA ka më shumë rëndësi për të rinjtë që luajnë atje futboll, që tashmë e kanë një të ardhme, sesa fakti që Kosova do të ketë një përfaqësuese të veten.

“Kam qenë me mendimin që elita duhet të qëndrojë me kombëtaren shqiptare. Kam qenë i mendimit që lojtarët më të mirë të rrijnë me kombëtaren shqiptare. Ndoshta në të ardhmen mund të bashkohen federatat, por kjo nuk i takon brezit tonë”, shtoi ai.

Sezoni që la pas ka patur sfidat e veta, sidomos sa i takon aspektit fizik. Megjithatë, Loriku thotë se ka luajtur mjaftueshëm për të qenë i gatshëm për Europian.

“Kam patur probleme me mesin, por tashmë jam në kushtet më të mira për të luajtur këtë Europian. Të gjithë do të jemi gati për në Europian”, thotë ai.

/ Top Channel

Tifozët maqedonas: “Shqiptarët e mirë janë shqiptarët e vdekur”

patrioti mkUrrejtja ndaj shqiptarëve nga fqinjët ballkanik ka dalë në pah përsëri në një ndeshje futbolli të zhvilluar dje në Maqedoni.

Derbi kryesor për titull të ligës ndërmjet Vardarit dhe Shkëndijes i zhvilluar dje në Shkup nuk ka kaluar pa incidente, pasi tifozët e ekipit maqedonas kanë kënduar kore raciste kundër tivozëve shqiptar të ekipit tetovar, transmeton Koha.net.

Thirrja tashmë e njohur “Shqiptarët e mirë janë shqiptarët e vdekur” ishte kënga raciste që ata këndonin kundrejt tifozëve mysafirë, të cilët edhe i sulmuan fizikisht në vazhdim të takimit.

Prezent në këtë takim ishte edhe kryetari i Prishtinës, Shpend Ahmeti, i cili është fans i Shkëndijes. Ai përmes një postimi në Facebook ka treguar rrjedhën e kësaj ndeshje.

“Dje isha në ndeshjen vendimtare të kampionatit në mes të Vardarit dhe Shkëndijës në Shkup. Tifozëve të Shkëndijës i ishte ndaluar hyrja në stadium ndërsa aty ishin mbledhur rreth 2 mijë tifozë të Vardarit. Ne ishim rreth 20 shqiptarë, mysafirë të klubit Shkëndija të cilëve udhëheqësia e Vardarit na kishte vendosur në mes të tifozëve të Vardarit”, ka shkruar Ahmeti.

Ai ka thënë se gjatë gjithë lojës këndimet e tifozëve të Vardarit ishin të llojit “shqiptarët e mirë janë shqiptarët e vdekur”.

“Pasi shënoi Vardari, gjërat u tensionuan edhe më shumë sepse ata e kishin të qartë që aty jemi rreth 20 shqiptarë. Kur filluan të këndojnë se të gjithë maqedonasit të ngritën në këmbë e vërtetuan se ishim shqiptarë. Mirëpo incidenti ndodhi kur Shkëndija shënoi golin e barazimit, ndërsa kryetari i klubit të Shkëndijës u ngrit në këmbë për të festuar. Që nga ai moment, filluan të gjuajnë gjësende në drejtim tonin, duke goditur disa nga personat që ishin aty. Policia erdhi me vonesë, dhe u mundua t’i qetësojë por pa sukses. U detyruan të na nxjerrin nga ndeshja për sigurinë tonë”, ka shkruar më tutje kreu i Prishtinës.

Shpend Ahmeti shkupAhmeti më tutje ka shtuar: “Jam i vetëdijshëm që huliganë të futbollit ka kudo në botë. Megjithatë, ajo që nuk mund të tejkalohen janë dy gjëra: 1. Urrejtja ndaj shqiptarëve është në maksimum dhe në situata të tilla shpërfaqet e pastër. 2. Përfaqësimi shqiptar në Maqedoni është në gjendje shumë të dobët. Koketimi i partive tona për qeveri pa kërkesa të qarta dhe parimore të shqiptarëve do të sjellë më shumë diskriminim dhe urrejtje ndaj shqiptarëve e jo vetëm në ndeshje futbolli. Unë mund të jem atje vetëm disa orë, një herë në dy tre muaj, por shqiptarët e Maqedonisë atje jetojnë në kushte të tilla gjatë tërë vitit, brenda e jashtë stadiumit”.

Më këtë rast ka reaguar edhe klubi i Shkëndijes përmes faqes zyrtare, duke treguar se disa nga anëtarët e saj të kryesisë kanë pësuar lëndime të lehta trupore.

Goli i Armend Alimit në minutën e 39-të i siguroi një pikë Shkëndijes që mban vendin e dytë me 63 pikë, dy më pak se Vardari. (koha)

“Triumf”, fanela europiane e Kombëtares kuqezi për “Euro 2016”

fanellat kuq e ziPër herë të parë në një finale të kampionatit europian, Kombëtarja shqiptare e futbollit do të luajë me një fanelë të personalizuar, e cila është dizenjuar nga një kompani shqiptare.

“Pas një pune disamujore, arritëm të bënim një ndërthurje me 3 elementët kryesorë. Elementë të folklorit, të frymës bashkëkohore, si dhe elementë të kombëtares sonë. Në këtë mënyrë lindi edhe uniforma e kombëtares sonë, të cilën ne e quajtëm triumf”, tha Alban Fejzaj, drejtor kreativ.

Pas shumë kërkesave, Federata Shqiptare e Futbollit vendosi që t’ia besojë për 5 vitet e ardhshme këtë detyrë kompanisë italiane “Macron”.

“Besoj se ky është një moment historik për Shqipërinë, e cila merr pjesë për herë të parë në një Europian. Për këtë, ne jemi shumë të kënaqur që bëhemi pjesë e këtij projekti”, tha Gianluca Pavanelli, president i “Macron”.

***
Janë prezantuar këtë të premte tri fanelat me të cilat do të luajë Kombëtarja shqiptare në Europianin francez.

Bëhet fjalë për një dizajn krejtësisht të ri dhe, ashtu siç pritej, me një shqiponjë të vendosur në mes në të trija fanelat që mbërrijnë në tri ngjyra, ajo tradicionale kuqezi, e dyta që është e bardhë dhe fanela e tretë që është e zezë, por me nuanca më të theksuara të shqiponjës në pjesën e përparme (kliko këtu).

Fanela është një ndërthurje mes traditave shqiptare, me shqiponjën si simbol, dhe modernes, pasi dizenjo e saj është vërtet unike. Gjithashtu në brendësi, fanela ka një shkrim të veçantë në gjuhën shqipe, që do të jetë frymëzues për të gjithë personat që do ta mbajnë veshur atë.

Fanelat janë dizenjuar nga kompania “Pik” dhe prodhuar nga “Macron”. FSHF ka bërë të ditur se ka arritur dhe një marrëveshje 5-vjeçare me sponsorin teknik “Macron”, me një vlerë prej 6 milionë eurosh.

/ Top Channel

Zvicër-Shqipëri, sfida çoroditëse…sipas DailyMail

kombetarjaShorti i Parisit dha verdiktin e tij për ndarjen e grupeve të 24 skuadrave pjesëmarrëse të Euro 2016, duke shkruar historitë e para, histori që kanë të bëjnë me disa ndeshje që do të përjetohen në mënyrë të veçantë.

Ajo që ka tërhequr më shumë vëmendjen në media është pikërisht përballja e 11 qershorit 2016 në Lens, mes Shqipërisë dhe Zvicrës. DailyMail i ka dedikuar një artikull kësaj përballjeje, që e cilëson si një prej ndeshjeve më çoroditëse të Europianit të Francës.

Kjo për faktin se Shqipëria do të hedhë në fushën e lojës 6 lojtarë të lindur në Zvicër, ndërsa helvetët kanë në përbërje futbollistë, të cilët kishin mundësitë të zgjidhnin kundërshtarët e tyre për të luajtur.

Shqipëria është mijëra kilometra larg Zvicrës, por emigracioni në masë nga Ballkani ka bërë  në vendin helvet të dalin dhjetëra futbollistë të talentuar me të drejtën për të bërë zgjedhjet e tyre. Rasti që spikat më shumë është ai i vëllezërve Xhaka, Granitit dhe Taulantit, që do të jenë kundërshtarë në sfidën e Grupit A.

Nuk është hera e parë që dy vëllezër luajnë kundër njëri-tjetrit dhe këtë e vërteton shembulli i vëllezërve, Boateng në Botërorin 2014, por është hera e parë që një gjë e tillë ndodh mes dy përfaqësueseve nga kontinenti europian e për më tepër në ngjarjen më madhore të tij.

Graniti Xhaka do të luajë për Zvicrën duke hedhur poshtë mundësinë për të veshur fanelën e skuadrës së vendit të origjinës, ndërsa Taulant Xhaka, që edhe pse ka luajtur në ekipet e të rinjve të Zvicrës, në fund vendosi të mbrojë ngjyrat kuqezi

Edhe Amir Abrashi më parë ka luajtur për Zvicrën, madje ai ka qenë edhe në lojërat Olimpike 2012, por kjo nuk e pengoi atë që në fund të zgjedhë Shqipërinë.

Zvicra nga ana e saj beson shumë te Xherdan Shaqiri, i lindur në Gjilan të Kosovës nga prindër shqiptarë, të cilët u transferuan në vendin helvet, kur ai ishte vetëm 1 vjeç.

Pajtim Kasami ka lindur në Zvicër me prindër shqiptarë, ndërsa Valon Behrami u transferua kur ishte 5 vjeç.

/ Top Channel

“Francë 2016”, 24 kombëtaret presin shortin. Shqipëria, në vazon e katërt

shorti
Ekipet kombëtare, plot 24 që janë kualifikuar për në fazën finale të kampionatit europian “Francë 2016”, mes të cilave për herë të parë edhe Shqipëria e Giovanni De Biasit, të shtunën më në fund do të mësojnë kundërshtarët e tyre në këtë Europian.

Shorti i Parisit do të shënojë dhe fillimin e kompeticionit, që zhvillohet mes 24 skuadrash, e para kjo që nga krijimi i kësaj ngjarjeje sportive. Për shkak të koefiçentit të ulët, kuqezinjtë tanë do të jenë në vazon e katërt, së bashku me Turqinë, Republikën e Irlandës, Islandën, Uellsin dhe Irlandën e Veriut.

Gjatë momentit të hedhjes së shortit, në Pallatin e Kongreseve në Paris, Shqipëria do të përfaqësohet nga presidenti Armando Duka, trajneri De Biasi dhe menaxheri i kombëtares, Alban Bushi.

Në vazon e parë, Francës – që është edhe vendi organizator, – i bashkohen Spanja, Gjermania, Anglia, Belgjika dhe Portugalia.

Në vazon e dytë janë të tjerë emra të mëdhenj të futbollit europian, si Italia, Zvicra, Rusia, Austria, Kroacia dhe Ukraina.

Edhe vazoja e tretë nuk mbetet prapa, përsa i përket peshës që kanë këto kombëtare në Europë. Një nga kundërshtarët e Shqipërisë në “Francë 2016” mund të jetë edhe Suedia, apo Republika Çeke, Polonia, Rumania, Sllovakia e Hungaria.

shortin e së shtunës, që do të vijë për shqiptarët drejtpërdrejt në Top Channel, duke filluar nga ora 17:30, 24 përfaqësueset pjesëmarrëse do të ndahen në 6 grupe, me nga 4 skuadra. Sipas rregullit të ri të UEFA-s për këtë kompeticion, dy të parat e çdo grupi kualifikohen drejtpërdrejt në fazën tjetër, ndërkohë që një mundësi të mirë për të vazhduar më tej në “Francë 2016” do ta kenë edhe 4 skuadrat më të mira ndër të tretat e të gjitha grupeve.

Një skemë kjo, që mban të hapur deri në ndeshjen e fundit në grup shpresat e skuadrave të vogla, përfshi edhe kuqezinjtë tanë, për të qëndruar sa më gjatë në Europianin e parë ku marrim pjesë.

/ Top Channel

Pritje madhështore kuqezinjve, Cana: Krenar që do të luaj në stadiumin e Prishtinës

mire se vini ne shqiperi plisatKombëtarja shqiptare ka arritur në Prishtinë pak pas orës 17:00, ku është pritur në mënyrë madhështore nga “Plisat” dhe një numër tifozësh, pranë hotelit ku ata do të qëndrojnë.

Kapiteni i kombëtares shqiptare, Lorik Cana, me të arritur në Prishtinë tha se është i lumtur, që nesër do të zbresë në stadiumin e Prishtinës, duke shtuar se ky stadium është i lidhur me të dhe familjen e tij, sepse edhe babai i tij, Agim Cana ka qenë lojtar i Prishtinës.

“Jam krenar që jam në një vend dhe në një stadium me një histori të ngushtë, ku unë kam debutuar dhe ku babai im ka qenë pjesë e ekipit që i përket ky stadium. Shto këtu, në një moment kur kombëtarja jonë ka arritur një sukses dhe i ka bërë krenarë të gjithë shqiptarët me kualifikimin në Europianin e Francës”, ka thënë Cana.

“Pritja ka qenë shumë e mirë nga çdo person që kemi takuar, çdo makinë na kanë përshëndetur dhe të gjithë njerëzit, ashtu si dhe ‘Plisat’, ndaj dhe ishte vërtet një pritje fantastike”, ka deklaruar Cana.

/ Top Channel

TIFOZAT KUQEZI NË PRISHTINË, POR JO NË STADIUM

Tifo-grupi më i organizuar i kombëtares shqiptare, “Tifozat Kuq e Zi”, kanë bërë të ditur se më 13 nëntor do të jenë në Prishtinë…

Tifo-grupi më i organizuar i kombëtares shqiptare, “Tifozat Kuq e Zi”, përmes një deklarate për shtyp kanë bërë të ditur se më 13 nëntor do të jenë në Prishtinë, për t’iu bashkuar festimeve mbarëkombëtare për kualifikimin historik në finalet e “Euro 2016”, por jo në stadiumin e Prishtinës, gjatë kohës që do të luhet miqësorja vëllazërore, Kosovë-Shqipëri. Ata ngulin këmbë se duhet të kemi një kombëtare e jo dy, që të përfaqësojë flamurin kuqezi, atë të kombit tonë.

“Këtë të premte, kampionët tanë zhvillojnë ndeshjen e parë, pas kualifikimit historik në Kampionatin Europian “Francë 2016”, në shtëpinë e tyre të dytë, AUTOKTONE, në Prishtinë. Ndeshja do të jetë e karakterit festiv, ndaj një grupimi tjetër të futbollistëve shqiptarë. Që nga themelimi, një ndër misionet bazë të “Tifozave Kuq e Zi” ka qenë që shqiptarët, edhe pse të ndarë në disa shtete, të kenë vetëm një kombëtare dhe të përfaqësojmë vetëm një flamur. Ne vazhdojmë të besojmë në kauzën tonë dhe, për këtë arsye, të premten nuk do të jemi prezent si grupim në stadiumin e Prishtinës, por sigurisht do të jemi prezent në Prishtinë për festën e madhe.

Që nga themelimi dhe deri më sot, ne kemi përkrahur vetëm Kombëtaren Shqiptare dhe skuadrat shqiptare në Europë, por asnjëherë të vetme nuk kemi qenë në tribuna, kur në fushë kanë qenë dy skuadra, me futbollistë shqiptarë. Dhe, me gjithë dëshirën që të festojmë, nuk do të mundemi të jemi aty. “Tifozat Kuq e Zi” u bëjnë thirrje te gjithë shqiptarëve në Kosovë të shfrytëzojnë praninë e kombëtares në Prishtinë dhe të festojnë në numër sa më të madh. Edhe ne, si grupim, do të jemi të pranishëm në Prishtinë dhe do të festojmë të gjithë së bashku këtë arritje historike të kombëtares tonë.

Për fund, “Tifozat Kuq e Zi” vazhdojnë të besojnë se sot, më shumë se kurrë, janë krijuar kushte që të kemi vetëm një kombëtare. Ne duhet të vazhdojmë të përkrahim ekipet shqiptare të të gjitha trevave, që do të luajnë në arenën ndërkombëtare, dhe të mos mbesin të izoluara. Sidoqoftë, në përfaqësimin si komb, duhet të jemi një dhe vetëm një. Kombëtarja që e kemi tani është shembulli më i mirë i bashkimit dhe suksesit. Gëzuar shqiptarë! Gëzuar Shqipëri Etnike!” – thuhet në qëndrimin zyrtar të këtij tifo-grupi.

Kosovë-Shqipëri, Prishtina mbushet me flamuj kombëtarë

“Mirë se vini në Shqipëri”

prish-kuqDy ditë para ndeshjes miqësore Kosovë-Shqipëri, grupi i tifozëve nga Prishtina “Plisat” kanë nisur të vendosin rreth 5000 flamuj kombëtarë në rrugët e kryeqytetit kosovar.

Vendosja e flamujve kuq e zi po bëhet për të nderuar Kombëtaren shqiptare pas kualifikimit Europianin e Francës.

Ditë më parë, në rrjetin social Facebook, udhëheqësi i “Plisave”, Albert Kastrati ka shkruar se “Plisat” e konsiderojnë vetën pjesë të Kombëtares, po aq sa Kombëtarja është pjesë e Prishtinës.

“Festën tonë të madhe dhe rrugëtimin tonë të përbashkët drejt Francës, t’a bëjmë ashtu siç na ka hije, të gjithë shqiptarët të bashkuar”, ka shkruar Kastrati.

I pari i “Plisave” ka bërë thirrje që tribuna jugore e stadiumit të Prishtinës të jetë e gjitha kuq e zi. Kjo pasi ndeshja e së premtes është festë dhe për ta përshendetur Kombëtarën në rrugën e saj drejt Parisit.

Slogani me të cilin “Plisat” po presin Kombëtaren është “Mirë se vini në Shqipëri”, të cilin e ka shpërndarë në rrjetin social Facebook edhe kapiteni i Kombëtares, Lorik Cana me mbishkrimin “S’ka nevojë për më shumë fjalë! Bravo Plisat”.

/ Top Channel

Tifozat Kuqezi bojkotojnë stadiumin e Prishtinës: Jo dy kombëtareve

tifozat kzTifozat Kuqezi nuk do të jenë në shkallët e stadiumit të Prishtinës në ndeshjen mes përfaqësueses së Kosovës dhe asaj të Shqipërisë, që luhet këtë të premte.

Ky vendim i grupimit më të madh të tifozëve të Kombëtares, i bërë publik përmes faqes së tyre në Facebook, kuqezi është marrë në vazhdën e qëndrimit të shprehur edhe më herët nga ky grupim për pasjen e vetëm një kombëtarje për shqiptarët.

“Këtë të premte, Kampionet tanë zhvillojnë ndeshjen e parë që pas kualifikimit historik në Kampionatin Europian ‘Francë 2016’, në shtëpinë e tyre të dytë autoktone, në Prishtinë. Ndeshja do të jetë e karakterit festiv, ndaj një grupimi tjetër të futbollistëve shqiptarë. Që nga themelimi, një ndër misionet bazë të Tifozave Kuqezi ka qenë që shqiptarët, edhe pse të ndarë në disa shtete, të kenë vetëm një Kombëtare dhe të përfaqësojnë vetëm një Flamur. Ne vazhdojmë të besojmë në kauzën tonë dhe për këtë arsye të premten nuk do të jemi prezent si grupim në Stadionin e Prishtinës”, thuhet në komunikatën e TKZ.

Megjithatë, grupimi bën thirrje që kjo ndeshje të shfrytëzohet për krijimin e një atmosfere festive në Prishtinë.

“Ne do të jemi prezent në Prishtinë për festën e madhe dhe u bëjmë thirrje te gjithë shqiptarëve në Kosovë, të shfrytëzojnë praninë e Kombëtares në Prishtinë dhe te festojnë në numër sa më të madh. Edhe ne si grupim, do të jemi të pranishëm në Prishtinë dhe do të festojmë gjithë së bashku ketë arritje historike të Kombëtares tonë”, thonë Tifozat Kuqezi.

TKZ mbyll deklaratën duke kërkuar me ngulm pasjen e vetëm një kombëtarje për shqiptarët.

“Sot më shumë se kurrë, janë krijuar kushte që të kemi vetëm një Kombëtare. Ne vazhdojmë të përkrahim ekipet shqiptare të të gjitha trevave që luajnë dhe do të luajnë në arenën ndërkombëtare dhe të mos mbesin të izoluar. Sidoqoftë, në përfaqësimin si Komb, duhet të jemi një dhe vetëm një. Kombëtarja që e kemi tani, është shembulli më i mirë i bashkimit, dhe suksesit”, thuhet në deklaratë.

/ Top Channel

Ismail Morina: Pse dhe si e hodha dronin mbi stadiumin e Beogradit

ball-morMë 14 tetor një flamur fluturoi mbi stadiumin e Beogradit gjatë ndeshjes Serbi-Shqipëri. Ai flamur ishte një histori guximi dhe krenarie që tërhoqi vëmendjen e të gjithë opinionit sportiv botëror, po aq sa dhuna që u ushtrua mbi lojtarët e kombëtares shqiptare.

Në një rrëfim eksluziv për Digitalb dhe gazetarin Dritan Shakohoxha, Ismail Morina rrëfeu se si lindi ideja, peripecitë, të papriturat dhe rrezikun për jetën për të ngritur mbi stadiumin e Beogradit një dron. Sakrifica e një njeriu rezultoi krenaria e miliona të tjerëve. Në tregimin e tij, Ismaili tregoi se ai flamur i ngritur në një ndeshje futbolli lindi realisht pas një ndeshje futbolli.

“Menjëherë pas hedhjes së shortit kisha një ndeshje futbolli me miqtë e mi, disa shqiptarë dhe disa italianë. Italianët po na ngacmonin pak me batuta meqë do të luanim me Serbinë dhe njëri prej tyre në një moment më thotë: ‘Pse nuk përdorni një nga helikopterët që përdorim ne kryesisht, një dron, për të vënë një mesazh e për ta ngritur mbi qytet’. Aty më erdhi shkëndija e parë. Kisha dy versione fillimisht: një flamur me shqiponjën e sotme dhe një me shqiponjën e Skënderbeut,  zgjodha këtë të dytën, siç u pa dhe në transmetim. Ndërkohë sa i përket fjalës, fillimisht mendova të shkruaj diçka në italisht, por më pas kërkova në internet një version anglisht për fjalën autokton dhe një që më doli në kërkim ishte ‘autochtonus’. E vendosa menjëherë sepse mu duk diçka elegante”, rrëfeu Ismail Morina.

Përgatitjet nuk ishin të thjeshta, as udhëtimi gjithashtu. Gjithçka u planifikua muaj më parë, pati shumë gjëra të paparashikuara, por dëshira për të pasur një prezencë shqiptare në Beograd ishte e madhe.

“Më 26 korrik përfitova nga një vizitë në Shqipëri për të kaluar mes Beogradit. Isha i bindur që ndeshja do të bëhej në stadiumin e Cërvena Zvezdës, madje bëra dhe xhirime rreth e përqark stadiumit. Kalova edhe nga stadiumi i Partizanit, por nuk i kushtova shumë rëndësi. Më pas, kur mësova që ndeshja do të luhej në stadiumin e Partizanit të Beogradit u stepa disi. Gjithsesi mora informacionin e nevojshëm me “google maps” dhe kisha 3 ose 4 pika nga të cilat do të mendoja nga do të ngrija flamurin dhe pika më e volitshme ishte 50-70 metra vijë ajrore. Gjithashtu, kontaktova dhe me një djalë nga Shkupi dhe bashkë me të planifikuam çdo gjë. Unë dhe ai ngritëm flamurin”, vazhdoi rrëfimin e tij, Morina.

Ismail Morina qëndroi i fshehur për 17 orë në ditën që do të ngrinte dronin mbi stadium, ndërkohë që duke menduar se gjendej brenda zyrave të klubit të Partizanit të Beogradit, Morina nuk kuptoi se flamurin kishte planifikuar ta ngrinte nga brenda akademisë ushtarake të Serbisë.

“Kam bërë një udhëtim prej 12 orësh. Ideja ka qenë ta hedh gjatë këndimit të himneve, shikoja orën dhe e dija që në 21 e 32 mbaronte pjesa parë. Aty u montua droni. Kam ndez dronin, kam ngecur spangot, kam futur dy tubat plastike dhe tashmë isha gati, por nuk arrita dot ta ngrija sepse në atë moment pranë meje kalojë dikush dhe isha i shqetësuar mos më kishin zbuluar. Para fundit të pjesës së parë, mora vendimin për ta ngritur pasi nuk kisha më kohë, e ngrita në ajër, i bëra një xhiro në lagje dhe më pas e futa në stadium. Megjithatë nga shpejtësia mendova se ishte Shqipëria me të kuqe dhe kur pashë që dikush po zgjatej për ta kapur mendova t’ia lija djemve, për t’u karikuar. Në fakt, dështova. Unë e kam pasur një dështim”, u shpreh Ballisti, siç njihet ndryshe Ismaili.

Largimi nga Beogradi nuk ishte i thjeshtë, ashtu si dhe kalimi i kufirit.

“Më pikasën në momentin që po largohesha nga godina. Mora makinën me shpejtësi dhe u nisëm drejt autostradës, bashkë me shkupjanin. Në kufi kisha frikë se si do të reagonte policia. E kisha vendosur që nëse do nuhasnin diçka, do i jepja gaz dhe do kaloja traun. Për fat gjithçka shkoi mirë”, tregon Morina.

Por, si ka ndryshuar jeta e Ismail Morinës pas asaj dite? Gjërat për të duket se janë vështirësuar gjithnjë e më shumë.

“Efekti ka qenë negativ, nuk kam kontakte siç duhet me familjen time. Shkoj me periudha të shkurtra pranë saj. Kur vajza kishte datëlindjen, kam qëndruar vetëm 3 ditë në shtëpi. Rutinën  e përditshme që kisha dikur tani e kam te pamundur”, deklaroi ai.

Në fund, Ismaili valëvit dhe njëherë tjetër flamurin “autochtonus”, vetëm se këtë herë mes kodrinave të fshatit të tij, aty ku u formua dashuria për Shqipërinë dhe ëndrrat për të nesërmen, që ndryshuan shumë pas asaj nate në Beograd.

/ Top Channel

“Baku 2015”, dy medalje për atleten Luiza Gega

Luiza GegaVetëm 24 orë nga medalja e argjendtë e fituar në 800 metra me kohën 2:02:36, Luiza Gega, ka shkruar emrin e saj me të arta në garën e saj të preferuar.

Ditën e djeshme mes 14 konkurrentëve, Gega, do të mbante lart flamurin kuqezi siç pritej teksa u kurorëzua kampione e Lojërave Europiane njëherësh duke fituar edhe medaljen e artë e para për Shqipërinë në këtë event.

Koha e realizuar nga atletja shqiptare ishte 4:11:58 pas një gare të fortë. Falë këtij triumfi, 26-vjeçarja kontribuoi edhe me 14 pikë (maksimalet) në renditjen e përgjithshme epikore.

Kujtojmë datën 21 qershor, e cila rezultoi një ditë e suksesshme për Shqipërinë olimpike. Flamurin kuqezi e nderuan me dy medaljet e para të Olimpiadës Europiane të Bakut 2 atletë, Luiza Gega dhe Izmir Smajlaj.

Dy garuesit shqiptarë shkëlqyen në disiplinat e ndryshme të mbretëreshës së sporteve, atletikës duke koleksionuar dy vende të dyta, çka përkthehen në dy medalje argjendi.

22-vjeçari nga Shkodra, Izmir Smajlaj ai që arriti të garojë deri në fund për medaljen e artë në hedhjen së gjati, por distanca e tij më e gjatë 7 metra e 52 cm ishte 12 cm larg performancës më të mirë të pasdites që u dhurua nga gjeorgjiani Khorava.

Dy sukseset e arritura në pistën e atletikës e zhvendosin Shqipërinë në vendin e 35 në tabelën e vendeve me medalje, po aq sa edhe Maqedonia.

/Shekulli Online/