Si (do të) trajtohen azilkërkuesit nga Kosova dhe Shqipëria

Ministrat e Brendshëm të landeve gjermane do të diskutojnë të premten për azilkërkuesit nga Kosova dhe Shqipëria. Kërkohet ndryshimi i ligjit për vendet e sigurta, por kanë nisur që tani masat e para.Shtimi i shpejtë i azilkërkuesve nga Kosova dhe Shqipëria është kthyer në preokupim për politikën gjermane. Një numër i madh përfaqësuesish në qeverinë gjermane e sidomos në lande kanë kërkuar këtë javë marrjen e masave të shpejta. Diskutimet për përfshirjen e Kosovës dhe Shqipërisë në “vendet e sigurta” të origjinës vazhdojnë, por ndërkohë organet gjermane po marrin masa praktike kundër shpërdorimit të kërkesës për azil nga shtetas të këtyre vendeve.
Ministrat e brendshëm gjermanë për Kosovën e Shqipërinë
Në një konferencë telefonike të premten, Ministrat e Brendshëm të landeve gjermane do të diskutojnë për shtimin e numrit të migrantëve nga Kosova dhe Shqipëria. Propozimin për konferencën e bëri të martën Ministri i Brendshëm i Landit të Saksonisë së Poshtme, Pistorius. Agjencia gjermane e lajmeve, dpa citon me këtë rast edhe një zëdhënës të ministrisë së Brendshme të landit të Baden-Vyrttembergut. Ministria në Shtutgart drejtohet nga socialdemokratët. Baden-Vyrttembergu do të paraqesë me këtë rast një dokument, në të cilin do të diskutohet edhe çështja e zgjerimit të rrethit të “shteteve të sigurta”. Rregulli që do të propozohet pritet të përmbajë përshpejtimin e refuzimit në procedurën e azilimit, të pasuar nga kthimi pas në vendet nga kanë ardhur personat. Deri tani, statusin e vendeve të sigurta, në të drejtën e azilit e kanë Serbia, Bosnjë-Hercegovina dhe Maqedonia.
Edhe Ministria Federale e Brendshme theksoi të mërkurën (11.02.2015) nevojën për veprim të përshpejtuar në çështjen e azilkërkuesve nga Kosova. “Ne po e përshpejtojmë në mënyrë masive përpunimin e kërkesave për azil nga Kosova”, tha një zëdhënës i Ministrisë së Brendshme. “Migrimi masiv” nga Kosova i ka çuar në kufijtë e tyre mundësitë për strehimin në Gjermani dhe mund të ketë veç kësaj “pasoja shkatërrimtare” për stabilitetin e Kosovës vetë.
Por Ministria Federale e Brendshme nuk planifikon të ndërmarrë vetë ndonjë inisiativë për zgjerimin e listës së “vendeve të sigurta” edhe me Kosovën dhe Shqipërinë. Një ndryshim i ligjit kërkon shumë kohë, tha zëdhënësi i Ministrisë Federale të Brendshme. Kërkesa e momentit është “marrja e masave të menjëhershme dhe gjetja e përgjigjeve të shpejta”.
Problemi qendron në dhënien e miratimit për ndryshimin e ligjit nga landet gjermane që qeverisen nga socialdemokratët. SPD e ka lënë të hapur nëse do ta mbështesë një zgjerim të listës me vende të reja të sigurta. Por ministri i Brendshëm i landit të Renanisë Veriore-Vestfalisë (NRW), Ralf Jäger (SPD) tha se njerëzit që vijnë kanë nevojë shpejt për siguri “nëse mund të qendrojnë këtu apo jo”. Ai tha se njerëzit nga Kosova janë viktima të premtimeve të gënjeshtërta nga banda kriminele të trafikantëve të njerëzve.

Trajtim në praktikë i Kosovës e Shqipërisë si “vende të sigurta”
Në këtë situatë, organet gjermane kanë nisur t’i trajtojnë që tani praktikisht Kosovën dhe Shqipërinë sikur të bënin pjesë në listën e “shteteve të sigurta”.
Zyra Federale për Migracionin dhe Refugjatët në Nyrnberg deklaroi të mërkurën (11.02.2015) se për kërkesat për azil të kosovarëve ndërkohë vendoset brenda dy javësh. Një zëdhënës bëri të ditur se lutjet e kosovarëve përpunohen njësoj shpejt si lutjet nga vendet e reja të sigurta, Serbia, Maqedonia dhe Bosnjë-Hercegovina. Kuota e pranimit të lutjeve nga Kosova është vetëm 0,3 përqind, u bë e ditur. Pra pjesa dërrmuese e njerëzve duhet të llogarisin kthimin në atdhe.
Bavaria: jo para refugjatëve nga ish-Jugosllavia dhe Shqipëria
Kurse landi i Bavarisë që përballet me dyndjen më të madhe të refugjatëve ka planifikuar të shkojë një hap më tej. Bavaria nuk do t’u japë më para në dorë azilkërkuesve nga ish-Jugosllavia dhe nga Shqipëria. “Për këto vende ne në Bavari do të kalojmë shumë shpejt në parimin e shërbimeve në natyrë”, tha të mërkurën në Mynih Ministri i Brendshëm i Bavarisë, Joahim Herrmann (CSU). “Nuk duam të ofrojmë nxitje (për të ardhur)”, tha Herrmann. Sipas tij, rregulli i ri do të vlejë për Serbinë, Maqedoninë, Bosnjë-Hercegovinën, Kosovën dhe Shqipërinë. Bavaria ngul këmbë që veç tri vendeve të para, në vendet e sigurta të përfshihen edhe Shqipëria dhe Kosova. Bavaria ka bërë të ditur se një kërkesë të tillë do ta shtrojë në Dhomën e Landeve, në Bundesrat.
Edhë zëvendëskryetari i Grupit Parlamentar të CDU/CSU në Bundestag, Thomas Strobl tha se është e nevojshme që edhe Shqipëria, Mali i Zi dhe Kosova të shpallen shtete të sigurta të origjinës. Agjencisë së lajmeve Reuters ai i tha se “sistemi i azilimit do të bëhej kështu më i drejtë”. Për këtë duhet të japë mbështetje edhe Dhoma e Landeve.
Në situatën e krijuar, Ministrja për Evropën në Bavari, Beate Merk (CSU) do të qendrojë të enjten (12.02.2015) për bisedime politike në Prishtinë. Synimi i vizitës është frenimi i valës së largimeve nga Kosova.
Zëdhënësi i Ministrisë Federale të Brendshme në Berlin tha se Ministria po e vëzhgon me shqetësim dhe me kujdes zhvillimin aktual. Ai tërhoqi vëmendjen se gati 99 përqind e kërkesave për azil nga Kosova refuzohen në Gjermani. Azilkërkuesit nga Kosova duhet ta dinë, se për “shumicën e tyre, një qendrim i përhershëm në Gjermani nuk është i garantuar.”
Shtim i azilkërkuesve kosovarë në gjithë Gjermaninë
Kosova ka avancuar ndërkohë në vendin e dytë të origjinës së azilkërkuesve në Gjermani, pas Sirisë. Në janar, kërkesë për azil në Gjermani shtruan për herë të parë rreth 3030 njerëz nga Kosova. Ky është dyfishi i numrit të azilkërkuesve kosovarë në dhjetor. Në vitin 2014 u paraqitën gjithsej 6900 kërkesa të tilla.
Sipas një sondazhi të agjencisë gjermane të lajmeve dpa, numri i azilkërkuesve nga Kosova është rritur me vrull gati në të gjitha landet gjermane. Në Baden-Vyrrtemberg në shkurt, një në dy refugjatë erdhi nga Kosova. Në Bavari, në janar 3000 kosovarët përfaqësonin shumicën e azilkërkuesve. Gati shtatë herë më shumë refugjatë nga Kosova se një muaj më parë erdhë në janar në landin e Rheinland-Pfalz-it.
Vitin e kaluar, në Gjermani u paraqitën gjithsej 203.000 lutje për azil. Organizata Pro Asyl kërkoi që shqyrtimi individual i rasteve duhet të mbetet në qendër të procedurës së azilimit në Gjermani. Partia opozitare Të Gjelbrit paralajmëroi që azilkërkuesit kosovarë të mos kthehen në bllok. “Përballë varfërisë dhe vuajtjeve kjo do të ishte në kufirin e refuzimit të pranimit të realitetit”, tha shefja e të Gjelbërve, Simone Peters. (dw)

Kadare: Largimet nga Kosova, një ligshtim moral i trishtueshëm

Shkrimtari Ismail Kadare ishte para disa ditësh në Izrael, ku iu dorëzua Çmimi i Jeruzalemit për veprat që shprehin më mirë idenë e lirisë së individit në shoqëri. Ky çmim jepet në hapje të Panairit Ndërkombëtar të Librit në Jeruzalem, ngjarja më e madhe letrare e Izraelit. Në ceremoninë e së dielës ishte edhe Presidenti izraelit. Në një intervistë me telefon nga Parisi me kolegun tonë Ilir Ikonomi, shkrimtari i shquar foli në fillim mbi përshtypjet nga vizita në Izrael.ISMAIL KADARE: Unë kam qenë edhe herë tjetër në Izrael. Më bëri si gjithmonë përshtypje serioziteti i organizimeve të tilla. Ne ndonjëherë na bën përshtypje kjo, ndoshta ngaqë edhe nuk jemi mësuar me një qasje të tillë.

ZËRI I AMERIKËS: Në ceremoninë e çmimit ju zgjodhët të flisnit mes të tjerash për raportet e shkrimtarit me lirinë. Por do të dëshiroja t’ju pyesja për diçka tjetër që gjithashtu lidhet me lirinë. Shqiptarët e Kosovës e fituan lirinë jo shumë kohë më parë. Dhe, në vitet e para pati kthime në masë të njerëzve për të ndihmuar vendin e tyre të ri. Ndërsa tani shikojmë të kundërtën. Njerëzit po ikin. Si e shpjegoni ju gjithë këtë zhgënjim ndonëse në liri?

ISMAIL KADARE: Që të jem i sinqertë, unë nuk jam në gjendje ta shpjegoj plotësisht. Problemet që ka Kosova janë sigurisht probleme reale, të rënda disa herë. Kemi të njëjtat probleme pak a shumë edhe ne, pak a shumë Ballkani, pak a shumë një pjesë e Europës. Por ikja nga vendi nuk është zgjidhje, as ka qenë dhe as do të jetë zgjidhje. Kjo është jo ikje, por një lloj shpërngulje. Mësova me një trishtim të jashtëzakonshëm që midis të ikurve këto kohët e fundit janë gjashtë mijë fëmijë shqiptarë të shkollave. Kjo quhet, pra, jo ikje. Ajo nuk justifikohet, nuk përligjet vetëm nga arsyet ekonomike. Kjo është një lloj psikoze, një ligshtim moral shumë, shumë, shumë i trishtueshëm. Shpërngulja është një nga format më të rënda gjenocidale, nga format e shfarosjes së një kombi. Ajo çka i detyron ata duhet gjendur, mendoj. Nuk mund të ngrihen duart përpjetë nga askush, duke filluar nga njerëzit që drejtojnë Kosovën, tek ne të tjerët të gjithë. Kur them të gjithë, e kam fjalën te Shqipëria vetë, si shoqëri dhe si komb, te Shqipëria si shtet dhe si opinion publik, dhe këtu përfshij edhe veten time.

ZËRI I AMERIKËS: Ju flisni shpesh për Evropën, si shtëpia e madhe ku shqiptarët kanë vendin e tyre të natyrshëm. E megjithatë, Shqipëria dhe Kosova vazhdojnë të vuajnë mjaft nga probleme të tilla si korrupsioni, varfëria ekonomike, politika e egër, mosfunksionimi i drejtësisë, prania në parlament e njerëzve të inkriminuar. A janë këto për ju një pengesë serioze për t’u integruar në Evropë, apo i shihni si pjesë të zhvillimit?

ISMAIL KADARE: Të gjitha këto që përmendët ju janë të vërteta, nuk janë të tepruara, por asnjëra prej këtyre arsyeve nuk është e tillë bindëse që të lëkundë qëndrimin shqiptar, strategjinë shqiptare ndaj Evropës. Mendoj se kjo duhet të jetë e padiskutueshme. Jo sepse Evropa është një lloj feje apo besimi fetar, por sepse është mundësia e vetme që na ka dhënë historia, natyra dhe fati ynë, siç thuhet shkurt. Të gjitha ato incidente që ndodhin dhe do të ndodhin në rrugën e popujve evropianë, ballkanikë, në rrugën e popullit shqiptar, nuk janë justifikim për zgjidhje të tilla radikale siç është dorëzimi përpara së keqes. Përkundrazi.

ZËRI I AMERIKËS: Ju përmendët në Jeruzalem çështjen e hapjes së dosjeve në Shqipëri, që e quajtët pjesë të shqyrtimit të ndërgjegjes. Kohët e fundit në Shqipëri përsëri po flitet për këtë temë. Çfarë duhet të ndodhë në politikën shqiptare që ky proces vërtet t’i shërbejë shqyrtimit të ndërgjegjes dhe të mos kthehet në një shfaqje politike?

ISMAIL KADARE: Ka shumë njerëz që nuk duan që dosjet të hapen, nuk duan që arkivat të hapen. Disa nuk duan me arsye, disa pa arsye. Për shumë njerëz do të ndodhë diçka e madhe, do të detyrohen të struken në këndet e padukshme të shoqërisë. Por le të bëjmë një pyetje: A është e mirë kjo gjë, apo është e keqe? A është e mirë që njerëzit, të cilët kanë qenë përgjegjës të drejtpërdrejtë për një diktaturë të egër, që kanë qenë masha e saj, duart e saj të përgjakura, ose duart e saj të errëta, të tërhiqen në qoshe dhe të mos përzihen në jetën shqiptare? Unë mendoj se nuk ka asnjë të keqe në këtë gjë. Nga hapja e dosjeve vendi nuk humbet gjë. Gjermania e bëri këtë proces me një forcë shumë të madhe, sepse përmasat e së keqes ishin tepër të mëdha, të tmerrshme. E bëri dhe nuk humbi asgjë. Përkundrazi, një nga sekretet, shpjegimet, misteret e zhvillimit të jashtëzakonshëm gjerman sot në Evropë është pikërisht ky guxim për të shqyrtuar ndërgjegjen e vet dhe nuk ndodh ndonjë gjëmë, siç thuhet poshtë e përpjetë, me hapjen e këtyre dosjeve. Do të ndodhë vetëm një strukje e së keqes dhe kjo do t’i bëjë mirë kombit shqiptar. (voa)

Viets: Gjermania do të kthejë brenda javësh të ikurit nga Kosova

Ambasadorja gjermane në Prishtinë, Angelika Viets, i tha Zërit të Amerikës se ata që po migrojnë nga Kosova po mashtrohen sepse nuk mund të përfitojnë strehim në BEAmbasadorja gjermane në Kosovë Angelika Viets, i tha Zërit të Amerikës se brenda pak javësh Kosovën e pret vala e kthimit të atyre që muajve të fundit kanë migruar në rrugë të paligjshme në vendet e Bashkimit Evropian. Në intervistën dhënë korrespondentit tonë në Prishtinë, Besim Abazi, ajo tha se vendi i saj është përballur me shumëfishim të numrit të strehimkërkuesve nga Kosova, të cilët nuk kanë pothuajse asnjë mundësi që të sigurojnë qëndrimin në Gjermani.

Zëri i Amerikës: Zonja ambasadore, si e shihni ju shkallën e migrimit të paligjshëm të qytetarëve të Kosovës drejt vendeve të Bashkimit Evropian gjatë muajve të fundit?

Angelika Viets: Pyetja juaj është shumë e arsyeshme. Edhe në jemi shumë të shqetësuar për numrin në rritje që tashmë ka marrë përmasa alarmuese të njerëzve që po lënë vendin e tyre. Ata fatkeqësisht janë duke u mashtruar nga kontrabandistët me premtimet se do të gjejnë një jetë më të mirë. Ata po shesin edhe pasurinë e tyre në Kosovë duke u mbështetur në premtimet. Por, fakti është se ata do të kthehen dhe do të përballen me probleme akoma më të mëdha. Me lejoni të them diçka parimore në lidhje më këtë, duke marrë parasysh numrin e madh që dëshirojnë të vijnë në Gjermani dhe shtrojnë kërkesa për strehim. Kërkesa për strehim është një e drejtë politike por kjo nuk vlen për qytetarët e Kosovës. Ne e kuptojmë që ka kërkesa për strehim për shkak të varfërisë, por e dimë që ka edhe të tjerë që shtrojnë kërkesa për strehim dhe janë të përndjekur politikisht. Nëse ne do t’u jepnim strehim qytetarëve të Kosovës, atëherë nuk do të kishte mundësi për ata që më të vërtetë janë të përndjekur politikisht. Ne e dimë që qytetarët e Kosovës nuk kanë nevojë për një gjë të tillë.

Zëri i Amerikës: Çfarë e ka shkaktuar këtë migrim sipas pikëpamjes suaj?

Angelika Viets: Këtë pyetje ia kemi bërë vetes edhe ne, sepse ishte një valë e madhe që ka filluar në shtator e tetor të vitit të kaluar dhe tash për tash është shndërruar në një epidemi. Ne kemi mbledhur të dhëna për numrin e njerëzve që kanë marrë një rrugë të tillë për të hulumtuar shkakun. Besojmë se ka shumë faktorë dhe nuk mund të jetë vetëm një. Një ndër to mund të jetë periudha shumë e gjatë para krijimit të qeverisë. Në përgjithësi ishte një vit jo shumë premtues për zhvillimin ekonomik dhe njerëzit janë të dëshpëruar me këtë, e kanë humbur shpresën. Këtu përfshihet edhe fakti që njerëzit mund të mos kenë një vend pune dhe e kanë humbur besimin për të ardhmen. Një faktor tjetër, mendoj se janë premtimet që u bëjnë kontrabandistët që i mashtrojnë duke i dërguar në vendet e BE-së dhe nga kjo kontrabandë ata përfitojnë shumë. Një arsye tjetër është edhe grumbullimi i problemeve të shumta me të cilat janë përballur njerëzit për një kohë të gjatë, por për të cilat nuk mundet që detyrimisht të bëhet përgjegjëse qeveria e tashme. Porosia ime për qytetarët do të ishte që t’i japin një vit kohë qeverisë aktuale, në mënyrë që të mund të dëshmojë veten me punët që ka marrë përsipër dhe për të cilën ajo do të ketë edhe mbështetjen tonë. Më lejoni të them diç edhe për mediet, sepse mua më intereson shumë roli i tyre meqë janë një faktor shumë i rëndësishëm në shoqëri dhe kanë një detyrë të rëndësishme, meqë liria e medies është një vlerë në shoqëri. Mediet duhet të bëjnë këtë detyrë dhe të shkruajnë edhe rrëfime suksesi që nuk mungojnë këtu.

Zëri i Amerikës: Sa është numri i azilkërkuesve nga Kosova në Gjermani?

Angelika Viets: Numrat janë rritur. Në muajin nëntor të vitit 2014 ishin 600 veta, në dhjetor ishin 1 mijë e 956 dhe në janar 3 mijë e 630. Përqindja e atyre që mund të përfitojnë është 1.1 apo 1.2 për qind. Kjo do të thotë se presim një valë të kthimeve brenda pak javësh dhe kjo do të jetë një sfidë për qeverinë.

Zëri i Amerikës: Çfarë veprimesh po merr shteti juaj për t’u përballur me kërkesat në rritje për strehim?

Angelika Viets: Do doja t’u jap dy përgjigje. Ne kemi filluar një fushatë informimi për t’u thënë njerëzve se ajo që u është thënë se çdokush që shkon në Gjermani do të përfitojë strehim, është një keqinformim, mbase i shpërndarë nga grupe të interesit siç janë trafikantët me njerëz. Ka shume pak gjasa që ata njerëz të qëndrojnë në Gjermani. Mesazhi i dytë është se ne e mbështesim qeverinë e re në përpjekjet e saj për reforma ekonomike. Kryeministri do të publikojë nga mesi i shkurtit idetë e tij për reformat dhe masat ekonomike që do të ndërmarrë gjatë këtij viti. Mendoj se çdo qeveri e re meriton kohë që të përqendrohet në çështjet që e presin dhe kjo qeveri e meriton këtë po ashtu.

Zëri i Amerikës: A jeni e kënaqur me përpjekjet e institucioneve për t’u përballur me sfidën e migrimit?

Angelika Viets: Tani ka shume veprimtari. Mendoj se të gjithëve u është dashur kohë që të kuptojnë se si janë rritur numrat, sepse është liria e lëvizjes dhe asnjë qeveri nuk mund të pengojë banorët e saj q ë të dalin jashtë vendit, të paktën asnjë vend demokratik. Tani shumë masa po merren dhe unë kam kuptuar nga ministri i brendshëm se trafikantët po ndiqen dhe se 19 grupe janë akuzuar tashmë. Mendoj se ka shumë shenja se Kosova po kthehet në rrugë të mbarë.

Zëri i Amerikës: Migruesit e paligjshëm po shfrytëzojnë territorin e Serbisë për të kaluar në Hungari e më pastaj në vendin tuaj, Austri e vende tjera të BE-së. Si po i shihni veprimet e qeverisë serbe? A po bënë sa duhet që të mos lejojë kalimin e paligjshëm të kufirit me Hungarinë?

Angelika Viets: Nuk jam në pozitë të gjykojë këtë. Ajo që di unë është se të gjithë janë alarmuar tani dhe tash ka më shumë bashkëpunim në të dyja anët që të ndërpritet migrimi sepse kjo nuk është në interesin afatgjatë të Serbisë.

Zëri i Amerikës: Çështja e migrimit lidhet me liberalizimin e vizave. Përse po ngurron Bashkimi Evropian të heq vizat për qytetarët e Kosovës që kane mbetur të vetmit pa këtë mundësi në Evropë? Derisa ne po bisedojmë, shumë njerëz po presin para ambasadës suaj për një vizë.

Angelika Viets: Sa për informim ne japim 35 mijë viza brenda një viti dhe nuk është që qytetarët e Kosovës nuk mund të udhëtojnë. Nëse bëj një llogari për gjithë ambasadat e Bashkimit Evropian, ne japim rreth 200 mijë viza në vit dhe ky është një numër i konsiderueshëm. Liberalizimi i vizave është një çështje e Komisionit Evropian dhe ata kanë një raport për këtë çështje. Raporti i radhës është në muajin mars dhe të shohim se çfarë përfundimesh do të sjellin ata. Studentët më pyesin shpesh për procedurën dhe unë u them se është një listë e gjatë e kritereve dhe parametrave që duhet të përmbushen. Qeveria e Kosovës ka punuar dhe po punon për përmbushjen e shumë kritereve siç janë çështjet ligjore, masat për ri integrim etj. Ka një listë të gjatë por ata kanë shumë punë për të kryer detyrat e shtëpisë, siç është luftimi i korrupsionit dhe krimit të organizuar.

Zëri i Amerikës: A po bëjnë sa duhet për të luftuar këto dukuri?

Angelika Viets: Ju e keni parë raportin e progresit në tetor dhe sipas tij, nuk është bërë sa duhet.

Zëri i Amerikës: A po rrezikohet liberalizimi i vizave nga migrimi i paligjshëm?

Angelika Viets: Në një mënyrë po, të them sinqerisht. Një nga kriteret është se sa njerëz migrojnë në rrugë të paligjshme dhe numri i strehimkërkuesve nga Kosova. Këto janë pjesë e procesit të vlerësimit dhe natyrisht procesi do të ngadalësohet. Të paktën kjo është frika jonë. Mbase Komisioni mund të sjellë përfundime tjera. Kam marrë vesh se raporti i radhës është në pranverë. Së pari qeveria e Kosovës i raporton komisionit, dhe pastaj ata vijnë për të bërë vlerësimet. Ndoshta ata sjellin përfundime të mira dhe liberalizimi i vizave të ndodhë vitin e ardhshëm.

Zëri i Amerikës: Shumë mendojnë se me liberalizmin e vizave është më lehtë të kontrollohet migrimi i paligjshëm. Si mendoni ju?

Angelika Viets: Mendoj se njerëzit këtu e keqkuptojnë faktin se liberalizimi i vizave nuk nënkupton udhëtimin plotësisht të lirë. Ai nënkupton se mund të udhëtoni në vendet e listës Shëngen për tre muaj dhe pas 90 ditësh duhet të ktheheni. Është masë kontrolli dhe e kuptoj se ka një frikë psikologjike për të qenë “i mbyllur”. Por mund të them se liberalizimi i vizave nuk është zgjidhja, sepse kur shikoni rajonin, në Serbi, Mal të Zi e Shqipëri, ato kanë liberalizim të vizave dhe janë të përfshira në radhën e vendeve të sigurta, por ende kanë probleme me strehim kërkues. Mendoj se çështja qëndron në situatën e përgjithshme ekonomike, posaçërisht kur standard krahasues janë vendet e BE-së. Kosova ka një diasporë të madhe që dërgon para dhe kur njerëzit shohin se pagat në Gjermani, në Francë apo gjetiu janë dhjetëfish më të larta sesa në Kosovë, atëherë nuk janë shumë të motivuar të qëndrojnë dhe të ndërtojnë vendin e tyre. Por, nga ana tjetër, ata e fituan pavarësinë shtatë vjet më parë dhe është detyrë e tyre që të fillojnë të përpiqen të bëjnë më të mirën.

Zëri i Amerikës: Dhe a besoni se numrat do të bien?

Angelika Viets: Diplomati duhet të jetë optimist, në të kundërtën janë në punë të gabuar. Mendoj se do të merr kohë por situata do të jetë më mirë.
(voa)

Assadi: Nga armik në mik?

Për një kohë të gjatë Perëndimi i është shmangur Bashar Al Assadit. Por me sa duket, diktatorin sirian e informojnë për sulme ajrore ndaj pozicioneve të terroristëve të IS. Fronti ndërkombëtar kundër tij po lëkundet.Për një ftesë në Pallatin Elize, për këtë diktatori i Sirisë, Bashar Al-Assad sot vetëm mund të ëndërrojë. Vërtet që nuk kanë kaluar më shumë se katër vjet, kur hëngri darkë bashkë në Paris me Presidentin e atëhershëm të Francës, Nikolas Sarkozy.
Sot në plan ndërkombëtar Assadi konsiderohet i izoluar, të paktën në Perëndim. Por që kur milicia terroriste “Shteti Islamik” ka vënë nën kontrollin e saj pjesë të gjëra të Irakut dhe Veriun e Sirisë, diktatori u duket disa vëzhguesve si e keqja më e vogël. Shumë të paktë janë ata që mund të llogarisin rrëzimin e shpejtë të Assadit, i cili ndryshe nga pushtetmbajtësit e tjerë të republikave arabe, megjithë protestat e ashpra dhe luftën civile vazhdon të qendrojë në krye të shtetit. Një strategji për një Siri pa Assadin mungon deri sot, sepse radikalët po avancojnë, opozita siriane është e përçarë dhe Perëndimi jo i të njëjtit mendim si duhet të reagojë.
Koalicioni ndërkombëtar bombardon pozicionet e terroristëve. Për të, Bashar Al-Assadi nuk është më armiku kryesor. Presidenti sirian madje ka pohuar se merr “informacione” për sulmet që pasojnë. “Jo bashkëpunim i drejtpërdrejtë”, siç theksoi ai në një intervistë me BBC, por “informacione nga palë të treta, nga shtete të tjera”. Kush i jep këto informacione nuk dihet. Por është e qartë një gjë: me “Shtetin Islamik”, Presidenti sirian dhe koalicioni ndërkombëtar luftojnë kundër të njëjtit armik. Problemi në këtë bashkëpunim: Bashar Al-Assadi ka shumë armiq, të cilët ai i shtyp në mënyrë brutale. Por aleanca anti-IS nuk dëshiron të veprojë kundër kësaj, për aq kohë sa lufton me Assadin kundër terroristëve. Ndryshe nga diktatori sirian, IS konsiderohet si rrezik për të gjithë rajonin, gjë që ai e theksoi me shpalljen e një kalifati në qershor 2014. Në këtë kuadër, Perëndimi po afrohet pak me Assadin – një afrim që vërehet edhe me Egjiptin. Atje, kryetari i shtetit Al Sissi vepron në mënyrë brutale kundër kundërshtarëve të tij, të cilët janë bashkuar pjesërisht me IS, si në Sinai. Në aleancë me SHBA Al- Sisi lufton ndërkohë kundër terroristëve të IS.
Thirrjet për të rrëzuar Bashar Al-Assadin dëgjohen gjithnjë e më pak. SHBA vazhdojnë vërtet të stërvitin kryengritës dhe t’i armatosin ata me armë – por ndërkohë i pajisin ata para së gjithash për të luftuar IS dhe jo qeverinë siriane. Një rehabilitim në parketin ndërkombëtar, Assadi do ta presë ndoshta më kot. Por qëndrimi në pushtet duhet t’i mjaftojë hë për hë diktatorit sirian. (dw)

Maqedoni: kallëzim penal kundër kryeministrit Gruevski

Në Maqedoni, Lidhja Social Demokrate ka ngritur kallëzim penal kundër kryeministrit të vendit Nikolla Gruevski dhe kundër drejtorit të shërbimit sekret, Sasho Mijallkov lidhur me përgjimet masive, sipas partisë, të mbi njëzet mijë qytetarëve të vendit.Opozita maqedonase ka kërkuar përgjegjësi edhe nga ministrja e Rendit Gordana Jankullovska.

Opozita, përmes një nisme të quajtur Drejtësi për Maqedoninë, synon të nxjerr në shesh përmes materialeve për të cilat thotë se i ka, veprimet kriminale, sipas saj, të zyrtarëve të lartë të shtetit. Por deri tash, partia ka publikuar disa audio-regjistrime të parëndësishme; të dy ministrave në qeverinë Gruevski duke biseduar midis tyre dhe të vetë drejtuesit opozitar Zoran Zaev me një gazetare, si dhe të kryetarëve të tre partive politike shqiptare me bashkëpunëtorë të tyre.

Ka reaguar dhe presidenti i vendit Gjorgje Ivanov përmes një komunikate ku thuhet se mbështet organet shtetërore në hetimet e ngjarjeve për të parë nëse aktiviteti i tillë është në kundërshtim me kushtetutën dhe njëkohësisht autorët e veprës penale të përgjimeve të sanksionohen sipas ligjit.

Ndërkohë, Ali Ahmeti, kryetar i Bashkimit Demokratik për Integrim, ka theksuar nevojën e përfshirjes së faktorëve apo ekspertëve ndërkombëtarë në zgjidhjen e çështjes.

“Ne kërkojmë që komuniteti ndërkombëtar të krijojë një komision politik dhe ekspertë të fushës, em qëllim që ky proces të ketë besueshmëri tek të gjithë qytetarët e Maqedonisë dhe të heqë çdo dyshim mbi trajtimin e këtij procesi, tha zoti Ahmeti pas takimit që pati me ambasadorin e Bashkimit Evropian Aivo Orav.

Zoti Ahmeti, partia e të cilit bën pjesë në koalicionin qeveritar, tha se ngjarje të këtilla kanë ndodhur në vende shumë më të zhvilluara se Maqedonia.

Ndërkohë, edhe Partia Demokratike Shqiptare kërkon përfshirjen e faktorëve ndërkombëtarë në zbardhjen e këtij skandali. Kryetari i PDSH-së Menduh Thaçiështë shprehur, sipas një komunikate nga zyra e tij, se drejtuesit e PDSH-së qysh nga viti ’93 janë ndjekur dhe përgjuar dhe se asnjë individ asnjëherë nuk ka dhënë për këtë llogari para drejtësisë.

Ndërkaq, partia VMRO-DPMNE e kryeministrit Gruevski e auzon drejtuesin opozitar Zoran Zaev si bashkëpunëtor të shërbimeve të huaja sekrete duke thënë se janë ato që kanë bërë regjistrime ose montazhe të bisedave telefonike të personaliteteve këtu në Maqedoni. 35 e afërt me VMRO-në aludon në një kryeministër dhe një ambasador të huaj, pa saktësuar se kush janë ata, si të ndërlikuar në spiunazh në dobi të Zoran Zaevit.

Por ky i fundit ngul këmbë se materialet i ka marrë nga njerëz të shërbmit sekret maqedonas, “të cilët nuk kanë mundur të durojnë më veprimet e jashtligjshme të pushtetit”. Mjete të informimit të afërta me Lidhjen Zocial Demokrate të opozitës shkruajnë për pesë agjentë sekretë maqedonas, pa ua bërë publik emrat, t’ia kenë dorëzuar materialet opozitës dhe të jenë larguar me familjet e tyre jashtë shtetit. (voa)

Vërshimet jo vetëm natyrore por edhe nga abuzimi me mjedisin

Për ekspertët përmbytjet ciklike në Shqipëri nuk janë vetëm klimatike, por lidhen edhe me qendrimin abuziv të njerëzve ndaj mjedisit
Paniku dhe tronditja që krijuan përmbytjet në të paktën pesë qarqe të Shqipërisë, në ditët e para të muajit shkurt, tashmë janë duke u fashitur. Ndërpreja e rreshjeve të dendura të shiut ka rikthyer në kufijtë e zakonshëm rrjedhjet e lumenjve, kryesisht në jug të Shqipërisë, ka larguar ujin nga shtëpitë, sipërfaqet e mbjella, nga vendgrumbullimet e bagëtive dhe bizneset. Autoritetet, familjarët, sipërmarrësit po kuptojnë realisht humbjet e konsiderueshme nga vërshimi i pakontrolluar i ujrave, po evidentojnë gjithçka që “e ka marrë lumi” me shpresën se do të ketë rimbursim.
Këtë rradhë zonat më të prekura kanë qenë në pjesën jugore të vendit, ndërkohë që në rastet e mëparshme skenat e përmbytjeve me dëme kolosale për komunitetin janë regjistruar në veri. Pa dalë ende faturat përfundimtare të kostove, që kanë shkaktuar për banorët, bizneset dhe mjedisin përmbytjet e ditëve të fundit, një gjë mbetet e qartësuar: në Shqipëri shkaqet nuk janë thjesht dukuritë natyre dhe ndryshimet klimatike, por dhe vazhda e gabimeve njerëzore në rreth dy dekadat e fundit.
Çfarë do mbjellësh, do të korrësh!”
Prof. Kristo Goga, ekspert në inxhinierinë hidroteknike, mendon se katastrofat natyrore prekin vazhdimisht pjesë të ndryshme të globit. Sipas tij, në Shqipëri pasojat e tyre amplifikohen dhe rëndohen më shumë nga neglizhenca dhe indiferenca e vendimarrësve, si dhe nga mungesa për një kohë të gjatë e investimeve për ndërtimin dhe fuqizimin e një infrastrukture mbrojtëse dhe parandaluese për raste të tilla. Duke shikuar pamjet e sipërfaqeve të mëdha të tokave nën ujë vërtetohet fakti i degradimit të sistemeve të kullimit, thotë prof. Goga për Deutsche Welle-n.
“Mjafton vetëm ky aspekt që të kuptosh se ku ka shkuar puna. Duke mos bërë investime, ose duke shpenzuar ndonjë fond sa për dukje, infrastruktura e kullimit është në pikë të hallit. Atëherë çfarë duhet të presim? Duhet të presim që uji që përmbyt qindra e mijëra hektarë të largohet me shumë ngadalësi, duke zëvendësuar makineritë bujqësore me gomone ose varka, duke shkatërruar prodhimet, duke dëmtuar përmbajtjen e tokës, duke shkaktuar kasaphanë në vendqëndrimet e bagëtive etj. Hidrovoret duhet të jenë të gatshme që më 1 tetor, po kështu dhe argjinaturat mbrojtëse. Po në dy dekadat e fundit këto detyrime për pushtetin lokal dhe atë qendror neglizhohen. Çfarë do mbjellësh do korrësh!”
Prof. Kristo Goga shton dhe pakujdesin që ka në projektimin e autostradave dhe ngritjeve të veprave të artit përgjatë tyre, që sipas tij, nuk parashikojnë raste të katastrofave natyrore që shoqërohen me daljen nga shtrati të lumenjve, gjë që shkakton kosto shumë të lartë në riparimin dhe normalizmin e tyre.
Prof. Sazan Guri i kthyer nga një inspektim në qarkun e Fierit dhe të Beratit thotë se pasiguria nga përmbytjet është e vazhdueshme në Shqipëri. Arsyeja kryesore është gabimi njerëzor nga niveli qytetar e deri tek vendimmarrja e politikbërja e kahershme, thotë ai për Deutsche Welle-n. “Eshtë e pafalshme që ka vijuar pa pushim zënia e hapësirave të rrjedhjes së lumenjve me ndërtime urbane. Ka madje dhe ndërtime industrialo – blegtorale pranë argjinaturave mbrojtëse. Kur bie shi presin mbrojtje nga argjinaturat, kur ka diell i dëmtojnë dhe i vjedhin. Nuk mund të harrojmë fenomenin agresiv për prerjen masive të pyjeve. Ka një shprehje të goditur popullore që thotë: ‘Atë që i bën lumit në kodër, prite në fushë…'”
Prof. Guri shprehet se në përballimin e katastrofave në Shqipëri është zakon që të bëhet shumë politikë. Sipas tij, ata që harxhojnë më tepër fjalë e deklarata 35tike janë politikanët, ndërkohë që në plan të parë duhet të jenë ekspertët, grupet e specialistëve, të cilët kanë aftësinë të tregojnë me korrektësi atë që ndodh, si dhe atë që pritet të ndodhë.
“Ky do të ishte orientimi më i mirë i publikut në raste të tilla. Ky do të ishte motivimi më i mirë për të përballuar sa më shpejt dhe me sa më pak dëme rastet e emergjencave, duke krijuar sinergji pozitive në tejkalimin e situatave kritike.”
Koordinimi me pushtetin vendor
Zamir Muça, kordinator për marrëdhëniet me publikun në Kryqin e Kuq Shqiptar, ka ndjekur nga afër situata të tilla problematike prej rreth 25 viteve. Për përmbytjet e fundit ai tregon se në veprim nuk janë vetëm strukturat e brendshme të KKSH, por dhe partnerët ndërkombëtarë të kësaj organizate, për të përballuar një operacion mbështetje për dymijë familje të prekura në pesë qarqe të vendit, plus dhe 500 të tjera që mbështeten nga një kompani e telefonisë mobile. Rëndësi të dorës së parë ka koordinimi me pushtetin vendor në mënyrë që ndihma të shkojë te njerëzit në nevojë, thotë ai për Deutsche Welle-n. “Të ndihmosh në rradhë të parë do të thotë të jesh i përgatitur për të realizuar përgjegjësitë që ke marrë. Nuk ka rëndësi nëse je një shoqatë humanitare apo një institucion, por duhet investuar për të ruajtur dinjitetin e atij që është në nevojë, në mënyrë të veçantë në kushtet në të cilat ndodhet. KKSH ka përvojë të vyer në përgatitjen dhe ndërhyrjen në raste katastrofash. Prej kohësh jemi të fokusuar edhe për ndërgjegjësimin e vetë komunitetit për rrezikun që atij i kanoset nga katastrofat natyrore dhe për mënyrën se si ai vetë mund të kthehet në një kontribues për mirë në lehtësimin e pasojave”. (dw)

Ambasadorja Viets: Gjermania do t’i kthejë brenda javësh të ikurit nga Kosova

Ambasadorja gjermane në Prishtinë, Angelika Viets, ka thënë në një intervistë për Zërin e Amerikës se ata që po migrojnë nga Kosova, po mashtrohen sepse nuk mund të përfitojnë strehim në Bashkimin Evropian.Sipas saj, brenda pak javësh, Kosovën e pret vala e kthimit të atyre që, muajve të fundit, kanë migruar në rrugë të paligjshme në vendet e BE-së.
Viets ka thënë se vendi i saj është përballur me shumëfishim të numrit të strehimkërkuesve nga Kosova, të cilët nuk kanë pothuajse asnjë mundësi që të sigurojnë qëndrim në Gjermani.
“Në muajin nëntor të vitit 2014 ishin 600 veta, në dhjetor ishin 1 mijë e 956 dhe në janar 3 mijë e 630. Përqindja e atyre që mund të përfitojnë është 1.1 apo 1.2 për qind. Kjo do të thotë se presim një valë të kthimeve brenda pak javësh dhe kjo do të jetë një sfidë për qeverinë”, ka thënë pos tjerash Viets

Suedia nuk i pranon emigrantët nga Kosova

Me procedurë të përshpejtuar do të vendoset dhe do të kthehen prapa të gjithëPersonat që në Suedi kërkojnë strehim dhe që vijnë nga shtetet e Ballkanit, nga Serbia, Bosnja, Shqipëria, Maqedonia dhe nga Kosova.
Enti shtetëror për emigrim, Migrationsverket, i Suedisë do të ndjekë përvojat e Gjermanisë dhe do të kthejë prapa të gjithë personat që kërkojnë azil në Suedi e që vijnë nga shtete e gadishullit ballkanik. Këtu parasegjithash hyjnë shtetetasit që vijnë në Suedi për të kërkuar azil nga Serbia, Bosnja, Shqipëria, Mali I Zi, Maqedonia dhe nga Kosova. Kërkesat e të gjithë emigrantëve që vijnë nga këto shtete do të shqyrtohen në procedurë të përshpejtuar, më së gjati për pesë javë, dhe të gjithë do të kthehen prapa prej nga kanë ardhur.
Refuzimi në procedurë të përshpejtuar
Ministria përgjegjëse për emigrantët në Suiedi, rritjen e numrit të azilkërkuesve nga shtetet e Ballkanit e konsideron si fatkeqësi, por shkaqet që ata ofrojnë në kërkesdat për strehim nuk mjaftojnë për përgjigje pozitive. Në të njëjtën kohë kur karvane të tëra nga shtetet e Ballkanit ia kanë mësyer Perendimit, gjendja është shumë më e mjerueshme në shtetet tjera të rrozullit tokësor e parasegjitash ajo në Si ri dhe në Eritrea.

Shanset e qytetarëve nga Kosova për azil në Gjermani janë zero

Presidenti i Zyrës Federale Gjermane për Migracion dhe Refugjatë, Dr. Manfred Schmidt, për Deutsche Welle shpjegon rregullat për azil në Gjermani dhe çfarë parashikon ligji për rastet e kërkesave nga shtetasit e Kosovës. Ai thotë se shanset për azil të Kosovarëve në Gjermani janë zero.Zoti Schmidt, vetëm në dy muajt e fundit, sipas disa vlerësimeve, nga Kosova janë larguar më shumë se 30.000 kosovarë. Shumë prej tyre synojnë të vijnë në Gjermani, me shpresë se këtu do të gjejnë një jetë më të mirë. A mund të konfirmoni rritjen e numrit të kosovarëve që kanë ardhur këto ditë dhe javë në Gjermani dhe sa reale është shpresa e tyre që në Gjermani të gjejnë një jetë më të mirë?

Dr. Manfred Schmidt: Unë vërtetë mund të konfirmoj se këto ditë është shtuar dukshëm numri i kosovarëve që po vijnë në Gjermani. Në statistikat tona thuhet se prej muajit dhjetor deri në janar, pra brenda një muaji, është trefishuar numri i azilkërkuesve në sistemin tonë. Nëse krahasojmë periudhën e njëjtë me një vit më parë, kemi një rritje të kuotës prej 572 për qind të kosovarëve. Sa i përket pyetjes tuaj, se a mund të shpresojnë këta njerëz fillimin në Gjermani të një jete më të mirë, përgjigja është: Jo. Ne kemi ndryshuar procedurat tona dhe kërkesat e personave me nënshtetësi kosovare për azil po përpunohen me procedurë të përshpejtuar. Ne po përpiqemi që vendimi për secilin rast të merret sa më parë që është e mundur. Kuota e mundësisë për njohjen e së drejtë së azilit është gati 0,0 për qind. Pra kosovarët nuk kanë shanse që të fitojnë të drejtën e azilit në Gjermani. Ne (organet federale) kemi rënë dakord me landet që sa më parë të fillojmë procesin e kthimit të detyruar në Kosovë. Kjo do të thotë që këtyre personave do t’u ndalohet edhe hyrja në të gjitha vendet e Schengenit.

Zoti Schmidt, le t’i shpjegojmë gjërat një nga një. Shumë kosovarë nisen në Gjermani me qëllim që të kërkojnë azil. A kanë shanse ata për azil?

Dr. Manfred Schmidt: Nuk kanë shanse. Në Kosovë kemi një gjende të rëndë ekonomike dhe këtë e dimë edhe ne të gjithë. Por gjendja e rëndë ekonomike nuk mund të rezultojë me mbrojtje si refugjat në Gjermani, dhe në asnjë vend tjetër të Bashkimit Evropian.

Ju me siguri që e dini që Kosova është vendi më i varfër në Evropë dhe se papunësia është mbi 40 për qind. Ndërkohë që Gjermania ka nevojë për fuqi punëtore. A nuk është ky një shkak i mjaftueshëm që këtyre personave t’u jepet azil për shkaqe ekonomike dhe a ekziston në përgjithësi azili i tillë?

Dr. Manfred Schmidt: Azili për shkaqe ekonomike nuk ekziston. Gjendja e rëndë ekonomike apo varfëria nuk janë shkaqe, të cilat, sipas Konventës së Gjenevës për Refugjatë, dikujt i mundësojnë strehim. Varfëria nuk është shkak për strehim në Evropë.

Zoti Schmidt, ju thatë se i keni thjeshtuar procedurat për shqyrtimin e kërkesave të kosovarëve, që vijnë në Gjermani dhe kërkojnë strehim. Si duket kjo procedurë, sa mund të qëndrojnë kosovarët këtu si azilkërkues dhe pas sa kohe ata kthehen në vendlindje?

Dr. Manfred Schmidt: Ne kemi reaguar ndaj kësaj gjendjeje të jashtëzakonshme. Procedura është si vijon: fillimisht e përcaktojmë identitetin e personit. Bëhet vlerësimi i gjendjes së sigurisë, merren shenjat e gishtrinjve, bëhet fotografimi biometrik dhe më pas me kolegët tanë brenda 10 ditësh merret vendimi. Pasojnë përgjigjet negative, sepse të gjitha kërkesat janë të paargumentuara. Pas përgjigjes negative, ne kërkojmë prej tyre të largohen nga vendi. Për ata, të cilët nuk largohen vullnetarisht, pason kthimi i detyrueshëm.

A mund të llogarisin këta njerëz me mbështetje sociale, a kanë ku të sistemohen, a kanë për të ngrënë sa duhet, apo thjesht duhet të presin diku në kushte të papërshtatshme, deri sa t’ju vijë përgjigja negative?

Dr. Manfred Schmidt: Ata presin në vendstrehimet e landeve, ku janë pranuar për herë të parë. Ata natyrisht që atje do të marrin gjërat elementare për të mbijetuar. Atje qëndrojnë deri sa të mbërrijë përgjigja jonë negative dhe që atje ata duhet të largohen për në Kosovë.

Ju tërë kohën po flisni “deri sa nuk kemi vendosur negativisht”. A do të thotë kjo se vërtetë nuk do të pranohet asnjëri prej atyre që aplikojnë?

Dr. Manfred Schmidt: Ne nuk do të njohim asnjë prej këtyre kërkesave për azil.

Por zoti Schmidt, Kosova, Shqipëria dhe Mali i Zi ende nuk janë në listën e vendeve të sigurta, në dallim nga Serbia, Bosnje-Hercegovina dhe Maqedonia. A ka ky fakt ndonjë rëndësi për kosovarët që vijnë dhe kërkojnë azil?

Dr. Manfred Schmidt: Kosova nuk është vend i pasigurtë, por ende nuk është radhitur ndër vendet e sigurta, si këto tri vendet e tjera që përmendni ju. Kjo do të thotë se edhe në rastin e qytetarëve të Bosnjes, Serbisë dhe Maqedonisë mund të vendosim kaq shpejt. Ne aktualisht jemi duke shqyrtuar mundësinë që edhe Kosova të radhitet ndër vendet e sigurta. Por fakti që ende nuk është radhitur ndër vendet e sigurta, nuk ka aspak ndikim në kërkesat e paargumentuara për azil dhe të gjithë do të refuzohen.

Zoti Schmidt, ju me siguri që e keni parë se në Gjermani dhe vendet e tjera po vijnë edhe familje me fëmijë të vegjël dhe me gra. Cilat janë kushtet ku sistemohen këta njerëz?

Dr. Manfred Schmidt: Ata vendosen në vendstrehimet e landeve. Ato janë vendstrehime të përbashkëta, me një hapësirë relativisht të ngushtë. Në këto vendstrehime paraprake atyre u duhet të presin edhe vendimin. Këto nuk janë vendstrehime të mira. Por atje natyrisht që ekziston përkujdesi elementar për ta. Theksoj, se nuk ka asnjë lloj mundësie që personat që kërkojnë azil të mbeten për një kohë më të gjatë në Gjermani. Nëse dikush do të vijë në Gjermani, kjo vlen edhe për kosovarët, ekziston mundësia e ardhjes legale. Nëse dikush gjen një vend legal pune në Gjermani, duhet të shkojë dhe të kërkojë vizë në ambasadën gjermane në Kosovë. Në këtë mënyrë sigurohet ardhja legale në Gjermani. Por jo përmes azilit dhe ardhjes ilegale në Gjermani. /Deutsche Welle/

Kontrolle të shtuara përgjatë kufirit Serbi – Hungari

Numri i emigrantëve të paligjshëm nga Kosova për në vendet e Bashkimit Evropian, ka rënë në dy ditët e fundit, ka thënë Millorad Veloviq, drejtor i policisë së Serbisë.Ai është takuar sot me homologun e tij hungarez, Karol Pap, në vendkalimin kufitar Horgosh në mes të Serbisë dhe Hungarisë.
“Kjo rënie nuk është në nivelin e kënaqshëm. Ne kemi angazhuar tashmë xhandarmërinë serbe dhe në këtë zonë do të patrullojnë rreth 50 pjesëtarë të xhandarmerisë”, ka thënë zoti Veloviq, duke paralajmëruar edhe zbarkimin e kolegëve të tyre nga Gjermania, të cilët do të vijnë me pajisje për kontrollin e kufirit, përfshirë këtu edhe kamerat vëzhguese.
Ai tha se në Suboticë ekziston një hotel, të cilin e ka blerë në shtator të vitit të kaluar një “person i kombësisë shqiptare, ku vendosen emigrantët” dhe se në bashkëpunim me inspektoratin e punës, hoteli tash është mbyllur.
Zoti Veloviq gjithashtu tha se kjo çështje nuk është problem vetëm i Serbisë dhe Hungarisë, por është një problem më i gjerë dhe i përbashkët, që kërkon sipas tij, “shtimin e masave të kontrollit dhe hetimin e motiveve që kanë çuar deri te ky numër” i kalimeve të paligjshme të kufirit.
Çështja e migrimit të paligjshëm të qytetarëve nga Kosova për në vendet e Bashkimit Evropian, është diskutuar edhe në takimin e mbështetur nga Bashkimi Evropian ndërmjet kryeministrit të Kosovës, Isa Mustafa, dhe atij të Serbisë, Aleksandar Vuçiq.
Kështu ka thënë sot në Bruksel, Maja Kocijançiq, zëdhënëse e përfaqësueses së lartë të Bashkimit Evropian, Federica Mogherini.
“Kryeministri Mustafa dhe kryeministri Vuçiq janë pajtuar të punojnë bashkërisht për të adresuar shqetësimet e tyre”, ka thënë Kocijançiq, transmeton REL.
Natasha Bertaud, zëdhënëse e Komisionarit Evropian për migrimin, Dimitris Avramopulos, ka thënë se në dhjetor të vitit 2014, qytetarët nga Kosova përbënin 40 për qind të kalimeve të paligjshme të kufijve të jashtëm të Bashkimit Evropian, duke tejkaluar kështu sirianët dhe afganët.
“Qëndrimi i komisionerit është se Qeveria e Kosovës duhet të forcojë fushatën e informimit për ata që marrin këtë rrugë, të forcojë kufirin në pajtim me të drejtat themelore, të hetojë kompanitë e autobusëve që organizojnë këto udhëtime”, tha zonja Bertaud, duke thënë se këto çështje janë duke u diskutuar me autoritetet e Kosovës, në kuadrin e bisedimeve për liberalizimin e vizave për qytetarët e Kosovës.
Institucionet e Kosovës vazhdojnë t’u bëjnë thirrje qytetarëve që të mos e marrin rrugën e migrimit të paligjshëm. Në këtë kuadër, presidentja e Kosovës, Atifete Jahjaga, ka vizituar sot Podujevën dhe Gjilanin.
“Rruga e ikjes nuk është një rrugë e lehtë, është një rrugë e pagarantuar. Është një rrugë e pasigurtë sidomos tani kur po i dëgjojmë edhe prononcimet dhe deklarimet e fundit të vendeve të Bashkimit Evropian se qytetarët nga Kosova do të kthehen në vendin e tyre”, tha Jahjaga.
Autoritetet në Prishtinë deklarojnë se nuk kanë të dhëna të sakta për numrin e qytetarëve që kanë migruar paligjshëm në dy muajt e fundit, por flitet për mijëra të tillë që ia kanë mësyrë vendeve të Bashkimit Evropian, në kërkim të një jete më të mirë.

Qendra Informative Shqiptare "Liria"