Lëvizja VETËVENDOSJE! mbajti konferencë për media për ta komentuar vendimin e komisionit ad hic për demarkacionin me Malin e Zi. Deputeti Glauk Konjufca përmendi disa pika se pse rezultatet e këtij komisioni janë të pasakta.

“Më 15 mars kemi thënë që ky komision ad hoc i krijuar nga presidentja nuk do të sjellë rezultate të ndryshme nga Komisioni paraprak i drejtuar nga Murat Mehat. Ne patëm thënë, me të drejtë, që ‘Çdo komision vlerësimi që fillon punën sipas materialeve e metodës së njëjtë, pra përcaktimin e vijës kufitare sipas kadastrit, do të vijë në përfundim të ngjashëm me atë të komisionit qeveritar’ ”, tha Konjufca.

Ky komision i krijuar nga presidentja Jahjaga, është cilësuar si komision ekspertësh kompetentë për fushën, por në fakt nga 3 personat që e kanë përbërë atë, vetëm 1 është ekspert i fushës. Dy të tjerët janë njëri diplomat ish zyrtarë i ICO dhe Zyrës amerikane dhe tjetri Expert i sigurise dhe IBM.

Ky komision nuk ka pasur asnjë studiues e profesionistë shqiptarë, ani pse më mirë se sa shqiptarët askush nuk mund ta dijë çështjen e kufirit të vendit tonë.

Presidentja dhe ky komision nuk kanë marrë parasysh vullnetin e 205 mijë qytetarëve, që e kanë kundërshtuar rezultatin e komisioni qeveritar për demarkacion dhe nuk e kanë mbrojtur interesin e Republikës së Kosovës, në këtë rast..

Ekipi i ndërkombëtarëve i ftuar nga presidentja në raportin e tij ka thënë edhe skandale të tjera. P.sh. ky ekip e ka përshëndetur demarkimin e kufirit të Kosovës me Maqedoninë (i cili ka qenë skandaloz dhe në dëm të Kosovës) si dhe e ka përshëndetur demarkimin e kufirit të Kosovës me Shqipërinë (i cili nuk ka ndodhur kurrë!). Pra këtu kemi të bëjmë me joseriozitet të lartë të këtij grupi të ftuar nga presidentja.

Pjesa kryesore e raportit flet per përputhjen ligjore të dokumenteve të Komisionit shtetëror. Kjo është po ashtu vërtetë e pashembullt se si tre persona që asnjëri nuk e e njeh me detaje e imtësi legjislacionin e komplikuar sa i takon kësaj çështje për vetëm 15 ditë jep konkluzione.

Ndërsa sa i takon pjesës substanciale pra asaj ku flitet për territorin, duket qartë se me gjithë respektin per këdo që vjen në Kosovë i ftuar nga institucionet tona nuk mund të pretendojë që me 15 ditë të hulumtojë, studiojë dhe nxjerrë konkluzion per qindra faqe studimesh gjeodezike dhe po ashtu dhjetëra harta e mijëra faqe arkiva historike.

Ky komision ka marrë për bazë punën e komisionit të kaluar të drejtuar nga Murat Meha. Mirëpo ne kemi shpalosur para jush një hartë të vitit 1998 me autor Murat Mehën, në të cilën kufiri është në rregull, pra në shpërputhje me vendimet e komisionit që e kishte drejtuar. Ky është një skandal dhe flet për padrejtësinë që po i bëhet Kosovës në rastin me demarkacionin.

Pra, ateherë kur Murat Meha ishte studiues, i bënte hartat objektive dhe kufijtë e saktë, kurse tash që është shërbëtor i kompromiseve të pushtetit, shkel mbi vetë punën e tij shkencore, vetëm e vetëm që t’i justifikojë hektarët që Hashim Thaçi ia fali Malit të Zi.

Pra, kjo përveçse shkelje e interesit shtetëror, është edhe përdhosje e punës shkencore e profesionale, duke qenë që kjo hartë u botua nga Enti Shkollor i Kosovës dhe se breza të tërë nxënësish kanë mësuar dhe janë përgatitur profesionalisht me këto harta, të cilat tash Murat Meha po i shkel për hir të pushtetit.

Lëvizja VETËVENDOSJE!

Kreu i Lëvizjes Vetëvendosje, Visar Ymeri, e ka cilësuar si më skandalozin, vendimin e Gjykatës së Hagës për lirimin e të akuzuarit për krime lufte, Vojsllav Sheshel.

Përmes një postimi në “Facebook”, Ymeri thekson se mosndëshkimi i shtetit të Serbisë për krimet e luftës në Ballkan po rrënon dinjitetin viktimave të shumta dhe familjeve të tyre.

Ai thekson se mosndëshkimi i kriminelëve të luftës nga Serbia është pranim i krimit të luftës, çka nxit luftëra të reja në Ballkan

Postimi në “Facebook”

“Kriminelin Sheshel e paska shpallur të pafajshëm Tribunali i Hagës. Ky, sipas të gjitha gjasave, është vendimi më skandaloz i këtij Tribunali.

Të shpallet ultra-fashisti Sheshel i pafajshëm për krimet e kryera nga forcat militare e paramilitare të Serbisë në Kosovë, Bosnje e Kroaci, është krim në vete, dhe nuk ka asgjë të bëjë me drejtësinë.

Kështu fashistëve në Serbi, të cilët janë në pushtet, po u dërgohet një sinjal tjetër: jo i domosdoshmërisë për denazifikim e dekriminalizim, por i hapësirës për intensifikim të kërkesave e veprimeve të tyre shoviniste e hegjemone.

Ky mosndëshkim i shtetit të Serbisë po i rrënon dinjitetin për çdo ditë viktimave të shumta dhe familjeve të tyre. Nga Zagrebi, në Sarajevë e Prishtinë sot njerëzit ndihen të dhunuar rishtazi.

Tash nga buzëqeshja kriminale e Sheshelit, dhe nga vendimi i neveritshëm i Tribunalit ndërkombëtar. Është e padrejtë të quhet drejtësi ndërkombëtare.

Mosndëshkimi i kriminelëve të luftës nga Serbia është pranim i krimit të luftës. Ky pranim është nxitje e Serbisë për luftëra të reja në Ballkan.

/Shekulli Online/

Ekspertët e Kosovës të fushave që kanë të bëjnë me demarkacionin e kufijve, vlerësojnë se rezultati që ka dalë nga ekipi ndërkombëtar ad hoc lidhur me aspektin ligjor dhe teknik të demarkacionit të kufirit ndërmjet Kosovës dhe Malit të Zi, ka qenë i pritshëm.

Presidentja e Kosovës, Atifete Jahjaga, të mërkurën ka thënë se “nga aspekti ligjor dhe teknik, ekspertët ndërkombëtarë nuk kanë gjetur shkelje, dhe kanë vlerësuar se procesi u është përmbajtur rregullave ligjore”.

Por, profesor – doktor Shpëtim Bulliqi, ligjërues në Departamentin e Gjeografisë në Fakultetin e Shkencave Matematike-Natyrore, në Universitetin e Prishtinës, thotë për Radion Evropa e Lirë se ekipi ad hoc, i cili është ftuar nga presidentja e Kosovës Jahjaga, për vlerësimin e procesit të demarkacionit të kufirit me Malin e Zi, ka pasur për detyrë vlerësimin e ngushtë, teknik dhe ligjor.

“Nuk është pritur rezultat tjetër prej këtij që ka dalë nga ana e këtyre anëtarëve të komisionit ndërkombëtar, për faktin se këta kanë ardhur ta vlerësojnë dokumentacionin që e ka përgatitur Komisioni për demarkacion i Qeverisë së Kosovës. prandaj, nga ai material, rezultat tjetër nuk del, përveç këtij rezultati që realisht ka dalë”, ka thënë profesor Bulliqi.

Ai, së bashku me profesor doktor Florim Isufin, po ashtu ligjërues në Departamnetin e Gjeografisë në Fakultetin e Shkencave Matematike-Natyrore, në Universitetin e Prishtinës, në gusht të vitit të kaluar, patën publikuar punimin shkencor me titull “Demarkacioni Kosovë-Mali i Zi (Aspekte ndërkombëtare, gjeografike, politike dhe historike) Gusht 2015”.

Sipas profesor Bulliqit, për përcaktimin e vijave kufitare ndërmjet Kosovës dhe Serbisë, është përdorur vetëm në kriterin e të dhënave kadastrale, i cili siç thotë ai, i takon kritereve sekondare apo terciare, në kuptimin e kritereve shkencore.

“Mbështetja vetëm në të dhënat kadastrale është njëri prej gabimeve kryesore, që janë bërë në fillim të të dyja komisioneve, edhe të Malit të Zi edhe të Kosovës. Por, normalisht, kjo ka shkuar në favor të Malit të Zi, për arsye se dihet se për çfarë periudhe është shtet Mali i Zi dhe ai është shtet më i konsoliduar se Kosova. Ai ka arritur që kadastrën ta ketë në nivelin më të mirë se Kosova dhe normalisht, ky proces ka shkuar në favor të Malit të Zi dhe rezultati është ky çfarë është”.

Profesor Bulliqi, thekson se kriteri bazik dhe kryesore shkencore qe aplikohet në shënimin e vijave kufitare janë: kriteri natyror apo fizik-gjeografik, i cili i ndjek vijat ujëndarëse, qafat malore dhe luginat lumore. Gjithashtu sipas tij, është dashur të merret për bazë edhe kriteri historik, kriteri socio-ekonomik.

Të gjitha këto kritere, siç thotë profesor Bulliqi, nuk janë respektuar dhe si rezultat i kësaj, Kosova ka humbur rreth 8 mijë e 223 hektarë në procesin e demarkacionit me Malin e Zi.

Edhe profesor doktor Florim Isufi, vlerëson se asnjë nga kriteret bazike apo parësore për shënimin e vijës kufitare nuk janë respektuar e as aplikuar.

“Po ua them atë që ua kemi thënë edhe ndërkombëtarëve. Në botë ekzistojnë 23 ekspertët më të mirë botëror që merren me ketë lëmi. Ata kanë publikime jashtëzakonisht të mëdha. Këta 23 ekspertë, asnjëri në ekspertizën e tyre, në punën e tyre shkencore dhe praktike nuk e ka paraparë metodologjinë që e kanë marrë Komisioni shtetëror për demarkacion”.

“Duhet qenë real se, vetëm njëri prej këtyre ekspertëve, thotë se ky kriter (kadastral), mund të jetë sekondar ose terciar. Të gjithë të tjerët bazohen në kriteret, në të cilat po bazohemi unë dhe kolegu im Shpëtimi”.

Profesor Isufi shton se ekipi ndërkombëtarë ad hoc, ka kryer punën për të cilën edhe është ftuar nga presidentja Jahjaga, do të thotë, vetëm vlerësimin e procesit.

“Ata kanë dashur t’i shohin vetëm procedurat, se si ka shkuar puna. Por, jo edhe substancën, jo edhe atë se cila metodologji duhet të zbatohet dhe cila është më e zhvilluar në botë sot për demarkacion ose edhe çka ka materiale tjera”.

“Për shembull, ne u kemi dhënë një mori të madhe materialesh. Unë e mora raportin e tyre zyrtar dhe asnjë material i yni nuk është përfshirë në raportin e tyre. Kjo do të thotë se ne vetëm kemi biseduar, kemi grumbulluar material dhe ua kemi dhënë dhe ata nuk e kanë përfshirë në raport. Madje as nuk e kanë cekur që është material i keq. Këtë kanë mundur ta thonë”, tha Isufi.

Të dy këta ekspertë të fushave që kanë të bëjnë me shënimin e vijave kufitare, thonë se në rast se shteti kërkon ekspertizë shkencore, ata janë të gatshëm ta ofrojnë.

Por, ata nuk japin ndonjë vlerësim nëse rezultati nga komisioni ndërkombëtar ad hoc e përmbyllë problemin e demarkacionit të kufirit me Malin e Zi.

Siç kanë thënë ata, “shkenca nuk mund të vendosë mbi politikën”. (rel)

Tre ekspertët ndërkombëtar që vlerësuan procesin e demarkacionit Kosovë-Mali i Zi, thanë se në shënimin e kësaj vije kufitare janë zbatuar praktikat ndërkombëtare më të dëshmuara deri më tani në vendet tjera.

Komisioni i ekspertëve ndërkombëtarë për vlerësimin e procesit të demarkacionit ndërmjet Kosovës dhe Malit të Zi, tha se procesi i përkufizimit të kësaj vije kufitare është në përputhje me standardet ndërkombëtare dhe se ata nuk kanë gjetur shkelje ligjore gjatë tërë procesit. Partitë politike opozitare thanë se raporti i ekspertëve është i papranueshëm dhe sipas tyre është i domosdoshëm korrigjimi i vijës kufitare Kosovë-Mali i Zi. Tre ekspertët ndërkombëtarë, nga SHBA-ja, Britania e Madhe dhe Gjermania, erdhën në Kosovë dy javë më parë si pjesë e një komisioni që u iniciua nga Presidentja Atifete Jahjaga për vlerësimin e procesit të shënimit të kufirit në mes të Kosovës dhe Malit të Zi. Kjo u bë pas shqetësimeve të shprehura prej partive opozitare, të cilat kërkonin shfuqizimin e nënshkrimit të marrëveshjes për demarkacionin ndërmjet Kosovës dhe Malit të Zi e nënshkruar në gusht të vitit të shkuar.

Pasi pranoi raportin e ekspertëve ndërkombëtar, Presidentja Atifete Jahjaga, tha se “nga aspekti ligjor dhe teknik ekspertët nuk kanë gjetur shkelje në procesin e demarkacionit. Komisioni ka vlerësuar se procesi i shënimit të kufirit është dashur të jetë më transparent përfshirë edhe familjarizimin e publikut me hartat, të dhënat dhe gjetjet gjeodezike”, tha Presidentja Jahjaga.

Eksperti gjerman i Gjeodezisë, Herbert Wilmes, pjesë e komisionit, tha se komisioni ad-hoc ka zbatuar praktikat ndërkombëtare më të dëshmuara deri më tani në vendet tjera. “Dy komisionet shtetërore, ai i Kosovës dhe ai malazez kanë aplikuar teknikat më të mira si GSS ose GPS, të cilat kanë mundësuar që në mënyrë gjeodezike të përcaktohet çdo milimetër i kufirit. Ne na është dashur që t’i kombinojnë koordinatat me hartat gjeografike. Vija kufitare e prezantuar është bazuar në informacione të sakta. Vija më e lartë është vija administrative, e cila është e Krahinës Autonome të Kosovës dhe në nivelin dytë janë përdorur vijat e kufijve komunal në të dy anët e kufirit dhe niveli i tretë janë përdorur informatat kadastrale”, tha Herbert Wilmes.

Në të njetën linjë u shpreh edhe eksperti amerikan Fletcher Burton: “procesi kishte një bazë shumë të fortë ligjore. Kemi gjetur se nga aspekti ligjor procesi dhe puna e Komisionit kosovar shtetëror për shënimin e kufirit me Malin e Zi ka pasur legjitimitet të plotë”, tha Fletcher Burton.

Eksperti britanik Fred Newton nga ana e tij foli për rëndësinë që kanë proceset e demarkacionit ndërmjet vendeve, që sipas tij, duhet të jenë përcaktuar mirë dhe qartë.

Partitë politike opozitare në Kosovë reaguan ashpër pas publikimit të raportit duke e vlerësuar të papranueshëm raportin e ekspertëve ndërkombëtarë.

“Opozita e Bashkuar vlerëson se gjetjet e këtij ekipi ndërkombëtar për vlerësimin e punës së Komisionit Shtetëror të Kosovës për demarkacionin e kufirit me Malin e Zi janë vlerësime që janë bërë për nevojat e presidentes dhe si të tilla nuk mund të kenë reflektim në domosdoshmërinë e korrigjimit të kufirit me Malin e Zi”, thuhet në një reagim të përbashkët të partive opozitare.

Sipas tyre kufijtë e Kosovës mund t’i caktojë vetëm një komision i besueshëm shtetëror i Kosovës, i cili mund të ketë edhe ekspertë ndërkombëtarë, që do të shfrytëzojë dokumente të vlefshme, metodologji të përshtatshme të punës dhe të dhëna shkencore, por kurrsesi një grup prej tre personave, prej të cilëve vetëm njëri është ekspert i fushës kurse dy të tjerët janë diplomatë.

“Kufiri i Kosovës me Malin e zi është në Çakorr dhe në Kullë të Zhlepit, dhe pavarësisht vlerësimit të tre ekspertëve ndërkombëtar, demarkacioni i kufirit me Malin e Zi, nuk është i pranueshëm për opozitën dhe qytetarët dhe do të kundërshtohet pa kompromis. Mbi 205 mijë qytetarë kanë nënshkruar kundër këtij demarkacioni dhe vullneti i tyre nuk është marrë parasysh as nga presidentja e as nga ky ekip. Argumentet e paraqitura nga ky ekip ndërkombëtar, se demarkacioni me Malin e Zi është një proces legal e ku nuk ka pasur shpërputhje ndërmjet dy komisioneve shtetërore, nuk qëndrojnë, sepse edhe në një proces legal, e ku nuk ka as shpërputhje, mund të bëhen zgjidhje jolegale, siç ka ndodhur me rastin e Kosovës me Malin e Zi. Kosova nuk ka territore për të falur dhe tërësinë e saj territoriale do ta mbrojmë pavarësisht vendimeve të tilla”, thuhet në reagimin e opozitës së bashkuar.

Marrëveshja e nënshkruar më 26 gusht të vitit të kaluar ndërmjet Kosovës dhe Malit të Zi, e cila përcaktonte vijën kufitare ndërmjet dy vendeve dhe marrëveshja për themelimin e Asociacionit të Komunave me shumicë serbe, janë dy çështje, që bënë që partitë opozitare ta bllokojnë punën e parlamentit prej shtatë muajsh. Koalicioni qeveritar kërkon nga partitë opozitare që shqetësimet e tyre t’i paraqesin dhe debatojnë në institucionet e Kosovës, ndërsa opozita kërkon dorëheqjen e qeverisë dhe zgjedhje të parakohshme.

Sidoqoftë, megjithë mospajtimin e partive opozitare për të gjeturat e komisionit ndërkombëtar që shqyrtoi procesin shënimit të vijës kufitare ndërmjet Kosovës dhe Malit të Zi, ambasada e SHBA-së, në një deklaratë të saj, mirëpriti konkluzionet e komisionit ndërkombëtar duke thënë se gjetjet “qartazi plotësojnë normat ndërkombëtare”.

“Ne jemi të pajtimit me ftesën e komisionit drejtuar Republikës së Kosovës dhe Republikës së Malit të Zi për të ndërmarrë hapa në përmirësimin e menaxhimit të kufirit dhe thellimit të bashkëpunimit. Shpresojmë se palët do t’i rishikojnë me kujdes të gjeturat në raport dhe do t’i kthehen punës së rëndësishme që kanë, për ta çuar Kosovën përpara në rrugën e saj drejt institucioneve euro-atlantike”, thuhet në reagimin e ambasadës amerikane në Kosovë. (dw)