Prokuroria e Vlorës sekuestroi 89 hektarë tokë me vlerë 110 milionë euro në Zvërnec, një zonë me potencial të lartë në investime për turizëm.

Toka është përfituar në mënyrë të paligjshme nga Raimond Mezi, i njëjti person që përfitoi 220 hektarë toke edhe në Karaburun. Sipas prokurorisë, skema është realizuar në të njëjtën mënyrë dhe nga të njëjtët persona, të cilët kanë regjistruar në mënyrë të paligjshme tokën në Karaburun.

Toka në Zvërnec është regjistruar në Hipotekën e Vlorës në bazë të dokumentave të falsifikuara dhe nëpërmjet një procesi gjyqësor njohjeje prone tërësisht fiktiv.

Hetimi gjeti se Raimond Mezi, me vendim gjyqkate përfitoi 89 hektarë, vendimi ky i vitit 2003, dhënë nga gjyqtari Skerdilajd Konomi. Prokuroria e Vlorës e ka konstatuar tërësisht fiktiv këtë vendim, pasi, në kohën e dhënies së vendimit, i ndjeri Konomi nuk ka qenë gjyqtar.

Dosja e falsifikuar më pas është futur në arkivën e gjykatës dhe grupi i falsifikatorëve ka ndërhyrë edhe në regjistrin e vitit 2003. Kjo pronë është regjistruar në hipotekë nga shtetasja Blerina Dhrami, e cila është nën hetim.

Kjo është hera e parë që emri i të ndjerit Skerdilajd Konomi përmendet nga hetimi i prokurorisë. Në kohën kur ish-gjyqtari 35-vjeçar u ekzekutua u përmend se shkak mund të ishte një konflikt për pronësi tokash.

Prokuroria nuk e ka sqaruar ende nëse falsifikimi është bërë pas vdekjes së gjyqtarit apo gjatë kohës kur ai ishte në detyrë në Gjykatën e Vlorës dhe çfarë lidhje ka falsifikimi i një vendimi gjyqësor me toka që vlejnë 110 milionë euro me një atentat makabër në mes të qytetit.

/ Top Channel

Prokuroria thotë se në çështjen e kryebashkiakut të dorëhequr të Kavajës, Elvis Rroshi ka si prova kundër tij përveç formularit të vetëdeklarimit edhe dy shkresa të përcjella përmes Interpol Tiranës në të cilat autoritetet e huaja përcjellin informacion për të.

Në përgjigje të 8 qershorit Zvicra njofton Shqipërinë se ky shtetas njihet me emrat Ervin Rroshi, Elvis Rroshi, Baskim Hallulli , Enver Rroshi, Enver Proshi.

Zvicra shton se në prill 1993 Roshi ka hyrë në mënyrë të paligjshme dhe ka kërkuar azil. Në datën 14 maj ai është ndaluar nga policia e Zyrihut për një rast të dyshuar droge.

Prokuroria thotë se sipas homologeve duke qenë se ky rast ka 20  vjet dhe nuk është bërë e  mundur të sigurohen më tepër detaje, por duke marre parasysh faktin se ai është dëbuar 4 muaj më vonë, ndoshta nuk ka qenë një episod trafiku, por konsumi.

Zvicra shton se më datën 14 shtator 1993 Elvis Rroshi është dëbuar për në Shqipëri  ndërkohë që në korrik 1997 ai ka hyrë epërsi në mënyrë të paligjshme duke kërkuar sërish azil. Një muaj më pas me urdhër të Gjykatës se Zyrihut ai është dëbuar.

Por në vitin 2015 DEA amerikane ka informuar autoritetet zvicerane se ata po hetonin një shtetas me emrin Enver Rroshi për trafik droge dhe pastrim parash dhe për këtë gjë Zvicra po kryejnë hetime të mëtejshme. Gjithashtu sipas Prokurorisë Elvis Rroshi nuk ka deklaruar se është dëbuar nga shteti italian duke pasqyruar të dhëna të rreme.

Prokuroria shton se autoritetet gjermane të drejtësisë në përgjigjen e tyre kanë theksuar faktin se sipas ligjit nuk lejohet transmetimi i të dhënave personale pa u informuar më parë mbi faktet ekzakte të këtij hetimi.

/ Top Channel

Rreth shtatë orë qëndrimi në Tiranë të ministrit të Jashtëm të Gjermanisë, Frank-Walter Steinmeier patën si kryefjalë reformën në drejtësi.

Shefi i diplomacisë gjermane Steinmeier pati rast që të shkëmbente mendime me zyrtarë të lartë të mazhorancës dhe opozitës. Në takime u prekën edhe temat për bashkëpunimin mes dy vendeve si dhe procesi i integrimit europian të vendeve aspirante të rajonit. Frank-Walter Steinmeier u ndal në nevojën e vijueshmërisë së reformave dhe plotësimin e kushteve për vendin në rrugën drejt anëtarësimit në familjen europiane. Ai kujtoi dhe koston e reformave, por rëndësi të dorës së parë ka ecja përpara e zhvillimit të vendit.

“Për reformat nuk merr vetëm falenderime, sepse shpesh herë ka kritika të ashpra dhe ndoshta kostoja mund të reflektohet edhe në zgjedhje. Kam mësuar se në opozitë nuk mund të fitohet gjithmonë duke refuzuar. Ka situata në të cilat një qeveri do të duhet të marrë risqet përkatëse për ta çuar vendin përpara, por e njëjta gjë vlen edhe për opozitën. Nuk duhet menduar për avantazhet afatshkurtra, por për ato afatgjata, në të mirën e vendit”.

Frank-Walter Steinmeier ishte i drejtëpërdrejtë kur artikuloi rëndësinë që ka realizimi sa më parë të reformës në drejtësi. “Pa reformën në drejtësi, nuk mund të përshpejtohet procesi i integrimit të Shqipërisë në BE”. Veç impaktit direkt tek qytetarët, sipas tij, kjo reformë krijon mundësinë që vendi të bëhet në rajon pararendës i ristrukturimit të sektorit të drejtësisë në kuptimin e shtetit të së drejtës.

Homolgu shqiptar, Ditmir Bushati shprehu gatishmërinë e mazhorancës për ta miratuar paketën e reformës në drejtësi ku kanë kontribuar në çdo hap të procesit dhe ekspertët ndërkombëtarë. Miratimi i saj do të jepte sipas Bushatit efekte “në forcimin e sundimit të ligjit në ekonomi, në luftën kundër korrupsionit, në luftën kundër krimit të organizuar, dhe në luftën kundër terrorizmit dhe radikalizmit… Shqipëria i ka të qarta detyrat e saj, në mënyrë që të sigurojë mbeshtetjen e nevojshme për të kryer hapin e rradhës, atë të një rekomandimi pozitiv për çeljen e negociatave për anëtarësim në BE.”

Kryeministri Edi Rama në shenjë kortezie, pak para se të takohej me shefin e diplomacisë gjermane shpërndau përmes adresës personale në rrjetet sociale shënimin: “Mikpresim sot një mik të madh, ministrin e Jashtëm gjerman, Frank Walter Steinmeier, mbështetës i madh i Shqipërisë për hapjen e negociatave.”

Shefi i opozitës Lulzim Basha gjatë takimit me ministrin e Jashtëm të Gjermanisë përmendi ndikimin e Partisë Demokratike për të përmirësuar draftin e reformës në drejtësi. Në një komunikatë për median, që u shpërnda të martën pasdite nga zyra e shtypit e opozitës mbi takimin Basha-Steinmeier, thuhej dhe se PD ka kërkuar zbatimin e plotë të rekomandimit nr. 88 të Komisionit të Venecias.

“Parimi duhet të pranohet për të gjitha institucionet, theksoi Basha, sepse një drejtësi nuk mund të jetë e pakapur nëse kryeministri vendos se kush është i pastër dhe kush jo nga gjyqtarët dhe prokurorët. Kjo është refuzuar deri tani nga Edi Rama.”

Gjatë kohës që shefi i diplomacisë gjermane zhvillonte agjendën e tij zyrtare në Tiranë, në mjediset e kryesisë së Kuvendit u zhvillua një mbledhje e Komisionit të Posaçëm Parlamentar të Reformës në Drejtësi, që u monitorua nga afër nga dy diplomatë të rëndësishëm të akredituar në Tiranë, ambasadorja e BE-së, Vlahutin dhe ambasadori amerikan, Lu.

Deputetët e opozitës qëndruan vetëm pak minuta dhe lëshuan sallën, duke mos u përfshirë në debatin e diskutimit nen për nen të draftit të reformës, një procedurë që kaloi vetëm me votat pro të bashkuara të deputetëve të PS dhe LSI-së. Akti i sotëm ka shënuar fillimin e procesit për miratimin e reformës përmes parlamentit.

Periudha e mbetur në afër dy javë do të shfrytëzohet dhe për të arritur ndonjë kompromis me afrim qëndrimesh, mes mazhorancës dhe opozitës, për pikën më të debatueshme të momentit që lidhet me formulën e përzgjedhjes së përfaqësuesve në organet e reja të drejtësisë. Dhe duket se presioni i faktorit ndërkombëtar nuk do të rreshtë deri në hapin e fundit, kur drafti të futet për diskutim dhe votim në seancë plenare në Kuvend. (dw)

Deputetët socialistë në komisionin e posaçëm parlamentar për reformën në drejtësi votuan sot nen për nen projektin e kësaj reforme, pasi përfaqësuesit e opozitës u larguan nga mbledhja.

Pjesa e mbetur e komisionit vazhdoi miratimin nen për nen dhe në parim të draftit të përgatitur, ndërsa mbledhja u ndoq nga afër prej ambasadorit amerikan Donald Lu dhe ambasadores së BE-së, Romana Vlahutin.

Mbledhja e sotme e komisionit të reformës u zhvillua me dyer të mbyllura për mediat, dhe pas kërkesave të deputetëve të opozitës, deputetët e PS dhe LSI votuan të gjitha ndryshimet ligjore, përveç atyre që opozita nuk ka dhënë mirëkuptim.

Deputeti i PD-së, Oerd Bylykbashi, tha kur u largua nga mbledhja se e vetmja pikë që kërkon opozita është zbatimi i nenit 88 nga rekomandimet e Komisionit të Venecias.

Deri tani ende nuk duken shenja për mirëkuptim mes palëve mbi pikën 88 të rekomandimeve të Venecias.

Vendosmëria e deputetëve demokratë në komisionin e reformës ishte vazhdim i të njëjtës këmbëngulje që shfaqi më herët kryetari i partisë demokratike, Lulzim Basha.

Pak kohë pasi komisioni parlamentar me antarët socialistë votoi projektin e reformimit të drejtësisë, kryeministri Edi Rama doli para mediave për një deklaratë shtypi së bashku me ministrin gjerman të punëve të jashtme Fran Valter Shteinmeier.

Reforma në sistemin e drejtësisë shqiptare po vlerësohet si mjaft e rëndësishme nga qytetarët shqiptarë dhe nga diplomatët ndërkombëtarë.

Krahas diplomatit amerikan Lu dhe asaj europiane Vlahutin, të cilët po ndërmjetësojnë në çdo hallkë të procesit, sot e vizitoi Tiranën Frank Valter Steinmeier, ministri i jashtëm gjerman, i cili u shpreh se ka ardhur pikërisht për reformën në drejtësi, e cila, sipas tij, duhet miratuar pa humbur shumë kohë.

Kryediplomati gjerman Shteinmeier ka ardhur në Tiranë për të shtuar trysninë ndaj forcave politike që të gjejnë mirëkuptimin mbi reformën në drejtësi.

Si diplomatët gjermanë, europianë dhe amerikanë theksojnë se miratimi i kësaj reforme ka rëndësi të veçantë për t’u shënuar si arritje në raportin e vjeshtës së Komisionit Europian për ecurinë e Shqipërisë.

Nëse një nga mangësitë në raport do të jetë reforma në drejtësi, atëherë procesi i anëtarësimit të saj në BE nuk do të ecë shpejt, ndaj të gjithë palët duhet të mendojnë për të ardhmen e vendit.

Debatet për sistemin e drejtësisë duhet të zhvillohen të ndershme”, – tha ministri i jashtëm gjerman.

Projekti i miratuar sot pritet të kalojë në institucione të tjera të parlamentit, ku mundësia e bisedimeve dhe dakordësimeve, sipas shumicës, ka mbetur e hapur. (voa)