Kryetari i Lëvizjes VETËVENDOSJE! Visar Ymeri dhe Nënkryetarja Fatmire Mulhaxha-Kollçaku, përmes një konference për media shpallën datën e protestës në kundërshtim të ratifikimit të Marrëveshjes për Demarkacionin me Malin e Zi. Protesta do të mbahet me 1 Shtator, në ditën kur kjo marrëveshje do të sjellet në Kuvend për ratifikim.

Gjatë kësaj konference, Visar Ymeri theksoi se Marrëveshja për Demarkacionin është në kundërshtim me rezolutën parlamentare të 25 qershorit të vitit 2015, me vullnetin e banorëve të Rugovës e Dukagjinit, me integritetin territorial të Kosovës dhe me interesin kombëtar të shqiptarëve.

“Ajo marrëveshje ia heq Kosovës bjeshkët e majat, liqenet e lëndinat, burimet e lumenjve dhe pasuritë nëntokësore. Ndoshta ato nuk janë më të bukurat në botë, ndoshta nuk janë më të vlefshmet me para, por për neato bjeshkë e ai territor janë të paçmueshme. Nuk e këmbejmë territorin me asgjë. Nuk e shesim territorin për asgjë”, ka potencuar Ymeri në fjalën e tij.

Ai poashtu përmendi 205 mijë nënshkrimet e mbledhura kundër kësaj marrëveshjeje, protestat e organizuara gjatë janarit e shkurtit, si dhe faktet e argumentet e profesorëve, ekspertëve, gjeografëve, gjeodetëve e hartografëve.

“Ne sot po e shpallim organizimin tonë për protestë masive në datën 1 Shtator.  Ata që duan të miratojnë demarkacionin , do t’i bartin pasojat e asaj që po bëjnë. Ne demarkacionin do ta ndalim me çdo kusht e çdo mjet demokratik”, tha ndër të tjera Visar Ymeri.

Kurse Nënkryetarja e VETËVENDOSJE!-s, Fatmire Mulhaxha-Kollçaku, deklaroi se janë tronditëse përgjimet e aferës ‘Pronto 2’, si dhe dëshmi që korrupsioni, nepotizmi e krimi nuk luftohen me këta njerëz.

“Ne ju ftojmë që së bashku t’i themi jo këtyre politikanëve”, tha Mulhaxha-Kollçaku, në thirrjen e saj për qytetarët që t’i bashkohen kësaj ptoteste.

Në fund u potencua se Lëvizja VETËVENDOSJE! pret që protesta e 1 Shtatorit të jetë masive, dhe se bashkë më qytetarët, do ta ndalë demarkacionin, si dhe ta heqin këtë klikë tradhëtarësh e të korruptuar nga pushteti. (LVV)

Nënpresidenti amerikan Joe Biden, takoi udhëheqësit më të lartë të Kosovës, duke bërë thirrje për përmbylljen e punëve që lidhen me fqinjësinë e mirë dhe për luftë kundër krimit të organizuar dhe korrupsionit.

Pas takimeve me kryeministrin Isa Mustafa dhe presidentin Hashim Thaçi, ai tha se, zbatimi i zotimeve të bëra në bisedimet për normalizimin e marrëdhënieve me Serbinë, janë thelbësore për përparimin e Kosovës drejt Evropës. Ai tha se ratifikimi i marrëveshjes për shënimi e kufirit me Malin e Zi, do të ushtrojë ndikim pozitiv në rajon.

Nënpresidenti Biden ishte këmbëngulës në thirrjet e tij për luftë kundër krimit dhe korrupsionit.

Udhëheqësit e Kosovës e vlerësuan me rëndësi të jashtëzakonshme vizitën e nënpresidentit Biden i cili në Kosovë shihet si një nga mbështetësit e fuqishëm të lirisë dhe pavarësisë së saj.

Vizita e nënpresidentit Biden i cili arriti të martën mbrëma në Prishtinë, e gjen Kosovën në një periudhë tensionesh për shkak të mospajtimeve rreth marrëveshjes për shënimin e kufirit me Malin e Zi. Kjo çështje mund të zërë vend në takimet e tij në Prishtinë ku pritet që të diskutohet edhe përballja me ekstremizmin e dhunshëm si një sfidë në nivel botëror, por edhe me krimin e organizuar dhe korrupsionin.

Nënpresidenti Biden do të marrë pjesë pasdite në ceremoninë e emërimit të një rruge me emrin e dalit të tij të ndjerë Joseph “Beau” Biden. Rruga që do të mbajë këtë emër çon në Bondstell në kampin e disa qindra trupave amerikane që vazhdojnë të shërbejnë në kuadër të forcave paqeruajtëse të udhëhequra nga NATO-ja në Kosovë.

Kjo do të jetë edhe një nga rrugët që mbajnë emrat e personaliteteve amerikane, një formë kjo me të cilën në Kosovë shprehet mirënjohja për mbështetjen e Shteteve të Bashkuara për Kosovën rolin e të cilave e cilësojnë të pazëvendësueshëm në të gjitha proceset politike.

Nënpresidenti amerikan Joe Biden, qëndroi të martën në Serbi në fillim të vizitës dyditëshe në rajon gjatë së cilës do të qëndrojë edhe në Kosovë. Vizita e tij në Beograd cilësohet si mbështetje për aspiratat evropiane të Serbisë, e cila po përpiqet të ruajë drejtpeshimin e saj ndërmjet perëndimit dhe Rusisë.

Ai takoi kryeministrin serb Aleksandër Vuçiç dhe presidentin serb Tomislav Nikoliç, për të diskutuar edhe çështjet e hapura na marrëdhëniet ndërmjet Shteteve të Bashkuara dhe Serbisë.

Nënpresidenti Biden dhe kryeministri serb Vuçiç, nënvizuan siç u tha, rëndësinë e përparimit në bisedimet e ndërmjetësuara nga Bashkimi Evropian për normalizimin e marrëdhënieve ndërmjet Kosovës dhe Serbisë.

“Kjo është punë e vështirë, nuk ka asgjë të lehtë dhe la shumë histori për të tejkaluar. Kërkohet shumë punë dhe vullnet politik për të tejkaluar dallimet”, tha nënpresidenti Biden, duke nënvizuar se “nëse të dyja pakët qëndrojnë të përkushtuara ndaj ardhmërisë në paqe e përparim, kjo do t’u ndihmojë të dyja vendeve që të lëvizin drejt anëtarësimit në Bashkimin Evropian”.

Kryeministri serb tha se çështjet kryesore në bisedimet me nënpresidentin Biden ishin marrëdhëniet dypalëshe, bisedimet me Prishtinën, marrëdhëniet në rajon dhe rruga evropiane e Serbisë.

Ai tha se do të bëjë gjithë çfarë është e mundur për të siguruar invetsuesit, përfshirë edhe ata amerikanë, ndërsa nënvizoi se e ka njoftuar nënpresidentin Biden se brenda një muaji do të pres në Beograd kryeministrin e Shqipërisë Edi Rama si dhe përfaqësuesit e shqiptarëve të Kosovës.

“Shumëkush ka bërë gabime në marrëdhëniet ndërmjet serbëve dhe shqiptarëve, shumë serbë e shqiptarë kanë humbur jetën”, tha kryeministrit serb.

Derisa nënpresidenti Biden po bisedonte me kryeministrin serb, qindra mbështetës të Partisë Radikale serbe, protestuan kundër vizitës së tij, duke brohoritur në favor të kandidatit presidencial amerikane, Donald Trump.

Protestuesit që po brohorisnin “Votoni për Trumpin” mbanin të veshura bluza me portretin e kandidatit republikan.

“Trumpi është alternativë e globalizmit. Ai do të shkatërrojë qendrat e vjetra të fuqisë në Amerikë dhe është mbështetës i Rusisë”, tha kryetari i Partisë Radikale Vojislav Sheshel, dikur shef i kryeministrit aktual të Serbisë Aleksandër Vuçiç dhe presidentit serb Tomislav Nikoliç.

“Joe Biden duhet ta dijë që Serbia nuk e do por e urren atë”, tha Sheshel duke nënvizuar rolin e Shteteve të Bashkuara në fushatën e bombardimeve të NATO-s kundër Serbisë në vitin 1999, që çuan në përfundimin e luftës në Kosovë.

Nënpresidenti Biden, ndërkaq pas takimit me kryeministrin serb shprehu ngushëllimet e tij për serbët që kanë humbur jetën gjatë bombardimeve të NATO-s, duke u bërë kësisoj zyrtari i parë amerikan që e bën një gjë të tillë.

Shtetet e Bashkuara luajtën rolin kryesor në fushatën e bombardimeve të NATO-s që çuan në çlirimin e Kosovës dhe në proceset politike që çuan në pavarësinë e saj e cila vazhdon të kundërshtohet nga Beogradi.

Ndonëse nuk u përmend gjatë konferencës me gazetarë, besohet se nënpresidenti Biden ka nxitur Beogradin që të trajtojë me përparësi çështjet që lidhen me krimet e luftës. Në këtë kuadër ai besohet të ketë diskutuar edhe ndriçimin e rastit të vrasjes së vëllezërve Bytyci, tre shqiptaro amerikanë që u vranë në rrethana të panjohura në korrik të vitit 1999.

Kryeministri serb, Aleskandër Vuçiç, është zotuar disa herë për ndriçimin e këtij rasti, por edhe 17 vjet pas luftës autorët nuk janë identifikuar dhe as vënë para drejtësisë.

Zëvendëspresidenti amerikan Joe Biden, tha në Prishtinë se Kosova duhet ta themelojë asociacionin e komunave me shumicë serbe dhe ta ratifikojë marrëveshjen e demarkacionit me Malin e Zi.

Zëvendëspresidenti amerikan Joe Biden, porositi udhëheqësit politik kosovar që ta vazhdojnë dialogun me Serbinë dhe ta përmbyllin çështjen e themelimit të Asociacionit të komunave me shumicë serbe. Po ashtu të përmbyllet edhe çështja e demarkacionit me Malin e Zi dhe institucionet e Kosovës të vazhdojnë luftën kundër korrupsionit dhe krimit të organizuar. Këto komente zëvendëspresidenti i SHBA-së Joe Biden, i bëri gjatë vizitës së tij në Kosovë, në kuadër të një turneu ballkanik ku vizitoi edhe Serbinë. Në Prishtinë, zëvendëspresidenti amerikan Biden takoi, Presidentin e Kosovës Hashim Thaci, kryeministrin Isa Mustafa dhe kryetarin e parlamentit Kadri Veseli. Me Presidentin e Kosovës Biden mbajti një konferencë për media.

“SHBA-të do të vazhdojnë që të qëndrojnë krah Kosovës, në mënyrë që vendi juaj të bëhet një demokraci me prosperitet. Dhe këtë nuk po e them vetëm sa për ta thënë. Nëse ju arrini sukses edhe rajoni do të ketë sukses. Vizioni ynë i botës është që të ketë një Evropë të plotë të lirë dhe të bashkuar. Kjo ka rëndësi për SHBA-në”, tha Joe Biden.

Zëvendëspresidenti amerikan, duke iu drejtuar udhëheqësve politik kosovar tha se “në politikë ka vendime të vështira, por zakonisht ato janë më të suksesshmet.

Ai tha se Kosova duhet t’u përmbahet zotimeve të bëra në Bruksel në kuadër të dialogut me Serbinë dhe këto janë kushte që duhet të përmbushen për t’u integruar në Evropë.

“Kërkohet bashkëpunim i ngushtë me vendet fqinje e madje edhe me ish-armiqtë tuaj. Presidenti dhe kryeministri i Kosovës kanë shprehur përkushtim për vazhdimin e dialogut me Serbinë në Bruksel. Themelimi i asociacionit të komunave me shumicë serbe do të jetë i domosdoshëm por i zorshëm. Për këtë çështje unë fola edhe me kryeministrin e Serbisë Aleksandër Vuçiq dhe e di që të dyja palët përballen me zëra të ndryshëm, por ju e keni përgjegjësinë t’u përmbaheni zotimeve që i keni dhënë”, tha Biden.

“Dëshiroj të nënshkruani një marrëveshje me Malin e Zi. Është një marrëveshje e drejtë dhe kjo do të ketë ndikim pozitiv në rajon. Gjithashtu edhe Asociacionin e komunave serbe. Është dashur t’i shtyni përpara disa reforma, por vendimet e vështira sjellin fryte. Dhimbjet e luftës janë ende të freskëta. Të gjitha këto vragë janë të freskëta, por Kosova duhet të ecë përpara me një të ardhme të përbashkët, ku të drejtat e qytetarëve janë të barabarta”, tha Biden.

Sipas Joe Biden, klasa politike dhe shoqëria kosovare duhet ta luftojnë korrupsionin dhe krimin e organizuar, të cilin ai e cilësoi si kancerin e shoqërisë.

“Korrupsioni është kancer, kjo nuk është hiperbolë. Çdo vend i cili përballet me korrupsion është pasojë e qeverisjes jo të mirë sepse nuk kanë mundur të ecin përpara. Nëse nuk e trajtoni këtë, mundësia që të ecni përpara, do të jetë e pamundshme. Shpresoj që do ta keni një Kosovë të fortë, demokratike pa korrupsion”, tha Biden.

Presidenti i Kosovës, Hashim Thaçi, i cili mbajti konferencë për media së bashku me zëvendëspresidentin amerikan, Joe Biden, tha se pavarësia e Kosovës e ka forcuar paqen në rajon dhe kështu do të vazhdojë.

“Kosova, tani si shtet i pavarur dhe sovran, e ka forcuar paqen, stabilitetin dhe bashkëpunimin rajonal. Ne kemi shënuar hapa të rëndësishëm në procesin e normalizimit të marrëdhënieve mes Kosovës dhe Serbisë. Ne e kemi për detyrë që t’i japim një dinamikë të re dialogut me Serbinë që sa më shpejtë të arrijmë deri te pajtimi mes dy popujve tanë. Jam i sigurt se pajtimi është i mundur dhe do të ndodhë”, tha presidenti Hashim

Ai e siguroi mikun amerikan që Kosova do ta ratifikojë marrëveshjen e demarkacionit me Malin e Zi edhe pse kjo çështje ka kundërshtime të forta nga partitë politike opozitare.

“Ju siguroj se edhe çështja e demarkacionit do të përmbyllet shpejtë. Marrëveshja e demarkacionit është marrëveshje e drejtë. Ky vendim i parlamentit të Kosovës do ta forcojë shtetësinë tonë, duke i hapur rrugë të sigurt integrimit euro-atlantik dhe lëvizjes pa viza. Pa kalimin e demarkacionit me Malin e Zi, dhe pa krijimin e Asociacionit të komunave serbe, Kosova do të mbetet e vetmuar dhe e izoluar nga bota, apo e lënë anash edhe nga SHBA-të, edhe nga Brukseli”, tha Presidenti Thaçi.

Zëvendëspresidenti amerikan Joe Biden, viziton Kosovën për herë të dytë. Rrugët e kryeqytetit të Kosovës, Prishtinës, u stolisën me flamuj amerikan për t’i uruar mirëseardhje zëvendëspresidentit Joe Biden. Nga udhëheqësit e institucioneve të Kosovës, kjo vizitë u cilësua historike, ndërsa, vet Biden në Kosovë njihet si një nga mbështetësit e lirisë dhe pavarësisë së Kosovës.

Shumica e rrugëve të Prishtinës u mbyllën për qarkullim, ndërsa, mijëra forca policore u angazhuan për sigurinë e zëvendëspresidentit amerikan Joe Biden.

Kryeministri i Kosovës, Isa Mustafa, në një postim në rrjetin social tha se me vizitën e Joe Biden në Kosovë, ai “është thellësisht i bindur se kjo vizitë do të ketë ndikim pozitiv në fuqizimin e mëtejshëm të miqësisë dhe të partneritetit strategjik ndërmjet Kosovës dhe SHBA-së”.

Zëvendëspresidenti Joe Biden, pasditen e së mërkurës (17.08) mori pjesë në ceremoninë e emërimit të një rruge në lindje të Kosovës me emrin e dalit të tij të ndjerë Joseph “Beau” Biden. Kjo rrugë tashmë me emrin Joseph “Beau” Biden çon në kampin e trupave amerikane Bondstell, që gjendet në zonën lindore të Kosovës.

Para se të vijë në Kosovë, zëvendëspresidenti amerikan Joe Biden, qëndroi në Beograd. Kjo vizitë u cilësua, si mbështetje për aspiratat e Serbisë drejt Bashkimit Evropian. (voa)