Presidenti i Kosovës, Hashim Thaçi, shpalli të enjten dekretin me të cilin i propozon parlamentit të Kosovës, Avdullah Hotin nga Lidhja Demokratike për formimin e qeverisë së re të Kosovës.

Në dekret thuhet se zoti Hoti ka 15 ditë afat për të paraqitur përbërjen e qeverisë së re dhe të kërkojë miratimin e saj në parlamentin e Kosovës.

Presidenti Thaçi e shpalli dekretin pasi mori nga Lidhja Demokratike letrën me të cilën ajo e njofton se ka siguruar shumicën parlamentare.

“Në ditët në vijim një tjetër qeveri e re, mund të votohet në Kuvendin e Kosovës, sërish në përputhje të plotë me Kushetutën e Kosovës dhe më rendin demokratik të Republikës sonë, duke marrë parasysh legjitimitetin e qartë nga deputetët e Kuvendit të Kosovës dhe zotimin që u dëshmua sot i shumicës së re parlamentare”, tha ai.

Presidenti Thaçi tha se të gjithë duhet t’i respektojnë në tërësi këto procedura.

“Duhet të pajtohemi me faktin që pushteti fitohet dhe humbet në respektim të plotë të Kushtetutës dhe rendit demokratik të vendit. Askush nuk mund të pretendoj që me metoda tjera krejtësisht jo demokratike mund ta marrë ose ta mbajë apo uzurpoj pushtetin”, tha presidenti Thaçi.

Pak kohë pas dekretimit, Lidhja Demokratike e Kosovës dorëzoi kërkesën që parlamenti i Kosovës të mblidhet në seancë të jashtëzakonshme ditën e shtunë në orën 13 për të votuar kabinetin e zotit Hoti.

Ky proces kundërshtohet nga lëvizja Vetëvendosje e cila kërkon zgjedhje të reja pas pandemisë së koronavirusit.

Kjo lëvizje dorëzoi në Gjykatën Kushtetuese kërkesën për vlerësimin e kushtetutshmërisë së dekretit të presidentit. Bashkë me kërkesën për vlerësim lëvizja Vetëvendosje i kërkoi Gjykatës edhe vendosjen e masës së përkohshme, sipas së cilës të gjitha veprimet pushojnë në pritje të vendimit të Gjykatës.

Arbërie Nagavci, nënkryetare e parlamentit nga radhët e lëvizjes Vetëvendosje tha se “vendosja e firmës në këtë dekret është vetëm se vendosja e një vule në shkeljen me paramendim të Kushtetutës që ai po e bën tashmë e një kohë. Pra të gjithë kemi qenë dëshmitarë për presionin e vazhdueshëm që presidenti jashtë mandatit të tij e ka bërë mbi lëvizjen Vetëvendosje dhe për kërkesat e shumta të një pas njëshme që i ka dërguar kryeministrit në detyrë zotit Kurti. Kemi parë përzierjen e vazhdueshme të presidentit duke ndikuar te partitë politike dhe në anën tjetër duke anashkaluar tërësisht fituesin e zgjedhjeve”, tha ajo, duke theksuar se presidenti në dekretin e tij po i referohet nenit 95 të Kushtetutës, duke anashkaluar në tërësi nenin 82 të saj.

Përgjatë gjithë debateve rreth formimit të qeverisë së re pas rrëzimit të qeverisë së kryeministrit tashmë në detyrë, Albin Kurti me 25 mars, Vetëvendosje dhe presidenti janë përplasur rreth këtyre neneve të Kushtetutës.

Presidenti Thaçi mbështetet në nenin 95 të Kushtetutës së Kosovës në të cilin thuhet që “nëse Kryeministri jep dorëheqjen ose për arsye të tjera, posti i tij/saj mbetet i lirë, Qeveria bie, dhe Presidenti i Republikës së Kosovës, në konsultim me partitë politike ose koalicionin që ka fituar shumicën në Kuvend, mandaton kandidatin e ri, për të formuar Qeverinë”.

Ndërsa lëvizja Vetëvendosje dhe zoti Kurti kërkuan vazhdimisht që të veprohet sipas nenit 82 të Kushtetutës, sipas të cilit “Kuvendi mund të shpërndahet nga Presidenti i Republikës së Kosovës, pas votimit të suksesshëm të mosbesimit të Qeverisë”.

voa

Presidenti Hashim Thaçi e ka mandatuar edhe zyrtarisht Avdullah Hotin për ta formuar Qeverinë e re.

Kryetarja e Kuvendit të Kosovës, Vjosa Osmani, priti sot ambasadorët e pesë vendeve të QUINT-it, dhe shefen e Zyrës së BE-së në Kosovë, Natalia Apostolova.

Në njoftimin për media thuhet se ajo po ashtu i informoi ata për hapat që do t’i ndërmarrë ajo si kryetare e Kuvendit për mbrojtjen e integritetit institucional të Kuvendit, mbrojtjen e stabilitetit dhe të demokracisë në vend, si dhe respektimin e Gjykatës Kushtetuese si e vetmja instancë e cila mund ta interpretojë kushtetueshmërinë e veprimeve të institucioneve.

Osmani po ashtu i informoi përfaqësuesit e QUINT-it me punën e Kuvendit të Kosovës, me theks të veçantë për kujdesin të cilin Kuvendi po e ushtron në menaxhimin e krizës së pandemisë Kovid-19.

Ajo ua shprehu atyre mirënjohjen e saj dhe të Kuvendit për gatishmërinë e tyre dhe të vendeve të tyre që t’i qëndrojnë afër popullit të Kosovës dhe institucioneve të vendit gjatë kësaj krize. /Telegrafi/

Lidhja Demokratike e Kosovës ka finalizuar marrëveshjen e koalicionit me Aleancën për Ardhmërinë e Kosovës për formimin e qeverisë së re.

Marrëveshja është nënshkruar gjatë një takimi të zhvilluar mes kryetarit të LDK-së, Isa Mustafa dhe liderit të AAK-së Ramush Haradinaj, ku ishte i pranishëm edhe kandidati për kryeministër, Avdullah Hoti.

“Sapo përmbyllëm një takim me Mustafën dhe me të nominuarin për kryeministër (v.j. Avdullah) Hotin dhe ne arritëm marrëveshjen për krijimin e qeverisë së re”, u shpreh Haradinaj.

Kryetari i AAK-së, Ramush Haradinaj tha se partia e tij do t’i ketë katër ministri si dhe një post të zëvendëskryeministrit të parë.

Sipas marrëveshjes, zëvendëskryeministër i parë do të jetë Besnik Tahiri. Kurse ministritë që do të udhëhiqen nga AAK janë: Ministria e Punëve të Jashtme me ministren e propozuar Meliza Haradinaj-Stublla, Ministria e Drejtësisë me ministrin e propozuar Selim Selimi, Ministria e Zhvillimit Ekonomik me në krye Blerim Kuqin dhe Ministria e Arsimit me ministrin e propozuar, Ramë Dika.

Kandidati për kryeministër, Avdullah Hoti tha se është në proces të përmbylljes së bisedimeve me partitë politike për qeverinë e re, të cilën ai pretendon se do ta drejtojë së shpejti.

“Sa më parë që i përmbyllim marrëveshjet, menjëherë do të procedojmë për në Kuvend”, tha Hoti.

Duke iu përgjigjur një deklarate të kryetarit të Partisë Demokratike të Kosovës, Kadri Veseli se vendi duhet të shkoj në zgjedhje sapo të përfundojë pandemia e koronavirusit, nHoti tha se “vendi nuk ka nevojë të shkojë në zgjedhje, përderisa të ketë një shumicë parlamentare në Kuvend”.

Në marrëveshjen e nënshkruar nga krerët e LDK-së dhe AAK-së, mes tjerash thuhet se marrëveshja është arritur duke respektuar vullnetin demokratik të qytetarëve të Kosovës, “të shprehur në zgjedhjet parlamentare të 6 tetorit 2019, dhe obligimin për themelimin e institucioneve legjitime, funksionale e demokratike”.

Të dy partitë pajtohen edhe rreth prioriteteve kryesore të qeverisë në pritje, duke veçuar angazhimin për t’u përballë me pandeminë e koronavirusit, rimëkëmbjen ekonomike, forcimin e shtetit ligjor si dhe përmbylljen e dialogut me Serbinë. Njëherësh, të dy partitë e koalicionit zotohen të luftojnë krimin e korrupsionin si dhe të forcojnë partneritetin me Bashkimin Evropian dhe Shtetet e Bashkuara të Amerikës.

Kryetari i AAK-së, Ramush Haradinaj tha se pritet që tash LDK të finalizojë edhe marrëveshjet me partitë tjera para se të nisin procedurat në kuvend për formimin e qeverisë. Sipas tij, shumë shpejt do të lëvizet drejt vendimit dhe votimit në kuvend për qeverinë e drejtuar nga LDK-ja.

Përkundër paralajmërimeve nga partia fituese e zgjedhjeve, Lëvizja Vetëvendosje se formimin e kësaj qeverie do ta dërgojë për aktgjykim në Gjykatën Kushtetuese, LDK po e vazhdon procesin e negociatave edhe me subjektet politike pwr finalizimin e marrëveshjeve. Ajo pret që sapo t’i përfundojë të gjitha marrëveshjet,presidenti i Kosovës, Hashim Thaçi t’i japë edhe zyrtarisht mandatin kandidatit të saj për kryeministër Avdullah Hoti, që të kërkojë votimin në kuvend të qeverisë së re.

Gjatë ditës, LDK pritet të nënshkruajë marrëveshje edhe me Nismën Socialdemokrate, Listën Serbe, Aleancën Kosova e Re dhe partitë nga radhët e komuniteteve joserbe.

Qeveria zgjidhet përmes votimit në kuvend, me të paktën 61 vota për.

Pjesë e qeverisë së ardhshme, nëse ajo do të formohet, nuk pritet të jenë Lëvizja Vetëvendosje, e cila ka 30 deputetë dhe Partia Demokratike e Kosovës që ka 24 deputetë.

Partia Demokratike e Kosovës, e cila ishte në opozitë pas zgjedhjeve të 6 tetorit, 2019, sipas liderit të saj Kadri Veseli, nuk do të votojë për qeverinë e udhëhequr nga LDK-ja me partitë partnere.

“Asnjë deputetë i PDK-së nuk voton qeveri të mashtrimeve. LDK dhe LVV janë përgjegjëse për këtë gjendje të krijuar dhe ato duhet të gjejnë zgjidhje. Ne kërkojmë që vendi të shkojë në zgjedhje të reja demokratike pas pandemisë”, ka deklaruar Kadri Veseli.

Zëdhënësi i Vetëvendosjes, Arlind Manxhuka, përmes një postimi në Facebook e ka cilësuar të turpshme dhe në kundërshtim me vullnetin e votuesve marrëveshjen në mes LDK-së dhe AAK-së.