Europa kërkon të pavarësohet më shumë në fushën e mikroelektronikës dhe chip-ave nga Kina dhe SHBA. Tani BE ka startuar një program të madh ndihme, nga i cili përfitojnë kompanitë europiane, edhe ato gjermane.

Për të qenë më i pavarur si nga Kina edhe Shtetet e Bashkuara të Amerikës, Komisioni Europian ka miratuar një program miliardësh ndihme për industrinë e mikroelektronikës dhe chip-ave. Sipas të dhënave të komisares së BE për konkurrencën, Margrethe Vestager me këtë program mundësohen duzina projektesh. Vestager e cilësoi industrinë e mikrochip-ave si “shtyllën e ekonomisë”. Europa duhet të përmirësojë këtu aftësitë e saj. “Ne duhet të bëhemi pionierë” në këtë drejtim, u shpreh Vestager.

Që ndryshimi të jetë i suksesshëm, Komisioni Europian në kuadër të projektit “Important Projects of Common European Interest” – Projekte të Rëndësishme të Interesit të Përbashkët Europian, IPCEI, ka miratuar ndihma në vlerë prej 8,1 miliardë eurosh. Përveç kësaj vetë kompanitë private kanë investuar edhe njëherë 13,7 milirdë euro në BE, kështu që bëhet fjalë për një  investim gjigand prej 21,8 miliardë eurosh. Në këtë projekt marrin pjesë krahas Gjermanisë, edhe 13 vende të tjera të BE, mes tyre Franca, Austria, Holanda dhe Spanja.

Nga ndihmat përfitojnë shumë projekte gjermane

Një numër i madh projektesh që përfitojnë nga ky program e kanë qendrën në Gjermani: Në Gjermani ekzistojnë 31 projekte të gjysmëpërçuesve në 11 lande. Shifrat e projekteve të mbështura variojnë në varësi të mënyrës së klasifikimit të mbështetjes. Sipas mënyrës së llogaritjes nga BE, Gjermania mbështetet në 23 projekte, ndërkohë që në të gjithë Europën flitet për mbështetjen e 100 projekteve. Ministria Gjermane e Ekonomisë është shprehur në lidhje me financimin e projekteve. “Në tërësi  sipërmarrjet gjermane investojnë më shumë se 10 miliardë euro, ndër të tjera për komplekse inovative të prodhimit, për reparte prodhimi dhe zhvillimin e chipave për gjysmëpërçuesit. Në tërësi ato do të mbështeten me 4 miliardë euro, nga ku 70% do të jepen nga federate dhe 30% nga vetë landet.”

Krahas kompanive të mëdha në Gjermani do të jenë pjesë e projekteve që mbështeten nga BE edhe kompani të mesme dhe Start-up-e. Kështu ndër të tjera mbështeten Infineon në Bavari, Saksoni dhe Renani Veriore-Vestfali, si edhe Bosch në BAdeyn-Vyrtemberg dhe Drezden.

Habeck bën fjalë për moment historik

Ministri gjerman i Ekonomisë, Robert Habeck ka falënderuar Komisionin Europian për vendimin. Projektet e mbështetura do të forcojnë Gjermaninë si vend prodhimi të mikroelektronikës dhe janë një moment historik i rëndësishëm për politikën e industrisë. “Ne kështu do mund të rrisim aftësinë rezistuese në të gjithë Europën në këtë fushë të rëndësishme dhe do sigurojmë prodhimin në vlerë dhe vende pune.”

BE synon me këtë programn ndihme të rrisë pjesën e tij në tregun botëror të gjysmëpërçuesve në 20%, por ekspertët thonë, se programe të tilla ndihme në SHBA dhe Kinë janë më agresive. Edhe në Tajvan, Korenë e Jugut dhe Japoni kjo degë është shumë e kërkuar. BE nis kështu ofensivën e dytë të mbështetjes së elektroteknikës, pas programit të parë të mbështetjes në vitin 2018.

la/ag

Presidenti Joe Biden pritet të takohet sot në Shtëpinë e Bardhë me Sekretarin e Përgjithshëm të NATO-s në largim, Jens Stoltenberg.

Takimi vjen ndërsa gara për të gjetur pasardhësin e tij është nxehur.

Zoti Stoltenberg, ka udhëhequr aleancën ushtarake që nga viti 2014, periudhë gjatë së cilës mandati i tij është zgjatur tre herë. Por në fillim të këtij viti, ai bëri të ditur se në fund të shtatorit do të largohet.

Përpjekjet për zëvendësimin e tij janë intensifikuar ndërsa udhëheqësit e aleancës ushtarake prej 31 anëtarësh, mblidhen muajin e ardhshëm për takimin vjetor të nivelit të lartë, që mbahet në Vilnius të Lituanisë.

Javën e kaluar, Kryeministri britanik Rishi Sunak i përmendi Presidentit Biden, Ministrin e Mbrojtjes të Mbretërisë së Bashkuar Ben Wallace, si kandidat të mundshëm. Presidenti amerikan u takua gjithashtu edhe me Kryeministren daneze Mette Frederiksen, një tjetër pretendente e mundshme.

Gjatë një konferencë shtypi me në krah zotin Sunak, zoti Biden e quajti zotin Wallace një person “shumë të kualifikuar”, por vuri në dukje se diskutimet për të gjetur një kandidat “konsensual’, për të zëvendësuar zotin Stoltenberg, po vazhdon. Opinioni i Presidentit Biden ka peshë të madhe pasi Shtetet e Bashkuara shpenzojnë për mbrojtjen, më shumë se çdo vend tjetër anëtar i aleancës.

Zonja Frederiksen u përpoq të anashkalonte çështjen e kandidimit të saj të mundshëm për postin e Sekretarit të Përgjithshëm të NATO-s pas takimit me Presidentin Biden javën e kaluar. Ajo nuk pranoi të thoshte nëse kishte diskutuar mbi këtë çështje me të, por u tha gazetarëve se nuk donte t’i jepte zë spekulimeve lidhur me NATO-n. Aleanca nuk ka pasur kurrë një sekretare të përgjithshme grua.

Danimarka ka mbetur pas me objektivin e shpallur të NATO-s, për të shpenzuar 2% të Prodhimit të Brendshëm Bruto për ushtrinë, deri në vitin 2030. Por në fund të muajit të kaluar qeveria e këtij vendi, njoftoi se synonte, që gjatë dekadës së ardhshme, të investonte rreth 20.6 miliardë dollarë për mbrojtjen, për shkak të kërcënimeve serioze ndaj sigurisë.

Zoti Biden dhe zoti Stoltenberg pritet gjithashtu të diskutojnë rreth agresionit rus në Ukrainë si dhe mbi përpjekjet për të bindur Turqinë, një vend anëtar i NATO-s, të heqë dorë nga bllokimi që i ka bërë anëtarësimit të Suedisë në aleancë.

voa

Silvio Berluskoni, manjati i mediave dhe miliarderi që shërbeu si kryeministri më afatgjatë i Italisë, megjithë skandalet dhe akuzat për korrupsion që e shoqëruan, vdiq të hënën në moshën 86 vjeçare.

Ai ishte shtruar në spital të premten për të dytën herë gjatë muajve të fundit, pasi vuante nga leuçemia.

Rrjeti televiziv Mediaset, në pronësi të zotit Berluskoni, njoftoi vdekjen e tij nëpërmjet faqes së internetit.

Ndërsa ishte shtruar në spital për shkak të leuçemisë, zoti Berluskoni vuante prej vitesh edhe nga probleme të zemrës, nga kanceri i prostatës dhe ishte shtruar në spital edhe nga COVID-19 në vitin 2020.

Berluskoni përdori rrjetet e tij televizive dhe pasurinë e madhe për të ndërtuar një karrierë politike që mori besnikërinë e mbështetësve, por edhe urrejtjen e kundërshtarëve.

Për admiruesit, politikani që shërbeu tre herë si kryeministër i vendit ishte një burrë shteti i aftë dhe karizmatik, që u përpoq ta ngrejë imazhin e Italisë në skenën botërore. Për kritikët, ai ishte një populist, që rrezikoi të dëmtonte demokracinë, duke përdorur pushtetin politik si mjet për pasurimin e vetes dhe të bizneseve të tij.

Megjithëse zoti Berluskoni nuk mbante vetë ndonjë post, vdekja e tij ka të ngjarë të destabilizojë politikën italiane në muajt e ardhshëm. Partia e tij Forza Italia është pjesë e koalicionit qeverisës të Kryeministres Giorgia Meloni, një udhëheqëse e së djathtës së skajshme, që mori pushtetin vitin e kaluar.

Miqësia e tij me Presidentin rus Vladimir Putin e vendosi në kundërshti me zonjën Meloni, një mbështetëse e vendosur e Ukrainës.

Për ditëlindjen e tij të 86-të, ndërsa lufta vazhdonte, Presidenti rus Putin i dërgoi zotit Berluskoni urime si dhe një shishe vodka. Zoti Berluskoni më pas u mburr se ia ktheu favorin duke i dërguar verë italiane.

Me kalimin e moshës, disa kritikonin paraqitjen e tij, me nxirjen e përhershme të lëkurës dhe transplantet e flokëve, si dhe për të dashurat me të cilat bashkëjetonte dhe që ishin me dekada më të reja se ai. Për shumë vite megjithatë, zoti Berluskoni dukej se ishte i paprekshëm megjithë skandalet personale.

Çështjet penale filloheshin dhe përmbylleshin për shkak të kalimit të afateve në sistemin e ngadaltë të drejtësisë italiane, ose ai i fitonte ato në apel.

Objekt i hetimeve ishin festat e manjatit, ku përfshiheshin vajza të reja dhe të mitur, apo bizneset e tij, si ekipi i futbollit AC Milan, tre rrjetet më të mëdha televizive të vendit, revistat dhe një gazetë e përditshme, si dhe kompanitë e reklamave dhe filmave.

Njëra prej çështjeve gjyqësore përfundoi me dënim për mashtrim me taksat nga shitja e të drejtave të një filmi. Vendimi u konfirmua në vitin 2013 edhe nga gjykata më e lartë e Italisë, por për shkak të moshës 76-vjeçare që kishte në atë kohë, ai u dënua vetëm me shërbim në komunitet për pacientët me sëmundjen Alzheimer.

Ai humbi megjithatë vendin në senat dhe iu ndalua pjesëmarrja në politikë për gjashtë vjet, bazuar në ligjet anti-korrupsion. Zoti Berluskoni qëndroi megjithatë në krye të partisë së qendrës së djathtë Forza Italia, që e krijoi vetë kur hyri në politikë në vitet 1990 dhe emrin e të cilës e huazoi nga thirrjet e tifozëve italianë gjatë ndeshjeve të futbollit. Ai arriti gjithashtu të zgjidhet sërish në Parlamentin Evropian në moshën 82-vjeçare dhe vitin e kaluar edhe në senatin e Italisë.

Partia e tij nuk është më forca dominuese në spektrin e djathtë të politikës në Itali dhe ka humbur terren përballë lëvizjes populiste Lega Nord, të udhëhequr nga Mateo Salvini, dhe më pas lëvizjes me origjinë neo-fashiste Vëllezërit e Italisë, të udhëhequr nga zonja Meloni.

voa