Shtetet e Bashkuara thonë se do t’i vazhdojnë sulmet ajrore kundër objektivave të Shtet Islamik në Siri, pasi Rusia filloi fushatën e saj ajrore dhe kërkoi që avionët bombardues amerikanë të shmangin hapësirën ajrore të Sirisë gjatë operacioneve ruse.

Zyrtarë të ministrisë ruse të mbrotjes thanë se sulmi drejtohej kundër Shtetit Islamik, por shtypi amerikan, po njofton se zyrtarë amerikanë thonë se duket se sulmet nuk ishin drejtuar ndaj Shtetit Islamik.

Zëdhënësi i Departamentit amerikan të Shtetit John Kirby tha sot se një zyrtar rus në Bagdad informoi personelin e Ambasadës Amerikane se avionët ushtarakë rusë do të fillonin misionet e fluturimit mbi Siri.

“Koalicioni nën udhëheqjen e Shteteve të Bashkuara do t’i vazhdojë misionet ajrore mbi Irak dhe Siri, sipas planit dhe në mbështetje të misionit tonë ndërkombëtar për të shkatërruar grupin ISIS”, tha zëdhënësi Kirby.

Sulmet filluan pasi Dhoma e Lartë e Parlamentit rus, miratoi kërkesën e presidentit Vladimir Putin për të dërguar forca ushtarake në Siri, për t’i ardhur në ndihmë qeverisë së presidentit Bashar al-Assad në luftën kundër militantëve të Shtetit Islamik. (voa)