Kategoritë: Bota

Lajmet nga Bota

Gjermani: Më shumë se 100 të vdekur nga përmbytjet

Deutschland | Unwetter - Hochwasser in HeimerzheimStuhitë dhe reshjet e shiut në landet Rheineland-Pflaz dhe Nordrhein-Wesfalen kanë shkaktuar dëme të tmerrshme. Qeveria gjermane premton ndihma të shpejta.

Pas stuhive dhe reshjeve në perëndim të Gjermanisë numri i të vdekurve vazhdon të rritet. Sipas informacioneve të fundit të autoriteteve më shumë se 100 vetë gjetën vdekjen.

Deutschland Unwetter Schäden | Rheinland-Pfalz Skuadrat e ndihmës kanë frikë se do të ketë një rritje të mëtejshme të numrit të viktimave, sepse kërkimi i personave që kanë mbetur në rrënoja dhe i të zhdukurve nuk ka përfunduar ende. Përveç kësaj, ekziston rreziku që digat në rajon të mos i mbajnë dot sasitë e ujërave ose kërcënojnë të prishen.

Deutschland Schäden nach Starkregen in EssenAktualisht në Rheinland-Pfalz kanë vdekur mbi 60 vetë, kurse në Nordrhein-Westfalen njoftohet për 43 vdekje.

Verifikimi i viktimave vështirësohet edhe prej faktit, sepse për shumë vetë ende nuk është e qartë nëse ata ndodhen diku me pushime, janë strehuar për shkak të situatës së rënduar tek të njohur të tyre, apo ndodhen vërtet në vështirësi.

Deutschland Unwetter Schäden | Rheinland-Pfalz Në shumë rajone njerëzit janë bllokuar prej ujit në shtëpitë e tyre. Në disa zona janë ndërmarrë evakuuime nga ajri .

Deutschland Unwetter l Bundeswehr im Einsatz, Rettungshubschrauber in SwisttalPër shkak të përmbytjeve janë bllokuar rrugët në disa komuna dhe në disa qarqe autoritetet kanë shpallur gjendjen e katastrofës.

dw

Gazsjellësi rus, ngërçi i takimit Biden-Merkel

Presidenti amerikan Joe Biden priti të enjten në Shtëpinë e Bardhë, Kancelaren gjermane Angela Merkel. Të dy udhëheqësit theksuan partneritetin e fortë transatlantik dhe bashkëpunimin për një sërë çështjesh, por Uashingtoni dhe Berlini vazhdojnë të kenë qëndrime të ndryshme lidhur me gazsjellesin rus “Nord Stream 2”. Korrespondentja e Zërit të Amerikës Patsy Widakuswara njofton.

Ishte një vizitë lamtumire për Angela Merkelin, e cila brenda pak muajsh do të tërhiqet nga politika, pasi ka shërbyer për 16 vite si Kancelare e Gjermanisë. Presidenti Joe Biden nuk i kurseu lëvdatat për të.

Ju keni qenë një kampione e palëkundur e aleancës transatlantike dhe partneritetit Atlantik. Nën udhëheqjen tuaj, miqësia dhe bashkëpunimi mes Gjermanisë dhe Shteteve të Bashkuara është forcuar gjithnjë e më shumë”, tha Presidenti Biden.

Dy udhëheqësit diskutuan rreth tërheqjes së trupave amerikane dhe të NATO-s nga Afganistani, si dhe çështje të tjera me përparësi, sikurse COVID-19, ndryshimet e klimës e sulmet kibernetike.

Por Uashigtoni dhe Berlini vazhdojnë të kenë qëndrime të ndryshme në lidhje me gazsjellësin “Nord Stream 2”, një projekt ruso-gjerman prej 11 miliardë dollarësh. Uashingtoni beson se projekti do të rrisë varësinë e Evropës tek gazi natyror rus, e do t’i krijojë mundësi Moskës, të ushtrojë presion mbi vendet e dobëta të Evropës Lindore, veçanërisht ndaj Ukrainës.

Por kancelarja gjermane u zotua për një front të bashkuar kundër agresionit rus.

Kemi vlerësime të ndryshme rreth asaj se çka paraqet ky projekt. Por më lejoni të them shumë qartë, ideja jonë është dhe mbetet që Ukraina të vazhdojë të jetë një vend tranzit për gazin natyror, se Ukraina, ashtu si çdo vend tjetër në botë, ka të drejtën e sovranitetit territorial”, tha ajo.

Kohët e fundit Presidenti Biden i hoqi sanksionet ndaj kompanive gjermane të përfshira në projektin “Nord Stream 2”, një vendim që shkaktoi zemërim tek demokratët dhe republikanët në Kongres.

Kur unë mora detyrën e presidentit, projekti ishte 90 për qind i përfunduar dhe vendosja e sanksioneve nuk dukej se kishte ndonjë kuptim. Kishte më shumë kuptim të punoja me kancelaren, për të gjetur mënyra se si do të vepronte ajo, nëse Rusia do të shantazhonte në një farë mënyrë Ukrainën“, tha Presidenti Joe Biden.

Lidhur me çështjen e Kinës, dy udhëheqësit u zotuan për një reagim ndaj rasteve të shkeljes së të drejtave të njeriut nga ana e Pekinit, por ata nuk ranë dakord mbi marrëdhëniet ekonomike. Nën zonjës Merkel, lidhjet tregtare gjermane me Kinën, janë thelluar.

Por pavarësisht diferencave, marrëdhëniet dypalëshe duken më të ngrohta pas një periudhe marrëdhëniesh të trazuara të Kancelares Merkel me ish-Presidentin Donald Trump.

Gjatë kohës kur ishte President, zoti Trump, refuzoi t’i shtrëngojë dorën zonjës Merkel në vitin 2017, duke u përplasur për çështje sikurse ajo e kontributin financiar të vendeve aleate të NATO-s mbi mbrojtjen, multilateralizmin si dhe çështje të tregtisë.

Ka një rreshtim të ri në një linjë mes Shteteve të Bashkuara dhe Gjermanisë. Kjo do të jetë e rëndësishme për të ardhmen sepse ndërsa Britania e Madhe është larguar nga Bashkimi Evropian, tashmë Gjermania në mënyrë të veçantë është fuqia qendrore e Evropës. Dhe bashkëpunimi me fuqinë qendrore të Evropës, do të jetë e rëndësishme për interesat amerikane“, thotë Dan Hamilton, i Qendrës Wilson.

Të dy udhëheqësit ritheksuan edhe rëndësinë e integrimit të mëtejshëm të Ballkanit Perëndimor në institucionet evropiane.

Përpara vizitës së zonjës Merkel në selinë e kompanisë farmaceutike Pfizer në Nju Jork, protestues të mbledhur përpara godinës, kërkuan heqjen e kufizimeve mbi patentat e vaksinave kundër koronavirusit. Presidenti Biden e mbështet këtë ide, ndërsa zonja Merkel argumenton se një gjë e tillë do të dëmtonte kërkimin shkencor.

voa

Vdekjet dhe rastet me COVID përsëri në rritje në shkallë globale

Vdekjet dhe rastet e COVID-19 janë në rritje përsëri në shkallë globale që po sjell si rezultat një raund tjetër kufizimesh dhe po zbeh shpresat për një verë argëtuese pothuajse normale.

Organizata Botërore e Shëndetësisë njoftoi të mërkurën se numri i vdekjeve u rrit javën e kaluar pas nëntë javësh rënie, duke regjistruar më shumë se 55,000 jetë të humbura, një rritje prej 3% krahasuar me një javë më herët.

Rastet u rritën 10% javën e kaluar në gati 3 milion, me shifrat më të larta të regjistruara në Brazil, Indi, Indonezi dhe Britani, tha OBSH-ja.

Rritja po u atribuohet niveleve të ulëta të vaksinimit, zbutjes së rregullave për maskat dhe masave të tjera paraprake dhe përhapjes së shpejtë të variantit më ngjitës Delta, për të cilin OBSH-ja tha tani është identifikuar në 111 vende dhe pritet të bëhet globalisht dominues në muajt e ardhshëm.

Sarah McCool, një profesore e shëndetit publik në Universitetin Shtetëror të Xhorxhias, tha se kombinimi i këtyre faktorëve krijon kushtet për “një shpërthim të mundshëm”.

Numri i të vdekurve në Argjentinën e goditur rëndë nga virusi arriti në afro 100,000. Vdekjet e përditshme të koronavirusit në Rusi arritën rekorde të larta këtë javë. Në Belgjikë, infeksionet me COVID-19, të nxitura nga varianti Delta mes të rinjve, janë pothuajse dyfishuar gjatë javës së kaluar. Britania regjistroi një total ditor prej më shumë se 40,000 rastesh të reja për herë të parë në gjashtë muaj.

Në Mianmar, krematoriumet po punojnë pa pushim. Në Indonezi, e cila regjistroi pothuajse 1,000 vdekje dhe mbi 54,000 raste të reja të mërkurën, nga rreth 8,000 raste në ditë një muaj më parë, njerëzit pranë Xhakartës po ndihmojë në hapjen e varreve.

Në SHBA, ku nivelet e vaksinimit janë ndër më të lartat, infeksionet e sapo konfirmuara për një ditë janë dyfishuar gjatë dy javëve të fundit në mesatarisht rreth 24,000, megjithëse vdekjet vazhdojnë të jenë në rënie.

Tokio është për herë të katërt në gjendje emergjence përpara Lojrave Olimpike Verore. Ekspertët kanë thënë se infeksionet mund të shumëfishohen gjatë Lojrave.

Rritja e rasteve ka sjellë kufizime shtesë në qytete si Sidnei, Australi, ku 5 milion banorët do të jenë nën këto masa të paktën deri në fund të korrikut, dy javë më shumë sesa ishte planifikuar. Koreja e Jugut e ka vendosur zonën e Seulit nën rregullat më të rrepta të distancimit deri tani për shkak të niveleve të rasteve rekord.

Pjesë të Spanjës, përfshirë Barcelonën, kanë vedosur një ndalim-qarkullim për natën. Kryebashkiaku i Londrës Sadiq Khan tha se maskat do të jenë të detyruara në autobusë dhe trena edhe pasi kufizimet e tjera në Angli të hiqen javën e ardhshme. Italia paralajmëroi të gjithë ata që shkojnë jashtë vendit se mund të duhet të bëjnë karantinë para se të rikthehen.

Sado shqetësuese të jenë shifrat në të gjithë botën, ato janë më të ulëta se numrat alarmantë në fillim të këtij viti.

Shtatë muaj pas vaksinimit, vdekjet globale janë ulur në rreth 7,900 në ditë, pasi kaluan mbi 18,000 në ditë në janar, sipas të dhënave të Universitetit Johns Hopkins. Rastet janë mesatarisht 450,000 në ditë, një përgjysmim që nga kulmi i tyre në fund të prillit.

voa

George W. Bush për Merkelin: “Grua me parime dhe zemër të madhe”

Merkel zu Besuch auf George W. Bushs Ranch in TexasNë fakt ish-Presidenti i SHBA George W. Bush nuk jep më intervista. Por për Angela Merkelin ai bën një përjashtim pak para vizitës së saj të lamtumirës në Uashington.

“Angela Merkel e ka veshur pozicionin e saj shumë të rëndësishëm me dinjitet dhe ka marrë vendime shumë të vështira. Ajo ka bërë atë, që ishte më e mira për Gjermaninë, dhe e ka bërë duke u bazuar në parime”, u shpreh ish-Presidenti i SHBA George W. Bush në një intervistë me Ines Pohl, drejtuese e zyrës së DW në Uashington, përpara vizitës së fundit të Merkelit në Shtëpinë e Bardhë të enjten më 15 korrik.

Intervista u zhvillua në rezidencën verore të familjes Bush në Maine dhe është pjesë e dokumentarit të DW: “Angela Merkel – kancelarja në kohë krizash”. DW do ta transmetojë dokumentarin para zgjedhjeve parlamentare të shtatorit.

Lidhur me tërheqjen e trupave të NATO-s nga Afganistani, Bush u shpreh: “Gratë dhe vajzat afgane do të përjetojnë vuajtje të patreguara. Ky është gabim. (…) Ata lihen thjesht në dorë të fatit, për t’u vrarë nga këta njerëz shumë brutalë. Më dhemb në zemër”. Ai tha se supozon, që Angela Merkel „ndjen po të njëjtën gjë”.

Bush paralajmëroi lidhur me varësinë e Gjermanisë nga gazsjellësi rus Nord Stream 2. “Sa më shumë një komb, që nuk është demokraci e hapur, zë për fyti ekonomikisht një demokraci, aq më i vështirë bëhet pozicioni strategjik i njerëzve atje”, tha presidenti.

Shtimi i tendencave populiste në të gjithë botën është për Bushin një sinjal i “zhgënjimit me shoqërinë”. “Rreziku i vërtetë” vjen megjithatë nga teoritë e konspiracionit.” Do të duhen politikanë të fortë, për të hedhur poshtë disa nga këto ideologji qesharake, ekstremiste – si në krahun e majtë ashtu edhe në të djathtin.”

Qendrimi Merkelit lidhur me krizën e refugjatëve në vitin 2015, “është udhëhequr nga dhembshuria njerëzore”, tha Bush. “Ka qenë padyshim një vendim i vështirë politik për të, por ajo mori në dorë iniciativën”. Bota ka nevojë për “udhëheqës, që bazohen në parime”.

Thëniet e Bushit për drejtimin e Merkelit si kancelare qëndrojnë në kontrast me ato për ish-kancelarin Gerhard Schröder. Bush tha se Schröder e ka përdorur atë “politikisht për rizgjedhjen e tij”. “U bë shumë personale. Disa anëtarë të kabinetit thanë gjëra, që nuk duhet t`i kishin thënë”.

Zgjedhja katër herë e Merkelit flet “shumë për sukseset e saj”, u shpreh Bush. Ai e quajti kancelaren “personalitet drejtues me sensibilitet, një grua që nuk ka frikë të udhëheqë” dhe një model për gratë dhe vajzat. “Ajo është një person shumë i matur dhe i përzemërt, që ka arritur të mbijetojë në një mjedis politik mjaft të ashpër”, shtoi Bush.

dw

Miliona vende të reja pune: energjia diellore po bëhet motor punësimi

Spanien I Tabernas I Heliostaten Në gjithë botën po hapen miliona vende të reja pune në industrinë e shfrytëzimit të energjisë diellore. Edhe në Gjermani po shtohen panelet diellorë dhe firmat kanë nevojë për punonjës të rinj.

Puna më jep shumë kënaqësi, jam i entuziasmuar dhe mësoj shumë”, thotë Fabian Rojas. Që nga tetori i vitit të kaluar argjentinasi 26-vjeçar punon në një firmë pranë Këlnit, që monton panele diellorë në çati dhe ka katër punonjës. Shefi i firmës René Hegel e punësoi inxhinierin argjentinas, i cili në atë kohë ndodhej për vizitë në Gjermani. Kështu mund të përballohet një pjesë e kërkesës, e cila ka rritje të shpejtë.

“Ne kemi shumë kërkesa, unë shkruaj të paktën gjashtë oferta në javë dhe kemi porosi për katër deri në pesë muajt e ardhshëm”, tregon Rojas për DW. “Klientët duan të prodhojnë vetë energji elektrike, të ngarkojnë makinat elektrike me të dhe të ulin konsumin nga rrjeti. Kjo ndihmon për mbrojtjen e klimës.”

Fabian Rojas bisedon me klientët, planifikon sistemet dhe nganjëherë ndihmon për montimin e tyre në çati. Shefi i tij shet që nga viti 2008 impiante për shfrytëzimin e energjisë diellore. “Fabiani mëson shumë shpejt,” thotë Hegel i kënaqur. “Muajt e ardhshëm ai do të fitojë më shumë përvojë praktike, atëherë gjërat do të shkojnë edhe më mirë”.

Gjerman ia kërkon punonjës

Hegeli dëshiron të punësojë punonjës të tjerë, sepse kërkesa po rritet. Pas një bumi si pasojë e ligjit për energjitë e rinovueshme në fillim të viteve 2000, energjia diellore pësoi një rënie pas vitit 2012 dhe tani po përhapet sërish. Në vitin 2020 në Gjermani u instaluan sisteme të energjisë diellore me një fuqi prej gjithsej pesë gigavat (GW), tendenca është në rritje. Sipas studimeve për të përmbushur objektivin e 1.5 gradëve zgjerimi do të duhet të rritet gjashtëfish, në 30 GW në vit.

Për këtë në industrinë solare nevojiten gjithnjë e më shumë punëtorë, thekson edhe Günther Haug, menaxher në BayWa r.e. Kompania me seli në Mynih ndërton parqe të mëdha për energjinë e diellit dhe të erës në të gjithë botën. Ajo po zgjerohet. Në vitin 2017 BayWa r.e. kishte 1100 punonjës, sot ajo ka 2.700. “Ne kërkojmë specialistë për zhvillimin e projekteve, inxhinierë, ekspertë financiarë dhe njerëz të trajnuar teknikisht për mirëmbajtjen”, thotë Haug.

Për të gjetur dhe mbajtur stafin ne i përgatisim vetë ata, sepse ka shumë pak punonjës të kualifikuar”.

“Momentalisht në Gjermani ka rreth 50.000 vende pune në industrinë e shfrytëzimit të energjisë diellore“, thotë Volker Quaschning, profesor për energjitë e rinovueshme në HTW në Berlin. Shumë vetë kërkonin punë të reja për shkak të krizës së koronës. “Ne duhet të veprojmë tani me zgjuarsi, të fillojmë programe trajnimi, për të pasur sa duhet punëtorë të kualifikuar. Përndryshe tranzicioni energjitik do të dështojë për shkak të mungesës së personelit”, thotë Quaschning për DW.

Miliona vende pune në industrinë e energjisë diellore

Në vitin 2019 në mbarë botën rreth 11.5 milion vetë punonin në fushën e energjisë së rinovueshme, më shumë se një e treta e tyre në industrinë e shfrytëzimit të energjisë diellore. Kështu thuhet në një raport i Agjencisë Ndërkombëtare të Energjisë së Rinovueshme (IRENA).

Sipas IRENA investimet për stimulimin e ekonomisë dhe tregut të punës pas krizës se covidit duhet të shfrytëzohen duke pasur prioritet tranzicionin energjitik. “Ne vlerësojmë faktin që çdo dollar këtu krijon tri herë më shumë vende pune sesa në sektorin e energjive me lëndë fosile” thotë drejtori i përgjithshëm Francesco La Camera. “Gjithnjë e më shumë vendimmarrës politikë kuptojnë potencialin e këtyre vendeve të punës.”

Momentalisht në gjithë botën janë instaluar impiante solare me një kapacitet të përgjithshëm prej rreth 850 GW. Ata prodhojnë energji elektrike sa rreth 190 centrale bërthamorë. Energjia diellore është momentalisht më e lira, kështu që studiuesit presin që ajo të zërë vend si burimi më i rëndësishëm i energjisë në botë. Studimet supozojnë, se për një furnizim global me energji neutrale ndaj klimës nevojiten rreth 60.000 GW energji diellore. Për këtë në dekadën e ardhshme industrisë do t’ì duhen më shumë se 60 milion punonjës për prodhimin e moduleve, montimin dhe mirëmbajtjen e impianteve.

Me kuriozitet për punën e re në sektorin e energjisë

Inxhinieri Fabian Rojas në Këln është magjepsur nga energjia e diellit dhe e erës dhe teknologjitë e reja për kursimin e energjisë. Ai rregullisht shkëmben mendime mbi këto tema me një mik argjentinas, i cili ndërton sisteme diellore në SHBA. “Energjia diellore nevojitet në mbarë botën dhe prandaj kudo kërkohen njerëz të kësaj fushe”, thotë Rojas. Kjo vlen për Evropën, ashtu edhe për Azinë dhe vendlindjen e tij Amerikën e Jugut.

Rojas rekomandon iniciativë personale për të gjithë ata, që duan të punojnë në këtë sektor. “Informohuni, bëni një praktikë dhe për fat të mirë ka shumë informacione në internet.” Në sektorin solar ai sheh shumë mundësi për të punuar në pjesë të tjera të botës dhe për të transmetuar dijen e tij: “Ku i dihet. Le të shohim kush tjetër do të trokasë në derë.”

dw

BE-ja nuk i njeh të gjitha vaksinat kundër COVID-19

Një punëtore shëndetësore në Kroaci përgatitet të administrojë dozën e vaksinës AstraZeneca. Fotografi nga arkivi. Pasi Dr. Ifenayi Nsofor dhe gruaja e tij morën dy dozat e vaksinës AstraZeneca në Nigeri, ata menduan se gjatë kësaj vere do të mund të udhëtonin në ndonjë prej shteteve evropiane. Por, u gabuan.

Ky çift – dhe miliona persona të tjerë që janë vaksinuar kundër COVID-19 me ndihmën e Kombeve të Bashkuara – mund të ndalohen që të hyjnë në shumë shtete evropiane dhe shtete të tjera, pasi ato shtete nuk e njohin për udhëtim versionin e vaksinës AstraZeneca që është prodhuar në Indi, shkruan Associated Press.

Edhe pse vaksina AstraZeneca prodhohet në Evropë dhe është miratuar për përdorin nga Agjencia Evropiane e Barnave, e njëjta vaksinë, që prodhohet në Indi, ende nuk ka marrë dritën e gjelbër për përdorim.

Në Kosovë po ashtu administrohet vaksina AstraZeneca, por nga Ministria e Shëndetësisë nuk u janë përgjigjur pyetjeve të Radios Evropa e Lirë nëse në vend përdoren vaksina AstraZeneca të prodhuara në Indi.

Kosova ka pranuar vaksina AstraZeneca si donacion nga programi COVAX, po ashtu nga Norvegjia, Kroacia dhe Mali i Zi.

Rregullatorët e BE-së thanë se AstraZeneca nuk ka përfunduar të gjithë dokumentacionin e nevojshëm për fabrikën indiane, përfshirë këtu edhe detajet mbi praktikat e saj të prodhimit dhe standardet e kontrollit të cilësisë.

Por, disa ekspertë e përshkruajnë këtë lëvizje të BE-së si diskriminuese dhe të pabazuar në shkencë, duke theksuar se Organizata Botërore e Shëndetësisë ka inspektuar dhe miratuar fabrikën në Indi. Zyrtarët shëndetësorë kanë thënë se situata jo vetëm që ta komplikojë udhëtimin dhe do të frustrojë ekonomitë e ndjeshme, por gjithashtu do të minojë besimin për vaksinat duke etiketuar disa vaksina si vaksina që janë nën standardin e kërkuar.

Derisa fushata e vaksinimit po përfshin mbarë Evropën dhe shtete të tjera të pasura, autoritetet janë në ankth që ta shpëtojnë turizmin veror, duke lehtësuar masat kufizuese për kalimin e kufijve.

Më herët gjatë këtij muaji, Bashkimi Evropian prezantoi certifikatën digjitale për COVID-19, që u mundëson banorëve të BE-së të lëvizin lirshëm në 27 shtetet e bllokut evropian nëse janë vaksinuar me një prej katër vaksinave të autorizuara nga Agjencia Evropiane e Barnave. Shtetasit e BE-së po ashtu mund të udhëtojnë lirshëm nëse prezantojnë një test negativ për COVID-19 apo dëshmi se e kanë kaluar virusin.

Ndërkaq, Shtetet e Bashkuara dhe Britania e Madhe gjerësisht janë të mbyllura për vizitorët e jashtëm dhe certifikatat e BE-së janë parë si një model i mundshëm për udhëtimet në epokën e pandemisë COVID-19 dhe si një mënyrë për shtytje ekonomike.

Vaksinat e mbështetura nga BE-ja përfshijnë edhe ato të prodhuara nga Pfizer, Moderna dhe Johnson & Johnson. Por, aty nuk përfshihet vaksina AstraZeneca, që prodhohet në Indi, apo edhe vaksinat e tjera të prodhuara në shtetet në zhvillim, përfshirë edhe vaksinat e prodhuara në Kinë dhe Rusi.

Secili shtet i BE-së është i lirë që të aplikojë rregullat e tij për udhëtarët që vijnë nga brenda dhe jashtë bllokut dhe rregullat dallojnë nga shteti në shtet, duke krijuar edhe më shumë konfuzion te turistët. Disa shtete të BE-së, përfshirë Belgjikën, Gjermaninë dhe Zvicrën lejojnë personat që kanë marrë vaksina që nuk janë të mbështetura nga BE-ja, ndërkaq disa shtete tjera, përfshirë Francën dhe Italinë nuk lejojnë një gjë të tillë.

Për Nsoforin, kuptimi që ai mund të ndalohet ishte “zhgënjyes”. Pas një viti të vështirë të punës gjatë pandemisë në Abuxha, Nsofor dhe gruaja e tij, së bashku me dy vajzat e tyre, mezi po prisnin që të kalonin pushimet verore në Evropë, ndoshta për të vizituar Parisin apo Salzburgun.

Nsofor theksoi se vaksina e prodhuara në Indi, me të cilën është vaksinuar, është e autorizuar nga Organizata Botërore e Shëndetësisë për përdorim emergjent dhe këtë vaksinë e kishte dhuruar COVAX-i, programi i Kombeve të Bashkuara, që ndihmon shtetet e varfra me vaksina kundër koronavirusit.

Autorizimit për përdorim emergjent të lëshuar nga OBSH-ja i parapriu një vizitë në fabrikën e Institutit Serum të Indisë, për t’u siguruar se kjo fabrikë përmbushte praktikat e mira të prodhimit dhe standardet e kontrollit të cilësisë.

“Ne jemi mirënjohës ndaj BE-së për financimin e COVAX-it, por tani ata, në thelb po diskriminojnë ndaj një vaksine që në mënyrë aktive e kanë financuar dhe promovuar”, tha Nsofor.

“Kjo do të krijojë hapësirë për lloj-lloj teorish të konspiracionit që vaksinat që po i merr Afrika nuk janë aq të mira sa ato që marrin për vete ata në Perëndim”, shtoi ai.

Ivo Vlaev, profesor në Universitetin e Varvikut të Britanisë, që ka këshilluar qeverinë lidhur me sjelljet sociale gjatë COVID-19, është pajtuar se refuzimi i shteteve perëndimore për të njohur vaksinat që përdoren në shtetet e varfra, rrisin mosbesimin ndaj vaksinave.

“Njerëzit që veçse dyshojnë në vaksina do të bëhen edhe më dyshues ndaj tyre”, tha Vlaev.

“Ata po ashtu mund të humbasin besimin në mesazhet e qeverive për shëndetin publik dhe të jenë më pak të vullnetshëm për të respektuar rregullat kundër COVID-19”, shtoi ai.

Dr. Mesfin Teklu Tessema, drejtor i shëndetësisë në Komitetin Ndërkombëtar të Shpëtimit, tha se shtetet që kanë refuzuar që të njohin vaksinat e miratuara nga OBSH-ja po veprojnë kundër të dhënave shkencore.

“Vaksinat që kanë plotësuar kriteret e OBSH-së duhet të pranohen. Në të kundërtën, e gjithë kjo duket se ka një element të racizmit”, tha ai.

OBSH-ja u ka bërë thirrje shteteve që të njohin të gjitha vaksinat që ka autorizuar, përfshirë edhe dy vaksina që janë prodhuar në Kinë. Shtetet që refuzojnë të bëjnë një gjë të tillë, “minojnë besimin në vaksinat që po shpëtojnë jetë dhe që tashmë kanë treguar se janë të sigurta dhe efektive, duke ndikuar në marrjen e vaksinave dhe potencialisht duke vënë në rrezik miliarda persona”, tha OBSH-ja më herët gjatë këtij muaji.

Në qershor, drejtori ekzekutiv i Institutit Serum të Indisë, Adar Poonawalla, shkroi në Twitter se ai ishte i shqetësuar me indianët e vaksinuar, të cilët mund të përballeshin me probleme gjatë udhëtimeve në BE dhe shtoi se këtë problem ai do ta diskutonte në nivelet më të larta me rregullatorët dhe shtete të ndryshme.

Stefan De Keersmaeker, zëdhënës i Komisionit të BE-së për Shëndetësi, javën e kaluar tha se rregullatorët ishin të obliguar të kontrollojnë procesin e prodhimit në fabrikën indiane.

“Ne nuk po mundohemi që të krijojmë dyshime për këtë vaksinë”, tha ai.

AstraZeneca ka thënë se vetëm ka dorëzuar dokumentacionin për fabrikën në Indi tek agjencia e barnave të BE-së. Por, nuk ka treguar pse nuk e ka bërë më herët një gjë të tillë, para se agjencia të merrte vendimin në janar.

Ekspertët e shëndetit publikë kanë paralajmëruar shtetet që po refuzojnë të njohin vaksinat, që janë të miratuara nga OBSH-ja, duke thënë se këto vende po ndërlikojnë përpjekjet globale që në mënyrë të sigurt të rinisin udhëtimet.

“Të përjashtosh njerëz të caktuar nga shtete të caktuara për shkak të vaksinës që ata kanë marrë nuk konsiston me atë që dimë e që është se të gjitha këto vaksina që janë miratuar ofrojnë jashtëzakonisht mbrojtje”, tha Dr. Raghib Ali nga Universiteti i Kembrixhit.

Nsofor tha se ai dhe bashkëshortja e tij ende nuk kanë vendosur se ku do të kalojnë pushimet verore, por dy opsionet kryesore janë Singapori ose Afrika Lindore.

“Ne nuk e kishim kuptuar se kishte kaq shumë shtresa të padrejtësive sa i përket vaksinave”, tha ai.

rel

Efektiviteti i vaksinave ndaj variantit Delta

FILE PHOTO: A medical worker administers a dose of the AstraZeneca vaccine to a man during a vaccination session for elderly people over 75 years old, at a stadium in New Taipei City, Taiwan June 25, 2021.Deri tani shtatë vaksina kundër COVID-19 janë miratuar për përdorim nga Organizata Botërore e Shëndetësisë. Dhe ndërsa koronavirusi po ndryshon në variante të reja, lind pyetja – sa të efektshme janë vaksinat? Përgjigja është e komplikuar. Por siç njofton korrespondenti i Zërit të Amerikës Steve Baragona, çdo vaksinë ndihmon për t’i mbajtur njerëzit gjallë dhe larg spitalit.

Me përhapjen e variantit Delta, të dhënat tregojnë se edhe disa njerëz të vaksinuar po infektohen me virusin COVID-19.

Por këto infeksione janë kryesisht të lehta. Të gjitha vaksinat po funksionojnë për të përmbushur objektivin më të rëndësishëm, thonë ekspertët.

“Vaksinat janë shumë të efektshme për atë që janë krijuar. Ato po mbrojnë njerëzit nga rastet e rënda të sëmundjes dhe nga vdekja”, thotë Bill Powderly, ekspert i shëndetësisë në Universitetin e Uashingtonit.

Një rritje e menjëhershme e infeksioneve në Izrael ngriti kohët e fundit shqetësime se disa vaksina janë më të dobëta ndaj variantit Delta. Por zoti Powderly thotë se vaksinat po parandalojnë rastet më të rënda, siç po ndodh në shtetin e tij të Mizurit.

“Po shohim infeksione, ashtu siç panë izraelitët, tek njerëzit që janë vaksinuar. Por askush prej tyre nuk përfundon në spital. Të gjitha shtrimet në spital, dhe fatkeqësisht, të gjitha vdekjet nga COVID-i, ndodhin tek ata që nuk janë vaksinuar”, thotë zoti Powderly.

Disa nga vaksinat janë më të mira se të tjerat në aktivizimin e sistemit imunitar.

Në përgjithësi, vaksinat me teknologjinë e re të Modernës dhe Pfizer-it duket se prodhojnë më shumë antitrupa. Ato pasohen nga vaksinat me teknologjinë klasike të prodhuara nga Johnson & Johnson, AstraZeneca e Universitetit të Oksfordit dhe Sputnik V e Rusisë.

Vaksinat Sinovac dhe Sinopharm të Kinës janë në fundin e renditjes për nga efektiviteti.

Të gjitha vaksinat prodhojnë mjaft antitrupa për të luftuar variantin origjinal të virusit. Por nivelet e antitrupave fillojnë të kenë më shumë rëndësi kundrejt varianteve të tjera, thonë ekspertët.

“Ndoshta me vaksinat më pak të fuqishme, që nuk po shkaktojnë një përgjigje aq të fortë të sistemit imunitar, varianti Delta ka filluar të depërtojë. Këto vaksina ende ofrojnë një farë mbrojtje ndaj variantit të fundit, por është qartë se ka një dobësim të aftësisë së tyre”, thotë Peter Openshaw, ekspert në Universitetin “Imperial College” të Londrës.

Vaksinat Pfizer, Moderna, AstraZeneca, J & J dhe Sputnik V, të gjitha duket se janë më të mira se Sinpharm dhe Sinovac në aktivizimin e vijës së dytë të mbrojtjes së trupit, atyre që quhen qelizat T.

“Vaksinat që janë në gjendje të nxisin një përgjigje imune ekstra, si përgjigjen e qelizave T, sigurojnë një mbrojtje më të mirë kundër varianteve të ndryshme, varianteve virale, sesa një vaksinë që shton vetëm antitrupa”, thotë Deborah Fuller me Universitetin e Uashingtonit.

Megjithatë, thotë zonja Fuller, vaksinat Sinopharm dhe Sinovac janë më shumë si vaksinat e përvitshme të gripit: jo perfekte, por më mirë se sa të mos marrësh asnjë lloj mbrojtje, pavarësisht ankesave që ajo dëgjon çdo vit nga njerëzit që vaksinohen.

“Dëgjoj nga ata që marin vaksinën, dhe thonë,” kurrë nuk do ta marr përsëri. “Sepse gjithsesi u sëmura. ‘ dhe përgjigjja ime është gjithmonë: do të ishit sëmurur shumë më keq, ndoshta do të ishit shtruar në spital, nëse nuk do të kishit marrë vaksinën”.

Zonja Fuller thotë se të gjitha vaksinat ndihmojnë në ngadalësimin e përhapjes së virusit, që do të thotë, më pak shanse që virusi të evoluojë në variante më të rrezikshme.

voa

Franca dhe Greqia kërkojnë vaksinim me detyrim në disa profesione

Symbolfoto ImpfstoffPas Italisë dhe Francës, edhe Greqia do të aplikojë vaksinimin e detyrueshëm kundër Coronës për punonjësit e shëndetësisë dhe kujdesit. Shkaku: përhapja e Deltës.

Presidenti francez Emmanuel Macron dhe kryeministri grek Kyriakos Mitsotakis janë larguar nga kursi i vaksinimit vullnetar kundër COVID-19. Të dy ata njoftuan se do të duhej të vaksinoheshin personat që punojnë në sistemin e kujdesit shëndetësor. “Nëse nuk veprojmë tani, numrat e infektimeve në klinika do të rriten”, tha presidenti Emmanuel Macron, në një fjalim televiziv.

Pa vaksinim nuk ka punë dhe para

Në Francë, të gjithë punonjësit në spitale, ata që punojnë me të moshuar ose në shtëpitë e kujdesit për moshën e tretë, duhet të vaksinohen më së voni deri më 15 shtator. Ndryshe, sipas ministrit të Shëndetësisë Olivier Véran, ata nuk do të jenë më në gjendje të punojnë dhe nuk do të paguhen më.

Në Greqi, vaksinimi i detyrueshëmdo të zbatohet nga mesi i gushtit për punonjësit në shtëpitë e kujdesit për të moshuar, ndërsa nga 1 shtatori për sektorin e shëndetësisë. “Ne mund të përfundojmë kapitullin e fundit të krizës shëndetësore vetëm nëse të gjithë marrin vaksinën që mundëson liri”, tha kryeministri Mitsotakis. Vendi nuk do të futet sërish në një lockdown, për shkak të qëndrimit negativ të individëve.

Në Francë, fjalimi gjysmë ore i Macronit pati një efekt të menjëhershëm. Faqja për rezervime Doctolib kumtoi në Twitter se numri i aplikimit për orare për vaksinime është rritur shumë.

Italia e para

Vaksinimi i detyruar në Evropë është një fenomen jashtëzakonisht i rrallë. Edhe Macroni fillimisht i ka përjashtuar vaksinimet me detyrim në Francë. Italia, e cila u godit veçanërisht rëndë nga pandemia, ishte një përjashtim. Ky vend ka kërkuar që punonjësit e shëndetësisë të vaksinohen në mars.

Përveç vaksinimit të detyrueshëm, Franca dëshiron ta bëjë paraqitjen e certifikatave shëndetësore si kusht për të vizituar restorantet ose qendrat tregtare, për udhëtime me trena ose fluturime brenda vendit, duke nisur nga muaji gusht. Dokumenti dëshmon se një person është vaksinuar, është shëruar apo ka bërë një test negativ. Në Greqi, kufizimet për personat që nuk janë vaksinuar do të futen në fuqi nga dita e premte (16.07).

“Gara” kundër virusit

Për grupet e rrezikuara që janë vaksinuar në fillim të këtij viti, do të ketë një rifreskim të vaksinës me një dozë të tretë në Francë, duke nisur nga shtatori. Macroni foli për një “garë” të re kundër virusit, i cili po përhapet përsëri në të gjithë Francën. Pa veprim të shpejtë, ekziston rreziku i përkeqësimit të sërishëm të gjendjes në spitale.

Në Francë, si edhe në Greqi, rreth 40 përqind e popullsisë është plotësisht e vaksinuar. Në të dy vendet, numri i infektimeve të reja është rritur sërish kohët e fundit. Ekspertët thonë se shkaku i rritjes së infektimeve është përhapja e variantit Delta. Ky variant i virusit Corona është zbuluar për herë të parë në Indi.

bc/fab/fw (afp, rtr)

SHBA, fillon të rritet sërish numri i të infektuarve nga koronavirusi

Infermieret bisedojnë në hyrje të pavionit të urgjencës ndërsa po përballen me një rritje të numrit të infeksioneveGrafiku i rasteve të infektimit me koronavirusin në Shtetet e Bashkuara po rritet sërish pas disa muajsh rënieje. Numri i rasteve të reja në ditë po dyfishohet gjatë tre javëve të fundit, të nxitura nga përhapja e shpejtë e variantit delta, nga niveli i ngadaltë i vaksinimit, si dhe nga festimet masive për 4 korrikun.

Rastet e konfirmuara të infektimeve u ngjitën të hënën në një mesatare prej 23’600 në ditë, krahasuar me 11’300 që ishin më 23 qershor, sipas të dhënave të Universitetit Johns Hopkins. Të gjitha shtetet amerikane, me përjashtim të Meinit dhe Dakotës së Jugut, raportuan se shifrat janë rritur gjatë dy javëve të fundit.

“Nuk është rastësi që jemi pikërisht në periudhën gjatë së cilës do të prisnim shfaqjen e rasteve gjatë fundjavës së 4 korrikut”, tha Dr. Bill Powderly, drejtues në divizionin për sëmundjet ngjitëse në Shkollën e Mjekësisë të Universitetit Washington në St. Louis.

Në të njëjtën kohë, pjesë të Shteteve të Bashkuara po përballen me një rezistencë të thellë ndaj vaksinës, ndërsa një version tepër ngjitës i koronavirusit, i pikasur fillimisht në Indi, është përgjegjës për një rritje edhe më të madhe të infektimeve.

Në rang vendi, 55.6% e amerikanëve kanë bërë të paktën njërën dozë të vaksinës për COVID-19ën, sipas të dhënave të Qendrës për Kontrollin dhe Parandalimin e Sëmundjeve. Pesë shtetet me kërcimin më të madh dy-javor në rastet për frymë kishin normat më të ulëta të vaksinimit: Misuri, 45.9%; Arkansas, 43%; Nevada, 50.9%; Luiziana, 39.2%; dhe Juta, 49.5%.

Edhe me valën e fundit, rastet e infektimit në Shtetet e Bashkuara nuk janë aspak pranë kulmit të tyre prej një çerek milioni në ditë në muajin janar. Dhe vdekjet po qëndrojnë mesatarisht nën nivelin 260 në ditë, pasi kaluan në mbi 3’400 gjatë dimrit – një dëshmi kjo se me sa efektshmëri mund të parandalojë vaksina sëmundjen e rëndë dhe vdekjen e personave që infektohen.

Megjithatë, për shkak të rritjes, autoritetet e shëndetësisë në vende të tilla si Los Anxhelos dhe St. Louis janë duke iu lutur njerëzve, madje edhe atyre të imunizuar, që të rifillojnë të mbajnë maska në publik. Edhe zyrtarët e Çikagos njoftuan të martën se udhëtarët e pavaksinuar nga Misuri dhe Arkansas duhet ose të karantinohen për 10 ditë ose të rezultojnë negativë nga një test për COVID-19ën.

Ndërkohë, Departamenti i Shëndetësisë në Misisipi, i cili renditet i fundit në shkallë vendi për vaksinimet, filloi të bllokonte postimet rreth COVID-19ës në faqen e tij në Facebook, për shkak të një “rritje të keqinformimit” rreth virusit dhe vaksinës.

Zyrtarët e Misisipit gjithashtu po rekomandojnë që njerëzit mbi 65 vjeç dhe ata me sëmundje kronike të qëndrojnë larg grumbullimeve të mëdha në mjedise të brendshme për shkak të një rritjeje prej 150% të shtrimeve në spital gjatë tre javëve të fundit.

Por, vullneti politik mund të mos ekzistojë në shumë shtete të lodhur nga muaj të tërë kufizimesh.

Në Miçigan, Guvernatorja demokrate Gretchen Whitmer po përballet me një përpjekje për të shfuqizuar një ligj që ajo përdori për të vendosur kufizime të mëdha gjatë fazave të hershme të pandemisë.

Dhe guvernatorja republikane e Alabamas, Kay Ivey, iu kundërvu idesë se shteti mund të ketë nevojë të rivendosë masat parandaluese, ndërsa vaksinimet vonohen dhe rriten shtrimet në spital.

“Alabama është e HAPUR për biznes. Vaksinat janë në dispozicion, dhe unë inkurajoj njerëzit që ta marrin. Urdhrat për gjendjen e emergjencës dhe shëndetësinë kanë skaduar. Ne jemi duke ecur përpara”, tha ajo në rrjetet sociale.

Dr. James Lawler, një drejtues i Qendrës Globale për Sigurinë Shëndetësore në Qendrën Mjekësore të Universitetit të Nebraskës në Omaha, tha se rikthimi i maskave dhe kufizimi i tubimeve do të ndihmonte. Por, ai pranoi se shumica e vendeve që shohin nivele më të larta të virusit “janë pikërisht zonat e vendit që nuk duan të bëjnë ndonjë nga këto gjëra”.

Zoti Lawler paralajmëroi se ajo që po ndodh në Britani është një shije paraprake e asaj që do të vijë në Shtetet e Bashkuara.

“Përshkrimet nga rajonet e botës ku varianti delta ka zënë vend dhe është bërë virusi mbizotërues, janë me fotografitë e pavionëve të urgjencave plot me 30-vjeçarë. Kjo është ajo që përshkruajnë mjekët e kujdesit intensiv dhe kjo është ajo që po vjen në Shtetet e Bashkuara”, tha ai.

Ai shtoi: “Unë mendoj se njerëzit nuk e kanë idenë se çfarë do të na godasë.”

Presidenti Joe Biden po shfrytëzon fuqinë e yjeve për përpjekjet e administratës për të vaksinuar të rinjtë. Aktorja, këngëtarja dhe kantautorja tetëmbëdhjetëvjeçare Olivia Rodrigo do të takohet me Preidentin Biden dhe Dr. Anthony Faucin të mërkurën.

Ndërsa administrata ka pasur sukses në vaksinimin e amerikanëve të moshuar, të rinjtë kanë treguar më pak urgjencë për të bërë vaksinat.

Disa, të paktën, po e dëgjojnë thirrjen në Misuri pas disa javë lutjesh, tha Erik Frederick, shefi administrativ i spitalit Mercy Hospital Springfield. Ai shkruajti në Twitter se numri i njerëzve që imunizohen në klinikën e tyre të vaksinimit është rritur nga 150 në 250 çdo ditë.

“Kjo më jep shpresë”, tha ai.

Hakerët iranianë prezantohen si studiues britanikë

Një grup famëkeq hakerash të lidhur me Gardën Revolucionare Islamike të Iranit (IRGC) kanë zhvilluar një fushatë të fshehtë ndaj profesorëve të universiteteve dhe ekspertëve të tjerë të vendosur në Britaninë e Madhe dhe Shtetet e Bashkuara në përpjekje për të vjedhur informacionin e tyre sensitiv, sipas hulumtimit nga firma e sigurisë kibernetike Proofpoint.

Grupi, i njohur si TA453 dhe Charming Kitten, janë shtirur si studiues britanikë në Shkollën e Studimeve Orientale dhe Afrikane të Universitetit të Londrës (SOAS) të paktën që nga janari kur u janë afruar viktimave të tyre, tha kompania Proofpoint në një raport të ri të publikuar të martën.

Studiuesit e Proofpoint thanë se ata nuk mund të konfirmonin në mënyrë të pavarur se grupi i hakerëve është pjesë e IRGC-së, por ata vlerësojnë me “besim të lartë” se mbështet përpjekjet e saj të zbulimit. IRGC-ja u themelua pas revolucionit iranian si një forcë paralele me ushtrinë iraniane. Hakerët kanë vendosur më parë në objektiv studiues amerikanë dhe izraelitë të mjekësisë, Konferencën e Sigurisë së Mynihut dhe një fushatë presidenciale në Shtetet e Bashkuara, thotë kompania Proofpoint.

Objektivat e fushatës së fundit të piraterisë përfshinin ekspertë për çështjet e Lindjes së Mesme, profesorë të lartë në institucione të njohura akademike dhe gazetarë të specializuar në Lindjen e Mesme – të gjithë individë me informacione në lidhje me politikën e jashtme, njohuri për lëvizjet e disidentëve iranianë dhe një botëkuptim të bisedimeve bërthamore amerikane, thanë studiuesit e Proofpoint. Shumica e viktimave ishin goditur më parë nga i njëjti grup hakerash, thanë ata.

“Interesi i vazhdueshëm i TA453 në këto objektiva tregon një angazhim të vazhdueshëm iranian për të përdorur operacione kibernetike për të mbledhur informacione në mbështetje të përparësive të zbulimit të IRGC-së”, shkruajti Sherrod DeGrippo, drejtori i lartë për kërkimin dhe zbulimin e kërcënimeve në Proofpoint, në një email për Zërin e Amerikës. “Sulmi i TA453 mund të demonstrojë një dëshirë për të kuptuar diskutimet dhe pozicionet jozyrtare të politikave që mund të zhvillohen jashtë qeverisë, por që megjithatë ndikojnë tek vendimmarrësit”.

Kompania nuk bëri të ditur emrat e të sulmuarve, por tha se ka bashkëpunuar me autoritetet për të njoftuar viktimat.

Në një fushatë piraterie të këtij lloji, e njohur si korrje kredencialesh, kriminelët kibernetikë së pari lidhen me viktimat përmes postës elektronike përpara se t’u dërgojnë atyre bashkëlidhur një material malinj, ose një adresë për një faqe të kompromentuar në internet, e krijuar për të vjedhur fjalëkalimet.

voa