Ministria e Arsimit njoftoi në orët e pasdites se nuk heq dorë nga provimi i maturës shtetërore, si dhe nga testimi ekstern. Pavarësisht protestave dhe kampimit të nxënësve, nga MASH, sot njoftuan se, “si proces i verifikimit të njohurive të fituara në arsimin e mesëm dhe parakusht për vazhdimin e arsimimit të lartë, matura shtetërore do të vazhdojë të zbatohet edhe në vitin shkollor 2014/2015.

Gjithashtu, do të vazhdojë të zbatohet edhe procesi i testimit ekstern, përmes të cilit, prej 3 vjetësh tashmë kontrollohen arritjet e njohurive të nxënësve dhe objektiviteti i vlerësimit të mësimdhënësve. Por, nga ministria e arsimit, theksuan se lëshimi i vetëm është kthimi i modelit të vjetër të nënshtrimit të maturës shtetërore, pra, testimi të realizohet në formë të shkruar, ndërkohë që lënda e matematikës të jetë alternativë për të gjithë nxënësit. Nga dita e hënë do të fillojë edhe paraqitja e maturantëve për dhënien e maturës shtetërore sipas modelit të vjetër, ndërsa sa i përket testimit ekstern sipas praktikës së deritanishme, gjatë ditëve në vazhdim do të publikohen edhe pyetjet për të gjitha lëndët në këtë vit shkollorë. Nga ministria e Arsimit vënë theksin se mungesa e paarsyeshme e mësimit vendos në rrezik serioz procesin arsimor. (alsat)