Imagjinoni sikur të mund të udhëtonit në kohë në një nga vendet më historike të botës. Një aplikacion i quajtur “Forumet Perandorake” u mundëson tashmë vizitorëve udhëtimin në kohë në Forumin Romak.

Në zemër të Romës, shumë pranë Koloseut, ndodhen Forumet Perandorake, sheshe të lashta të ndërtuara nga disa perandorë romakë përgjatë qindra viteve të Perandorisë Romake.

Ato që u ndërtuan më vonë, Forumi i Augustit i vitit 2 para erës sonë dhe Forumi i Trajanit i vitit 112 para erës sonë, mund të vështrohen tashmë në të gjithë madhështinë e tyre nëpërmjet një aplikacioni të ri për iPad. Aplikacioni “Forumet Perandorake” ka tre seksione: pamje të drejtpërdrejta tre-dimensionale, harta dhe histori.

Pamjet 3D paraqesin një rindërtim të objektit nga perspektiva e vizitorit, duke i dhënë kështu mundësinë të krahasojë rrënojat e sotshme me atë çfarë shikonin romakët në katër epoka të ndryshme, duke filluar që ndërtimi në vitin 125 para erës sonë dhe deri në vitin 1815 kur zona u gërrmua dhe pastrua.

“Tabletët dhe celularët inteligjentë janë mjetet perfekte për të parë trashëgiminë kulturore, pasi ofrojnë pamje të qarta në momentin e duhur, ndërkohë që mund të krahasosh menjëherë objektin që shikon me atë çfarë shfaq paisja,” thotë drejtori i projektit, Sergio Fontana.

Seksioni i hartave jep një pamje tre-dimensionale nga ajri, dhe vizitorët mund të përzgjedhin monumentin për të cilin duan informacion më të detajuar.

“Ka dy mënyra se si aplikacioni mund të perceptohet. Nga njëra anë mund të shihet si një instrument i pasur me dokumenta shkencore. Nga ana tjetër, përmban edhe elementë loje duke mundësuar udhëtimin në kohë dhe hapësirë rrotull Forumit Romak,” thotë zoti Fontana.

Seksioni historik përmban tekst dhe imazhe të bollshme për të kënaqur të apasionuarit pas historisë. (voa)