Një kompani amerikane ka marrë miratimin për të nxjerrë në treg një test të ri për koronavirusin. Testi i kompanisë “Abbott Laboratories” diagnostikon koronavirusin brenda pak minutave dhe mund të vendoset në të gjitha mjediset e kujdesit shëndetësor. Kompania do të fillojë shpërndarjen këtë javë dhe është zotuar të prodhojë 50 mijë teste në ditë.

Firma kërkimore amerikane “Abbott Laboratories” njoftoi se ka fituar miratimin për të nxjerrë në treg një test diagnostikues për koronavirusin. Testi i ri mund të nxjerrë rezultatin brenda disa minutave dhe mund të përdoret në zyrat e mjekëve të përgjithshëm, në klinikat e kujdesit të shpejtë, si dhe në spitale.

Shtetet e Bashkuara kanë tashmë më shumë raste të koronavirusit se çdo vend tjetër i globit. Spitalet janë duke u përpjekur të plotësojnë kërkesat për të testuar mijëra njerëz për virusin vdekjeprurës.

Miratimin për këtë test të ri e dha Administrata e Shteteve të Bashkuara për Ushqimin dhe Ilaçet (FDA), sipas autoritetit që i jep ligji për emergjencat.

Kompania “Abbott” shpërndau një deklaratë ku informon se do të fillojë shpërndarjen këtë javë të kompleteve të reja të testeve dhe se do ta shtojë prodhimin në gati 50 mijë teste në ditë.

“Nxjerr një rezultat të saktë në pak minuta, në vend të orëve të tëra apo ditëve. Kjo i jep mundësinë mjekëve ta shikojnë pacientin dhe të ndërhyjnë me shpejtësi për të parandaluar përhapjen tek njerëzit e tjerë”, thotë Gavin Cloherty, kreu i punës kërkimore për sëmundjet ngjitëse në kompaninë “Abbott Laboratories”.

Sipas zyrtarëve të këtij laboratori, testi mund të konkludojë brenda 5 minutave nëse dikush ka virusin COVID-19, dhe brenda 13 minutave nëse dikush rezulton negativ.

Testi do të menaxhohet nëpërmjet sistemit ID NOW të kësaj kompanie.

Ky është testi i dytë i miratuar nga FDA që mund të përdoret drejtpërsëdrejti në zyrat e mjekëve dhe në mjedise të tjera komunitare të kujdesit shëndetësor për t’u ofruar menjëherë pacientëve rezultatin.

“Një tjetër mjet i rëndësishëm për të luftuar përhapjen e këtij virusi është që testet të ndodhen aty ku janë pacientët. Sistemi Abbott ID NOW mund të japë me shpejtësi rezultatet aty ku është e nevojshme. Pra, mund të jetë në zyrat e mjekëve, në spitale, apo në vende të tjera. Është pra një platformë shumë e lëvizshme që jep rezultate shumë të besueshme për një kohë shumë të shkurtër. Pra, tani flasim për minuta, dhe jo orë apo ditë, që pacienti të marrë rezultatin”, thotë John R. Hackett, Jr., nënpresident në kompaninë “Abbott Laboratories”.

Javën e kaluar, FDA miratoi një test të prodhuar nga firma “Cepheid” që mund të përdoret në pikat e kujdesit shëndetësor. Kompania “Abbott” mori miratimin për të prodhuar në sasi të mëdha teste të automatizuara që mund të përdoren fillimisht në laboratore. 150 mijë prej tyre do të shpërndahen në mbarë Shtetet e Bashkuara.

“Abbott” tha se planifikon të prodhojë në total për të dyja këto platforma testimi rreth 5 milionë teste në muaj.

FDA ka shpejtuar të miratojë me urgjencë teste për koronavirusin. Janë miratuar në parim modele të tjera testimi të paraqitura nga kompanitë “Roche Holding AG” dhe “Thermo Fisher Scientific Inc”.

Zgjerimi i testimit është shoqëruar me një rritje të rasteve të konfirmuara me virusin COVID-19.

voa