Ç’kuptim do të kishte politika për Arben Taravarin pa punësime, pa poste, pa pushtet!?
Që kur përfundoi specializimin më 2006, Arbeni u antarësua në PDSH, sepse e dinte shumë mirë se pa parti nuk ka as punësim e as karrierë ,as pushtet, as lekë…. Shumë e thjeshtë. Po të njëjtën gjë do ta bënte Arbeni, edhe po të ishte sistemi monist akoma në fuqi – do të anëtarësohej në Lidhjen Komuniste të Maqedonisë.
Arben Taravari, dhe morali bashkë!?
Ja t’i marrim me rradhë gjërat ndoshta gjejmë pak moral:
Kush janë në të vërtetë, përgjegjësit për krimin në spitalin modular në Tetovë, kur nga zjarri që bëri shkrumb e hi për jo më shumë se 3 minuta spitalin, u dogjën të gjallë 12 pacientë të shtruar për Covid dhe dy familjarë të këtyre pacientëve, si dhe u plagosën shumë të tjerë?
Një pjesë e përgjegjësve vërtetë janë kolegët e Arbenit në krye të BDI-së, për të cilët Arbeni thotë se nuk kanë moral t’i kërkojnë dorëheqje. Janë ata me të cilët Arbeni pa problem bashkëqeverisi në vitin 2017, pikërisht si ministër I shëndetësisë. Kuptohet, këtë e bëri për të mirën e “Maqedonisë” – për të hequr VMRO-në nga pushteti!
Pjesa tjetër e përgjegësve janë jeniçerët e Lëvizjes Besa, të cilët kur ndodhi krimi ishin në koalicion qeveritar me LSDM-në dhe BDI-në. Madje pikërisht personi përgjegjës për spitalin modular i cili firmoste të gjitha pisllëqet e LSDM-së, ishte drejtor Teknik nga rradhët e Lëvizjes Besa, me të cilët sot Arbeni bashkëqeveris poashtu pa problem – përsëri si ministër i shëndetësisë. Kuptohet, edhe këtë e bëri për të mirën e “Maqedonisë” – për të sjellur VMRO-në në pushtet.
Pas këtij krimi të ndodhur në spitalin modular në Spitalin e Tetovës, familjarët e viktimave dhe një numër qytetarësh protestuan në rrugët e Tetovës. Madje një numër i tyre edhe u dënuan për këto protesta.
Po, çfarë bëri Arbeni, si mjek, si prind, si qytetar – ju bashkua këtyre protestave?
Jo. Por ama “guximshëm” kërkoi që të iknin ata që ishin në qeveri dhe të vinte ai në vend të tyre, mundësisht si ministër i shëndetësisë. Pra, që të sakrifikonte edhe ai diçka, si gjithë të tjerët – kolltukun e kryetarit të komunës së Gostivarit, për kolltukun e ministrit të shëndetësisë.
Unë vërtetë kërkova, por nuk gjeta moral deri këtu. Po ju?
Aman të gjejmë pak moral për Arbenin, se i shkreti, vërtetë me politikë bëri karrierën, shtëpitë, lekët… por ka nevojë njeriu edhe për pak moral!
Afrim Fanda
Pasi që dyftyrësia më nuk mjafton, sipas kërkesës së tregut tani përdoren fytyra njëpërdorimshe…