Në Maqedoni gjatë kësaj jave pritet që opozita maqedonase të publikojë të ashtuquajturat “bomba” që kanë të bëjnë me shqiptarët.

Lideri i LSDM-së, Zoran Zaev paralajmëroi nga fundi i javës së kaluar se së shpejti do të publikojë materiale të aferës së përgjimeve që kanë të bëjnë me çështje të ndjeshme që do të prekin marrëdhëniet ndëretnike. Kjo pritet të jetë edhe sinjalizim për të ashtuquajturat “bomba” që kanë të bëjnë me çështje për shqiptarët.

“Pasojnë materiale shumë të ndieshme si dëshmi dhe argumente. Prandaj, ju ftoj edhe maqedonasit edhe shqiptarët edhe turqit edhe romët edhe vllehët edhe boshnjakët dhe të gjitha bashkësitë etnike që kur do ta ndëgjoni  ate që është e ndieshme në materiale do tu zgjohen mllefi dhe nxitja, por mos u zemëroni ndaj bashkësisë tjetër etnike, mos i akuzoni anëtarët e VMRO-DPMNE-së sepse fajtor janë individët nga udhëheqësia-drejtuesit që janë në pushtet. Kur do të mbërrinë materialet e ndieshme deri tek grupet dhe familjet, kur do të ndiheni të ofenduar dhe të lënduar, keni kujdes, se nuk janë fajtor familjet tjera”, deklaroi Zaev gjatë marshit protestues në Ohër.

Zaev me muaj të tërë ka paralajmëruar se do publikohet gjithçka edhe për rastet që kanë të bëjnë me shqiptarët, si rasti i vrasjes së pesëfishtë në Smilkovc i quajtur “Monstra”, rastin e ekzekutimit të komandantit të njohur të UÇK-së, Harun Aliu alias ish-komandant Kushtrimi, por edhe raste tjera skandaloze që kanë të bëjnë me funksionarë shtetëror, kryesisht ministra dhe zyrtarë të tjerë shqiptar, për vepra dhe raste korruptive kriminale. (INA)