Sanksionet që pasuan aneksimin e Krimesë nga Rusia, synojnë nxitjen e zbatimit të marrëveshjes së Minskut për zgjidhjen e situatës në lindje të Ukrainës

Ministrat e jashtëm të Bashkimit Evropian u pajtuan zyrtarisht të hënën që të vazhdojnë edhe për gjashtë muaj sanksionet ndaj  Rusisë, në përgjigje të rolit të saj në Ukrainën fqinje.

Vendimi u mor në takimin e ministrave të bllokut 28 anëtarësh në Luksemburg. Paraprakisht, të dërguarit evropian i kishin miratuar këto masa javën e kaluar.

Sanksionet godasin sektorët e energjisë, mbrojtjes dhe financave të Rusisë dhe ishin vendosur që në janar të vitit 2014, rreth katër muaj pasi që Rusia aneksoi gadishullin ukrainas të Krimesë. Ato tash do të vazhdojnë deri më 31 mars të vitit 2016.

Zëdhënësi i Kremlinit Dmitri Peskov, tha javën e kaluar se Rusia do të përgjigjet “sipas parimit të reciprocitetit”, pas formalizmit të vazhdimit të sanksioneve. Analistët thonë se kjo mund të nënkuptojë bojkotimin e mëtejmë të importeve të ushqimit nga Evropa.

Zëdhënësja e BE-së, Maja Kocijançiç, shkroi në Twitter se vazhdimi i sanksioneve u bë me synimin për të nxitur “zbatimin e plotë të marrëveshjes së Minskut”.

Plani për armëpushimin i nënshkruar në shkurt nga Rusia, Ukraina, Gjermania dhe Franca bën thirrje për tërheqjen e armatimit të rëndë dhe luftëtarëve të huaj nga Ukraina lindore. Vëzhguesit thonë se marrëveshja është shkelur vazhdimisht.  (voa)