Serwer ka thënë se nëse vendimi i Kuvendit të Kosovës për moskrijimin e Gjykatës mbetet kështu sic është, Kosova do ta ketë të vështirë në të ardhmen ta marrë mbështetjen e SHBA-ve dhe BE-së

Daniel Serwer, ish-diplomat amerikan dhe profesor në Johns Hopkins School of Advanced International Studies, në një intervistë për Gazetën Express ka thënë se nëse vendimi i Kuvendit të Kosovës për moskrijimin e Gjykatës mbetet kështu sic është, Kosova do ta ketë të vështirë në të ardhmen ta marrë mbështetjen e SHBA’ve dhe BE’së për çështje të ndryshme përfshirë edhe krijimin e Gjykatës nga Kombet e Bashkuara

Serwer i ka thënë Gazetës Express se nëse ka vullnet vendimi mund të ndryshojë pasi pro Gjykatës Speciale kanë munguar vetëm 5 vota. Ish-diplomati amerikan ka theksuar se një vend që kërkon njohje dhe pranim ndërkombëtar duhet të tregojë gatishmëri t’i dënojë ata që kanë dëmtuar reputacionin e UÇK’së duke kryer krime lufte.

Ai ka hedhur poshtë mundësinë që Kosova të merret me këto krime.

Express: Kosova e hodhi poshtë krijimin e Gjykatës Speciale në votimin e së premtes në Parlament. Ambasadorja amerikane, në Kombet e Bashkuara Samantha Power, disa ditë më parë, tha se kjo çështje do të jetë një test për kredibilitetin e liderëve të Kosovës. A do të përballet Kosova me pasoja në të ardhmen për këtë?

D.Serwer: Po, më së paku Kosova do të shihet si e pavullnetshme për të administruar drejtësinë ndaj atyre që e kanë dëmtuar reputacionin e Ushtrisë Çlirimtare të Kosovës duke bërë krime lufte, krime kundër njerëzimit dhe vrasje. Për një vend që është duke kërkuar njohje dhe pranim ndërkombëtar, nuk është gjë e mirë. Nuk ka asgjë patriotike në këto krime- një patriot i Kosovës duhet të kërkojë që ata që kanë kryer krime të dalin para drejtësisë.

Dua të shtojë menjëherë se kjo nuk është e lehtë për t’u bërë. Sidomos është e vështirë për sistemin gjyqësor të Kosovës, I cili në çdo rast nuk ka juridiksion për krimet e kryera në Shqipëri. Nuk ka mundësi reale për një proces gjyqësor serioz brenda Kosovës.

Express:Kryeministri Mustafa dhe Zëvendësi i tij Hashim Thaçi thanë se çështja e Gjykatës do të jetë shpejt në agjendën e Kuvendin duke e hedhur poshtë krijimin e Tribunalit nga Kombet e bashkuara. A është tani vonë për këtë?

D.Serwer: Me sa unë e di amendamenti që kërkohet, nuk I morri 2/3 vetëm për 5 vota. Kjo mund të ndryshojë në të ardhmen nëse ka vullnet politik.

Express: Ambasadorja Amerikane në Prishtinë Tracey Ann Jacobson në reagimin e parë të saj tha se SHBA’të nuk do të përdorin veton kundër iniciativave në OKB për të krijuar një Tribunal. A mendoni se një Tribunal mund ti imponohet Kosovës?

D.Serwer: Ministri i Jashtëm Thaçi e tha mirë në Parlament: “ Ne i kemi dy opsione: që ta bëjmë këtë Gjykatë, bashkë me BE’në dhe SHBA’të, dhe t’i japim fund kësaj çështjeje një herë e përgjithmonë Brenda 3 deri në 5 vjet; ose të dështojmë dhe kjo të shkojë në Këshillin e Sigurimit të OKB’së, ku gjykata do të krijohet nga kundërshtarët e pavarësisë së Kosovës dhe do të zgjasë 15 deri në 20 vjet.”

Një fakt I pikëlluar është se Kosova në të ardhmen do ta ketë të vështirë që të marrë ndihma të ndryshme nga SHBA dhe BE, nëse ky vendim mbetet kështu siç është. (rtk)