Prokuroria publike kërkon paraburgim për Zahir Beqirin-Çaushin pas bastisjeve në shtëpinë e tij në dhjetor të vitit të kaluar, por edhe për dy persona tjerë që dje u arrestuan në të ashtuquajturën “fabrikë për përpunimin e dokumenteve të falsifikuara”. Që të tre akuzohen për armëmbajtje pa leje. Por për Çaushin dhe për një person nga të arrestuarit gjatë aksionit të të një dite më parë, për herë të parë zyrtarisht ka dyshime për:

“Falsifikim të dokumenteve në bazë të Nenit 378 dhe keqpërdorim të të dhënave personale nga Neni 149, të kodit penal”.

Paraburgimi për Çaushin është kërkuar edhe pse ai për momentin vuan dënimin me burg. Sipas prokurorisë, ky fakt nuk e përmbush as qëllimin, e as kufizimet që arrihen me paraburgim.

Alsat kërkoi sqarime nga prokuroria se çfarë është gjetur saktësisht në kompjuterët gjatë bastisjeve së djeshme. Por, nga institucioni i Marko Zvërlevskit nuk u prononcuan me arsyetimin se këto informacione mund të dëmtojnë procesin e hetimit.

Mirëpo kjo megjithatë nuk e pengoi zv/ministrin plotësues Mitko Çavkov të tregoj se dje janë gjetur biseda të përgjuara dhe se të njëjtat i ka një numër më i madh i personave.

“Sipas informacioneve, hard – disku është krijuar në Lidhjen Socialdemokrate, kështu qëndron shenja në skedarë. Edhe më shumë shqetëson fakti se në USB janë gjetur komunikime që nuk janë në hard – diskun tjetër, USB e cila është krijuar në fillim të vitit pas dorëzimit të bisedave të përgjuara deri te PSP-ja dhe pas arrestimit të Zahir Beqirit”, tha Mitko Çavkov në një deklaratë për Radio Maqedonia e lirë.

Ministri i brendshëm Oliver Spasovski sot nuk deshi të komentoj në këtë temë.
“Për këtë do ta pyetni Prokurorin Publik”.

Zyrtarisht, Prokuroria publike edhe më tej nuk tregon se nga vijnë bisedat që janë gjetur gjatë bastisjeve te banesa e Çaushit në dhjetor. Atëherë thanë se do t’ju nevojiten të paktën dy muaj, por edhe tre muaj pas aksionit përgjigje nuk ka.

Alsat-M