Zhvillimet më të fundit në jetën politike të Tiranës me qëndrimet e LSI-së për një qeveri besimi dhe dorëzim mandatesh, si dhe për domosdoshmërinë e pjesëmarrjes së opozitës në zgjedhje u pritën me komente të ndryshme nga studiuesit e politikës shqiptare.
Ajo që për disa është një ftesë dialogu, për të tjerë është një mesazh i paqartë.
Zhvillimet më të fundit në jetën politike të Tiranës me qëndrimet e LSI-së për një qeveri besimi, për për dorëzim mandatesh dhe për domosdoshmërinë e pjesëmarrjes së opozitës në zgjedhje u pritën me komente të ndryshme nga studiuesit e politikës shqiptare.
Drejtuesi i Institutit të Studimeve Politike, Afrim Krasniqi, thotë se zakonisht gjatë krizave politike në Shqipëri palët konsumojnë gjithë mjetet e presionit gjatë ballafaqimit dhe në fund vjen çasti për dialog, dhe si e tillë mund të shihet nisma e mbrëmshme e LSI-së.
Nga ana tjetër, studiuesi Roland Lami, profesor në Universitetin Europian të Tiranës, thotë se demokracia shqiptare është e ngrirë sa kohë që procesi zgjedhor është i pabesueshëm, reforma gjyqësore nuk ka fryte konkrete pas 10 muajsh qysh kur u miratua, lufta ndaj korrupsionit nuk ka të dënuar konkretë dhe liria e medias është ende në tregues negativë.
Njëra palë është mbyllur te çadra e zgjedhjeve ndërsa pala tjetër është te çadra e vetingut, tha ai, ndërsa deklaratat e mbrëmshme nga LSI-ja nuk dhanë asnjë mesazh për publikun, madje shtuan edhe më shumë mjegullën dhe errësirën ku ndodhet shoqëria shqiptare.
Zoti Krasniqi thotë se para zgjedhjeve nuk mund të krijohen kompromise dhe kabinete të qëndrueshme, por vendi ka nevojë për një paketë masash të përhershme mbi sjelljen e institucioneve në prag zgjedhjesh.
Ai shtoi se qeveria në fund të mandatit bën legalizime masive falas, rritje pagash, koncensione dhe amnisti financiare vetëm për të shtuar votat, të cilat duhen parandaluar si shembuj të korruptimit elektoral me paratë e publikut të gjerë.
Sipas zotit Krasniqi, mund të arrihet një marrëveshje për zgjedhjen e presidentit të ri dhe për postet shtetërore pas zgjedhjeve parlamentare. Ndërsa në rrafshin politik ai sheh mundësinë e një marrëveshje të ngjashme me atë të Romës në vitin 1997.
Ndërsa zoti Lami thotë se LSI bëri disa deklarata konfuze, por nuk mori përsipër asgjë për ta lëvizur përpara procesin e dialogut.
Ashtu si vetë partitë politike janë të ngurta dhe të paqarta deri tani mbi hapat e mëtejshëm në këtë proces, as analistët ende nuk po shohin ndonjë shenjë për dialog dhe mirëkuptim, ndërkohë që ditët kalojnë, afatet skadojnë dhe prova e parë e ashpërsisë së palëve do të duket në zgjedhjet e parakohshme për bashkinë e Kavajës.