Parlamenti i Maqedonisë e ratifikoi marrëveshjen me Greqinë për ndryshimin e emrit. 69 ligjvënës që ishin të pranishëm në seancën plenare votuan pro, ndërsa opozita maqedonase e drejtuar nga VMRO-DPMNE e bojkotoi seancën.

Ky akt i ratifikimit i hap rrugën referendumit të paralajmëruar për në shtator ose tetor, ku qytetarët e Maqedonisë do të deklarohen nëse duan që emri i vendit të tyre të jetë “Republika e Maqedonisë së Veriut”.

Kryeministri Zoran Zaev, duke folur në parlament, tha se marrëveshja ruan identitetin e popullit maqedonas dhe gjuhën e tij dhe e quajti atë si arritjen më të mirë të mundshme për të dy vendet.

Para aktit të votimit, ai njoftoi deputetët se Këshilli Veriatlantik i Natos sapo kishte marrë vendim që ftesa për Maqedoninë të vihet në rend dite në samitin e pritshëm të Aleancës.

Në bazë të marrëveshjes, Greqia duhet ta njoftojë presidentin e Këshillit Evropian, se nuk ka çështje të hapura me vendin fqinj, duke dhënë njëkohësisht mbështetje për anëtarësimin e Maqedonisë (së Veriut) në Bashkimin Evropian dhe po ashtu ta njoftojë edhe Sekretarin e Përgjithshëm të NATO-s për mbështetjen greke të vendit fqinj për anëtarësim në NATO.

Pas ratifikimit, presidenti i Maqedonisë Gjorgje Ivanov ka një afat prej shtatë ditësh që ta dekretojë marrëveshjen; në të kundërtën, parlamenti detyrohet që për së dyti ta miratojë atë dhe kjo e detyron presidentin që të japë nënshkrimin e tij. Ivanov disa herë është prononcuar kundër marrëveshjes. (voa)