Në Shqipëri, parlamenti votoi sot në favor të ndryshimeve kushtetuese të cilat prekin element të rëndësishëm të procesit zgjedhor, duke hapur listat dhe duke shmangur organizimin e koalicioneve parazgjedhore në mënyrën se si ato kanë funksionuar deri tani. Ishin 106 deputetë të cilët dhanë votën në favor, ndërsa vetëm 6 votuan kundër.

Nisma u nxit nga opozita jashtëparlamentare. Pak javë më parë ajo u mbështet publikisht dhe nga shumica e cila deklaroi se po i bindej vullnetit të shumicës së qytetarëve që ata të kenë të drejtë të zgjedhin me voten e tyre deputetin e preferuar.

Opozita jashtëparlamentare i ka kundërshtuar haptazi ndryshimet kushtetuese, duke i cilësuar ato si një ndërhyrje të njëanshme. Javën e shkuar, partitë kryesore të opozitës, u deklaruan në favor të hapjes së listave 100 përqind, por mos prekjen e mënyrës së organizimit të koalicioneve.

Mbrëmë, në mbledhjen e Këshllit politik, përfaqësuesit e PD-së dhe LSI-së, propozuan që të prekej vetëm një nen i Kushtetutës, dhe ajo pjesë që lidhej me përkufizimin mbi listat e mbyllura. Socialistët nuk e pranuan propozimin, duke deklaruar se formulimi i ndryshimeve kushtetuese nuk pengon hapjen e plotë të listave.

Në një deklaratë të ditës së sotme, përpara nisjes së seancës parlamentare, opozita e Bashkuar akuzoi shumicën se braktisi dialogun, duke theksuar se “ndryshimet e njëanshme kushtetuese shkatërrojnë konsensusin, thyejnë dhe zhbëjnë marrëveshjet e 5 Qershorit dhe të 14 Janarit të nënshkruara nga vetë Partia Socialiste, dhe sjellin pasoja të rënda për stabilitetin, demokracinë dhe integrimin europian të vendit”. Opozita paralajmëroi se “asnjë akt i njëanshëm nuk është i detyrueshëm për Opozitën dhe aq më pak për qytetarët.

voa