Sipas Organizatës Botërore të Shëndetësisë, megjithë përparimin e bërë në zhvillimin e trajtimeve për hepatitin, vendet vazhdojnë të injorojnë rrezikun e virusit. Sot, në Ditën Botëtore të Hepatitit, ka 400 milionë njerëz të infektuar me hepatitin B dhe C – dhjetë herë më shumë se sa numri i atyre të prekur nga virusi HIV.

Në një klinikë në Islamabad njerëzit mbajnë rradhën për t’u kontrolluar dhe testuar.

Në Pakistan banorët përballen me rrezikun e infeksionit nga të pesë viruset e hepatitit.

Hepatiti A dhe E janë endemik, për shkak të ujit dhe sistemit të ujrave të zeza, një situatë që përkeqësohet në sezonin e shirave.

Sipas të dhënave të Organizatës Botërore të Shëndetësisë, gati 1.45 milionë njerëz gjetën vdekjen nga sëmundja në vitin 2013.

Synimi i organizatës është të trajtojë tetë milion njerëz për hepatitin B apo C deri në vitin 2020.

Zyrtarët e shëndetit publik besojnë se vendet me qasje ndaj ilaçeve më të lira xhenerike, kanë një shans të mirë për të luftuar sëmundjen.

Në Egjipt, një nga vendet me shkallën më të lartë të hepatitit C, qeveria ka trajtuar 200 mijë njerëz gjatë 12 muajve të fundit.

Ministria e Shëndetësisë ka ulur konston e ilaçeve nga 900 dollarë në gati 200 dollarë për person.

Kahled Megahed, zëdhënësi i Ministrisë Egjiptiane të Shëndetësisë thotë se më shumë se 500 mijë pacientë me hepatit kanë marr mjekim dhe janë trajtuar me sukses.

“Janë tre gjëra të rëndësishme që i kemi marr në konsideratë: ulja e listës së pritjes për pacientët me hepatit viral; përdorimi i barnave lokake në vend të atyre të importuara, që inkurajon tregun vendas dhe në të njëjtën kohë ul konston për pacientët; e treta është ulja e çmimit të ilaçeve”.

Në Pakistan, shërbimi shëndetësor po zgjeron gjithashtu me shpejtësi mundësinë e trajtimeve.

Gati katër milionë njerëz janë të ekspozuar me hepatitin B, dhe gati 8 milionë me hepatitin C.

Dr. Inyat Adil Instituti i Shkencave Mjekësore:

“Në Pakistan, hepatiti C është shumë i përhapur dhe mendohet se rreth 5 për qind e popullësisë vuan nga hepatiti C kronik dhe gati 2.5 për qind vuan nga hepatitis B. Këto janë në fakt, shifrat zyrtare por për mendimin tim shkalla është shumë më e lartë.”

Një pacient pret në rradhë. Fermeri Ghulam Abbas kujton tronditjen kur mësoi se ishte prekur nga hepatiti C.

Ai ishte në spital për të dhuruar gjak për të një afërm dhe falë një programi skanimi, ai mësoi se ishte i infektuar.

“Isha shumë i shqetësuar kur mësova për sëmundjen. Ndihesha i lodhur dhe nuk mund të punoja. Puna është e rëndësishme për mua pasi me të mbaj familjen”.

Mjekët kërkojnë që programi i skanimit të shtrihet në mbarë vendin.

Ata thonë se në Pakistan, hepatiti B dhe C ndodh për shkak të mos testimit të gjakut, trajtimit jo higjenik dentar, papastërtisë së ujit si dhe ripërdorimit të shiringave nga përdoruesit e drogës.

Organizata Botërore e Shëndetësisë thotë se ka nevojë për më shumë infermierë të trajnuar për kontrollin e infeksionit dhe menaxhimin e mbetjeve.

Ministria e Shëndetësisë në Pakistan thotë se 20 milionë njerëz kanë një formë të hepatitit që do të thotë një në çdo 10 persona është i prekur.