Biznesmeni miliarder, Donald Trump sot do të përurohet si presidenti i 45-të i Shteteve të Bashkuara.

Një ditë para përurimit të tij, zoti Trump tha se vendi “do të shohë diçka shumë mahnitëse” të premten (sot) kur ai të bëjë betimin si presidenti i 45-të amerikan.

Donald Trump ka premtuar se do të punojë shumë, do të bashkojë vendin dhe do ta “bëjë Amerikën të madhe për të gjithë.”

Protesta

Të ejten në mbrëmje, protestues anti-Trump u përleshën me policinë para ndërtesës së Klubit të Shtypit Kombëtar në Uashington. Brenda ndërtesës po zhvillohej një ballo e quajtur “Deploraball”, një referencë ndaj komenteve që Hillary Clinton bëri gjatë fushatës për mbështetësit e zotit Trump, duke i quajtur ata një shportë mjeranësh.

Protestuesi hodhën parulla “Jo Trump. Jo SHBA fashiste” ndërsa policia u përpoq t’i mbante ata larg dyerve të ndërtesës.

Disa protestues hodhën objekte të ndryshme mbi policinë. Pati të paktën një zjarrvënie në rrugë.

Në Nju Jork, mijëra njerëz u mblodhën në Parkun Qendror afër Kullës Trump, ku ndodhet zyra e Presidentit të zgjedhur, për të protestuar kundër administratës së tij të ardhshme.

Në këtë protestë folën edhe kryabashkiaku i qytetit të Nju Jorkut, Bill de Blasio, regjisori dhe aktivisit Michael Moore, aktori Robert de Niro dhe këngëtarja Cher.

Në këtë protestë mbajti fjalim edhe aktori Alec Baldwin, i cili në emisionin komik “Saturday Night Live” të kanalit televiziv NBC imiton presidentin e zgjedhur Donald Trump. Zoti Trump e ka shprehur pakënaqësinë e tij për mënyrën se si ai është përshkruar në këtë emsion.

Redaktimi i fjalimit

Zëdhënësi i ardhshëm i Shtëpisë së Bardhë, Sean Spicer tha të ejten se presidenti i zgjedhur po vazhdonte t’i bënte ndryshime në fjalimin e tij të përurimit. ​

Spicer tha se fjalimi do të ketë në përmbajtje “vizionin e tij për Amerikën”.

Zoti Trump do të flasë për “sfidat me të cilat po ndeshemi”, shtoi Spicer. Ai e cilësoi mesazhin si një deklaratë filozofike rreth mënyrës se si zoti Trump do ta udhëheqë qeverinë amerikane, e jo një axhendë legjislative.

Urdhërat ekzekutivë

Duke filluar sot mbasdite, dhe në ditët e ardhshme, zoti Trump do të nënshkruajë urdhëra ekezekutive “për zbatimin e axhendës për ndryshim të vërtetë”, tha zëdhënësi Spicer. Presidenti i zgjedhur “ende është duke punuar në përparësitë e tij në fusha që ai do të bëjë ndryshime” shtoi zoti Spicer.

Zoti Trump me këto veprime mund të shfuqizojë menjëherë disa nga politikat e presidentit Barack Obama.

Nënpresidenti i zgjedhur, Mike Pence tha se ai dhe zoti Trump do të jenë gati “të fillojnë t’i shërbejnë popullit amerikan që në ditën e parë”.

Emërimet për kabinetin qeverisës

Me emërimin e ish guvernatorit të Xhorxhias në postin e Sekretarit të Bujqësisë, zëdhënësi Sean Spicer tha se zoti Trump ka përfunduar emërimet për 21 postet e kabinetit të tij.

Ai gjithashtu vuri në dukje se 536 zyrtarë tani janë vendosur në agjencitë qeveritare në Uashington për t’iu bashkuar ekipit të tranzicionit të pushtetit , të cilët do ë jenë të gatshëm të hënën kur të filloj punën qeveria e re.

Zëdhënësi Spicer tha se pesëdhjetë zyrtarë të qeverisë amerikane që po punojnë për presidentin Obama dhe që janë marrë me tranzicionin e pushtetit kanë rënë dakord të qëndrojnë me administratën e re.

Ceremonia e vënies së kurorës

Po të ejten, i shoqëruar nga nënpresidenti i zgjedhur Pence, presidenti i zgjedhur Trump vuri një kurorë me lule në Varrezat Kombëtare të Arlingtonit, ku prehen më shumë se 400 mijë veteranë të ushtrisë dhe anëtarë të famiiljeve të tyre.

Presidenti i zgjedhur Trump kaloi natën e tij të fundit si qytetar privat në “Blair House”, një ndërtesë qeveritare ku qëndrojnë zyrtarë dhe personalitete të njohura. Ndërtesa ndodhet në rrugën Pensilvania përballë Shtëpisë së Bardhë. (voa)