Minatorët e kompleksit “Trepça” janë të vendosur të vazhdojnë grevën, ka konfirmuar për Radion Evropa e Lirë kryetari i komunës së Mitrovicës, Agim Bahtiri.Ai tha se edhe pas pesë orë bisedimesh me këshillin grevist dhe menaxhmentin e “Trepçës”, nuk ka arritur të bindë grevistët që të pezullojnë grevën.

Siç tha ai, ata nuk kanë kundërshtuar letrën e dërguar në adresë të minatorëve të mërkurën nga kryeministri i Kosovës, Isa Mustafa.

“Për ta ka qenë e papranueshme ajo shkresë e cila është drejtuar nga kryeministria. Përpjekjet tona kanë qenë maksimale që të pezullohet kjo grevë, por nuk arriti një pëlqim”, tha Bahtiri, duke tërhequr vërejtjen për gjendjen e përkeqësuar shëndetësore të grevistëve.

Kryeministri i Republikës së Kosovës, Isa Mustafa, në letrën dërguar minatorëve të “Trepçës”, ka siguruar se Qeveria e Republikës së Kosovës, është duke ndërmarrë të gjitha veprimet e nevojshme dhe të mundshme ligjore, që statusi i “Trepçës” të zgjidhet një herë e përgjithmonë në interes të minatorëve dhe të qytetarëve të Republikës së Kosovës.

Por, kryetari i komunës Agim Bahtri, bëri thirrje për zgjidhje sa më të shpejtë, pasi që “grevistët janë të vendosur që të nisen në këmbë për në Prishtinë ditën e shtunë”.

“Ne jemi munduar më çdo kusht që mos të eskaloj situata dhe të dalin në rrugë. Po grevistët dëshirojnë që të shtunën, nëse nuk bëhet ndonjë zgjidhje, të shkojnë këmbë në Prishtinë. Kjo na frikëson neve, dhe kjo më çdo kusht duhet të zgjidhet para të shtunës, ka tha kryetari Bahtiri për Radion Evropa e Lirë.

Sidoqoftë, edhe pas daljes se kryetarit Bahtiri, takimi i Këshillit Grevist është duke vazhduar ende.

Ndryshe, greva e punëtorëve të kombinatit “Trepça” ka filluar të martën, pasi të hënë më vendim të qeverisë, Kuvendi i Kosovës hoqi nga rendi i ditës, çështjen e pronësisë se këtij kombinati, që ishte në kuadër të diskutimeve për ndryshimet në ligjin për ndërmarrjet publike.

Kurse në Kuvendin e Kosovës është miratuar ligji për riorganizimin e ndërmarrjeve të caktuara dhe pasurisë se tyre, më anë të cilit parashihet ri organizimi i kompleksit dhe siç është thënë nga zyrtarë të qeverisë se Kosovës, duke evituar fillimin e procedurave për falimentim.

Komplesi metalurgjik “Trepca” që gjendet në Mitrovicë është ndërmarrje shoqërore, që menaxhohet nga Agjencia Kosovare e Privatizimit, kurse kërkesa e punëtorëve që kjo ndërmarrje të shndërrohet në ndërmarrje publike, mundëson kalimin e saj nga agjencia tek Qeveria e Republikës se Kosovës.

Ndryshe, përmes një komunikatë për 35, Sindikata e Pavarur e Metalistëve, që funksionon në kuadër të Bashkimit të Sindikatave të Pavarura të Kosovës, përkrah dhe solidarizohet më grevistët duke mbështetur dhe kërkesat e tyre.

Në komunikatë thuhet se “kjo sindikatë e ka përjetuar rënd transformimin e pasurisë së ndërmarrjeve industriale në Kosovë nga Agjencia Kosovare e Mirëbesimit dhe Agjencia Kosovare e Privatizmit, ku me shitjen e tyre i ka mbyllur me dhjetra e mijëra vende të punës dhe ka shkatërruar ekonominë e këtij vendi”.

Sipas tyre, “me këtë po synohet që edhe “Trepçën” ta tjetërsojnë për interesa të profiterve”.

Minatorët dhe punëtorët e Trepçës dhe të gjithë punëtorët e industrisë, kërkojnë nga Qeveria dhe Parlamenti, që pasuritë kombëtare të ruhen, ku këtu bën pjesë edhe “Trepça”. (rel)

Institucionet e Kosovës kanë krijuar një grup punues për shqyrtimin e legjislacionit për formimin e Gjykatës Speciale për krimet e luftës. Ky grup punues përfshinë përfaqësues nga Presidenca, Qeveria, gjykatat dhe prokuroritë.Zëdhënësi i presidentes së Kosovës, Arbër Vllahiu, ka thënë se të gjitha institucionet e Republikës se Kosovës ndajnë përgjegjësitë në përmbushjen e obligimeve ndërkombëtare, të miratuar me shumicë votash në Kuvendin e Republikës së Kosovës.

Takimi i parë i ekipit teknik ishte për të diskutuar ndryshimet legjislative, ka sqaruar Vllahiu. Sipas tij, ekipi teknik do të diskutojë për disa ndryshime legjislative sipas marrëveshjes së ratifikuar në kuvend.

Ky ekip, ka thënë Vllahiu në një prononcim për Radion Evropa e Lirë, do të mbajë takime të rregullta edhe me ekipin e BE-së për themelimin e dhomave te posaçme, dhe do të paraqesë diskutimet tek bartësit e institucioneve gjegjësisht Presidentes, Kryetarit të Kuvendit, Kryeministrit dhe Zëvendëskryeministrit.

Ndërkohë, profesori i së Drejtës Penale, Ismet Salihu, ka thënë për programin tonë se kjo do të jetë një Gjykatë Penale Ndërkombëtare me të gjitha atributet, ingerencat dhe juridiksionit që i kanë pasur edhe gjykatat e ngjashme si ajo e Hagës, Ruandës e tjera.

Kjo Gjykatë, ka shtuar profesori Salihu, do të trajtojë rastet e viteve 1998-99 e madje edhe ato të fazës së parë të pas luftës. Mandati i saj pritet të jetë pesë vjeçar.

Statuti i kësaj gjykate, sipas Salihut, në fakt është ligj penal, ligj i procedurës penale dhe ligj për ekzekutimin e dënimeve.

“Kjo Gjykatë do të jetë jashtë kompetencave, pushtetit, juridiksionit të Kosovës. Kjo është gjykatë që do të ketë kompetenca sikurse edhe Tribunali i Hagës sepse do të punon sipas rregullativës juridike të vetën”.

“Organet tona, eventualisht policia e prokuroria do të kenë për detyrë të ndërmarrin ndonjë veprim, vetëm ata (ndërkombëtarët) që e kërkojnë. Të gjithë gjykatësit e prokurorët do të jenë ndërkombëtar si edhe gjykimet do të bëhen jashtë territorit të Republikës së Kosovës”, ka thënë Salihu.

Themelimi i një Gjykate të veçantë për krime lufte, është pasojë e dështimit të sistemit të drejtësisë në Kosovë, por një pjesë të madhe të fajit e bartin edhe ndërkombëtarët, ka deklaruar në vijim, profesori Ismet Salihu.

“Në këtë dështim të instalimit dhe efikasitetit të sistemit të drejtësisë në Kosovë, një pjesë të madhe të fajit e kanë edhe ndërkombëtarët, për shkak se ata që nga çlirimi i Kosovës, pavarësisë së saj, por edhe më pas kanë pasur rolin kryesor në sajimin ndërtimin dhe konsolidimin e sistemit gjyqësor”.

“Përveç kësaj, ata kanë pasur ingerenca, pushtet, juridiksion që çdo lloj krimi, sidomos këto të rëndat, t’i gjykojnë vetë. Kështu që ky dështim është edhe i tyre dhe nuk është vetëm i kosovarëve”, ka deklaruar Salihu.

Pas përgatitjes së infrastrukturës ligjore, Gjykata Speciale pritet të themelohet me vendimin e institucioneve, qeverisë dhe Kuvendit. Sfida më e madhe e themelimit të saj, parashihet pjesa që kërkon amandamentimin e Kushtetutës, për të cilën qeveria duhet të siguroj mbështetjen e të paktën 80 deputetëve të Kuvendit të Kosovës.

Nga ana praktike, themelimi i kësaj gjykate cilësohet si një prej sfidave më të mëdha të vitit, pasi që ajo pritet të kthej sërish në gjykim raste të dyshuara të krimeve të luftës dhe gjykimin e tyre jashtë territorit të Kosovës.

Partitë opozitare tashmë janë pozicionuar kundër dhe kanë paralajmëruar se nuk do të votojnë për themelimin e saj.

Kryetarja e Komisionit Parlamentar për Legjislacion, Albulena Haxhiu, deputete e Lëvizjes Vetëvendosje ka paralajmëruar se jo vetëm që do të kundërshtohet me votë themelimi i kësaj Gjykate, por si kryetare e Komisionit nuk do të lejoj procedimin në Kuvend të propozimeve që do të binin ndesh me ligjet dhe Kushtetutën e Kosovës.

“Kjo (Gjykatë speciale) është jashtë rregullimit juridik të institucioneve tona dhe si rrjedhojë është edhe jo kushtetuese. Nëse ka pasur individ brenda Ushtrisë Çlirimtare të cilët paskan kryer, siç po thuhet krime, atëherë ata duhet të hetohen nga prokuroria vendore dhe jo nga Gjykata Speciale e cila po thuhet se duhet të themelohet”, ka theksuar deputetja Haxhiu.

Ideja për themelimin e një Tribunali Ndërkombëtar për Kosovën që më vonë u quajt Gjykata e veçantë apo speciale, fillimisht ishte prezantuar se ka rrjedhë në bazë të hetimeve të iniciuara nga Këshilli i Evropës, që si bazë kishin dyshimet e supozuara të zviceranit Dick Marty, mbi trafikimin e organeve të serbëve nga pjesëtarët e ish-Ushtrisë Çlirimtare të Kosovës.

Në bazë të këtyre supozimeve, prokurori amerikan Clint Williamson, ka zhvilluar edhe një hetim të gjerë.

E veçanta e funksionimit të kësaj Gjykate do të jetë roli i prokurorëve dhe gjykatësve ndërkombëtar dhe trajtimi i rasteve jashtë Kosovës, për të shmangur presionet dhe ndërhyrjet në punën e gjyqësorit. (rel)

Minatorët do të përgjigjen sot në letrën e kryeministrit të Kosovës, Isa Mustafa i cili u ka bërë thirrje t’i japin fund grevësKryeministri i Kosovës, Isa Mustafa, në një letër dërguar minatorëve të Trepçës, i ka siguruar ata se qeveria e Kosovës, është duke ndërmarrë të gjitha veprimet e nevojshme dhe të mundshme ligjore, që statusi i Trepçës të zgjidhet një herë e përgjithmonë në interes të minatorëve dhe të qytetarëve të Kosovës.

Në letër, kryeministri Mustafa, ka sqaruar hapat e ndërmarrë nga qeveria e Kosovës të cilat, siç thuhet në një njoftim të zyrës së tij, “kanë shmangur falimentimin e Trepçës dhe kanë siguruar perspektivë zhvillimore për të”.

“Kryeministri Mustafa po ashtu ka shprehur përkushtimin e Qeverisë së Kosovës për të mos lejuar asnjë veprim që do të dëmtonte interesat e Trepçës dhe të shtetit të Kosovës, duke bërë thirrje për ndërprerjen e grevës dhe që të gjithë së bashku, t’i përkushtohen punës në interes të vendit, në interes të shtetit të Kosovës”, thuhet në njoftimin e qeverisë.

Minatorët dhe këshilli grevist janë duke e shqyrtuar letrën dhe mundësitë që t’i japin fund grevës së filluar të martën një grevë, duke kërkuar shpjegime rreth fatit të këtij kompleksi dhe miratimin e një ligji të veçantë, në bazë të së cilit ky kompleks të shndërrohet në ndërmarrje publike në pronësi të qeverisë së Kosovës.

Greva pasoi miratimin e ligjit për riorganizimin e ndërmarrjeve të caktuara dhe pasurisë se tyre, në mënyrë që t’i hapet rrugë riorganizimit të kompleksit të minierave Trepça. Por, qeveria hoqi nga rendi i ditës çështjen e pronësisë mbi Trepçën, ndonëse kishte paralajmëruar që nëpërmjet ligjit ta shndërrojë atë në ndërmarrje publike.

Trepça vazhdon të administrohet nga Agjencia e Privatizimit, ndërsa qeveria tha se për të duhet të bëhet një ligj i veçantë dhe se ndryshimet kushtëzohen edhe nga borxhet që ka ky kompleks, që sipas vlerësimeve arrijnë në rreth një miliardë e 400 milion euro.

Ndryshimet në qasjen e qeverisë nxitën reagime edhe të opozitës e cila e akuzoi atë për zmbrapsje para trysnisë së Beogradit i cili tha nuk do të pranojë asnjë vendim të qeverisë së Kosovës lidhur me kompleksin e minierave Trepça.

Beogradi ngulë këmbë se pronari kryesor i Trepçës është fondi për zhvillim i Serbisë dhe se çështja e pronave duhet të jetë pjesë e bisedimeve për normalizimin e marrëdhënieve ndërmjet dy palëve të ndërmjetësuara nga Bashkimi Evropian, vazhdimi i të cilave pritet më 9 shkurt.

Kompleksi Trepça që ndodhet në Mitrovicë është i ndarë sikurse edhe vete qyteti. Minierat ndodhen në pjesën e banuar me shumicë shqiptare, ndërsa shkritoret dhe kapacitetet tjera prodhuese në pjesën e banuar me shumicë serbe. Përfshirja e Trepçës në procesin e privatizimit është pamundësuar për shkak të pretendimeve serbe dhe shitjes së aksioneve të saj gjatë viteve të 90-ta, kur administrohej nga Beogradi.

Dikur Trepça ishte gjigant ekonomik i Kosovës dhe një prej ndërmarrjeve më të mëdha të ish-Jugosllavisë në vitet e tetëdhjeta ku punonin mbi 20 mijë punëtorë. (voa)

Aleksandër Jabllanoviq, ministri për Kthim e Komunitete, dorëheqjen e të cilit po e kërkojnë me mijëra qytetarë të Kosovës, nuk e ka ndërmend ta jep. Ai thotë se është sqaruar disa herë, se nuk ka menduar që të lëndojë nënat e viktimave të luftës, dhe se ka kërkuar falje, transmeton zeri.info.
Shton se kur je në politikë, gjithmonë ballafaqohesh me kërkesa për dorëheqje, njëjtë është kërkuar edhe dorëheqja e Isa Mustafës, edhe e politikanëve të tjerë shqiptarë.

Por sipas tij, nëse dorëheqjen i’a kërkon Lista Serbe, sepse konstaton se nuk ka punuar mirë, atëherë edhe do të jetë i gatshëm që ta jep.

Zëri: Pse i fyet nënat e Gjakovës dhe më pas kërkuat falje?

Jabllanoviq: Tashmë e kam sqaruar disa herë, se në asnjë moment nuk kam dashur që t’i lëndojë nënat e viktimave të civilëve në Gjakovë. Si ministër i Qeverisë kam përgjegjësi për atë që bëj dhe për atë që flas dhe përderisa një deklaratë, të cilën unë e kam dhënë, është bërë shkas për protesta, atëherë unë jam ndier i detyruar që të sqarohem. Nuk do të doja që më ajo deklaratë të përdoret për të nxitur protesta të tjera.

Zëri: A iu ka thënë dikush që të kërkoni falje?

Jabllanoviq: Jo, nuk ma ka kërkuar askush. Unë si politikan me përgjegjësi e di kur, në cilin moment duhet të jap një deklaratë. E kam ndier nevojën që të sqarohem po ashtu edhe të kërkoj falje, sepse deklarata ime është keqkuptuar.

Zëri: Çfarë nëse vazhdojnë protesta kundër jush? A jeni i gatshëm të jepni dorëheqje?

Jabllanoviq: Se a do të ketë apo jo më protesta, është çështje e atyre personave që po i organizojnë ato. Unë jam përgjegjës për punën që kam marrë përsipër, ashtu siç e ka marrë e tërë “Lista Serbe” e zgjedhur nga qytetarët serbë të Kosovës. Por, natyrisht që duam të punojmë edhe për qytetarët e tjerë, sepse jemi të vetëdijshëm që pa pasur bashkëjetesë të mirë mes shqiptarëve, serbëve, romëve dhe komuniteteve të tjera, nuk mundet asnjë komunitet të jetojë mirë.

Sa i përket dorëheqjes, kjo nuk është një temë që është diskutuar. Unë jam ministër i caktuar nga “Lista Serbe” dhe nëse kjo Listë ma kërkon një gjë të tillë, në të ardhmen, duke konstatuar se kam punuar keq apo në dëm të Listës, atëherë unë jam i gatshëm të jap dorëheqje. Por tani, në këtë moment si politikanë, ne gjithmonë jemi të atakuar nga komentet e ndryshme dhe kërkesat. Kemi dëgjuar që edhe dorëheqja e kryeministrit Mustafa është kërkuar. Në seancën e fundit në Kuvend edhe kryetarit iu është kërkuar dorëheqja. Pra, është diçka që duhet të mësohemi përderisa jemi pjesë e politikës.

Zëri: Isa Mustafa është në krye të Kabinetit të Qeverisë. Çka nëse ai ju kërkon dorëheqjen si kryeministër i vendit?

Jabllanoviq: Isa Mustafa e di që unë punën time e bëj në pajtim me ligjet e Qeverisë edhe të Ministrisë dhe në interes të të gjithë qytetarëve të Kosovës. Lidhur me rezultatin e punës sime, sigurisht që do të ketë vlerësim pas 100 ditëve. Mendoj se punën po e bëj në mënyrë transparente dhe në interes të të gjithëve.

Zëri: Ju pyeta nëse kryeministri Mustafa do ta kërkonte dorëheqjen tuaj, për shkak të deklaratës suaj kur quajtët nënat e Gjakovës “egërsira”?

Jabllanoviq: Unë e kam sqaruar deklaratën time, ia kam sqaruar edhe kryeministrit Mustafa, prandaj nuk e shoh në këtë drejtim që do të ketë diçka të tillë. Me Mustafën kam komunikim të mirë.

Zëri: A ju ka thënë ndonjë gjë kryeministri Mustafa lidhur me këtë që ndodhi?

Jabllanoviq: Nuk mundem të flasë publikisht për të gjitha ato që mund të fliten brenda Kabinetit të Mustafës, por mund të them se mes nesh ekziston një komunikimi i mirë.

Mustafa është një politikan premtues për të gjithë qytetarët e Kosovës, me një përvojë të mirë, puna e të cilit do të sjellë rezultate të mira për të gjithë qytetarët e Kosovës./Zëri/

Mbi 400 minatorë të kombinatit metalurgjik “Trepça”, po vazhdojnë grevën edhe në ditën e dytë, duke kërkuar nga autoritetet kompetente që të miratojnë një ligj të veçantë, në bazë të së cilit ky kompleks të kaloj në pronësi të Qeverisë së Republikës se Kosovës.Ahmet Tmava, drejtor i përgjithshëm në kombinatin “Trepça”, në një prononcim për Radion Evropa e Lirë, tha se minatorët janë këmbëngulës të qëndrojnë në grevë deri në realizimin e kërkesës se tyre.

Ai thotë se mbetja e pozicionit të “Trepçës” nën menaxhimin e Agjencisë Kosovare të Privatizimit (AKP), nënkupton pengim për zhvillimin e kësaj ndërmarrje.

Minatorët janë duke qëndruar në horizontin e tetë të minierës së “Trepçës”në Stantërg.

“Ky status i paqartë në një institucion që nuk jep hapësirë zhvillimi, duke qenë nën AKP, do të thotë të jesh i penguar për të ecur më tutje, është një mbijetesë e pa perspektivë, pa mundësi investimesh, pa mundësi të planeve zhvillimore. Elementi bazë është për të krijuar parim të zhvillimit”, tha Tmava.

Kombinati metalurgjik “Trepça”, është ndërmarrje shoqërore dhe si e tillë menaxhohet nga Agjencia Kosovare e Privatizimit, ku shndërrimi eventual në ndërmarrje publike nënkupton kalimin e saj në pronë të Qeverisë së Kosovës.

Në anën tjetër, kryeministri i Kosovës Isa Mustafa, e konsideron të pa arsyeshme mbajtjen e grevës se minatorëve, pasi siç ka thënë ai, zgjidhja e problemit të kombinatit “Trepça” kërkon kohë.

“Ne konsiderojmë se arsye nuk është që të bëhet grevë në “Trepçë” sepse punëtorët janë të sigurt, “Trepça” është e sigurt, por asnjë gjë për “Trepçën” nuk mund të zgjidhet për një , dy ose tri ditë”.

“Unë mbrëmë kam biseduar më udhëheqësit e “Trepçës” dhe i kam sugjeruar që të vazhdojnë punën, që mos të ndërpritet, por nuk shoh asnjë arsyje që minatorët të qëndrojnë brenda sepse problemi do të zgjidhjet, por mund të zgjidhet vetëm në mënyrë normale dhe më një procedurë normale dhe më kohë”, ka thënë Mustafa.

Greva e minatorëve ka filluar pas vendimit të Qeverisë se Kosovës, kur të hënën është hequr nga rendi i ditës në Kuvendin e Kosovës çështja e pronësisë se kombinatit “Trepça”, kjo në kuadër të diskutimeve për ndryshimet në ligjin për ndërmarrjet publike.

Kuvendi i Kosovës, ndërkaq më procedurë të shpejtë ka miratuar një ligj tjetër, atë për riorganizimin e ndërmarrjeve të caktuara dhe pasurisë se tyre, në mënyrë që t’i hapet rrugë riorganizimit të kompleksit “Trepça”.

Edhe drejtori i minierës me flotacion “Trepça” në Stantërg, Qazim Jashari, tha se minatorët nuk pajtohen më miratimin e këtij ligji dhe nëse qeveria nuk ndërmerr ndonjë vendim, Jashari ka paralajmëruar masa më radikale veprimi.

“Ky ligj vetëm e ka prolonguar çështjen e “Trepçës” për një kohë, sepse neve ende na menaxhon Agjencia Kosovare e Privatizimit, edhe është prolonguar afati i falimentimit për 18 muaj. Ne nuk jemi të kënaqur. Minatorët kërkojnë ligj të veçantë për “Trepçën” që kjo ndërmarrje të jetë publike“.

Por, zyrtarë të qeverisë kanë deklaruar se ligji i miratuar të hënën krijon kushtet për punë normale të “Trepçës’, duke evituar fillimin e procedurave për falimentim.

Ndryshe, ekspertë për çështje ekonomike kanë vlerësuar se në seancën e të hënës në Kuvendin e Kosovës, është parë se Qeveria e Kosovës ka hequr dorë prej synimit parësor që “Trepçën” ta shndërrojë në ndërmarrje publike, duke u dorëzuar përballë presionit nga Serbia, si dhe faktorëve tjerë.

Por, në një postim në rrjetin social facebook, kryeministri i Kosovës, Isa Mustafa, ka shkruar se vendimin, i cili krijoi kushte që Trepça të ballafaqohet me falimentim nga data 2 shkurt, nuk e solli Serbia, por Dhoma e Posaçme e Gjykatës Supreme të Kosovës, vendorët dhe ndërkombëtarët.

Por, Kuvendi i Republikës së Kosovës, me ndryshimin e ligjit për organizimin e ndërmarrjeve, evitoi mundësinë e falimentimit.

“Qeveria dhe Kuvendi janë të ndërgjegjshme të marrin të gjitha vendimet dhe masat më të mira për këtë kombinat dhe për ardhmërinë e këtij vendi”, ka shkruar Mustafa në facebook.

Kombinati “Trepça”, aktualisht merret me nxjerrjen dhe përpunimin e mineraleve, kryesisht të plumbit dhe zinkut dhe është i vetmi prodhues i këtij lloji në Kosovë.

Ky kompleks operon në dy njësi, në jug dhe veri të Mitrovicës.

Por, përveç aseteve dhe degëve të ndryshme të shpërndara në rajone të ndryshme, jo vetëm në Republikën e Kosovës, por edhe jashtë saj, ka qenë një prej ndërmarrjeve më të mëdha të ish-Jugosllavisë në vitet e 80-ta, me mbi 20 mijë punëtorë. (rel)

Minatorët e kombinatit “Trepça”, kanë hyrë në grevë që nga mëngjesi i sotëm, bëjnë të ditur zyrtarët e këtij kombinati.Sipas tyre, rreth 250 minatorë, janë duke qëndruar në horizontin e 10-të në minierën e Stantërgut.

Sebahate Fetahu, asistente e drejtorit të ndërmarrjes “Trepça”, Ahmet Tmava, i ka thënë Radios Evropa e Lirë se të gjithë punëtorët e këtij kombinati janë në grevë.

“Minatorët duan sqarim për projektligjin që është shtyrë dhe duan sqarim për fatin e ‘Trepçës’. Për momentin, deri më tash askush nga qeveria nuk ka shkuar aty dhe as qe ka lajmëruar për një gjë të tillë”, ka theksuar Fetahu.

Ajo ka shtuar se minatorët i kanë thënë drejtuesve të “Trepçës”, se “deri sa të merret ndonjë vendim prej qeverisë, grevën nuk do ta ndalin”.

Eksperti i çështjeve të ekonomisë, Ibrahim Rexhepi nga Qendra për Hulumtime Strategjike dhe Sociale – STRAS, duke folur për radion Evropa e Lirë, shpreh mendimin se greva e minatorëve nuk është mjet i cili ndihmon në zgjidhjen e problemit të Trepçës.

“Sinqerisht mendoj se minatorët nuk duhet të mbeten në grevë. Por, megjithatë, të përdoret ndonjë mekanizëm tjetër i presionit, meqenëse çështja duhet të zgjidhet në parlament dhe në qeveri dhe jo në horizontin e nëntë”, thotë Rexhepi.

Rexhepi vlerëson se në seancën e të hënës në Kuvendin e Kosovës është parë se Qeveria e Kosovës ka hequr dorë prej synimit parësor që Trepçën ta shndërrojë në ndërmarrje publike.

Sipas tij, Qeveria e Kosovës është dorëzuar përballë presionit nga Serbia, si dhe faktorëve tjerë.

Rexhepi theksoi se realisht, Trepçën e ka lënë në pozicionin e njëjtë që ka pasur më parë, që do të thotë, nën përgjegjësinë e Agjencisë Kosovarë të Privatizimit.

Në anën tjetër, zëvendëskryeministri i Kosovës, Hashim Thaçi, ka thënë të martën se çështja e kombinatit “Trepça” nuk do të diskutohet me ndonjë vend tjetër.

Ai ka theksuar se në Kuvendin e Kosovës është nxjerrë legjislacion i veçantë i cili e ka shpëtuar nga falimentimi Trepçën.

“Kemi fituar edhe në kohë që bashkërisht me ekspert edhe ndërkombëtar ta nxjerrim legjislacionin adekuat që do ta stabilizoj atë kombinat dhe në të njëjtën kohë do të jetë profitabil edhe për Kosovën. Por, nuk do të jetë çështje që do të diskutohet edhe me ndonjë vend tjetër, sepse ajo tek e fundit është pasuri e Kosovës”, ka theksuar Thaçi.

Por, Rexhepi vlerëson se e vetmja gjë që ka arritur Qeveria e Kosovës, është shtyrja e afatit ose fitimi i kohës prej 1 vjet e gjysmë, gjatë së cilës periudhë, sipas tij, qeveria e ka shansin që të hartojë një ligj, një strategji, një koncept dhe të shtyjë përpara ligjet, të cilat Trepçën e bëjnë përgjegjësi të qeverisë, përkatësisht, e kthejnë atë në aset publik.

Megjithatë, sipas Rexhepit, Trepça deri më tash ka humbur shumë.

“Nuk është çështja e vetëm 1 vjet e gjysmë, në të ardhmen që do të jenë, por Trepça ka humbur qe 15 vjet. Kjo humbje reflekton në nivelin e përgjithshëm të zhvillimit të Kosovës”, thotë ai.

Ndryshe, Rexhepi ka theksuar se në qoftë se Qeveria aktuale e Republikës së Kosovës nuk do të arrijë që ta bëjë Trepçën pronë të qeverisë, ky do të jetë dështimi më i madh i kësaj qeverie. (rel)

Gjykata Speciale për Kosovën merr përsipër “hetimin e krimeve të luftës në periudhën 1998-1999, si dhe hetimin e krimeve të supozuara politike, kërcënimeve dhe vrasjeve të dëshmitarëve gjatë periudhës 2000-2001″.Në Prishtinë u takua (20.01)për herë të parë ekipi teknik për shqyrtimin e legjislacionit të pranuar nga BE-ja për formimin e Gjykatës Speciale, që do të merret me krimet e supozuara në raportin e senatorit zviceran Dick Marti, i miratuar edhe nga Këshilli i Europës. Pjesë e ekipit teknik është ministri i Drejtësisë, Hajredin Kuçi, në cilësinë e udhëheqësit të ekipit, ministri i Forcës së Sigurisë së Kosovës Haki Demolli, ministri i Arsimit, Arsim Bajrami, kryetari i Gjykatës Supreme, Fejzullah Hasani, kryesuesi i Këshillit Gjyqësor të Kosovës Enver Peci, ushtruesi i detyrës së Kryeprokurorit të shtetit, Sylë Hoxha, këshilltari për çështje ligjore të Presidentes, Selim Selimi, si dhe një eksperte, Donika Qerimi.
Çështjet që kanë të bëjnë me ndryshimet legjislative të ndërlidhura me dhomat e specializuara, në kuadër të veprimeve dhe obligimeve institucionale sipas miratimit të Kuvendit të Kosovës ishin temat që u diskutuan në takimin e së martës thuhet në një njoftim nga presidenca e Kosovës. “Ekipi teknik do të takohet në baza të rregullta dhe do të diskutojë çështjen e legjislacionit dhe marrëveshjeve ndërkombëtare me ekipin e Bashkimit Europian, të mandatuar për planifikim të operacionalizimit të Gjykatës Speciale”, thuhet në njoftim.
Ekipi teknik për shqyrtimin e legjislacionit të pranuar nga BE-ja për formimin e Gjykatës Speciale u krijua ditë më parë pas dakordimit të udhëheqësve më të lartë të institucioneve të Kosovës.
Arbër Vllahiu, këshilltar i presidentes së Kosovës, Atifete Jahjaga, i tha DW-së, se fillimisht ligjet do të procedohen në kuvend nga qeveria e Kosovës. “Tani është faza fillestare e bashkërendimit të veprimeve dhe të obligimeve institucionale për krijimin e Gjykatës Speciale, që është aprovuar në Kuvendin e Kosovës. Ligjet do të procedohen nga qeveria e Republikës së Kosovës dhe ato do të shqyrtohen në komisionet parlamentare për t’u diskutuar dhe miratuar pastaj në Kuvend. Në gjithë këtë punë nevojitet një konsensus i përgjithshëm në etapa të ndryshme për zbatimin e detyrimit ndërkombëtar”, tha Arbër Vllahiu.
Sipas tij, institucionet e Kosovës do të angazhohen në këtë proces për ta përmbyllur këtë kapitull njëherë e përgjithmonë. “Krijimi i Gjykatës Speciale pasqyron angazhimin e Kosovës për një proces të pavarur dhe të paanshëm për t’u marrë me këto akuza në mënyrë të besueshme dhe për ta përmbyllur këtë kapitull njëherë e përgjithmonë. Kjo gjykatë do të përqendrohet në individë dhe veprime individuale dhe nuk është gjykim i përpjekjeve kolektive të popullit tonë për çlirim dhe pavarësi”, i tha DW-së, Arbër Vllahiu.
Në ditën kur zhvilloi takimin e parë ekipi teknik për shqyrtimin e legjislacionit për formimin e Gjykatës Speciale, rreth 30 familje të veprimtarëve të LDK-së, të vrarë gjatë dhe pas lufte zhvilluan një protestë para qeverisë së Kosovës, duke shprehur shqetësimin e tyre për – siç thanë – moszbardhjen e rasteve dhe ata kërkuan drejtësi dhe ndëshkimin e vrasësve. Këshilli organizativ i kësaj proteste, ku të pranishëm ishin edhe disa deputetë të kuvendit nga Lidhja Demokratike e Kosovës, kërkuan themelimin sa më të shpejtë të Gjykatës Speciale, sepse sipas tyre, ajo është shpresa e vetme për zbardhjen e rasteve që kanë prekur familjet e tyre.
Doruntina Maloku, e bija e veprimtarit të vrarë të LDK-së, Enver Maloku, tani deputete, tha se familjarët kërkojnë themelimin e Gjykatës Speciale, që ajo t’i trajtojë edhe vrasjet ndërshqiptare.
“Në një deklaratë të përbashkët të familjeve tona, ne kemi kërkuar edhe themelimin sa më të shpejtë të Gjykatës Speciale, e cila do të duhej të merrej edhe me vrasjet ndërshqiptare të gjatë dhe pas luftës në Kosovë. Familjet tona janë thellësisht të indinjuara me dështimin e sistemit të drejtësisë në Kosovë, jo vetëm atij vendor, por edhe të UNMIK-ut dhe EULEX-it, ndaj shpresa jonë e vetme mbetet trajtimi i këtyre rasteve nga Gjykata Speciale”, tha deputetja Doruntinë Maloku.
Legjislatuara e kaluar e Parlamentit të Kosovës më 23 prill të vitit të shkuar, ratifikoi marrëveshjen Kosovë-Bashkim Europian, e cila mundëson themelimin e Gjykatës Speciale për Kosovën. Kjo gjykatë do të marrë përsipër hetimin e “krimeve të luftës në periudhën 1998-1999, si dhe hetimin e krimeve të supozuara politike, kërcënimeve dhe vrasjeve të dëshmitarëve gjatë periudhës 2000-2001″. Themelimi i kësaj gjykate nuk është parë me sy të mirë nga asnjë forcë politike në Kosovë, mirëpo, megjithatë miratimi për themelimin e saj u bë në parlamentin e Kosovës me shumicën e votave të deputetëve, duke shmangur kështu mundësinë që kjo gjykatë të themelohet nga Këshilli i Sigurimit të OKB-së. (dw)

Përmes një kumtese të lëshuar, misioni EULEX ka bërë me dije se Prokuroria Speciale e ka ngritur një aktakuzë për korrupsion lidhur me kompaninë publike Korporata Energjetike e Kosovës (KEK).Sipas komunikatës, aktakuza është ngritur ndaj shtatë personave të cilët dyshohen për kryerjen e disa veprave penale.

Në mesin e veprave penale për të cilat dyshohen të pandehurit janë: Mashtrimi dhe falsifikimi i dokumenteve, Shpërdorimi i pozitës zyrtare apo autoritetit, Nxitja për shpërdorimin e pozitës zyrtare apo autoritetit si dhe Lidhja e kontratave të dëmshme.

Vlera e dëmit që është shkaktuar nga ky rasti i korrupsionit, sipas misionit EULEX, është 6 milionë e 182 mijë euro.

Rasti është hetuar nga një prokuror ndërkombëtar. (rel)

Përfaqësuesit e shoqërisë civile në Kosovë, thonë se zyrtarët e lartë apo bashkëpunëtorët e tyre vazhdojnë të jenë imunë ndaj hetimeve rreth pasurisë së tyre.Ata thonë se institucionet kompetente, që kanë për qëllim luftën kundër korrupsionit, duhet të veprojnë duke u bazuar në ligjet ekzistuese, që pasuria e zyrtarëve të lartë të hetohet apo edhe të konfiskohet.

Kur një pasuri dyshohet se është fituar në mënyrë të paligjshme, ajo fillimisht ngrihet dhe sekuestrohet gjatë zhvillimit të hetimeve. Varësisht nga vendimi përfundimtar i gjykatës, pasuria edhe mund të konfiskohet nga shteti.

Në vitin 2014 totali i përgjithshëm i pasurisë së ngrirë apo të sekuestruar ka arritur në shumën prej rreth 31 milionë eurosh, thotë për Radion Evropa e Lirë koordinatori Kombëtar për Luftimin e Krimeve Ekonomike, Shqipdon Fazliu.

“Bëhet fjalë për vepra të ndryshme penale, pastrimi i parave, shpërdorimi i pozitës zyrtare, kontrabanda me mallra e të tjera”, tha Fazliu.

Por, Betim Musliu nga Instituti i Kosovës për Drejtësi, thotë se i gjithë sistemi prokurorial e gjyqësor ka dështuar të konfiskojë pasurinë e fituar nga veprat kriminale.

Musliu thotë se sekuestrimi nuk përfundon me konfiskim.

“Çështja me problematike këtu është se ka dyshime se një pjesë e madhe e pronave të cilat janë të sekuestruara, në fakt mund të jenë prona për të cilat nuk ka vendime përfundimtare dhe ato mund të jenë shitur nga pronari, gjatë kësaj kohe derisa është folur për sekuestrimin e tyre”, tha Musliu.

Koordinatori Shqipdon Fazliu, theksoi se dispozitat ligjore ekzistuese kur bëhet fjalë për konfiskimin dhe sekuestrimin kanë paqartësi të theksuara.

“Një pjesë e tyre është mjaft konfuze, në kundërshtim me njëra tjetrën edhe kanë sjellë probleme te prokuroritë dhe gjykatat në interpretimin e tyre. Do të thotë, sfida rreth interpretimit të dispozitave ligjore lidhur me sekuestrimin edhe konfiskimin ka pasur dhe ka edhe sot e kësaj dite”, tha Fazliu.

Për këtë çështje, kryesuesi i Këshillit Gjyqësor të Kosovës, Enver Peci tha për Radion Evropa e Lirë se aktualisht, në raport me sekuestrimin e pasurisë, gjykatat janë duke vepruar në fazën e sekuestrimit të përkohshëm.

“Ka sekuestrime të përkohshme, por ka edhe procedura që duhet të zhvillohen deri në fund, do të thotë deri të sekuestrimi i përhershëm”, tha Peci.

Lidhur me këtë temë, zyrtarët e Agjencisë për Administrimin e Pasurisë së Sekuestruar ose të Konfiskuar nuk kanë dashur të flasin.

Kurse, drejtori i Agjencisë Kundër-Korrupsion, Hasan Preteni thotë se gjitha ata persona që nuk mund ta justifikojnë pasurinë e deklaruar e njëjta duhet t’u konfiskohet, por siç thotë ai deri me tash nuk ka ndodhur ende diçka e tillë.

“Pasuri të konfiskuar vlerësoj se në Kosovë nuk ka. Kurse, kjo pjesa tjetër, pasuri e ngrirë ose ndryshe si po e trajtojnë ose publikojnë është diçka tjetër, por të konfiskuar definitivisht vlerësoj se nuk ka”, tha Preteni.

Korrupsioni në Kosovë konsiderohet si një nga sfidat me të mëdha me të cilat duhet të merren institucionet përkatëse.

Në vitin 2014, Kosova ka shënuar një përmirësim të lehtë dhe jo të efektshëm në indeksin e korrupsionit të botuar nga Transparency International, duke u radhitur bashkërisht me Shqipërinë në vendin e 110-të, në atë që njihet si “zonë e kuqe”. (rel)

Ndërrimi i pronësisë se kompleksit “Trepça” nga Agjencia Kosovare e Privatizimit tek ekzekutivi, hap një epokë të re për zhvillimin e këtij kompleksi, konsiderojnë menaxherë të kësaj ndërmarrjeje dhe përfaqësues të bizneseve.Për tu mundësuar ndërrimi i pronësisë se “Trepçës , Qeveria e Kosovës të mërkurën ka miratuar projekt-ligjin për ndryshimin dhe plotësimin e Ligjit për Ndërmarrjet Publike.

Kurse, kryesia e Kuvendit të Kosovës ka vendosur që projekt ligji të shqyrtohet ditën e hënë, me procedurë të përshpejtuar në Kuvend, duke shmangur në këtë mënyrë Rregulloren e Kuvendit të Kosovës.

Halil Qela, udhëheqës për Hulumtim, Zhvillim dhe Mjedis në këtë kombinat, vendimin e qeverisë për ndërrim të pronësisë se këtij kombinati e konsideron shpresë për ringjalle të Trepçës, pasi sipas tij, menaxhimi i saj nga Agjencia Kosovare e Privatizimit ka qenë rrugë e dështuar dhe njëherit asestët e Trepçës kanë qenë të rrezikuara.

“Unë mendoj se nuk duhet të ketë një status të njëjtë më ndërmarrje publike, , për shembull me Postën dhe Telekomin ose Korporatën Energjetike të Kosovës, sepse ato megjithatë ofrojnë shërbime”.

“Kjo duhet të jetë një interes nacional për zhvillimin e vendit ku bëhet ndërmarrje publike në kuptimin e menaxhimit shtetëror të një bordi, i cili do të ishte profesional, që mbikëqyrë menaxhmentin e bordit dhe një plan zhvillimor afat mesëm dhe afat gjatë që përcjell bordi për menaxhim”, tha Qela.

Edhe përfaqësues të komunitetit të biznesit e përkrahin vendimin e qeverisë për ndërrimin e pronësisë se Trepçës. Oda Ekonomike e Kosovës dhe Oda Ekonomike Amerikane në Prishtinë edhe herët patën rekomanduar që të miratohet një ligj për Trepçën dhe mundësinë e shndërrimit nga ndërmarrja shoqërore në atë publike.

Arian Zeka, krye shef ekzekutiv në Odën Ekonomike Amerikane në Prishtinë, në një prononcim për Radion Evropa e Lirë, thotë se më vendimin e qeverisë hapet mundësia që gjiganti metalurgjik e “Trepça” të bëhet potencial i rëndësishëm i zhvillimit ekonomik.

Pas ndërrimit të pronarit, qeveria më aprovim të Kuvendit ka mundësi që edhe të privatizoj ndërmarrjet publike, por kjo varet se çfarë përmban projekt ligji i cili do të shqyrtohet të hënënnë Kuvend.

Edhe Zeka konsideron se zgjidhja më e mirë për zhvillimin e Trepçës, duhet të jetë privatizimi.

“Qeveria nuk ka kapacitete të mjaftueshme financiare që ti lejojë vetës të bëjë investime substanciale në Trepçë, në mënyrë që të shndërrohet në ndërmarrje profitabile. Ndoshta mund të bëjë disa investime themelore sa për të ngritur vlerën e saj para tentimit për privatizim.Megjithatë nuk mund të përjashtohet se zgjidhja më e mirë do të kishte qenë pikërisht privatizimi për të bërë atë”, tha Zeka

Gjiganti metalurgjik “Trepça” që gjendet në Mitrovicë, ka qenë nën moratoriumin e vendosur nga Dhoma e Posaçme e Gjykatës Supreme, ndërsa Agjencia Kosovare e Privatizimit është administrator i saj.

Ndërkaq ditë më parë Dhoma e Posaçme e Gjykatës Supreme ka marr vendim që “ Trepcën” ta qojë në likuidim nga data 2 shkurt, arsye kjo për veprime të shpejta të Qeverisë dhe Kuvendit të Kosovës

Kombinati “Trepça”, si gjigant ekonomik kosovar me asete dhe degë të ndryshme të shpërndara në rajone të ndryshme, jo vetëm në Republikën e Kosovës, por edhe jashtë saj, ka qenë një prej ndërmarrjeve më të mëdha të ish-Jugosllavisë në vitet ‘80, me mbi 20 mijë punëtorë.

Trepça është i vetmi prodhues i këtij lloji në Kosovë.

Aktualisht, merret me nxjerrjen dhe përpunimin e mineraleve, kryesisht të plumbit dhe zinkut, por është edhe ndërmarrje industriale. (rel)