I dërguari i posaçëm i SHBA-së për Ballkanin Perëndimor, Gabriel Escobar, në një intervistë për televizionin publik të Serbisë, ka mohuar të ketë afate për një marrëveshje finale ndërmjet Kosovës dhe Serbisë. Mirëpo, ai ka theksuar se është e rëndësishme për të bërë hapa në këtë drejtim, duke parë situatën nëpër të cilën po kalon Evropa pas agresionit rus në Ukrainë.

“Nuk jam në dijeni se propozimi evropian kërkon një zgjidhje urgjente në afat prej disa javësh, por sigurisht që kërkon përparim shumë të shpejtë në dialog”, theksoi Escobar.

Ai ka thënë se SHBA-të e mbështesin propozimin franko-gjerman dhe njohjen reciproke Kosovë-Serbi e shohin si zgjidhjen më të mirë për dialogun. Megjithatë, ka shtuar se dialogu e ka në thelb gjetjen e një zgjidhjeje që u përshtatet palëve.

“ SHBA mbështet njohjen reciproke. Mendojmë se kjo do të ishte më e mira për rajonin. Por thelbi i dialogut është që të dyja palët të gjejnë një zgjidhje që u përshtatet atyre. Nëse ka një zgjidhje që funksionon për të dyja palët”, deklaroi Escobar.

Sa i përket asaj nëse SHBA do ta mbështesnin një marrëveshje edhe pa njohje reciproke, ai theksoi: “Nëse të dyja palët bien dakord, po”.

I pyetur nëse SHBA do të bëjnë presion që kjo të ndodhë, ai u shpreh: “Po e përdorni fjalën ‘presion’ gjatë gjithë kohës. Nuk do ta quaja presion, por inkurajim. Ne duhet të gjejmë një rezultat përfundimtar shumë të qëndrueshëm që i përshtatet të dy vendeve. Qëndrimi ynë gjatë gjithë kohës ka qenë se njohja është ndoshta zgjidhja më e mirë, por nëse të dyja palët gjejnë një zgjidhje tjetër, ne do ta mbështesim atë. Megjithatë, ndërkohë duhet të mbetemi të angazhuar në dialog, duhet të parandalojmë çdo konfrontim dhe çdo lloj dhune mes dy palëve që do të destabilizonte të gjithë rajonin”.

Ai tutje ka sqaruar edhe deklaratën e dhënë në Kosovë, ku marrëveshja vlerësohej si çështje javësh.

“Thashë që ka një propozim franko-gjerman që ne e mbështesim. Është një propozim që duhet shqyrtuar dhe do të na ndihmojë të arrijmë progres në dialog shumë shpejt. Nuk kam vendosur asnjë afat për këtë dhe ai propozim është ende në kuadër të dialogut të udhëhequr nga BE-ja. Së pari, nuk na takon neve të vendosim afate, por me sa di afate nuk kanë vendosur as evropianët”, sqaroi Escobar.

Ai ka thënë se propozimi franko-gjerman “duhet të shqyrtohet me shumë kujdes dhe të shikohet në kontekstin e asaj që po ndodh në Evropë”.

“Po, u përmendën javët, por mendoj se kjo do të thotë se ky propozim duhet të shqyrtohet me shumë kujdes dhe duhet parë në kontekstin e asaj që po ndodh në Evropë. Prandaj, ideja e progresit drejt krijimit të një situate të qëndrueshme në Ballkan është absolutisht e rëndësishme në këtë moment. Sa më shpejt të shqyrtojmë mundësitë për ta arritur këtë, aq më mirë”, tha ai.

Escobar tutje ka përgënjeshtruar shkrimet në media ku 24 shkurti përmendej si datë e nënshkrimit të marrëveshjes: “Nuk e di nga ka ardhur kjo, por kjo absolutisht nuk është e vërtetë”.

Ai ka thënë se nuk ka kurrfarë kërcënimesh për palët dhe se nuk janë planifikuar sanksione. “Nga këndvështrimi ynë, edhe Serbia edhe Kosova janë partnerë të rëndësishëm, konstruktivë dhe e gjithë kjo duhet të bëhet në kuadër të dialogut të udhëhequr nga BE-ja”, nënvizoi Escobar.

Sa i përket kërkesës që BE-ja i ka bërë Kosovës për shtyrje të zbatimit të vendimit për targa për 10 muaj, ai tha se shpreson që afati të shtyhet në mënyrë që zbatimi të jetë më pak kaotik dhe të sigurohen kushtet për zbatimin e duhur.

“Gjatë atyre dhjetë muajve do të kërkohet që të bëjnë një fushatë informuese, të bëjnë më shumë konsultime me komunitetet që do të preken nga kjo dhe të kenë më shumë koordinim me bashkësinë ndërkombëtare”, tha ai.

Escobar shtoi se nuk ka afate për themelimin e Asociacionit të Komunave Serbe, por se është “një obligim ekzistues që duhet përmbushur”.

“Dhe po, unë gjithmonë e ngre këtë çështje me autoritetet e Kosovës”, tha tutje diplomati amerikan.

rtk