Një muaj pas zgjedhjeve parlamentare, Lidhja Demokratike e Kosovës zgjodhi udhëheqjen e saj të re, që do të përballet me trajtimin e shkaqeve që çuan në humbjen e saj më të thellë në zgjedhje që nga përfundimi i luftës në Kosovë.
Lumir Abdixhiku fitoi në një përballje me Lutfi Hazirin si dhe Besian Mustafën.
Në fillim të punimeve të kuvendit, kandidaturën e tij e tërhoqi ministri në detyrë i Mbrojtjes, Anton Quni.
Kryetari i deritashëm i Lidhjes Demokratike, Isa Mustafa zyrtarizoi dorëheqjen e tij të cilën e kishte paraqitur menjëherë pas zgjedhjeve të 14 shkurtit, në të cilat kjo parti doli e treta me 12.7 për qind të votave që i sigurojnë 15 vende në parlamentin 120 vendesh të Kosovës.
Kryetari i ri i Lidhjes Demokratike të Kosovës, Lumir Abdixhiku, i lindur në vitin 1983, u bashkua me këtë parti në vitin 2017.
Pas zgjedhjeve të tetorit të vitit 2019, ai shërbeu si ministër i infrastrukturës në qeverinë e koalicionit të udhëhequr nga Albin Kurti, kryetar i lëvizjes Vetëvendosje.
Me gradën e doktorit të shkencave në fushën e ekonomisë, zoti Abdixhiku me parë kishte punuar në institutin “Riinvest” në Prishtinë.
Të dielën në hapje të kuvendit të Lidhjes Demokratike tha se rezultati i zgjedhjeve të 14 shkurtit ishte “ndëshkim nga qytetarët e vendit tonë, nga të njëjtit që dikur na kishin dhënë besim”.
“Lidhja Demokratike e Kosovës nuk arriti të mbajë e as të rrisë mjaftueshëm votuesit e saj. Ndonëse arsyet për një rënie të tillë mund t’i rendisim e t’i përmendim, arsyen e vërtetë dhe të vërtetën e vetme e gjejmë te vetvetja dhe nga vetvetja ne do të nisim rikthimin tonë të madh”, tha zoti Abdixhiku menjëherë pasi u zgjodh kryetar i ri i Lidhjes Demokratike të Kosovës.
Ai tha se kjo parti tash ka nevojë të ri gjejë rrugën në një periudhë të vështirë për të dhe Kosovën në përgjithësi.
“Sot ne duhet të veprojmë, të bashkohemi rreth njëri tjetrit, të hapemi për të tjerët, LDK nuk ka njerëz për të humbur, por nuk ka as njerëz të mjaftueshëm për të ecur para. LDK-së duhet t’i japim një ekip, një lidership që përballon sfidat e kohës. Ndjej obligim, detyrë dhe para së gjithash nder t’i prij këtij procesi. Kjo detyrë nuk është fare e lehtë, ajo përveç që e gjen LDK-në në udhëkryq të kohës, e gjen edhe vendin në rrëshqitje drejt frymave populiste, politikave të majta e ideve shpërbërëse të shtetit të Kosovës”, tha ai.
Naim Rashiti, nga Grupi Ballkanik për Hulumtimin e Politikave, i tha Zërit të Amerikës përmes telefonit se procesi i brendshëm zgjedhor i Lidhjes Demokratike sjell një frymë të re në skenën politike të Kosovës. Ai tha se pret që kryetari i ri i Lidhjes Demokratike të sigurojë qëndrimin në mbledhjen e parlamentit kur të votohet për zgjedhjen e presidentit dhe të krijojë mjedis të ri politike në atë institucion.
Lëvizja Vetëvendosje e cila doli e para në zgjedhjet e 14 shkurtit ka ftuar për të hënën takime me partitë politike për formimin e institucioneve. Ajo nuk pret vështirësi për formimin e qeverisë, për miratimin e së cilës duhen të paktën 61 vota. Por, zgjedhja e presidentit kërkon dy të tretat e votave, përkatësisht 80 vota të deputetëve, që të paktën duhet të jenë të pranishëm në sallën e parlamentit gjatë votimit. Dështimi për të zgjedhur presidentin e ri mund të çojë sërish në zgjedhje të parakohshme.
Partia Demokratike e Kosovës dhe Aleanca për Ardhmërinë e Kosovës konfirmuan se do të marrin pjesë në takim.
Kryetari i ri i Lidhjes Demokratike tha se e ka të pamundur të marrë pjesë në takimin e së hënës duke propozuar ditën e premte.
Lidhja Demokratike, partia më e vjetër në vend u themelua në vitin 1989 dhe për 16 vjet me radhë ishte drejtuar nga Ibrahim Rugova, ish president i Kosovës.
Pas vdekjes së tij në janar të vitit 2006, kjo parti u nda në Kuvendin e gjashtë zgjedhor dhe në nëntor të vitit 2007, për herë të parë humbi në zgjedhje.
Që nga vdekja e ish presidentit Rugova, ajo u drejtua nga Fatmir Sejdiu, ish president i Kosovës i cili u pasua në krye të partisë nga Isa Mustafa.
voa