Hapja e kapitujve për anëtarësimin e Serbisë në BE vare shumë nga progresi i dialogut mes Beogradit e Prishtinës.

Hapja e kapitujve të parë për fillimin e bisedimeve në mes të Serbisë e Bashkimit Europian, varet shumë nga progresi që bëhet në raportet mes Beogradit e Prishtinës, ka thënë Kancelarja gjermane, Angela Merkel, në një intervistë, pak ditë para udhëtimit të saj për në Beograd, njofton Tanjug, transmeton Klan Kosova.

Bashkimi Europian kërkon nga Kosova dhe Serbia që të bisedojnë, tha Merkel, e cila do ta vizitojë Beogradin me 8-9 korrik.

Ka edhe shumë për t’u bërë, por gjithsesi ka shenja progresi, dhe ne po bëjmë përpjekje që të përshpejtojmë procesin, deklaroi Merkel.

E pyetur për opinionin e saj sa u përket marrëdhënieve shtetërore në mes Serbisë dhe Shqipërisë, Merkel ka thënë se vizita e kryeministrit shqiptar në Serbi pas një kohe kaq të gjatë, është shenjë shprese.

Ajo ka thënë se Shqipëria dhe Serbia kanë punuar mjaft shumë për të përmbushur objektivat e Konferencës së Shteteve të Ballkanit Perëndimor që është mbajtur në gusht të vitit të kaluar.

Sa i përket integrimit Europoan, Merkel ka thënë se shtetet e Ballkanit Perëndimor, kanë thënë shenja të qarta se perspektiva e tyre është Bashkimi Europian.

“Besojmë se integrimi është mënyra e vetme për t’i zgjidhur konfliktet në mes këtyre shteteve. Pavarësisht të gjitha vështirësive me të cilat ballafaqohemi, në këtë drejtim ka mjaft progres”, ka thënë Merkel, e cila do të vizitojë edhe Shqipërinë edhe Bosnje-Hercegovinën gjatë turit të saj në Ballkan. (klan)