Nisur nga fakti botërisht i ditur se sistemet qeverisëse unitare shërbejnë për të zbatuar politika kombëtare përmes qeverive kombëtare, LSHD fton Artan Grubin si zëvendës kryeministër i parë i qeverisë së koalicionit, bashkë me ministrat e tjerë të BDI, dhe vet kreun e BDI, të sqarojnë opinionin publik shqiptar, se çfarë politikash ndjekin ata në koalicionin qeverisës me këto forca politike që zbatojnë politika antishqiptare!?

LSHD i bën të ditur z. Grubi dhe eksponentëve të tjerë të BDI, se shqiptarët nuk gënjehen me deklaratat patetike dhe pseudopatriotike, sa për sy e faqe të zotit Grubi, se kontesti me Bullgarinë duheshka t’u shërbejë “qeverisjes maqedonase” dhe partive politike të bashkëqytetarëve tanë të deklaruar maqedonas si këmbanë alarmi për krimet që kanë bërë ndaj shqiptarëve. Sepse shqiptarët tanimë e kanë qartë, se janë pikërisht z. Grubi bashkë me ministrat e tjerë shqiptarë që janë vënë në shërbim, dhe zbatuesit më të zellshëm të këtyre politikave antishqiptare, madje së fundmi duke u konfrontuar edhe me shtetet fqinje në mbrojtje të këtyre politikave të përvetësimit të identitetit, gjuhës, historisë, fesë… Janë pikërisht ata që japin jetë karakterit unitar të shtetit që zbaton politika që ushqejnë frikën dhe terrorin e mbjellur që në kohën e Mbretërisë Jugosllave ndër shqiptarët ortodoks, për të mos deklaruar përkatësinë e tyre të vërtetë, edhe sot e kësaj dite.

Shqiptarët nuk besojnë gënjeshtrat e z. Grubi, i cili bën avokatin e “Maqedonisë së re” duke i’a faturuar të gjitha mëkatet ndaj shqiptarëve “Jugosllavisë së vjetër”. Sepse shqiptarët kanë mbamendjen për të mos harruar represaliet policore të “Maqedonisë së re” në popullsinë e pafajshme shqiptare, dhe sytë në ballë për të parë të njëjtin gjyqësor të pa reformuar që nga koha e sistemit monist. Ashtu si edhe për të parë edhe sot e kësaj dite politikat e njëjta të përvetësimit të kishës dhe objekteve kishtare ortodokse edhe nga kjo qeveri, e cila para pak javësh festoi njëmijë vjetorin e Manastirit Mbigurr, si objekt fetar ekskluzivisht sllav, atje në mes të maleve të Dibrës, rrethuar me shqiptarë.

Për fat të keq, e gjitha kjo, nuk u lë fare përshtypje partive pseudo-opozitare ASH dhe AA, të zënë me ambiciet e tyre për pjesëmarrje me çdo kusht në qeverinë e zgjeruar, të propozuar me ngulm, gjatë gjithë kohës, nga ata vet.

E gjitha kjo ngarkon akoma më shumë LSHD-në, si partia e vetme opozitare.

Lëvizja për Shtet dhe Drejtësi

Kryesia qendrore

Kryetari