Ndryshimet që u ofrohen qytetarëve shqiptarëve nën Maqedoni, janë vetëm ndryshime sipërfaqsore, ta heqin Bakallin ta fusin Çakallin!
Po si është gjendja e vërtetë, më konkretisht në Komunën e Tetovës në duart e Lëvizjes Besa!
Kryetari i Komunës ofron ndryshime në nivelin republikan, ndërsa nuk është në gjendje të ndryshojë/menaxhojë me krizën e mbeturinave, kaosin në trafik, baltën dhe pluhurin që mbretëron në qytet, e mos të përmendim ndotjen e ajrit…
Plehra në ambiente publike, por edhe grumbuj mbeturinash përreth kontejnerëve. Kjo është fotografia në muajt e fundit pasi Komuna e Tetovës në disa raste premtoi se një kompani sllovene me të cilën ka nënshkruar kontratë do të fillojë me menaxhimin e mbeturinave.
Por të huajt nuk gjenden askund dhe grumbujt e mbeturinave janë në çdo hap.
Ajo që është shqetësuese është se mbetjet po afrohen më shumë me fëmijët. Në kopshtin e fëmijëve në lagjen Potok të Tetovës ka dalë një deponi e egër dhe në oborr ku ka mbeturina kullosin bagëtitë.
Në një kohë kur qyteti nën Sharr po thyen rekorde për ndotjen e ajrit, ku ditët e fundit përqendrimi i grimcave PM 10 ishte deri në 5 herë më i lartë se kufiri maksimal, autoritetet bashkiake as që lëvizin gishtin për të marrë hapa që do të lehtësonin situatën.
Qyteti po mbytet në kaos trafiku dhe urbanizim të pakontrolluar dhe ajo që është më shqetësuese është se po mbytet edhe në baltë dhe pluhur.