Të fokusuar kryesisht në diskursin e zgjedhjeve presidenciale, jo të gjitha partitë politike kanë publikuar emrat e bartësve të listave për zgjedhjet parlamentare të 8 majit. LSDM-ja një ditë më parë ka vendosur në tavolinë propozimet, në një mbledhje të kryesisë së partisë.

Nga partia e Kovaçevskit do të shkojnë me versionin e dy bartësve paralel të listave. Mirëpo nga atje nuk konfirmojnë emra përveç atij të ish kryeministrit. Deri tani, publikisht kanë pranuar vetëm emrin e kreut të partisë Dimitar Kovaçevski si bartës të listës në njësinë e parë zgjedhore. Kurse jozyrtarisht, në njësinë e dytë zgjedhore me listën pritet të udhëheqin Sanja Llukarevska dhe Fatmir Bytyqi. Ish ministri i Brendshëm Oliver Spasovski pritet të jetë bartës në njësinë e tretë kurse Venko Filipçe përflitet për një rikthim të mundshëm si bartës së njësinë e katërt bashkë me Jovana Trençevskën. Ministrja e Mbrojtjes Sllavjanka Petrovska pritet të jetë bartëse në njësinë e gjashtë. Si emra që mund të mbushin vendet e zbrazura të bartësve llogariten Jovan Mitrevski, Bisera Kostadinova, Mile Zeqeviq dhe partnerja e koalicionit Monika Zajkova.

LSDM
1. Dimitar Kovaçevski &
2. Sanja Llukarevska & Fatmir Bytyqi
3. Oliver Spasovski &
4. Venko Filipçe & Jovana Trençevska
5. /
6. Sllavjanka Petrovska &

Të konfirmuar deri tani edhe nga kreu i partisë janë emrat e bartësve të listave të VMRO-DPMNE-së. Hristijan Mickoski për herë të parë hyn në listat e kandidatëve për deputetë si bartës, edhe atë në njësinë zgjedhore numër një. Në njësinë e dytë do të jetë nënkryetari i partisë Vllado Misajllovski, në të tretën deputeti Dragan Kovaçki, në të katërtën do të jetë Aleksandar Nikollovski, ndërsa në të gjashtën deputetja Dafina Stojanovska. Partia ende nuk ka vendosur kandidat për njësinë e pestë zgjedhore.

VMRO – DPMNE

1. Hristijan Mickoski
2. Vllado Misajllovski
3. Dragan Kovaçki
4. Aleksandar Nikollovski
5. /
6. Dafina Stojanovska

Disa nga bartësit i kanë konfirmuar edhe nga koalicioni opozitar shqiptar VLEN. Tashmë dihet se liderët e partive të koalicionit do të jetë në krye të listave, edhe atë Izet Mexhiti në njësinë zgjedhore numër 1, Afrim Gashi në njësinë zgjedhore numër 2, Bilall Kasami në njësinë zgjedhore numër 6 dhe një kuadër i Aleancës për Shqiptarët në njësinë zgjedhore numër 5.

VLEN
1. Izet Mexhiti
2. Afrim Gashi
3. /
4. /
5. Kuadër i ASH-së
6. Bilall Kasami

Asnjëri nga BDI-ja deri tani nuk i ka konfirmuar emrat që përfliten si bartës të mundshëm të listave të tyre. Madje flitet hapur edhe për mundësinë e koalicionit të përbashkët të partisë së Ahmetit me ASH-në krahun e Ziadin Selës, me partinë Populli të Skender Rexhepit, me Partinë Demokratike Evropiane te Arjanit Hoxhës dhe me PDSH-në e Menduh Thaçit. Disa nga drejtuesit e lartpërmendur të këtyre partive, përfliten edhe si bartës të mundshëm të listave të përbashkëta për deputetë të këtij koalicioni, të cilin nuk e kanë konfirmuar akoma palët.

Listat e kandidatëve për deputetë dorëzohen në KSHZ e shumta deri më 2 prill, 35 ditë para mbajtjes së zgjedhjeve. Fushata zgjedhore për zgjedhjet parlamentare fillon më 18 prill.

alsat