Forumet e Sali Berishës vendosën të kërkojnë një strehë të re për zgjedhjet e 14 majit pas humbjes së vulës në Apel.
Në tryezë u hodhën dy opsione, por shumica mbështeti futjen në betejën e pranverës me koalicion.
“Pati ide për koalicion dhe kandidatë të pavarur. Këshilli vendosi që do të hyjmë me koalicion”, tha Edi Paloka, deputet i Partisë Demokratike.
Mbledhjet e fundjavës zyrtarizuan martesën tretë politike mes Berishës dhe Metës, ku vula dhe sigla e partisë së lire por edhe Vangjel Dules do jenë çelësi për të regjistruar kandidatët e primareve.
“Janë disa parti me të cilat kemi marrëveshje. Janë teknikalitete që do të zgjidhen dhe nga kryesia PL, Partia e të Drejtave të Njeriut dhe parti të tjera. Emri i koalicionit nuk është vendosur ende. Nesër regjistrojmë koalicionin në KQZ”, shtoi Paloka.
Para regjistrimit të koalicionit, Berisha tentoi të regjistrojë Partinë Demokratike i pari edhe pse të drejtën me vendim Apeli e ka grupimi Alibeaj, që do i drejtohet të hënën KQZ zyrtarisht.
Pas gjyqit të vulës pala humbëse duhet t’i dorëzojë çelësat e partisë, Enkelejd Alibeajt por ky i fundit bashkë me Lulzim Bashën janë shpallur non-grata nga Sali Berisha. Pasi i morën partinë hakmarrja e Berishës pritet të jetë shpejt si fillim ndaj Lulzim Bashës për të cilin lajmëroi mbështetësit se ka në dorë të dhëna të reja për t’i rihapur procesin për larje parash.
Top Channel