Reportazhi për fshatin Malbardhë, i ciklit “Shqipëria Tjetër” të gazetarit Marin Mema në Top Channel, është një ndër 5 kandidatët për të fituar çmimin ndërkombëtar të Fondacionit “Jacques Chirac” në Francë. Ai është kualifikuar për në fazën finale, mes mbi 100 kandidaturave nga e gjithë bota.

Për këtë çmim nominohen personalitete nga të gjitha vendet, por është hera e parë që nominohet një komunitet i tërë, si ai i fshatit Malbardhë.

Një vit më parë, gazetari Marin Mema solli realitetin e fshatit Malbardhë, një komuniteti me mbi 95 për qind myslimanë, i cili në bashkëpunim me pakicën dhe kishën katolike ka kontribuuar në mënyra të ndryshme, sipas mundësive, për ringritjen e kishës së vjetër të fshatit.

Një rast ky, tregues i tolerancës dhe bashkëjetesës, që bëri xhiron e mediave botërore. Ish-ministri i Jashtëm i Shqipërisë, Besnik Mustafaj, dhe një ndër intelektualët më në zë në vend, është një ndër 12 anëtarët e Komitetit të këtij çmimi, i përbërë nga personalitete botërore të fushave të ndryshme, rrëfen rrugëtimin e këtij reportazhi.

“U prit jashtëzakonisht mirë. Në 5 apo 6 raunde, nga mbi 100 kandidatura që ishin në fillim, në dhjetor të vitit të kaluar kur edhe filloi shqyrtimi i tyre, tashmë ka mbërritur në 5 kandidaturat më solide. Gjë që është një vlerësim shumë i madh, qoftë për shembullin që kanë dhënë banorët myslimanë të Malbardhës, ashtu edhe për punën që ka bërë gazetari për publikimin e këtij eventi”, tha Besnik Mustafaj.

Për të kuptuar rëndësinë e këtij çmimi, thekson zoti Mustafaj, mjafton të shikosh fituesit e viteve të mëparshme.

“Për ta shpjeguar pak më mirë, përpara 3-4 vitesh fitues i këtij çmimi ka qenë drejtuesi i San Edigios, që ka një aktivitet tani në Vatikan, para 2-3 vitesh fituese ka qenë pakistanezja Malala Yousafzai, e cila mori vitin e kaluar edhe Çmimin Nobel për Paqe. Gjithashtu është edhe një çmim i shpërblyer shumë mirë, plot 100 mijë euro për fituesin, çmim që jepet në Paris në nëntor të këtij viti”, tha më tej Mustafaj.

Sipas zotit Mustafaj, kjo kandidaturë ka thyer tabutë e mëparshme.

“Ishte hera e parë që merrej shumë seriozisht një kandidaturë jo vetëm nga Ballkani, por edhe nga gjithë Europa, përveç europianëve që kanë punuar në Afrikë apo në Lindjen e Mesme. Flasim gjithnjë për europianë brenda kufijve të Europës”, theksoi Mustafaj.

Pas publikimit në ciklin “Shqipëria Tjetër”, Malbardha ishte edhe tema që u trajtua në Galanë e Fundvitit në Top Channel, ku u zyrtarizua edhe nisma për të mbështetur ndërtimin e rrugës në këtë fshat. Një rrugë, që ka nisur të ndërtohet si pasojë e kësaj nisme, në bashkëpunim me qeverinë shqiptare.

/ Top Channel