Në Tiranë, ish ministri i Brendshëm Saimir Tahiri, i akuzuar për lidhje me një grup shqiptar që merrej më trafikun e lëndëve narkotike drejt Italisë, u paraqit sot për herë të parë përpara prokurorëve që po hetojnë ndaj tij

Zoti Tahiri qëndroi në zyrat e Prokurorisë për Krimet e Rënda për më shumë se dy orë, gjatë së cilave ai u mor në pyetje. Ish ministri i Brendshëm shoqërohej nga dy avokatët e tij mbrojtës. Pas daljes nga Prokuroria zoti Tahiri tha se kishte dhënë shpjegimet e tij përpara prokurorëve dhe se ka shprehur gatishmërinë për t’ju përgjigjur çdo kërkese të prokurorisë.

Dy ditë më parë me votat e së majtës Parlamenti rrëzoi kërkesën e Prokurorisë për të marrë autorizimin për arrestimin e tij, ndërkohë që pranoi lejimin e kontrollit të banesës apo dhe ndalimin e lëvizjeve të tij jashtë vendit. Opozita nga ana e saj e konsideroi vendimin e shumicës një dëshmi të lidhjeve të saj të ngushta me krimin.

Zoti Tahiri u vu nën hetim 10 ditë më parë. Dje 4 oficerë të policisë gjyqësore kontrolluan për më shumë se dy orë banesën e tij. (voa)