Në Maqedoni, Lidhja Social Demokrate e opozitës ka rënë dakord të martën mbi metodologjinë për pastrimin e listës zgjedhore. Kjo vlerësohet si arritje e marrëveshjes midis katër partive kryesore për listën zgjedhore, që mund t’i hapë rrugën zgjedhjeve të parakohëshme parlamentare në vend. Të dhënat e votuesve, në bazë të metodologjisë së propozuar nga Komisioni Shtetëror i Zgjedhjeve, do të merren nga institucionet shëndetësore, nga zyrat e gjendjes civile dhe institucione të ngjashme.

Maqedonia me rreth dy milion banorë ka afërsisht 1 milion e 800 mijë votues të regjistruar, një shifër kjo mjaft e diskutueshme. Edhe komuniteti ndërkombëtar dhe organizatat vëzhguese të zgjedhjeve, prej vitesh kanë bërë vërejtje për mungesën e pastrimit të listës zgjedhore. Ekspertët mendojnë se mungesa e një liste të besueshme zgjedhore krijon mundësi për manipulime të procesit. Madje, edhe në publikimet e bisedave telefonike nga skandali i përgjimeve dëgjohen zyrtarë të lartë qeveritarë duke folur për manipulime me votat.

Nga ana tjetër, opozita maqedonase nuk ka dhënë sinjale se do të marrë pjesë në zgjedhje, nëse ato mbahen më 24 prill, ashtu siç parashikon marrëveshja politike e 2 qershorit dhe 15 korrikut. (I.R.)