Izraeli tha të dielën se do të fillojë të ofrojë dozën e tretë të vaksinës Pfizer/BioNTech kundër koronavirusit, për të rriturit me sistem të dobët imunitar.
Përhapja e shpejtë e variantit Delta të koronavirusit ka rritur rastet në Izrael gjatë muajit të kaluar, nga numra njëshifrorë në rreth 450 në ditë.
Ministri i Shëndetësisë i Izraelit, Nitzan Horowitz, tha se të rriturit me sistem të dobët imunitar, që kanë marrë dy doza të vaksinës Pfizer/BioNTech, mund të marrin edhe dozën e tretë përforcuese.
Kompanitë Pfizer dhe BioNTech – furnizueset kryesore të Izraelit me vaksina – thanë të enjten se do të kërkojnë nga rregullatorët shëndetësorë në SHBA dhe Evropë që të autorizojnë dozën e tretë përforcuese.
Dy kompanitë përmendën një rrezik në rritje të infeksionit gjashtë muaj pas imunizimit me dy doza.
Edhe pse shkaktuan kritika nga disa shkencëtarë dhe zyrtarë, ato nuk i ndanë të dhënat që tregojnë për atë rrezik, por thanë se së shpejti do të bëhen publike.
“Ne jemi duke e shqyrtuar këtë çështje dhe ende nuk kemi përgjigje përfundimtare”, tha Horowitz.
“Në çdo rast, ne po administrojmë tani dozën e tretë për njerëzit që vuajnë nga mungesa e imunitetit”, shtoi ai.
Rreth 5.7 milionë njerëz nga popullsia 9.3-milionëshe e Izraelit kanë marrë së paku një dozë të vaksinës kundër koronavirusit.
Sipas autoriteteve shëndetësore atje, rreth gjysma e 46 pacientëve që janë në gjendje të rëndë dhe të hospitalizuar në Izrael, janë të vaksinuar.
Shumica e tyre thuhet se janë nga grupet e rrezikut.
Udhëheqësi i Departamentit të Shëndetit Publik në Ministrinë e Shëndetësisë në Izrael, Sharon Alroy-Preis, tha se autoritetet nuk do të nxitojnë për t’i dhënë doza përforcuese publikut të gjerë.
Izraeli: Bie efektiviteti i vaksinës Pfizer
Izraeli ka njoftuar se efektiviteti i vaksinës Pfizer/BioNtech ka rënë, pavarësisht se ajo mbetet shumë efektive në parandalimin e simptomave të rënda të sëmundjes COVID-19.
Njoftimi vjen pas përhapjes gjithnjë e më të lartë të variantit Delta të koronavirusit dhe heqjen e kufizimeve të distancimit fizik në Izrael.
Ministria e Shëndetësisë e Izraelit tha se efektiviteti i vaksinës në parandalimin e infektimit dhe të sëmundjes me simptoma ka rënë në 64 për qind, por ajo mbetet 93 për qind efektive në parandalimin e hospitalizimeve dhe simptomave të rënda të sëmundjes.
Në deklaratën e saj, Ministria e Shëndetësisë nuk ofroi të dhëna për nivelin e mëparshëm të efektivitetit ose ndonjë të dhënë tjetër, raporton Reuters.
Megjithatë, në muajin maj, zyrtarët izraelitë publikuan një raport në të cilin thuhej se dy doza të vaksinës së Pfizer sigurojnë 95 për qind mbrojtje kundër infeksionit, shtrimit në spital dhe simptomave të rënda të sëmundjes.
Një zëdhënës i kompanisë Pfizer nuk ka pranuar që të komentojë të dhënat e shtetit të Izraelit, por ai u bëri jehonë të dhënave nga kërkimet tjera që tregojnë se antitrupat e nxitura nga vaksina janë në gjendje të neutralizojnë të gjitha variantet e koronavirusit, përfshirë atë Delta, megjithëse me një fuqi më të ulët.
Izraeli ka qenë kampion në fushatën e imunizimit të popullsisë 9.3 milionëshe.
Rreth 60 për qind e banorëve kanë marrë të paktën një dozë të vaksinës së Pfizer.
Në janar, Izraeli regjistronte deri në 10.000 raste në ditë, ndërsa muajin e kaluar në këtë shtet u regjistruan në ditë raste njëshifrore.
Përmirësimi i situatës epidemiologjike bëri që Izraeli të heqë pothuajse të gjitha masat kufizuese.
Në të njëjtën kohë, në Izrael sikurse në pothujase gjitha vendet e botës, varianti Delta i koronavirusit filloi të mbizotërojë rastet e reja të të infektuarve.
Numri i rasteve të reja në Izrael gradualisht po rritet si dhe i personave me simptoma të rënda.
Për shembull, të dielën u regjistruan 343 të infektuar, ndërsa numri i të sëmurëve rëndë u rrit në 35 nga 21.
Eksperti i Institutit të Shkencës, Weizmann, në Izrael, Eran Segal, tha se nuk ka ndonjë mundësi që vendi të përballet me rritje të shtrimeve në spital.
Ai tha se është mirë që jeta të vazhdojë në normalitet dhe pa kufizime, por duke shtuar shkallën e vaksinimit.
Varianti Delta i koronavirusit, për të cilin Organizata Botërore e Shëndetësisë thotë se është më ngjitës, ka shkaktuar shqetësim në shumë vende të botës.
Ekspertët e shëndetit publik në Shtetet e Bashkuara theksojnë se fushatat e imunizimit janë çelësi për të mposhtur pandeminë e COVID-19, veçanërisht pasi mutacionet, siç është varianti Delta, po vazhdojnë të shfaqen.
Sipas ekspertëve, të trija vaksinat e autorizuara në Shtetet e Bashkuara – Pfizer, Moderna dhe Johnson & Johnson – kanë rezultuar të efektshme në mbrojtjen nga varianti Delta.
Megjithatë, disa studime tregojnë se niveli i mbrojtjes është pak më i ulët sesa kundër varianteve të para të koronavirusit.
Varianti Delta është mbizotërues në Britani të Madhe, mirëpo kryeministri Boris Johnson tha më 5 korrik se vendi i tij, nga data 19 korrik, do të heqë shumicën e kufizimeve.