Krerë të lartë të forcave paqeruajtëse të NATO-s nuk e përjashtojnë mundësinë e tensioneve në veri të Kosovës kur të skadojë afati i regjistrimit të makinave me targa serbe më 31 tetor. Në Kosovë thonë se situata mund të tensionohet në veri të Kosovës, nëse nuk ka pajtim politik ndërmjet Kosovës dhe Serbisë.

Sipas krerëve të forcave paqeruajtëse të NATO-s në Kosovë, situata aktualisht  në veri është e qetë, por e brishtë. Ata nuk e kanë përjashtuar mundësinë e tensioneve të reja, pas skadimit të afatit i regjistrimit të makinave të serbëve deri më 31 tetor.

Zëvendëskomandanti i KFOR-it, Luca Piperni, ka thënë se KFOR-i mund ta rrisë numrin e forcave rezervë në rast të eskalimit të situatës.

Për këtë kryetari i Komisionit Parlamentar për Çështje të Sigurisë dhe Mbrojtjes, Bekë Berisha, thotë se situata mund të tensionohet dhe për këtë KFOR-i ka marrë të gjitha masat e duhura.

”Ne kemi problem direkt me Serbinë. Jemi në negociata dhe situata qysh tani është e tensionuar. Situata mund të keqësohet dhe KFOR-i normalisht që i merr të gjitha masat e veta”, thotë Berisha.

“Situata edhe mund të tensionohet edhe pse veç është e tensionuar. Përndryshe shtetet e tjera të Evropës, kanë tension dhe janë të vetëdijshëm për rrezikun, andaj duhet të jemi të vetëdijshëm edhe ne”.

Drizan Shala, ekspertë i çështjes, së sigurisë thotë se mund të pritet tensionim i situatës nëse nuk do të ketë pajtim politik ndërmjet Kosovës dhe Serbisë.

“Kemi të bëjmë këtu me 600-1000 persona ushtarakë që kanë ardhur në kampin Bondsteel dhe janë duke kryer disa aktivitete operacionale në territorin e Kosovës, në bashkërendim edhe me EULEX-in, bazuar në atë që mund të ketë tensionim të situatës, nëse nuk arrihet një marrëveshje ndërmjet Kosovës dhe Serbisë”, thotë Shala.

“Pra, edhe nga aspekti i sigurisë mund të pritet tensionim  dhe eskalim i situatës.”

Ditët e fundit është raportuar se në Kosovë ka ardhur një kontingjent ushtarak nga Mbretëria e Bashkuar. Më 31 korrik kur Qeveria e Kosovës vendosi reciprocitet në dokumente udhëtimi dhe targa të makinave serbe, në veri të Kosovës pati përleshje ndërmjet Policisë së Kosovës dhe serbëve lokalë.

Serbët vendosën barrikada në rrugë dhe ato u larguan vetëm kur ndërhynë forcat paqeruajtëse të NATO-s dhe qeveria e Kosovës ra dakord të shtyjë afatin për zbatimin e vendimit për targa deri më 31 tetor.

rk