Pas sulmit terrorist në Shiraz, presidenti rus e siguron Iranin për mbështetjen në luftën kundër terrorizmit. Por çfarë do të thotë kjo për protestat masive aktuale në vend?
Presidenti rus Vladimir Putin ka njoftuar se dëshiron të forcojë bashkëpunimin me Iranin në luftën kundër kërcënimeve terroriste. “Dua të rikonfirmoj gatishmërinë e palës ruse për të zhvilluar më tej bashkëpunimin me partnerët tanë iranianë në drejtim të luftës kundër terrorizmit”, thuhet në një telegram të Putinit drejtuar presidentit iranian Ebrahim Raisi. Ai u publikua të enjten në faqen e internetit të Kremlinit.
Putin shprehu ngushëllimet e tij për liderët e Teheranit pas sulmit në qytetin e Shirazit. Milicia terroriste e Shtetit Islamik (IS) mori përgjegjësinë për sulmin e së mërkurës. Të paktën 15 persona u vranë. Është e paqartë nëse akti lidhet me protestat aktuale masive kundër qeverisë në Teheran.
Shtetet e Bashkuara kishin shprehur së fundmi drojën se Rusia mund të ndihmonte Iranin të shtypte protestat masive në vend. “Ne e dimë se ata mund të shqyrtojnë një lloj mbështetjeje për aftësinë e Iranit për të vepruar kundër protestuesve dhe për fat të keq Rusia ka përvojë me këtë,” tha drejtori i komunikimit i këshillit për sigurinë kombëtare, John Kirby. I pyetur nga gazetarët, ai tha se nuk ishte e qartë nëse kjo mbështetje e supozuar kishte filluar apo jo.
Në Bruksel, Bashkimi Evropian dënoi masat ndëshkuese të shpallura nga Irani kundër politikanëve, gazetarëve dhe institucioneve evropiane. Në vend që të fokusohet në hakmarrje, Irani duhet të garantojë liritë themelore të popullit të vet, tha Përfaqësuesi i BE-së për Politikën e Jashtme, Josep Borrell. Regjimi islamik dëshiron në veçanti të sanksionojë seksionin e gjuhës persisht të Deutsche Welle-s dhe kryeredaktorët e gazetës “Bild” Johannes Boie dhe Alexandra Würzbach. Ai i akuzon ata për “mbështetje të terrorizmit”.
Protestat në Iran, të shkaktuara nga vdekja e një të reje pasi ajo u arrestua nga policia e moralit, kanë tronditur vendin prej javësh. Udhëheqësit e Teheranit i quajnë këta protestues terroristë.
aud (dpa, dlf)