All posts by V.F.

Analiza

GJUMI I RIT FËMIJËT, POR AMA I VDES POPUJT

Komento

Jo me bombat e Kryetarit të opozitës por edhe me topat e Sulltan Hamitit në rast se gjuajmë, nuk do ta zgjojmë nga gjumi pozitën dhe ndihmësin e saj ,,opozitën,, shqiptare. Nuk ngeli më asnjë vlerë morale e pushtetarëve, ky është kiameti. Kryetari i ,,dërzhavës,, e shkarkon zëvendës drejtorin shqiptar të shërbimeve sekrete dhe partia shqiptare në pushtet, nëpërmjet të një komunikate e informon opinionin se nuk pajtohet me këtë punë. Po kush e pyet varësen e çelësave (BDI) se kur duhet të niset dhe kur duhet të fiket makina.Ish ushtarëve të UÇK, u plasi durimi dhe u tubuan para selisë së Partisë së tyre njerkë. Edhe kësaj radhe ua lanë kokën me akull. Natyrisht, aty ishte deputeti i ,,zgjedhur,, i Strugës, Zv. Kryeministri, Musa Xhaferi i Zajazit, i cili u dha tri herë më shumë premtime se sa do tu kishte dhënë Komandanti i atyre. Nuk e dinë ata se politika e tharton karakterin e ,,njeriut,,. Edhe guri mban peshë të madhe, por edhe ai e ka një kufi. S,ka më keq, se kur të shpërthen bomba në dorë.
Duke u nisur nga fakti që kjo qeveri është duke i armatosur me armë ofanzive dhe më moderne vetëm njësitet elitare të policisë dhe të ushtrisë, dhe e ka lënë pas dore pajisjen me armatime moderne ushtrinë dhe duke e marr parasysh gjendjen politike të momentit, nuk më habit fakti në rast se një ditë zgjohemi nën pushtetin e një Junte policore, natyrisht në ,,dobi të popullit dhe të ruajtjes të rendit kushtetues,,. Policia dhe shërbimet sekrete (buxheti për policinë dhe për shërbimet sekrete ,është dhjetë herë më i madh se buxheti për ushtrinë) janë nën kontroll të drejtpërdrejtë të partisë në pushtet VMRO, që do të thotë: Partia e Brendshme Revolucionare Maqedonase. Është revolucionare, pasi sipas doktrinës së VMRO, revolucioni për një Maqedoni me Selanikun e Korçën brenda, akoma nuk ka mbaruar. VMRO si partner të koalicionit me BDI-në e ka edhe Partinë TMRO, që do të thotë: Partia Ilegale Revolucionare Maqedonase. Kësaj punë në kohën e Revolucionit të Xhon Turqve të Rinj, (1908) i thonin: Jashasën Hyrijet-Shashërdi Milet (rroftë republika u trullos populli)
Duhet theksuar se në njësitet elitare policore, sikurse që janë: Ujqit, Tigrat, Luanët, Skorpionët, Njësiti i blinduar Pancir, Gjashtë drejtoritë civile për zbulim dhe për kundërzbulim, tre Shërbimet Sekrete të ushtrisë dhe në disa dhjetëra Institute dhe institucione që merren me çështje të sigurisë, prania e shqiptarëve matet me një ose dy përqind.
Zëvendës ministrat dhe as ministrat shqiptar (kompetent) sikurse që është Ministri i Drejtësisë dhe Zv. Ministri i policisë , as që informohet ose konsultohet për aksionet e Njësiteve speciale të policisë ose të ushtrisë. Kjo është konstatuar disa herë nga deklarata shumë kontradiktore të përfaqësuesve shqiptarë dhe të atyre maqedonas në polici. Gjatë këtyre njëzet e pesë viteve, gjithnjë ka pasur nga ndonjë zëvendës ministër të punëve të brendshme shqiptar, por gjatë të gjithë aksioneve të policisë, qoftë të asaj të rregullt ose të njësiteve speciale , shqiptarët i ka zënë në gjumë.
Jo që shqiptarët nuk respektohen si partnerë të koalicionit, por ata injorohen , përbuzen dhe nënçmohen, kurse ata vazhdojnë të qëndrojnë të kapur për pushteti si i piri për gardhi. Një herë koalicion, për të gjithë jetën koalicion, njëlloj si mjellmat.
Brenda ,,dërzhavës,, po vlon skena politike. Pothuajse është burgosur lideri i opozitës. Pushteti e akuzon liderin e opozitës për të gjitha matrapazllëqet që i ka bërë vetë; sikurse që janë; përgjimet, partizimin e administratës, kontrolli ndaj gjyqeve dhe të gjithë instituteve dhe të institucioneve të shtetit. Keqpërdorimi i qindra milionë Euro për projektin qesharak ,,Shkupi 2014,,, për burgosje dhe eliminim të kundërshtarëve politikë . Pozita e akuzon opozitën se për dhjetë vjet të sundimit të kësaj pozite, është dyfishuar borxhi i jashtëm. Opozita dhe shqiptarët akuzohen për dështimin e regjistrimit të popullsisë dhe të pronave në vitin 2010, i cili ,,dështoi,, pasi partia në pushtet e konstatoi se i doli hileja në shesh, ku në një vend me dy milionë na dolën një milion e tetëqind mijë votues, nga të cilët treqind mijë fiktivë. Shqiptarët dhe opozita kanë faj që pushteti nuk ka një regjistër qendror të zgjedhësve, që të mos mundet i njëjti person të votojë në disa vendvotime, natyrisht me dokumentacione falso, sikurse që u vërtetua mënyra se si votonin banorët e Liqenasit, të cilit Sali Berisha ia ndërroi emrin në Pustec. Fshati digjet plaka krihet. Për pothuajse burgosjen e liderit të opozitës, i cili është kulaç nga i njëjti brumë si pozita kur janë në pyetje shqiptarët, PDSH është futur në çintjane, kurse BDI, kërkon të respektohet Prezumpcioni i Pafajësisë, sikurse në rastin e ,,Monstrumit,, dhe shumë proceseve të tjerë të montuar.

Partia shqiptare në pushtet BDI, bashkë me nëndegën e vetë PDSH dhe jaranët e tyre në Kosovë, si duket janë në rrugë të mbarë që ta zgjidhin çështjen shqiptare. Forca më vitale dhe promotori i zhvillimeve shoqërore, ekonomike dhe politike, po largohet me të madhe nga trojet e veta. Mos u habisni, në rast se në zgjedhjet e ardhshme nuk do të mundemi më të zgjedhim prefektin shqiptar në Strugë ,në Dibër dhe në Kërçovë. Ky është rezultati i gjumit të BDI dhe nëndegës së saj PDSH. Opozita e vendit dhe shqiptarët që nuk kanë qasje te grazhdi, janë fajtorë që ,, dërzhava,, është në vendin e 123, sa i takon lirisë së 35ve. Partia shqiptare në pushtet dhe nëndega e saj, PDSH nuk e vënë aspak në zjarr ujin se në Luginën e Pollogut helmohen me materie radioaktive qindra dhe mijëra qytetarë, se pronari rus mundet aty të asgjësojë edhe materie radioaktive. Ministër i Ekologjisë është një shqiptar,edhe prefektja e Tetovës është shqiptare. Si është e mundur kur një popull i i tërë është ngritur në këmbë për ta mbyllur Vrasësin ,Jugohrom, këta nuk luajnë as me gishtin e vogël. ,,Dërzhava,, është e dyzeta për nga shërbimet shëndetësore nga 40 vende të Evropës. Sa u takon lirive dhe të drejtave të njeriut ,, dërzhava,, është në një listë me Angolën, Kolumbinë dhe Afganistanin, diku nga vendi i 123.
Edhe kësaj radhe miqtë tanë ndërkombëtarë ishin konsekuent në deklaratat e tyre, njëlloj sikurse me Procesin e montuar ,Monstra,. Ata thanë se duan të shohin një proces të drejtë dhe konsekuent, njëlloj si gjithë të tjerët. Është i freskët Procesi për vrasjet te liqeni i Smilkovcit afër Shkupit, ku në një proces të montuar , pesë shqiptarë u dënuan me burgim të përjetshëm, edhe pse nuk u gjet as arma e krimit, as dëshmi konkrete, as gjurmë të vrasësve, as motivi, as ndonjë lloj mjeti me të cilin ,,është kryer,, krimi. Argumenti kryesor i pushtetit ishte Dëshmitari i Mbrojtur. Pushtete diktatorial, gjithnjë do të gjejnë edhe njëqind , dëshmitarë të mbrojtur në rast se e do nevoja. Edhe me rastin e procesit ,,monstra,, përfaqësuesit e organizmave ndërkombëtarë i dhanë deklaratat e njëjte sikurse me rastin ,,PUÇ,, që do të thotë Grusht shteti. Të gjitha këto ndodhin në një kohë kur ministër i drejtësisë është shqiptar-fatkeqësisht kuadër i BDI, për të cilin kisha një respekt të madh. Në vend po ndodhin edhe vlimet me ri-testimet e nxënësve , studentëve dhe të profesorëve. Ministër i Arsimit është gjithashtu një kuadër i BDI, thonë se është një inxhinier i xehetarisë. Çfarë norme pedagogjike, metodike ose didaktike njeh një inxhinier i xehetarisë, i cili është në krye të një ministrie me 14 sektorë ku pothuajse nuk ka asnjë shqiptar. Kush do ti ushqejë me informata ministrat shqiptarë në rast se nuk kanë bashkëpunim me drejtorët e sektorëve, të cilët sipas instruksioneve dhe informatave që i kam i bojkotojnë, natyrisht që punën ta kryejnë sekretarët dhe shefat e sektorëve, ku të gjithë janë joshqiptarë.
Stejt Department, Komiteti i Helsinkit dhe të gjithë organizmat e tjerë të vendit dhe të huaj, që merren me të drejtat e njeriut, alarmojnë për një situatë të tensionuar në vend. Fajtorë të mëdhenj në këto rrethana janë edhe BDI, të cilët ia mbrojnë mizat Gruevskit bashkë me nëndegën e saj PDSH , e cila e pengon bashkimin ose ndonjë fitore të opozitës, por jo edhe për shumë gjatë. (rasti i Gostivarit, kur PDSH ndihmoi që për Prefekt të Gostivarit të zgjidhet kuadër i BDI, që nuk është aspak normale, mirëpo ky votim ka qenë pazari me Shërbimet sekrete të vendit. Disa ditë përpara zgjedhjeve të fundit lokale Kryetari i PDSH u kap me presh në dorë në një takim sekret me Shefin e Shërbimeve Sekrete të ,,dërzhavës,,).
Shqiptarët nuk duhet ta shohin ardhmërinë e vetë duke ikur në dhe të huaj. Toka e jonë është pjellore, e bukur dhe e begatë, natyrisht , për ata që e duan punën gjithnjë ka një mundësi. Dielli lind për të gjithë.
Strugë, 04 shkurt 2015 / Shpëtim Pollozhani

Maqedonia

Diplomatet ndezin alarmin! Seriozisht të brengosur dhe shqetësuar për situatën

Komento

Ambasadorët e vendeve të BE-së në Maqedoni, siç mëson ALSAT M nga burime diplomatike, në takimin e mbrëmshëm kanë shfaqur shqetësimin e tyre serioz për situatën në vend. Takimi është thirrur dhe ka qenë i fokusuar vetëm mbi rastin “Puçi” në të cilin kryeministri Gruevski akuzoi liderin e opozitës Zaev për kërcënim dhe grusht-shtet. Në këtë takim është analizuar situata e re e krijuar në vend dhe janë shqyrtuar të gjitha mundësitë dhe pasojat që mund të burojnë nga ajo. Sipas burimeve të ALSAT M, diplomatët e huaj kanë ndezur alarmin mbi seriozitetin e situatës në vend. Në reagimet e para zyrtare që patën menjëherë pas konferencës denoncuese të kryeministrit Nikolla Gruevski, ata iu bënë thirrje institucioneve maqedonase që t’i hetojnë akuzat serioze në një proces transparent, në përputhje me standardet ndërkombëtare, ku kuptohet, e rëndësishme është prezumimi i pafajësisë. Shqetësimi tjetër serioz që kanë shprehur diplomatët janë marrëdhëniet ndëretnike në vend, e që në këtë rast dikush mund t’i keqpërdor për të shpërqendruar vëmendjen e opinionit nga situata aktuale politike. Nga ana tjetër vazhdon lufta psikologjike mes VMRO DPMNE-së dhe LSDM-së. Në selinë opozitare sot heshtje, pas paralajmërimeve të djeshme se të premten do të vendosin për ditën e fillimit të publikimit të “bombave”. Hesht edhe VMRO DPMNE-ja dhe kryeministri Gruevski, i cili nuk ka bërë paraqitje publike që nga e diela e kaluar. Në pritje të zhvillimeve të reja edhe partitë shqiptare, BDI dhe PDSH. Partia e Ahmetit mbetet në reagimin fillestar për procedim transparent të akuzave, ndërsa PDSH-ja ende nuk është prononcuar lidhur me “bombat” dhe akuzat për “puç”. Benjamin Arifi

Maqedonia

Fërçkovski: Shqiptarët të papërfaqësuar. Goshev Sistemi krijon pabarazi ekonomike

Komento

Njohësit e çështjeve politike parashikojnë skenarë akoma më të zi si dhe përshkallëzim të mundshëm të situatës edhe në planin ndëretnik. Sipas Lubomir Fërçkovsit stabiliteti i Maqedonisë qëndron mbi këmbë të qelqta për faktin se çështjet e sigurisë janë vendosur mbi baza klienteliste, korruptive mes partive në qeveri. Ndërkohë që pjesa më e madhe e shqiptarëve të Maqedonisë, sipas Fërçkovskit janë të papërfaqësuar. “Shqiptarët janë grupacion i papërfaqësuar në Maqedoni, partia monopoliste e cila i bën marrëveshjet kryesore për to bazohet tek 20% i trupit të tyre votues, ndërkohë që trupi votues i shqiptarëve në Maqedoni mbi 52% është e papërfaqësuar, ky është një problem serioz për cilëndo demokraci..është bërthamë e cila mund të shkojë në njërin drejtim apo tjetrin, një element i vogël se si shkoi në një drejtim ishin demonstratat në rastin ‘Monstra’. Aty demonstronin shqiptarë të tjerë, gjykimet e ashpra ndaj këtyre demonstruesve, 3 vjet burg për 10 dritare të thyera, gjykimet e tjera vetëm se kanë marr pjesë në demonstrata të dhunshme pa bërë asgjë, as nuk u komentuan nga BDI, sepse këta janë shqiptarë të tjerë që ata nuk i njohin”, deklaroi Lubomir Fërçkovski.

Nga ana tjetër sipas ish ministrit të financave Petar Goshev,burim i konflikteve të shumta në vend është edhe pabarazia dramatike ekonomike dhe sociale që ka nxitur qeveria e Gruevskit.

“Në Maqedoni rreziku për shoqërinë maqedonase është ndjenja e pabarazisë e cila prodhon më shumë konflikte se sa që duhet të ketë dhe emigrim masiv nga vendi. 26:30 Nuk ekziston shoqëri demokratike me pabarazi aq të theksuara, zëri politik nuk është i njejtë, fuqia nuk është e distribuuar si duhet është e koncentruar në duar e një grupi të ngushtë të njerëzve”, u shpreh Petar Goshev, ish guverner i BP.

Pjesëmarrësit në debatin e sotëm vunë theksin edhe në mungesën e vëmendjes së duhur të Brukselit dhe Uashingtonit, në kohën kur Maqedonia po shndërrohet në një vend totalitar. Madje sipas Fërçkovskit është e pakuptimtë kërkesa e Bashkimit Evropian për gjykim të drejtë dhe transparent në rastin ‘Puç’ në kohën kur vetë ajo në raportin e progresit ka konstatuar drejtësi selektive dhe gjyqësor të politizuar. Semra Jakupi

Maqedonia

Sindikata multi-etnike: Marrëveshja mes SASHK-ut dhe Ministrisë së arsimit nuk garanton zgjidhje

Komento

Ndërprerja e grevës së mësimdhënësve nga ana e këshillit të SASHK-ut është miratuar pa asnjë konsultim paraprak me anëtarësinë dhe pa plotësimin e asnjë kërkese që kishin mësuesit grevistë. Akuzat në adresë të SASHK-ut i bëri sot Sindikata Multi-Etnike e Arsimit. Kryetarja e kësaj sindikate, Suzana Stefanoviq thotë se Jakim Nedellkov gënjen mësuesit kur thotë se gjobat e testimit ekstern janë hequr dhe gënjen edhe për faktin tjetër se MASH-i do t’i paguaj mësimdhënësit për 11 ditët sa zgjati greva.“Jemi të revoltuar që greva është ndërprerë pa arritur zgjidhje për asnjë nga kërkesat konkrete. Ne përsëri dëgjuam: do të merremi vesh, do të takohemi, do të punojmë në këtë projekt. Gjëja e vetme që dëgjuam është se për një vit janë shtyrë gjobat për mësuesit por edhe kjo nuk është zgjidhje konkrete, thuhet janë shtyrë për një vit dhe më pas do të bisedojmë! Nuk dëgjuam nëse është arritur marrëveshje me Ministrinë, nëse mësuesve grevistë do t’u paguhen mëditjet, por dëgjuam sindikatën se gjoja ministria do të duhet të jap mëditje,’ deklaroi Suzana Stefanoviq, kryetare e Sindikatës Multi-Etnike të Arsimit.

Nga Sindikata Multi-etnike e Arsimit akuzuan SASHK-un edhe për papjekuri dhe prishje të organizimit sindikal në vend.

“Nëse nuk ka ndonjë arsye tjetër pse u ndërpre greva në arsim, atëherë ky është tregues i qartë për diletantizmin e skajshëm të treguar nga ata! Vendimi për ndërprerje të grevës erdhi kur pushteti po përballej me presion të madh me qëllim realizimin e të drejtave të punëtorëve, një ditë para protestave të mësimdhënësve, të cila me siguri do të ishte masive dhe do të ishte forcë shtesë që SASHK-u të realizonte të gjitha kërkesat,” tha Zdravko Savevski, sekretar i SMA-së.

Sindikata Multi-Etnike e Arsimit është nëndegë e Lidhjes së Sindikatave të Maqedonisë dhe nuk ka të bëjë aspak me Sindikatën që organizoi deri tani grevën. Valmir Kuçi

Maqedonia

DioGuardi kritikon qasjen e politikanëve shqiptarë në Ballkan

Komento

Ish-kongresmeni DioGuardi ka theksuar se ka vite që nuk ka takuar ndonjërin nga politikanët shqiptarë, të paktën për të pirë një kafe.Ish-kongresmeni dhe kryetari i LQSHA-së në SHBA, Joe DioGuardi i ka pritur me shqetësim të madh lëvizjet dhe ecuritë e rënda politike dhe ekonomike të shqiptarëve në Ballkan, sidomos ato të fundit në Kosovë.

Përmes një letre dërguar veprimtarëve dhe asociacioneve kombëtare shqiptaro-amerikane qe ka bashkëpunim, DioGuardi ka nënvizuar se investimi i madh politik, diplomatik dhe ushtarak qe është bërë për lirinë, demokracinë dhe pavarësinë e shtetit të Kosovës nga Amerika mike dhe miqtë e saj në Evropë, nuk e ka merituar që tashti të ballafaqohemi me gjendjen e rëndë politike dhe ekonomike, informon INA.

“Dihet se shtetndërtimi nuk bëhet aq lehtë, por klasa politike shqiptare në Kosovë me tërë mekanizmat e saj ligjor (Kushtetuese) duhet të bëjnë vijat e qarta për kahet e reja demokratike dhe të ecurive të zhvillimit ekonomik të Kosovës, ndonëse dihen tashmë resurset e saja të pasura të nëntokës dhe të faktorit më të ri njerëzor shqiptar në Evropë”, thekson ne reagimin e tij Joe DioGuardi.

Duke komentuar ikjen masive të shqiptarëve nga Kosova, Dioguardi nënvizon se Qeveria e Kosovës është e vonuar dhe se ajo është dashur që në këtë drejtim të punojë me projekte konkrete për të zhvilluar resurse të caktuara që do të rrisnin punësimet, konkurrencën, zhvillimin e biznesit privat si dhe forcimin e arsimimit.

Ai shprehet i shqetësuar se përse klasa politike në Shqipëri, Kosovë dhe trevat tjera i ka kthyer shpindën LQSHA-së , e cila në programin e saj ka projekte dhe kahjet konkrete të zhvillimit të këtij rajoni të banuar me shqiptarët.

“Të gjitha këto çështje LQSHA i ka në programin e saj si asociacion lotues për çështjen shqiptare, por ka vite që nuk kam takuar njeri nga politikanët shqiptarë, të paktën për të pirë një kafe”, ka nënvizuar DioGuardi. Por, ai shton se përderisa do ti rrah zemra dhe ti qarkulloj gjaku shqiptarë, ai do të jetë në shërbim të çështjes kombëtare shqiptare në Ballkan.

“E kam thënë dhe po e përsëris, se çështja shqiptare ende nuk është zgjidhur drejtë në hapësirën e Ballkanit të trazuar, ku shqiptarët me shekuj kanë qenë në kandarin e pazareve politike të kohes. Duhet afirmuar vlerat tona si komb dhe jo të jemi në skemën e problemeve, ku të tjerët na konsiderojnë si fajtor kujdestar në rajon”, theksoi ish-kongresmeni DioGuardi. (INA)

Maqedonia

Nesër protestë në Tetovë kundër ndotjes

Komento

Qytetarët e Tetovës nesër sërish do të protestojnë kundër ndotjes së ambientit jetësor dhe rrezikimit të jetëve të tyre. Protesta u paralajmërua nga Lëvizja EcoGuerilla ndërsa ftohen të gjithë qytetarët që të protesojnë në ora 13.00 në sheshin Iliria në qendër të qytetit.

Drejtuesi i EcoGuerilla, Arianit Xhaferi ka bërë thirrje që të gjithë qytetarët masovikisht të dalin në protestë për të ngritur zërin kundër ndotjes dhe rrezikimit të jetës së qytetarëve.

“Është e domosdoshme, sepse nëse presim që dikush tjetër do e bëj – nuk do e bëj askush tjetër. Fatkeqësisht ata që kanë fuqinë të vendosin për këtë gjë – ata shpesh na shohin si vota jo si njerëz, prandaj sa më shumë vota të shohin që u rrezikohet kolltuku i tyre aq më shpejtë do reagojnë, prandaj i lus të gjithë qytetarët që mos ta lënë për një herë tjetër, pra të gjejnë kohën ku do që ta gjejnë dhe të dalin ditën e premte në orën një. Po ashtu do kisha dashur të iu bëj thirrje edhe institucioneve të ndryshme, shkollave, universiteteve bizneseve të ndryshme, që gjatë ditës së premte nga ora 1 deri në orën 2 apo dy e gjysmë sa do të zgjasë protesta që ti lënë të lirë të gjithë punëtorët, të gjithë studentët dhe nxënësit që të dalin sa më tepër sepse është shumë me rëndësi”, deklaroi Arianit Xhaferi nga Lëvizja Eco Guerilla.

Protesta ka gjetur përkrahjen e dhjetërave organizatave joqeveritare në rajonin e Pollogut. Tetova konsiderohet si qyteti më i ndotur në vend, por edhe në Evropë. Ndotja po bëhet kryesisht nga kombinati i industrisë së rëndë “Jugohrom” që gjendet në periferi të qytetit, dhe që edhe përkundër rekomandimeve, Qeveria e lejon ate që të vazhdojë me punë dhe të ndotë masivisht tërë zonën. (INA)

Maqedonia

Nedelkov po gënjen, dënime për arsimtarët do të ketë?

Komento

Ndërprerja e grevës së mësimdhënësve nga ana e këshillit të SASHK-ut është miratuar pa asnjë konsultim paraprak me anëtarësinë dhe pa plotësimin e asnjë kërkese që kishin mësuesit grevistë. Akuzat në adresë të SASHK-ut i bëri sot Sindikata Multi-Etnike e Arsimit.

Kryetarja e kësaj sindikate, Suzana Stefanoviq thotë se Jakim Nedellkov gënjen mësuesit kur thotë se gjobat e testimit ekstern janë hequr dhe gënjen edhe për faktin tjetër se MASH-i do t’i paguaj mësimdhënësit për 11 ditët sa zgjati greva.

“Jemi të revoltuar që greva është ndërprerë pa arritur zgjidhje për asnjë nga kërkesat konkrete. Ne përsëri dëgjuam: do të merremi vesh, do të takohemi, do të punojmë në këtë projekt. Gjëja e vetme që dëgjuam është se për një vit janë shtyrë gjobat për mësuesit por edhe kjo nuk është zgjidhje konkrete, thuhet janë shtyrë për një vit dhe më pas do të bisedojmë! Nuk dëgjuam nëse është arritur marrëveshje me Ministrinë, nëse mësuesve grevistë do t’u paguhen mëditjet, por dëgjuam sindikatën se gjoja ministria do të duhet të jap mëditje,’ deklaroi Suzana Stefanoviq, kryetare e Sindikatës Multi-Etnike të Arsimit.

Nga Sindikata Multi-etnike e Arsimit akuzuan SASHK-un edhe për papjekuri dhe prishje të organizimit sindikal në vend.

“Nëse nuk ka ndonjë arsye tjetër pse u ndërpre greva në arsim, atëherë ky është tregues i qartë për diletantizmin e skajshëm të treguar nga ata! Vendimi për ndërprerje të grevës erdhi kur pushteti po përballej me presion të madh me qëllim realizimin e të drejtave të punëtorëve, një ditë para protestave të mësimdhënësve, të cila me siguri do të ishte masive dhe do të ishte forcë shtesë që SASHK-u të realizonte të gjitha kërkesat,” tha Zdravko Savevski, sekretar i SMA-së.

Sindikata Multi-Etnike e Arsimit është nëndegë e Lidhjes së Sindikatave të Maqedonisë. (s.m.)

Kosova

Qeveria e Kosovës formon komision për faljen e borxheve ndaj shtetit

Komento

Gjatë mbledhjes së Qeverisë së Kosovës të enjten, kjo e fundit ka miratuar vendimin për themelimin e një komisioni, i cili do të shqyrtojë mundësinë për faljen e borxheve për personat fizik dhe juridik.Falja e borxheve nga Qeveria e Kosovës, do të bëhet nga ana e institucioneve shtetërore dhe ndërmarrjeve publike, si dhe të gjitha borxhet që i kanë qytetarët deri më 31 dhjetor të vitit 2008.

Pas mbledhjes se qeverisë, Ministri i Financave, Avdullah Hoti, e ka cilësuar të rëndësisë kapitale vendimin në fjalë.

Ai ka thënë se janë bërë vlerësimet paraprake për borxhet, që bizneset dhe qytetarët kanë ndaj Administratës Tatimore të Kosovës, tatimi në pronë, dhe borxhet ndaj ndërmarrjeve publike në energji, ujë, mbeturina dhe ngrohje.

Në afat prej një muaji, ka thënë ministri Hoti, ky komision do të dalë para qeverisë me propozimin për nivelin e këtyre borxheve dhe procedurat e mëtutjeshme për të legalizuar këtë vendim, në instancat e duhura të Republikës së Kosovës.

“Nuk ka ndryshim më të madh pas luftës që nga viti 1998 – 1999, se në vitin 2008. Prandaj, ne po planifikojmë të bëjmë një prerje në këtë vit, do të falim të gjitha borxhet që qytetarët dhe bizneset kanë ndaj shtetit dhe ndaj ndërmarrjeve publike”, ka thënë ministri Hoti.

Ai ka shtuar se qeveria është duke shqyrtuar edhe mundësinë që pas 31 dhjetorit 2008, të falen ndëshkimet dhe interesi për borxhet që qytetarët dhe bizneset nuk kanë paguar gjatë kësaj periudhe.

Ndryshe, kjo iniciativë mirëpritet nga ekspertë për çështje ekonomike, sipas të cilëve, raste të tilla kanë ndodhur edhe në shtete të ndryshme, të cilat kanë pasur probleme të theksuara sociale.

Ibrahim Rexhepi, udhëheqës i Qendrës Për Studime Strategjike dhe Sociale “STRAS”, në një prononcim për Radion Evropa e Lirë, konsideron se puna e parë e komisionit duhet të jetë ndërtimi i kritereve dhe caktimi i kategorive se kush mund të përfitojë nga vendimi i qeverisë.

“Puna e parë e komisionit nuk duhet të jetë gjetja e shifrave se sa është totali i borxhit, qoftë si obligime fiskale apo shërbime të ndryshme publike, por së pari duhet të ndërtojë kritere, se kujt mund t’i falen borxhet, apo që të fshihen të gjitha borxhet e vjetra”.

“Ky model nuk është aq i aplikueshëm, sepse në shumicën e rasteve merren parasyshë rastet sociale, apo merren parasyshë rastet e qytetarëve më të hyra të vogla dhe pamundësi për pagesën e këtyre borxheve.” thekson Rexhepi.

Sipas Rexhepit, borxhet më të mëdha të konsumatorëve kanë qenë ndaj Korporatës Energjetike të Kosovës, tashmë pas privatizimit, Distribucionit për Furnizim më Energji Elektrike (KEDS), dhe Administratës Tatimore të Kosovës.

Ndryshe, sipas deklaratave të zyrtarëve të disa ndërmarrjeve publike dhe institucioneve shtetërore, dhënë Radios Evropa e Lirë, deri në vitin 2010, thuhet se mbi 320 milion euro ka qenë shuma e konsumatorëve që kanë borxh ndaj Korporatës Energjetike të Kosovës, që nga përfundimi i luftës deri në mesin e dhjetorit të vitit 2007.

Ndërkaq, borxhi i përgjithshëm që tatimpaguesit kanë ndaj Administratës Tatimore deri në tetor të vitit 2008, është mbi 241 milionë euro, prej të cilave rreth 60 milionë euro janë ndëshkime.

Borxhi i konsumatorëve ndaj Ngrohtores se Qytetit “Termokos”, deri në fund të dhjetorit të vitit 2010 ka arritur në 5 milionë e 800 mijë euro. (rel)

Kosova

Vuçiq kërkon që rasti “Jabllanoviq” të diskutohet në Bruksel

Komento

Për pjesëmarrjen e mëtutjeshme të përfaqësuesve të serbëve të Kosovës në institucione, do të vendoset pas takimit të radhës ndërmjet kryeministrave të Kosovës dhe Serbisë, në Bruksel më 9 shkurt.Ky ishte konkluzioni që është prezantuar pas takimit të mbajtur në Beograd, ndërmjet përfaqësuesve të Listës Serbe me kryeministrin e Serbisë, Aleksandar Vuçiq.

Shqyrtimi i pjesëmarrjes në institucione, pasoi vendimin e kryeministrit të Kosovës, Isa Mustafa që të largojë nga qeveria ministrin serb për Komunitete dhe Kthim, Aleksandar Jabllanoviq.

Drejtori i Zyrës për Kosovën në Qeverinë e Serbisë, Marko Gjuriq, ka thënë pas takimit të zhvilluar me Listën Serbe në Beograd se shkarkimi i Jabllanoviqit, e ka përkeqësuar situatën para bisedimeve ndërmjet Prishtinës dhe Beogradit në Bruksel.

“Kemi marrë vendim që hapat e ardhshëm t’i ndërmarrim në interesin e komunitetit serb në Kosovë dhe në interesin e gjithë Serbisë”, ka thënë Gjuriq.

Sipas tij, javën e ardhshme, kryeministri dhe Qeveria e Serbisë do t’i ftojnë në një takim të përbashkët në Beograd të gjithë përfaqësuesit serbë nga Kosova, përfshirë këtu ministrat, deputetët dhe kryetarët e komunave.

Ky takim, pritet të mbahet pas raundit të ri të bisedimeve ndërmjet kryeministrave të Kosovës dhe Serbisë në Bruksel, më 9 shkurt.

Ndërkohë, Aleksandar Jabllanoviq, i shkarkuar nga posti i ministrit për Komunitete dhe Kthim në Qeverinë e Kosovës, sërish ka deklaruar se nuk ndihet i fajshëm për deklaratën e tij.

Ai më 6 janar i kishte quajtur “egërsira” protestuesit në Gjakovë të cilët po përpiqeshin t’i pengonin pelegrinët serb të vizitojnë Gjakovën për Krishtlindjen Ortodokse.

Edhe pse Jabllanoviq kishte kërkuar falje për deklaratën e bërë, kjo situatë kishte nxitur më pas protesta të fuqishme si nga shoqatat e familjarëve të personave të pagjetur të luftës dhe sidomos nga opozita, pas të cilave, kryeministri Isa Mustafa vendosi që të largojë atë nga posti.

Por, Jabllanoviq, vazhdon ta konsiderojë largimin e tij si veprim jo adekuat nga kryeministri i Kosovës.

“Ndihem mirë. E di që nuk kam bërë asgjë të keqe. E di po ashtu që detyra jonë në Kosovë është që të mbrojmë interesat e serbëve dhe të ndihmojmë që të gjithë të dëbuarit të kthehen sërish në Kosovë”, ka deklaruar Jabllanoviq në Beograd.

Me këtë rast, ai i i është referuar Aleksandar Vuçiqit si kryeministër i tij.

Në takimin e ditës së enjte në Beograd, kanë marrë pjesë Aleksandar Jabllanoviq, Branimir Stojanoviq, zëvendëskryeministër në Qeverinë e Kosovës, Lubomir Mariq, ministër i Administrimit të Pushtetit Lokal në Qeverinë e Kosovës dhe Bratisllav Nikolliq, kryetar i zgjedhur i komunës së Shtërpcës dhe kryetar i paligjshëm i emëruar nga Beogradi, i po të njejtës komunë.

Vendimi i kryeministrit Isa Mustafa për largimin e Jabllanoviqit, sipas zëdhënësit të Qeverisë së Kosovës, Arban Abrashi nuk pritet që të ketë ndikim në përfaqësimin e serbëve dhe këtij subjekti politik në institucionet e Kosovës.

“Ne besojmë në konstruktivitetin dhe partneritetin me Listën Serbe dhe jemi të hapur për bashkëpunim. Është një vendim që është marrë nga kryeministri dhe besoj që ka hapësirë të punojmë me Listën Serbe në realizimin e objektivave të qeverisë, integrimin e veriut, e gjithashtu edhe integrimin e komunitetit serb brenda Republikës së Kosovës”, ka deklaruar Abrashi.

Ministri tashmë i shkarkuar, Aleksandar Jabllanoviq, i takon subjektit politik me emrin Lista Serbe, që është krijuar nga Beogradi me qëllim që të përfaqësojë komunitetin serb në institucionet lokale dhe qendrore të Kosovës.

Me këtë mbështetje që mori nga Beogradi, ky subjekt politik arriti që t’i dominojë të gjitha partitë tjera serbe dhe tani përfaqësohet me një zëvendëskryeministër, dy ministra, nëntë deputet si dhe ka nën udhëheqje nëntë komuna të Kosovës. (rel)

Shqipëria

Trafiku ndërkombëtar i drogës, edhe dy ushtarakë në pranga

Komento

Në skandalin e trafikut ndërkombëtar të drogës janë të përfshirë edhe dy ushtarakë të tjerë shqiptarë, bashkëpunëtorë të pilotit Sokol Feka, që humbi jetën javën e shkuar në Spanjë teksa transportonte drogën me helikopter nga Maroku. Ata janë një major dhe një kapiten që mbahen të ndaluar nga Policia Ushtarake. Emrat e tyre deri më tani nuk bëhen të ditura nga Shtabi i Përgjithshem i Forcave të Armatosura. Por gazetarja e Top Channel, Anila Hoxha mundi të mësojë identitetin e dy të arrestuarve që jo zyrtarisht thuhet se janë Hamit Koxha dhe Vladimir Ademi.

Dy ushtarakët mbahen në ambientet e Policisë Ushtarake prej disa orësh. Mësohet se ata i përkasin regjimentit të Helikopterëve të Farkës. Në njoftimin zyrtar të Ministrisë së Mbrojtjes thuhet se dy ushtarakët janë ndaluar për shkelje të rënda dhe përfshirje në trafikun e drogës me të ndjerin Sokol Feka.

Ajo që dihet deri më tani është se ndalimi i tyre është bërë nga Policia Ushtarake dhe ndaj tyre nuk ka asnjë urdhër prokurori apo një vendim gjykate, por Top Channel mëson se në Prokurorinë e Krimeve të Rënda ka mbërritur një kallëzim penal prej Ministrisë së Mbrojtjes ditën e enjte dhe në rrugë jozyrtare mësohet se bëhet fjalë për trafik lëndësh narkotike.

Shkëputur nga hetimet për trafikun ndërkombëtar të drogës janë liruar këtë të enjte nga detyra dy punonjës të Policisë Ushtarake. Ata janë Destan Shehu dhe Hajdar Nako, që të dy të akuzuar për shkelje të rënda dhe largim pa leje nga detyra. Shkeljet e tyre janë gjetur pas verifikimeve që kanë nisur pas ngjarjes së ndodhur në Spanjë. / Top Channel