Serbia po shqyrton rikthimin e shërbimit të detyrueshëm ushtarak, tha presidenti i saj të martën, duke përmendur tensionet në Ballkan dhe gjetkë në Evropë.
Presidenti Aleksandar Vuçiç tha se komandantët e lartë të ushtrisë i dhanë atij “argumente të forta” në favor të rivendosjes së shërbimit të detyrueshëm, i cili u pezullua në vitin 2011 në një përpjekje për profesionalizimin e forcave të armatosura.
Presidenti populist serb nuk saktësoi se kur mund të ndodhë kjo, por theksoi se parlamenti i cili dominohet nga aleatët e tij, do të votojë mbi propozimin, i cili pason një fushate të gjatë nga nacionalistët në favor të tij.
“Ne nuk po e kërcënojmë askënd”, tha presidenti Vuçiç teksa inspektoi një ekspozitë të pajisjeve ushtarake pas takimit me komandantët e ushtrisë. “Sot, nëse nuk keni një ushtri të fortë, nuk keni një shtet”, tha ai.
“Do të shohim nëse shërbimi ushtarak do të zgjasë 90 apo 100 ditë, apo ndoshta 110 ditë”, u tha presidenti Vuçiçq gazetarëve.
Politikanët e opozitës dhe kritikët e tjerë të shërbimit ushtarak kanë vënë në pikëpyetje logjikën e një veprimi të tillë kur Serbia është pothuajse tërësisht e rrethuar nga vendet anëtare të NATO-s të cilat kanë fuqi superiore në rast konflikti. Ekzistojnë gjithashtu shqetësime se qeveria mund të përballet me vështirësi për të paguar faturën për një ushtri më të madhe.
Tensionet kanë qenë të larta në rajonin e Ballkanit, i cili përjetoi shpërbërjen e përgjakshme të ish-Jugosllavisë në vitet 1990. Edhe pse zyrtarisht neutrale, ushtria serbe ka mbajtur lidhje të ngushta me Rusinë, nga e cila blen shumicën e armëve të saj, duke përfshirë avionë luftarakë dhe tanke.
Presidenti serb tha të martën se Beogradi do ta prezantojë muajin e ardhshëm një sistem rus të mbrojtjes nga dronët të quajtur Repellent, të cilin e ka blerë kohë më parë nga Rusia.
Edhe pse zyrtarisht kërkon anëtarësimin në Bashkimin Evropian, Serbia ka refuzuar të vendosë sanksione kundër Rusisë për shkak të agresionit të saj në Ukrainë.
Tensionet janë të lartë me Kosovën e cila e cila shpalli pavarësinë në vitin 2008, të cilën Serbia dhe aleatët e saj Rusia dhe Kina nuk e kanë njohur. Serbia ka ngritur disa herë gatishmërinë luftarake të forcave të saj në kufirin me Kosovën gjatë disa muajve të fundit.
Serbia ka mbajtur gjithashtu marrëdhënie të përzemërta me NATO-n, trupat paqeruajtëse të së cilës janë vendosur në Kosovë që nga viti 1999, kur aleanca ushtarake perëndimore ndërhyri për t’i dhënë fund shtypjes së përgjakshme të shqiptarëve nga forcat serbe.
Një rajon tjetër i paqëndrueshëm është Bosnja, ku udhëheqësi i Repubikës Serbe Milorad Dodik është kërcënuar se do të shpallë pavarësinë e entitetit të tij dhe ta bashkojë atë me Serbinë fqinje. Milorad Dodik e shoqëroi presidentin Vuçiç në takimin me komandantët e ushtrisë të martën.
voa