Pas publikimit të disa videove në Facebook me vrasje, vetëvrasje, përdhunime dhe veprime të tjera të dhunshme, gjigandi i medias sociale thotë se po punëson 3,000 persona të tjerë për të kontrolluar videot dhe për të hequr nga faqja ato që shkelin rregullat.

Kompania është duke u ndeshur me presion në rritje për të ndalur postimet dhe shkëmbimet e videove të dhunshme.

Sipas kushteve të shërbimit të faqes Facebook, videot e dhunshme nuk janë të lejuara, por siç kanë treguar ngjarjet e fundit, kontrollimi dhe heqja e këtyre videove mund t’i marrë kohë kompanisë.

Njoftimi për të zgjeruar personelin tashmë 4,500 anëtarësh që kontrollojnë videot u bë të mërkurën në faqen e Facebookut të Mark Zuckerbergut.

Themeluesi dhe Presidenti i Facebook-ut shkroi: “Gjatë javëve të fundit, kemi parë njerëz që lëndojnë veten dhe të tjerët në Facebook, përmes transmetimeve të drejtpërdrejta, ose videove të postuara më vonë. Kjo është shumë e rëndë, dhe unë kam reflektuar se si mund të punojmë më mirë për komunitetin tonë”.

“Personat që kontrollojnë videot do të na ndihmojnë gjithashtu të bëjmë punë më të mirë për heqjen e publikimeve me përmbajtje që ne nuk i lejojmë në Facebook, si gjuhën urrejtjes dhe shfrytëzimin e fëmijëve”, shkroi Zuckerberg.“Ne do të vazhdojmë të punojmë me grupet e komuniteteve lokale dhe me forcat e zbatimit të ligjit, që mund të ndihmojnë personat që përpiqen të dëmtojnë veten ose ata që rrezikohen nga njerëz të tjerë”.

Përveç shtimit të presonelit, Zuckerberg tha se kompania do të zgjerojë edhe programet për shmangien e postimit të videove të dhunshme në Facebook.

“Kjo do ta bëjë më të lehtë raportimin e problemeve tek ne, që më pas kontrolluesit të kontaktojnë forcat e zbatimit të ligjit, nëse dikush ka nevojë për ndihmë”, – tha zoti Zuckerberg, duke shtuar se kompania e tij kohët e fundit kishte vepruar pas një raportimi mbi një person që po mendonte për vetëvrasje në Facebook, duke e parandaluar atë të realizojë synimin e tij. (voa)