Presidenti i Bundestagut gjerman Norbert Lammert pozicionohet me fjalë të qarta kundër Presidenti turk Erdogan: kërcënimet kundër disa deputetëve janë të papranueshme dhe një sulm mbi gjithë parlamentin.

Presidenti i Bundestagut Norbert Lammert (CDU) e kritikoi ashpër Presidentin turk Rexhep Tajip Erdogan për deklaratat e tij lidhur me rezolutën e Parlamentit gjerman për Armeninë. “Dyshimet se disa anëtarë të këtij Parlamenti janë zëdhënës të terroristëve, i hedh poshtë në të gjitha format”, deklaroi Lammert në Berlin në emër të të gjitha grupeve politike të parlamentit dhe i shoqëruar nga duartrokitje të mëdha.

Parlamenti gjerman e dënoi masakrën ndaj armenëve rreth 100 vjet më parë si genocid dhe pas votimit përë këtë rezolutë Erdogani i quajti deputetët gjermanë me prejardhje turke si dorë e zgjatur e partisë kurde PKK për shkak se këta kishin votuar pro rezolutës. Ai gjithashtu kërkoi që ata të bëjnë në laborator analizat e gjakut të tyre.

Lammert tha se nuk i kishte vajtur në mendje që një president i zgjedhur në mënyrë demokratike do të bënte deklarata të tilla. Disa organizata turke në Gjermani i quajtën deklaratat e Erdoganit “si të neveritshme dhe absolutisht pa vend.” (dw)