Ndërkohë që nesër pritet të hyjë në fuqi armëpushimi në Siri, Presidenti Barak Obama thotë se ndalja e konfliktit në Siri dhe Irak është me rëndësi kyçe për mundjen e rrjetit terrorist Shteti Islamik.

Ai tha se situata në Siri dhe Irak është “një ndër më komplekset që ka ndeshur bota në kohët moderne”. Presidenti nënvizoi se Shteti Islamik “ka krijuar baza në zonë, përfshirë rajonet urbane, duke përdorur civilët si mburoja njerëzore”.

Konflikti në Siri, tha zoti Obama, reflekton rivalitetet mes fuqive rajonale, si dhe ndasitë e thella sektare në zonë.

Presidenti i bëri komentet pas takimit me zyrtarë të lartë të sigurisë dje në Departamentin e Shtetit. Ai tha se ka sinjale që po bie numri i rekrutëve të huaj që vijnë në Siri, duke e bërë më të vështirë për organizatat terroriste të zëvendësojnë humbjet në radhët e tyre. (voa)