Ish-kreu i Vetëvendosjes Albin Kurti hedh dyshime se kualicioni i nënshkruar sot mes AAK dhe nismës është afër me pushtetin e Kosovës.

Në Tonight Ilva Tare, Kurti tha se duke u nisur nga takimet e përfaqësuesve të AAK me përfaqësues të qeverisë, u shpreh se ka një lloj flirtimi me pushtetin. Ai deklaroi se AAK-ja dhe NISMA kanë zbutur qëndrimet e tyre, duke hequr vizat e kuqe për koalicion.

Gjatë intervistës, ai deklaroi se fal qëndrimit të Vetëvendosjes, Zajednica është praktikisht e vdekur dhe se në këtë linjë është edhe demarkacioni me Malin e Zi.

I pyetur për qëndrimet e Departamentit amerikan të Shtetit, Kurti u shpreh se është e vërtetë se shumë qëndrime të Vetëvendosje janë të jashtëligjshme, por se ato kanë sjellë bllokimin e marrëveshjeve të nënshkruara nga qeveria e Kosovës me atë të Serbisë.

Duke hyrë në analiza politike të marrëdhënieve me ShBA-në, ish-lideri i Vetëvendosje thotë se duhet të kalohet në një aleancë të re me Shtetet e Bashkuara.

Intervista:

Tare: Çfarë ndodhi me AAK-në dhe Nismën? Marrëveshja ishte e pritshme?

Kurti: Ajo ishte e paralajmëruar që dje. Ne nuk kemi qenë të ftuar për një marrëveshje të tillë. Vetëvendosje po përgatitej për një alternativë qytetarëve edhe me shoqërinë civile. Këtë ide e ka pranuar AAK-ja dhe Nisma. Duket që kjo alternativë nuk ka hasur në mirëkuptimin e AAK-së, e cila nuk na ka ftuar neve në këtë marrëveshje. Nuk i di hollësitë.

Tare: I dini rezervat?

Kurti: Ne kemi thënë që Vetëvendosje, AAK dhe Nisma kanë bërë opozitën e bashkuar në Kuvend me vezë, uji dhe sidomos gaz lotsjellës. Prandaj na nevojitej një ombrellë të re. Ata thanë se këtë jetë politike. Ne e kemi konsideruar se kjo alternativë të paraqitej edhe në zgjedhjet e ardhshme. Kjo i sposton gjasat që të kemi zgjedhje parlamentare së shpejti, të nevojshme për Kosovën. Nuk na duket e drejtë të bëhen marrëveshje parciale. Jemi të brengosur në veçanti për takimet dhe kontaktet të AAk-së me ata të qeverisë, duke flirtuar.

Tare: Ju besoni se ka një marrëdhënie të re me qeverinë?

Kurti: Besoj se ka një raport të ri me kryetarin e Kuvendit, Veseli sepse ndryshe nuk shpjegohet qëndrimi se nuk kanë vija të kuqe për asnjë parti dhe nga ana tjetër ka një zbutje edhe të qëndrimeve dhe të qëllimeve. Ka kaluar koha kur protestat mund t’i thërrasë një subjekt dhe duhet një alternativë e re. Mos harroni se Vetëvendosje ka 17 deputetë dhe AAK dhe Nisma kanë 14 deputetë. Nuk e kuptoj se ku duan të shkojnë me këtë marrëveshje.

Në atë alternativën që kemi propozuar ne kemi thënë që udhëheqësi të jetë nga Vetëvendosje dhe pjesëmarrja të jetë 3 plus 1. Nëse duhen që udhëheqja të jetë me rrotacion, ku nuk është e barabartë.

Tare: Ndoshta të gjithën nuk mund t’ua lexoj, por më bëri përshtypje një fragment: duke pasur parasysh ndërtimin e një opsioni real qeverisës që garanton qeverisje demokratike, zhvillim të qëndrueshëm ekonomik.

Kurti: Pa Vetëvendosje nuk mund të kemi një qeveri të vërtetë në Kosovë. Është e vërtetë që ne ndonjëherë kemi bërë edhe shkelje të vogla, por në mbrojtje të Kushtetutës, por Gjykata Kushtetuese na dha të drejtë me Zajednicës.

Sondazhet e fundit, Lëvizjen Vetëvendosje e nxjerrin në 2 pikë pas Partisë Demokratike. LDK-ja ka pasur rënie.

Tare: Edhe një pikë tjetër; ata thonë se janë të hapur për koalicion në përjashtim të partive qeverisëse!

Kurti: Tash e përjashtojnë koalicionin para zgjedhor që të mos përjashtojë atë pas zgjedhor. Është e qartë se e kanë zbehur aktivitetin opozitar. Ka një lloj zmbrapsje.

Tare: Bëri ndonjë gabim Vetëvendosje me aksionet e saj?

Kurti: Jo! Ne kemi bërë që Zajednica të jetë sot e vdekur dhe demarkacioni të mos ekzistojë. Pa aksionet e shumta, ne nuk do të arrinim t’i ndalim projektet e Serbisë. Vuçiçi dështimet më të mëdha i ka pasur në Kosovë dhe jo në Serbi.

Tare: Ka një reagim të Shpend Ahmetit se në Vetëvendosje ka një frikë nga ndryshimi… Pse ka frikë për ndryshim në Vetëvendosje?

Kurti: Vetëvendosje është ndodhur në një sulm të jashtëzakonshëm për shkak të bashkëpunimit me AAK-në dhe Nismën. Ata kanë qenë në qeverisje me PDK-në dhe LDK-në.

Tare: Siç ishit të gatshëm ju të qeverisnit me LDK-në!

Kurti: Synimi ishte largimi i PDK-së që kishte kapur shtetin. Ne e shikojmë koalicionin nga pikëpamja strategjike dhe jo nga qëndrimi moral.

Tare: Shpend Ahmeti po del kundër Vetëvendosje! Ka një distancë?

Kurti: Jo! Ne ishim bashkë në mbledhjen e Këshillit të Përgjithshëm dje kur u bashkua Donika Kadaj Bujupi.

Tare: Çfarë do të ndodhë tani me marrëveshjen e Zajednicës?

Kurti: Zajednica ka vdekur për shkak të peticionit 205 mijë nënshkruesve, për shkak të protestave dhe për shkak të aktgjykimit të Gjykatës Kushtetuese. Kjo qeveria është mundësia për ringjalljen e saj. Prandaj duam ose ta largojmë ose ta rrëzojmë.

Tare: Kam pyetje për sa i përket një raporti të Departamentit amerikan të Shtetit, i cili thuhet se pengesa më e madhe e të drejtave të njeriut në Kosovë ka qenë pengimi i dhunshëm i Kuvendit nga deputetët opozitar. Pengimi ka bllokuar debatin dhe kalimin e ligjeve. E konsideron Vetëvendosje veten shkaktar?

Kurti: Është e vërtetë. Unë kam bërë burg për këtë. Unë për shkeljet më të vogla e paguaj shtrenjtë. Të gjithë deputetët e Vetëvendosje dhe aktivistët e saj janë dënuar. Dënimi me vdekje nuk ekziston. Po këta kur do të dënohen?

Tare: Si mund t’u besojnë ju qytetarët kur nuk e keni njohur këtë drejtësi?

Kurti: Pse qytetarët besojnë që unë të bëhem deputet? Nëse sillesh normalisht në një situatë ekstreme, atëherë je ekstremist. Ne sillemi radikalisht në një situatë ekstreme jemi normal!

Tare: Edhe pas raportit të DASH?

Kurti: Nëse kongresmenët amerikanë do të kishin një Zajednicë do të reagonin!

Tare: Ambasadori amerikan në Kosovë e ka cilësuar akt të neveritshëm hedhjen e gazit në Kuvend. Ju nuk e keni takuar asnjëherë ambasadorin amerikan në Prishtinë.

Kurti:  Ai ka thënë që pamja është e neveritshme. Ky është gjykim estetik. Ishte akt i drejtë politik, kombëtar dhe moral. Ambasadori ka thënë se gazi lotsjellës nuk është mjet demokratik. Normalisht nuk është mjet demokratik. Duhet të kujtojmë edhe një gjë; Shtetet e Bashkuara nuk e kanë përkrahur kurrë UÇK-në, por pas UÇK erdhi intervenimi i NATO-s. Faktorët ndërkombëtar na ndjekin kur ne ecim, dhe na shtypin kur ne ngecim. Po mos të ishte Vetëvendosje, Presidentja nuk do t’i ishte drejtuar Gjykatës Kushtetuese. Nuk lexohet në mënyrë formale deklarata e ambasadorit amerikan.

Tare: Ju keni marrëdhënie të ftohtë me ambasadorët amerikan.

Kurti: Kryetari i Vetëvendosje, Ymeraj ka takime të vazhdueshme me ambasadorët. Shtetet e Bashkuara janë duke na testuar neve a jemi serioz apo jo! SHBA nuk mund të angazhohen për ty. Ne nuk kemi nevojë për aleat të ri, por për një aleancë të re. Si bëhet që Kosova ka 17 vjet partneritet me SHBA-në dhe nuk ka ushtrinë e saj? Kur kujtojmë aleancën me SHBA-të flasim për sulmet e NATO-së. Sot, Shtetet e Bashkuara të Amerikës nuk na lejojnë të kthehet ushtria e Serbisë.

Tare: Siç mund të themi se Shtetet e Bashkuara po punojnë kundër Kosovës. Kerry kur erdhi në Prishtinë tha se ‘ne nuk do të bënim kurrë një veprim kundër sovranitetit të Kosovës’.

Kurti: Çfarë ndodhi? Gjykata Kushtetuese pa u bërë tri javë nga deklarata e Kerryt rrëzoi vendimin për Zajednicën.

Duke folur për zgjedhjet e Hashim Thaçit President, Kurti deklaroi se ai nuk e përmendi në fjalën e tij UÇK-në, duke theksuar se ngjitja lart e tij do ta sjellë edhe rrëzimin më të fortë.

Tare: Pse realisht e kundërshtoni zgjedhjen e tij? Ka qenë pjesë e UÇK-së. Ka një karrierë të gjatë në politikë, ka qenë kryeministër i parë e Kosovës së pavarur.

Kurti: Ju thatë se ka qenë në UÇK. Ka pasur edhe shumë të tjerë që kanë luftuar. Mos harroni se më shumë ka luftuar Esat pashë Toptani se Hashim Thaçi. Se një njeri bën një luftë, nuk do të thotë se nuk bën gabime më pas. Mos harroni se Peteni në Francë në Luftën e Parë Botërore ishte hero dhe u bë Marshall, mirëpo në Luftën e Dytë Botërore, përfundoi në shportën e historisë. Nga Sharl Degoli u dënua me dënim me vdekje, por ju konvertua në burgim të përjetshëm. Tri gabimet e mëdha ishin: shpallja e projektit të mbyllur kombëtar të projektit të Ahtistarit, çarmatosja e UÇK-së dhe braktisja e të majtës kombëtare për neoliberalizmin kosovar.

Tare: Këto janë problemet e Thaçit President se këto ishin për Thaçin Kryeministër?

Kurti: Vëllezërit i ka milionerë, ka dështuar Kosovën, ka penguar me Projektin Ahtisari për bashkimin me Shqipërinë.

“Pas gjashtë muajsh veprimtari të përbashkët, Lëvizja Vetëvendosje është e mendimit që ne jemi përpara një udhëkryqi dhe ky udhëkryq duhet të tejkalohet me testin e radhës”, ka thënë në intervistën për Radion Evropa e Lirë, shefi i Grupit Parlamentar të Lëvizjes Vetëvendosje, Glauk Konjufca. Krijimi i një platforme politike dhe listës së përbashkët për zgjedhjet, shihen si testi kryesor i tejkalimit të këtij udhëkryqi.

Radio Evropa e Lirë: Zoti Konjufca, kohët e fundit janë vërejtur disa ndryshime në diskursin politik të partive opozitare. Cilat hapa dhe veprime parashihet t’i ndërmerrni ju si Vetëvendosje apo edhe si opozitë?

Glauk Konjufca: Prej shtatorit të vitit të kaluar, kur ne filluam rezistencën më aktive dhe me veprime konkrete, brenda Kuvendit të Kosovës, kundër dy marrëveshjeve që na i solli Qeveria e Kosovës, blloku opozitar ka përjetuar një thellim të bashkëpunimit. Kur kemi nisur këtë bashkëpunim na është dukur e rëndësishme që përgjatë ecjes së bashku ta njohim njëri tjetrin më mirë, të testojmë gatishmërinë tonë, në qëndrimet e përbashkëta dhe veprimet që i kemi marrë në koordinim me njëri tjetrin.

Pas gjashtë muajsh veprimtari të përbashkët, Lëvizja Vetëvendosje është e mendimit që ne jemi përpara një udhëkryqi dhe ky udhëkryq duhet të tejkalohet me testin e radhës. E testi i radhës është një hap edhe më tutje në bashkëpunimin tonë që konsiston në dy pika; së pari në krijimin e një alternative të shkruar politike të qeverisjes së përbashkët, pra një platformë programore i nevojitet kësaj opozite, kjo është ajo që na ka munguar deri tash.

Nuk na ka munguar rezistenca, nuk na kanë munguar demonstratat të cilat po shkojnë duke u bërë gjithnjë e më masovike, mirëpo ne frikësohemi që ky intensitet nuk do të mund të mbahet, po që se populli i Kosovës nuk e ka të qartë se çka do të bëjmë ne, kur ta bëjmë qeverinë e re. Cilët do të jenë 10 hapat e domosdoshëm që do t’i ndërmarrim ne në fillim, secilës fushë të jetës si do ti qasemi për ta përmirësuar, mendoj se këtu ka mbetur paksa pezull bashkëpunimi opozitar.

Radio Evropa e Lirë: Çfarë parashihet të përmbajë kjo platformë?

Glauk Konjufca: Kur të ndërrohet pushteti dhe kur opozita ka gjasë që mund të garojë në zgjedhjet e ardhshme si një bllok i përbashkët, atëherë nuk ka fije dyshimi, edhe sondazhet bile e thonë se nëse do të konkurronin tre trupa politik, që do të thotë PDK, LDK dhe opozita e bashkuar, sondazhet thonë që opozita do të dilte subjekti i parë politik me më së shumti vota dhe në këtë nuk kam kur farë dyshimi.

Por, në të njëjtën kohë, ne nuk duhet të lëmë opsione të hapura për një shkapërderdhje të këtij blloku, pas zgjedhjeve. Për ne duhet të mbyllen të gjitha këto dilema. Si i mbyllen këto dilema? – mendoj me dy veprime të cilat po insistojmë që t’i arrijmë dhe ka bisedime të vazhdueshme.

E para është alternativa e përbashkët programore, kur të bie ky pushtet, si do ta zëvendësojmë ne, jo vetëm në mënyrë kuantitative, hiqen disa njerëz dhe do të vijnë disa të tjerë. Por, cilat koncepte do t’i zbatojmë, vitin e parë, të dytë dhe të tretë, të qeverisjes e kështu me radhë. Dhe e dyta lista e përbashkët.

Pra, lista e përbashkët dhe alternativa e përbashkët programatike, janë gjërat që nuk kemi mundur t’i arrijmë deri me tani. Këto janë dy arsyet kryesore të pezullimit edhe të protestës. Një shtyrje për një afat të caktuar deri sa t’i rregullojmë këto gjëra, sepse janë në një farë forme le t’i quaj disa hesape të hapura të brendshme brenda opozitës dhe pa i tejkaluar këto ne nuk mund të bëjmë eksperimente me popullin të thërrasim në protestë për arsye se vetëm kur jemi se e dimë saktë se çka po duam.

Për shembull, sikur kur ishte ajo përpjekja më VLAN-in. Atëherë jemi ulur ekipet tona të eksperteve dhe e kanë nënshkruar një marrëveshje prej disa pikave. Pikat më të rëndësishme të cilat kanë qenë një zotim për rishqyrtimin e rasteve të dyshimta të privatizimit prej të cilës janë pasuruar politikanët. Dhe e dyta ka pas qenë ri-konsiderimi dhe ndryshimi drejtimit të negociatave me Serbinë.

Tash në duhet një alternative shumë më e thellë, jo vetëm këtu vete me pika të thjeshta, por disa faqe të shkruara sikur një lidhje e kontratës së drejtpërdrejtë me qytetarin e Kosovës, në mënyrë që edhe ai kur të dal në demonstrata për ta rrëzuar pushtetin ta ketë atë alternativ në dorë duke thënë se ne nuk jemi vetëm që ta ndryshojmë Isa Mustafën më një tjetër, por do ta rrëzojmë ketë qeveri se ajo që është shkruar në letër është një dhënie e fjalës për të cilën këta njerëz do të japin dorëheqje nëse nuk i realizojnë premtimet.

Në të gjitha këto që janë pesë apo gjashtë tema të mëdha ne mund të marrim pjesë.

Radio Evropa e Lirë: Zoti Konjufca përmendët një alternative të qeverisë së përbashkët dhe shkuarjen eventuale në zgjedhje me listë të përbashkët si opozitë. Ku ka përkrahje më të madhe?

Glauk Konjufca: Jemi në atë fazën ku janë zhvilluar bisedime edhe për listën e përbashkët. Për listën e përbashkët mund ta konfirmojë një koncenzus më të madh sesa për alternativë qeverisëse të subjekteve opozitare. Bile kanë qenë të tjerët që këtë çështje e kanë hapur para Vetëvendosjes nevojën që të shkohet më një listë të përbashkët si opozitë e bashkuar me një fron të gjerë shoqërore me shoqërinë civile dhe në këtë mënyrë bisedimet janë duke ndodhur dhe unë me përshtypjet që i kam nga këto bisedime mund ta konfirmojë me optimizëm që është shumë afër arritjes një marrëveshje e tillë për të shkuar si bllok opozitar bashkë më shoqërinë civile në zgjedhjet e ardhshme.

Radio Evropa e Lirë: Si i shihni pozicionet e ndara të partive në opozitë. AAK dhe Nisma për Kosovën janë deklaruar se do t’i braktisin seancat plenare e me këtë edhe përdorimin e gazit lotsjellës. Por, një deklarim i tillë nuk erdhi nga Vetëvendosje. Do të vazhdoni edhe më tutje me gazin lotsjellës në Kuvend?

Glauk Konjufca: Ne kemi dhenë qëndrimin tonë i cili konsiston në strategjinë që seancat të shqyrtohen sipas rastit. Pra, ne nuk jemi që në parim dhe në mënyrë absolute ta braktisim Kuvendin e Kosovës. Ne mendojmë se në Kuvendin e Kosovës pushteti do të krijonte një rahati të funksionimit nëse opozita mungon totalisht. Në një farë mënyre ata më së shumit e kanë synuar një lloj të parlamentit pa opozitë fare dhe kjo tash më po realizohet. Ne nuk do tua lehtësojmë atyre qëllimet në ketë mënyrë.

Radio Evropa e Lirë: Do të thotë që gazi lotsjellës do të përdoret sërish?

Glauk Konjufca: Gazi lotsjellës është një prej metodave, mirëpo ne do ta shqyrtojmë secilën seancë veç e veç. Aty ku nuk ka pika të rëndësishme, ku për shembull preket fati i Kosovës në mënyre fondamentale atëherë nuk do të marrim pjesë. Për ndryshe kur është rasti i temave të mëdha kur është rasti me Serbinë, Trepçën, siç është statuti i Asociacionit të komunave më shumicë serbe që është paralajmëruar.

Radio Evropa e Lirë: Në pjesën e parë të muajit prill, pritet të ndodhë ceremonia e betimit të presidentit të ri të Kosovës, Hashim Thaçi. A do të jeni ju si Vetëvendosje në atë seancë?

Glauk Konjufca: Për ketë nuk kemi marr vendim ende, por vendimi do të merret në kuadër të opozitës së bashkuar, pra nuk do të vendosim vetëm ne do të takohen liderët do të takohen grupet punuese edhe do ta vlerësojnë sipas nevojës nëse do të marrin pjesë në atë seance apo jo. Deri me tash nuk vendim.

Radio Evropa e Lirë: Kryetari i Kuvendit dhe njëherësh ushtruesi i detyrës së kryetarit të PDK-se, Kadri Veseli ka paralajmëruar një ofertë konkrete për opozitën. Cila do te ishte një oferte e pranueshme për ju?

Glauk Konjufca: Kanë qarkulluar shumë spekulime kohëve të fundit që do të ketë një, le të themi një ristrukturim të Qeverisë së Kosovës, një rikonfigurim dhe është përmendur emri i Albin Kurtit që do t’i udhëheqë negociatat me Serbinë, emri i Ramush Haradinajt që do ta marr diplomacinë në dorë e kështu me radhë.

Këto janë vetëm përpjekje të pushteti që t’i kundërpërgjigjet krizës së legjitimitetit që e ka duke thënë se tash po vjen edhe opozita, që do t’i marr Albin Kurti negociatat me Serbinë, dhe diplomacinë opozita do ta marr, kështu që do të bëheshim pushtet ma i mirë. Këtë e shohë vetëm në kuadër të reagimit për të krijuar atë iluzionin e radhës se edhe opozita po bashkëngjitet pushtetit kështu që nuk kemi pse të dilni në protesta sepse gjithçka do të jetë mirë. Ky mendoj se është një mashtrim i radhës i pushteti kështu që opozita në asnjë mënyrë ka treguar se nuk bëhet pjesë e këtij pushteti.

Ne kërkojmë me ngulm zgjedhje të reja dhe vetëm pas zgjedhjeve unë mendoj që dhe jam i sigurt se Kosova do ta ketë një qeveri të mirë ashtu siç duhet dhe me një alternativë qeverisëse krejt ndryshe nga çka po shohim tani.

Zotëri Abazi, para se të na flisni për dëbimi tuaj nga Policia e Kosovës a mund të na thoni shkurtimisht kur ka filluar aktivizimi juaj në Lëvizjen Vetëvendosje, pasi opinioni në Shqipëri nuk ka shumë informacion për ju, për Vetëvendosjes dhe për politikën e Kosovës në përgjithësi ?

Unë kam qenë pjesë e shoqërisë civile në Tiranë, kam punuar për disa organizata në Shqipëri si dhe kam dhënë mësim në universitet, pasi u ktheva prej studimeve të mia në ShBA. Prej studimeve dhe prej leximeve të mia, prej aktivizmit gjatë universitetit në SHBA, si dhe prej viteve të aktivizmit në Shqipëri, ku kam punuar edhe në disa nga zonat më të varfra të Shqipërisë, kam formuar bindjet e mia për politikën. Thelbësore në këto bindje janë parimet e barazisë, sovranitetit dhe bashkëpunimit mes popujve e njerëzve.

Si këndvështrim, kam qenë dhe mbetem tepër kritik ndaj neoliberalizmit, politikës që unë mendoj se ka shkaktuar krizë dhe shkatërrim kudo që është aplikuar.

Këto bindje e parime i gjeta në masë të madhe të shprehura në Lëvizjen VETËVENDOSJE!, dhe kam filluar të interesohem për të dhe të kem kontakte dhe bashkëpunime që prej vitit 2006. Në vitin 2010 kjo Lëvizje vendosi të marrë pjesë në zgjedhje. Në atë kohë, ata kërkuan ndihmë nga kushdo që dëshironte të bashkëpunonte si vullnetar për fushatën zgjedhore. Kemi qenë një grup vullnetarësh që shkuam në Kosovë të ndihmonim për zgjedhjet e 2010.

Më pas, ka qenë ftesa e Lëvizjes që disa prej nesh të ndihmonim në mënyrë më sistematike. Kështu që, prej 2010, më është dashur ta vizitoj shumë shpesh Kosovën, si aktivist i Lëvizjes dhe si pjesëtar i strukturave të saj. Prej 2011 deri në 2014 kam qenë koordinator i sekretariateve. Prej 2015 jam anëtar i kryesisë së Lëvizjes, si Sekretar për Marrëdhëniet me Jashtë. Lëvizja VETËVENDOSJE ka në Kryesinë dhe Këshillin e Përgjithshëm të saj, përveç shqiptarëve nga Kosova, edhe shqiptarë nga Shqipëria, Maqedonia, nga Lugina e Preshevës etj. Unë i vlerësoj idetë ekonomiko-politike te Lëvizjes, të barazisë mes popujve, të antikolonializmit, të vetëvendosjes, të solidaritetit, të shtetit zhvillimor. Ndaj dhe jam aktivist.

Pas deportimit nga Kosova ju jeni shprehur se Policia nuk ka pasur asnjë flet arrest. Si ka ndodhur arrestimi dhe cila është vërteta në të gjithë këtë histori sipas jush?

Ditën e mërkurë, rreth orës 13;15, më janë afruar tre policë civilë në një lokal afër Selisë së Lëvizjes, ku po bisedoja me një kolege. Policët e veshur civilë nuk paraqitën fletëarrest edhe pse unë ia kërkova që në fillim. Ata më thanë që fletarrestin do ma jepnin ne stacionin e policisë, por kjo nuk ndodhi as aty. Unë e konsideroj këtë akt si një rrëmbim personi.

Në stacionin e policisë ata kanë printuar shpejt e shpejt një urdhër dëbimi nga Kosova. Aty kanë shkruar akuza të pavërteta. Nuk më kanë dhënë mundësinë të kontaktoj me një avokat (duke shkelur konventat ndërkombëtare), nuk më kanë dhënë mundësinë të kontaktoj me Ambasadën e Reublikës së Shqipërisë, nuk më kanë dhënë mundësinë as të shkoj në shtepi për të marrë rroba me vete. por më kanë sjell direkt ne kufirin me RSh. Sot policia e Reublikës së Kosovës zyrtarisht ka deklaruar se akuzat për vepra penale që janë numëruar në atë urdhër dëbimi paskan qenë “gabim teknik i përvjedhur”. Por ata këmbëngulin që unë duhet të dëbohem nga Kosova. Unë jam angazhuar për realizimin e idealeve mbi të cilat Kosova është çliruar, ashtu siç angazhohet edhe çdo aktivist tjetër i Lëvizjes.

Që prej gushtit 2015, regjimi autoritar që është instaluar në Kosovë ka arrestuar 348 aktivistë të Lëvizjes. Vendime dhe praktika të tilla janë akte të një shteti policor. Servilizmi i të korruptuarve që qeverisin Kosovën, i ka çuar ata në shërbim të Serbisë në marrëveshje që e copëtojnë Kosovën, në mënyrë që të ruajnë pushtetin e tyre.

Çfarë duhet të bëj shteti shqiptar, sipas jush, pasi keni deklaruar se prisni një përgjigje nga Ministri Bushati?

Shteti shqiptar ka për detyrë që të interesohet për çdo qytetar të vetin, kudo në botë. Në botën demokratike është e papranueshme që një qytetar i një vendi të deportohet nga një vend tjetër, vetëm për shkak të bindjeve dhe angazhimeve të veta politike që janë në përputhje me parimet e shprehura edhe në Kartën e OKB-së.

Besoj se Shqipëria do të kishte reaguar nëse kjo do të ndodhte në ndonjë vend tjetër. Por afërsia mes Shqipërisë dhe Kosovës nuk duhet të jetë arsye për të mbyllur sytë ndaj abuzimeve, ndaj autoritarizmit, apo ndaj deportimeve arbitrare, siç më ndodhi mua.

Para disa vitesh, rasti i fundit i një qytetari të Shqipërisë të dëbuar për arsye politike, ka qenë ai i një gazetari të dëbuar nga Greqia. Ai rast ishte skandaloz, dhe u reagua deri në Parlamentin Evropian. Është normale të besoj se edhe për rastin tim, do të reagohet e do të kërkohet drejtësi. Mes Kosovës e Shqipërisë nuk duhet të kishte as kufij, e lëre më deportime.

Edhe pse Vetëvendosje (opozita e bashkuar) gati prej një viti ka bërë përpjekje titanike për të frenuar funksionimin e koalicionit PDK-LDK, që sipas jush është i dëmshëm për Kosovën nuk ia ka arritur. Thaçi është votua President, këto dy parti vijojnë të qeverisin. A mund të themi se beteja juaja ka rezultuar jo e suksesshme dhe cila do të jetë karta juaj e radhës për të rrëzuar këtë koalicion?

Thaçi u votua president me votimin e tretë, duke marrë në votimin e parë një numër shumë të vogël votash, e duke shtuar 21 vota brenda 30 minutash, të cilat sipas gjasave i ka blerë. Postet e blera na kthejnë në mesjetë. Të gjitha vendet e zhvilluara evropiane po na tregojnë se si nuk mund të blihen votat, nuk mund të blihen postet. Pra, nuk është çështje strategjie. Sigurisht, ata që kanë vjedhur për vite me radhë, kanë fuqi blerëse e mund të blejnë shumëçka. Por beteja jonë, edhe strategjia jonë, nuk ka të bëjë vetëm me postin, por me transformimin rrënjësor të pushtetit, në mënyrë që shteti të bëhet më demokratik. Dhe mendoj se jemi shumë pranë suksesit tani që qytetarët e Kosovës janë ngritur në protesta mbarëpopullore dhe është krijuar një front më i gjerë rezistence që përfshin edhe shoqërinë civile. Mos të harrojmë se kjo qeverisje e diktaturës së numrave, po e mban pushtetin vetëm me dhunë policore, me arrestime, me gjyqe të inskenuara dhe me deportime, por nuk do ta kenë të gjatë.

Albin Kurti është themelues i lëvizjes opozitare më radikale kosovare Vetëvendosje, e cila njihet për faktin e pengimit nga deputetët e saj të punës së qeverisë me gaz lotsjellës.

Kjo lëvizje është e dalluar dhe e njohur si një alternativë e rrallë dhe artikuluese e mirë e shtetit sovran. Kurti për shkak të aktivizmit të tij politik ishte dy vite e gjysmë në burgje të Serbisë, disa muaj po ashtu ishte i burgosur në Kosovën e pavarur për shkak të aktivizmit politik. “Nëse pohojmë se nuk ka demokraci, është krejtësisht e logjikshme që na burgosin”, shton deputeti i Kuvendit të Kosovës dhe demonstruesi me eksperiencë.

Si e kuptoni gjendjen e Kosovës tetë vite pas shpalljes së pavarësisë?

Ka pasur progres në pranimin e shtetit të Kosovës, nga shtetet e tjera, por jo edhe konsolidim të brendshëm. Kemi pavarësi formale, por jo edhe përmbajtjesore. Nuk kemi integritet territorial, nuk kemi sovranitet, nuk kemi ushtri dhe nuk kemi zhvillim ekonomik. Është shumë më keq se si ishte Gjermania pas Luftës së Dytë Botërore. Hashim Thaçi i ka bindur deputetët serbë që ta votojnë si kryetar, por nuk mundë t’i bindë që të ndryshojnë Kushtetutën dhe të formojmë ushtrinë. Deri te pavarësia e Kosovës kemi ardhur me shumë koncesione dhe që nga pika fillestare e saj. Shpallja e pavarësisë u pat shtyrë për një ditë, vetëm për t’u krijuar EULEX-i. EULEX-i është një ditë më i moçëm sesa shteti i Kosovës, se përndryshe nuk mund të merreshin vesh anëtaret e BE-së për ta themeluar atë. Pesë nga ato ishin kundër pavarësisë së Kosovës dhe ato një ditë pas shpalljes së pavarësisë do të votonin kundër EULEX-it. Mitrovica është qytet i ndarë, papunësia ka tejkaluar të gjithë kufijtë racionalë. Mitrovica është rezultat i trashëgimisë milosheviqiane. Që ta fitonte Kosova pavarësinë kemi ndjekur planin e Ahtisaarit. Serbëve në Kosovë u janë dhënë privilegje shtesë që i ka kërkuar nga Beogradi. Ata i kanë fituar dhjetë komuna të pavarura me shumicë serbe dhe si të tilla faktikisht janë ndarë nga Kosova. Vuçiq tani sërish kërkon shkëputjen e atyre komunave nga Kosova.

Por Kosova ka Kuvendin, Qeverinë dhe Kryetarin. A mundeni që për këto zhvillime të tilla ta ngarkoni Serbinë?
Elitat tona politike janë të dëgjueshme dhe të lakueshme ndaj serbëve dhe BE-së. Pse? Sepse një gjë e tillë është në interes të tyre. Ata janë njerëzit më të pasur në shtet dhe jetojnë nga korrupsioni. Për të mos përfunduar në burg i japin koncesione Serbisë, sepse BE bën presion mbi ta.

Pse do të ishte kjo në interes të Evropës?
Sepse Evropa mendon se kështu do ta largojë Serbinë nga Rusia. Kjo nënkupton faktin se nëse kjo qeveri do të ketë sukses, kjo do të thotë se Republika si e tillë ka dështuar. Do të bëhemi edhe një shtet i enklavave siç është Bosnja, e cila do të duhet të krijojë relacion ndaj Republika Srpskas së vet. Dhe, ne këtë gjë duam të parandalojmë! Vetëvendosja dhe dy parti më të vogla po zhvillojmë mosbindje qytetare para kuvendit dhe në kuvend po pengojmë punën e tij. Përdorëm bylbyla, vezë të prishura, bomba me erë të keqe dhe drita laser. Gazi lotsjellës ishte vepra jonë protestuese. Kur organizojmë demonstrata në rrugë, mbi ne dhe ndër ne gjuan policia me qindra bombola lotsjellës. Ato nuk aktivizohen të gjitha, ne i mbledhim ato, i ruajmë dhe i aktivizojmë brenda parlamentit ndër deputetë.

Kësaj i thoni ju protestë?
Po. Kur demonstrojnë të varfrit, mbi ta hidhen bombola me lotsjellës, kjo është e natyrshme. “Shkoni në shtëpi dhe shikoni televizionin” u thonë policët që janë të blinduar. “Sheshi nuk është për ju”. Për të varfërit gazi lotsjellës është vetëm vërejtje miqësore për sjellje të mirë. E po qe se këtë gaz lotsjellës e hedhë para milionerëve, menjëherë e quajnë po atë gaz si armë kimike, gaz helmues dhe krim të paparë. Mua më kanë arrestuar dhe si kriminel me kanë burgosur tri javë e gjysmë. Dymbëdhjetë aktivistë dhe udhëheqësi i grupit tonë parlamentar janë në burg. Gjashtë aktivistë janë në arrest shtëpiak, atje janë edhe dy deputetë nga opozita e bashkuar. Në Kosovë nuk ka demokraci por regjim autoritar.

A është ky trend në Evropën lindore?
Po. Diktatura është e papranueshme, autokracia është krejtësisht në rregull. Shtetin e udhëheq figura paternaliste e babait, ai është babai i kombit, dhe të gjithë tjerët duhet të përkulen. Thaçi, Vučić, Gruevski, Orban funksionojnë sipas logjikës së njëjtë. Ato nuk janë regjime totalitare por autokrate. Pushteti në Kosovë funksionon si një katror. Në kënde janë fuqia politike, ekonomia, mediumet dhe universitetet private. Në mes këtyre katër pikave lëvizë pushteti mbi shtet, i cili është nën kontrollin e një elite politike. Në universitete private edukohen gjeneratat e ardhshme të këshilltarëve të ministrave dhe anëtarët e rinj të parlamentit e kështu me radhë. Politika ka aksione në ekonomi, afaristët janë pjesë e pushtetit politik. Mediat e kontrolluara e ofrojnë këtë si të vetmin rend të mundshëm. Nga politika e kanë larguar historinë dhe idetë.

E ju, çka ofroni diçka ndryshe?
Qeveria nuk na urren për shkak se i shkelim ligjet, por për shkak se guxojmë t’i shkelim ato. Këtë gjë nuk mundë të na e falin assesi. Kur na burgosin, njerëzit thonë se qeveria i mbron ligjet. E kotë. Qeverisë aspak nuk i intereson se cilat ligje shkelën. Sepse ata krejt kohën i shkelin ato. Regjimi autoritar nuk mund të shkruajë ligje të cilat fshehtas nuk i shkel. E nëse ju guxoni publikisht të shkelni ligjin, sepse jeni besnik ndaj bindjeve që keni, për qeverinë kjo është e pafalshme. Na kanë thirrur në qeveri. Janë të gatshëm të ndajnë realitetin e tyre të ndyrë, por nuk mund të na falin kur jemi besnik në idealet tona. Kur i bien shkelm historisë dhe ideve nga politika, atëherë politika bëhet lojë. Rregullat e lojës sillën në katrorin vicioz, ashtu sikurse e shpjegova më parë.
Lëvizja jonë ka filluar me idenë se, nuk qëndron problemi se Kosova nuk ka status të shtetit të pavarur, por se banorët e Kosovës nuk kanë liri. Kemi filluar me atë së Kosova nuk është problem, por se Kosova ka problem me Serbinë dhe UNMIK-un. Prandaj kërkojmë Republikën e tretë. E para ishte republika për rezistencë, e dyta është krijuar me shpalljen e pavarësisë. Ajo ishte republika e shitjes. Elektrodistribucionin e kanë shitur për 26 milionë euro. Po të kishin shitur për hekur të vjetër aq do të fitonin prej saj. Ne na duhet republika e tretë e cila do të merret me zhvillim. Këtë nuk mundë ta bëjë asnjë fuqi e jashtme. Duhet ta fillojmë vetë e pastaj mund të fitosh ndihmë. Kështu është e krijuar bota. Nëntëdhjetë përqindë e gjithë investimeve të huaja në botë shkon në shtetet e zhvilluara. Zhvillimi sjell investime. Investimet para zhvillimit janë korrupsion.

Këtu te ne, politikën kosovare e përjetojmë si rivalitet në mes Ramush Haradinajt dhe Hashim Thaçit. A është në të vërtetë çështje më e komplikuar kjo?
Të dy ishin komandantë në ushtrinë çlirimtare, të dy kanë formuar parti të veta të djathta, që nuk bazohen në programe por në udhëheqës. Ata janë në pozita të ndryshme. Thaçi është në krye të regjimit autoritar i cili Kosovën e ka shndërruar në peng. Haradinaj është në opozitë dhe është pjesë e betejës politike. Dallimi në mes karakterit të tyre nuk është thelbësor, e rëndësishme është pozita në të cilin gjinden. Në Kosovë me dekada kemi jetuar me idenë e rezistencës paqësore. Ishte tejet pasive ajo. Në vitin 1991, me shkatërrimin e Jugosllavisë, ne shqiptarët në Kosovë, Maqedoni dhe në Shqipëri e kemi humbur shansin që të ndërtojmë strategji të përbashkët, kur ishte koha për të. Të humbësh shansin është shumë më keq sesa të bësh gabim. Të bësh gabim është mirë. Të përqafosh rrezikun, edhe nëse dështon, mëson nga gabimet dhe disa leksione duhet t’i përsëritni. Nga humbja juaj të paktën do të dalin ndoshta libra. Pas rënies gjithmonë vjen ringjallja dhe diçka pozitive. Nuk i keni arritur caqet tuaja, porse shumë keni mësuar. Ne kishim fat të keq me intelektualët, të cilët ishin më tepër shkrimtarë sesa shkencëtarë, të cilëve u interesonte gjuha më shumë se filozofia. Për këtë çështje shqiptarët ishin pasivë dhe kurrë nuk kemi krijuar asnjëherë strategji të përbashkët as kundër Milosheviqit.

Si e shpjegoni mungesën e zhvillimit ekonomik?
Kur erdhi UNMIK-u në vitin 1999, thoshin se teatri ynë kombëtar nuk mundë të shkojë ne Edinburg, sepse nuk kemi status të shtetit të pavarur. Ndërkaq, për privatizim nuk kishim nevojë të kishim status të shtetit të pavarur. Ne kemi nisur 60 valë të privatizimit dhe kemi shitur 600 ndërmarrje shtetërore si të mira të vdekura dhe jo si organizata punuese dhe njësi prodhuese. I kanë shitur si tokë dhe si mure. Ekonominë e kanë vrarë dhe e kanë shitur si kufomë. Me shpalljen e pavarësisë ka ndodhur lëvizja nga Kombet e Bashkuara kah BE-ja. Vetëm emri i protektoratit është ndërruar.

A është ndërruar ndonjë gjë me krizat evropiane?
Shqetësimi ynë është se diku 300 shqiptarë luftojnë në Siri dhe nuk kemi asnjë refugjatë sirianë. Kjo zgjon ndjenjën se shqiptarët e Kosovës janë refugjatë në shtetin e vet. Jetojmë nën çadra para parlamentit. Kosova ka themele por nuk ka çati mbi kokë. Refugjati është njeri pa çati mbi kokë. Nga qeveria nuk mund të presim asgjë, kështu ne nuk mundemi më. Të dy jemi peng të së djathtës e cila në Evropë i ka zgjeruar krahët e saj. Vetëvendosja është lëvizje socialdemokrate. Kemi vështirësi. E djathta ka përvetësuar katër shtyllat e jetës dhe të botës. Liria, shteti, ekonomia dhe kombi janë bërë pronë e saj. Socialdemokratëve ua kanë lënë ambientalistët dhe LGBT. Ne ambientalistët dhe LGBT me kënaqësi i pranojmë, por kemi shumë për të thënë për lirinë, ekonominë, shtetin dhe kombin.

*(Intervistën e plotë të Albin Kurit dhënë gazetës sllovene Dnevnik më 16 mars 2016, për gazetarin Ervin Hladnik – Milharčič, e ka shqipëruar lëvizja Vetëvedosje)

Gjatë qendrimit të shkurtër të Kurtit në Lubjanë te Sllovenisë ka ngjallur interesim të shumtë medial dhe atje janë publikuar intervista në te gjitha mediat kryesore.

“Bashkëbisedues tejet interesant, i bindshëm në qëndrime, i qetë dhe tejet i qartë, i fokusuar në Evropën Juglindore, një anglisht folës i përkryer, me shumë të dhëna prezantoi Vetëvendosjen dhe kundërshtimin e thekshëm të saj kundër marrëveshjes me Beogradin, “Zajednicën” (Bashkësinë e komunave serbe në Kosovë) dhe pushtetarëve në Kosovë, kështu e kanë cilësuar Kurtin në mediat sllovene.

Kjo është intervista e plotë:

Albin Kurti: »Gazin lotsjellës të hedhur në rrugë, ia kthyem qeverisë në parlament”

Bashkëbisedim me deputetin dhe ish udhëheqësin e Vetëvendosjes.

Lubjanë, 13 mars 2016

Çka fshehët pas traditës të panatyrshme në Kosovë – hedhja e gazit lotsjellës ne mbledhje të Kuvendit? “ Nëse serbët janë të mësuar të luftojnë, ne si shqiptarë jemi të mësuar demonstrojmë.”

Kundërshtimet ndaj Serbisë dhe përfaqësuesve të Beogradit në Kosovë- “Zajednicës”. Ende e pa krijuar, Bashkësia e komunave Serbe në Kosovë mbetet pengesë në shtetin më të ri të Evropës. Nga marrëveshja historike Prishtinë -Beograd në Bruksel, e nënshkruar me 25 gusht të vitit të kaluar Kosova drithëron nga kriza e thellë politike. Atë e shënojnë dy çështje: demonstratat masive  dhe hedhja e vazhdueshme e gazit lotsjellës në Kuvend, vetëm e vetëm, për t’u parandaluar realizimi i marrëveshjes të mbështetur nga BE në mes qeverisë së Isa Mustafës dhe Aleksandër Vučićit.

Tetë vite pas pavarësisë në udhëkryq

Në fokus të betejës së Opozitës së bashkuar kundër marrëveshjes së nënshkruar me 25 gusht dhe “Zajednicës”, Albin Kurti luan rol kyç. Deputeti dhe para disa kohësh udhëheqësi i lëvizjes opozitare, ish kryetari i komisionit për marrëdhënie me jashtë në Kuvendin e Kosovës.  Të enjten Kurti me ftesë të IFIMES (Institutit ndërkombëtarë për Lindje te afërt dhe Ballkan” mbajti ligjërate) në Lubjanë, “Tetë vite pas shpalljes së pavarësisë Kosova sot – në udhëkryq”, shtoi Kurti.

Bashkëbisedues tejet interesant, i bindshëm në qëndrime, i qetë dhe tejet i qartë, i fokusuar në Evropën Juglindore, një anglisht folës i përkryer, me shumë të dhëna prezantoi Vetëvendosjen dhe kundërshtimin e thekshëm të saj kundër marrëveshjes me Beogradin, “Zajednicën” (Bashkësinë e komunave serbe në Kosovë) dhe pushtetarëve në Kosovë . “Pas viteve të krizës, tani është në krizë edhe qeveria”, ishte decid deputeti 39 vjeçar, për të cilin edhe përkundër rinisë së tij, është një e kaluar 20 vjeçare e vrullshme e karrierës politike (më tepër nën fotografinë e dytë)

Teksti nën fotografi të dytë: Albin Kurti lindi në vitin 1975 në Prishtinë, në botën paralele në Kosovë u ndërthur politikisht në betejën e shqiptarëve nga Kosova. Si udhëheqës i Unionit të pavarur në vitet 1997 dhe 1998 udhëhoqi demonstratat masive studentore kundër regjimit represiv të Miloševićit . Në kohë kur Adem Demaqi, mentor i tij, u bë udhëheqës politik i UÇK-së, Kurti u bë pjesë e kabinetit të tij. Gjatë luftës në Kosovë, në kohën e bombardimeve të NATO-s, e arrestuan dhe  e torturuan forcat policore serbe. Ne vitin 2000, në gjykatën e Nishit e dënuan 15 vite me burg, për
“ shkatërrim të RF të Jugosllavisë, komplot me armikun dhe aktivitete të lidhura me terrorizëm” . Shumicën e kohës ishte i burgosur në Požarevac , ne vendlindjen e Miloševićit. Krejtësisht në burg qëndrojë 27 muaj; 15 muaj nën regjimin e Miloševićit dhe 12 muaj nën atë të Koštunicës. . “ Në burg kam mësuar mirë gjuhën serbe, mbase nuk kishte tjetër çfarë të lexohej në gjuhë tjera, e kohë kisha “përkrye kreje” . Foto Reuters 

“Zajednica” dhe kufiri me Mal të Zi janë shkas për demonstrata

“ Në vitin 2017 janë të parapara zgjedhjet lokale, kurse në vitin 2018 ato parlamentare, mirëpo në besojmë se sivjet do të shkojmë në zgjedhje të parakohshme. Ku edhe do të fitojmë” tha në funde të ligjëratës “Kosova në Udhëkryq”, Kurti përmblodhi në pika të shkurtra thelbin e veprimtarisë  së Opozitës së bashkuar dhe Vetëvendosjes, duke i parashikuar, trashëgimtares së shtatë të ish Jugosllavisë, pranverë dhe verë të bujshme. Demonstratat e fuqishme janë të parapara me datën 26 mars.

Zgjedhjet e parakohshme janë kërkesë e opozitës kosovare për të kundërshtuar realizimin e “Zajednicës” në veri të Kosovës, si dhe demarkacionit me Mal të Zi, peticionin me këto kërkesa në vitin e kaluar e kanë nënshkruar 200. mijë banorë të Kosovës.

“Bosnjëzimi” e shpie shtetin serb në Kosovë

Kosova, sipas mendimit të Kurtit ka dy vështirësi të mëdha. E para është ndarja e qytetit të Mitrovicës me rrethinë përmes të lumit Ibër, kurse tjetra është papunësia. Fajin për vështirësinë e parë ia mveshë Serbisë, kurse për tjetrën, faji, sipas mendimit të tij, është “politika neoliberale e ekstremeve të tregut dhe privatizimi brutal”

“ Për këtë shkak ne si opozitë e kundërshtojmë qeverinë dhe thërrasim në zgjedhje të parakohshme, sepse duam të parandalojmë “bosnjëzimin” e Kosovës. Për të parandaluar depërtimin e shtetit Serb në Kosovë siç ka nopdhur në Bosnje dhe Hercegovinë me Republika Srpska”, e qiti në pah Kurti bindjen e opozitës kosovare për marrëveshjen e mbikëqyrur nga BE, e cila e sjell këtë e që në Bosnje dhe Hercegovinë u arrit me luftë.

Dy vite pengojnë themelimin e “Zajednicës”

Zgjedhjet e lokale në Kosovë në të cilën për herë të parë morën pjesë edhe serbët nga Veriu i Kosovës ishin në nëntor të vitit 2013, e që ishte si parakusht për themelimin e Bashkësisë së Komunave serbe ne Kosovë, e cila nuk është themeluar ende. Çështja duket se ishte harmonizuar në Bruksel mirëpo Kuvendi i Kosovës për shkak të bojkotit të opozitës kosovare nuk mundë të miratojë ligjin e pranuar i cili do të mundësonte atë.

Në anën tjetër BE e hidhëron kryeministri AleksandarVučić, i cili pohon se 36 nga 49 pika të negocimit me Serbinë janë të pa pranueshme. Pikat mbështeten kryesisht ne rregullimin e marrëdhënieve me Kosovën siç pohon Vučići. Për Serbinë janë të papranueshme sesa pranimi i vetë Kosovës.

Provuam me mënyra tjera, pastaj e gjetëm gazin lotsjellës

“ Mediat e ndryshme dhe organizatat na qepin etiketa të ndryshme, që së pari të shikojnë etiketën. Aspak nuk ka rëndësi vetëm etiketa që ta qepin, por edhe kush ta qep atë etiketë. Pikërisht për këtë ne nuk na dëgjojnë.  Çdo herë kur kundërshtojmë planet e qeverisë së Serbisë , , ne na akuzojnë se jemi kundër serbeve. Ne nuk jemi kundër serbëve por është Serbia kundër nesh”, shtoi Kurti se shumica po i mbyll sytë për mesazhin dhe kërkesat e opozitës.

Gjatë debatit Kurti nuk i iku pyetjes se a është hedhja e gazit lotsjellës mjet demokratik . “Kemi provuar edhe mjete të tjera, me fishkëllime, vezë të prishura. Pastaj e kemi zbuluar gazin lotsjellës. Gazin lotsjellës nga rruga e kemi marrë dhe u kemi lëshuar qeverisë në Kuvend. Tërë gazin lotsjellës që e hedhim, e mbledhim nga policia që e hedhë në protestues me qindra kanaçe për t’i larguar demonstruesit, kur mbi protestues hedhet si re ai gaz. Kurrë nuk kemi  dëgjuar se qeveria është shqetësuar për shëndetin e njerëzve të thjeshtë. Kur e kanë provuar ata vetë atë gaz lotsjellës, e ne Kuvend janë njerëzit më të pasur të Kosovës, atëherë ishte “këngë “tjetër.

Tetë herë gaz lotsjellës, tri herë demonstrata masive

“Po, ne i shkelim ligjet por këtë e bëjmë për shkaqe të mëdha. Hedhja e gazit lotsjellës nuk është mënyrë  demokratike, por nuk na mbetet tjetër. Ne nuk hedhim gaz lotsjellës për të plagosur ndonjërin. Vetë ne si opozitë  më se shumti vuajmë prej tij. Pra pengojmë procedurën për miratim të marrëveshjes të cilën edhe Gjykata Kushtetuese e ka cilësuar si jokushtetuese” është tejet i bindur në pohimin e tij Kurti.

Pikërisht të enjten kur ishte Kurti në Lubjanë, opozita e bashkuar edhe herën e tetë hodhi gaz lotsjellës në Kuvendin e Kosovës. (“Sot për herë të parë kam arsye për mungesën që nuk isha atje”) .

Në Kosovë, në gjashtëmujorin e fundit kishte tre demonstrata të fuqishme. Dy të fundit ishin më masive nga periudha e pas luftës 1998/1999. Vetëvendosja dhe aleatet e saj ndërtojnë besimin në vendimin e Gjykatës Kushtetuese ku shumica e neneve dhe kapitujve sa i përket marrëveshjes së Brukselit ishte në kundërshtim me  Kushtetutën.

“Jo dialog për pajtim, por dialog për zhvillim”

“Me serbë është e mundur të jetohet dhe të punohet edhe jashtë hegjemonisë së Beogradit. Ne nuk na nevojitet dialog i mbyllur ne mes përfaqësuesve të qeverisë në Bruksel, por na duhet bashkëbisedim demokratik mbi zhvillimin. Për marrëdhënie normale duhet të ndryshohet Serbia dhe jo Kosova. Në Kuvend nuk janë përfaqësuesit e serbeve të Kosovës por janë 10 përfaqësueses të Beogradit”, tha Kurti, udhëheqësi parë i Lëvizjes Vetëvendosje i cili njëkohësisht mbështet dialogun me serb lokal, me fshatarësi, student dhe jo vetëm në politikë: “Jo nga lartë poshtë, por nga poshtë lartë. Ne nuk na nevojitet dialog për pajtim, por dialog për zhvillim dhe progres”.

Të burgosur tetë deputet të opozitës

“Kosova nuk është shtet demokratik, sepse ka të burgosur politikë. Qeveria është e zhgënjyer me popullin e vet. Për peticion, për demonstrata dhe për opinione publike . Sipas anketave të fundit, 71% e banorëve të Kosovës është kundër “Zajednicës” sepse janë të zhgënjyer., e tash qeveria dhe policia e kërcënojnë popullin. Në këtë moment kemi mbi dhjetëra aktivist të burgosur. Në burg janë gjashtë deputet tonë dhe dy nga partitë tjera opozitare”. Kurti përmendi represionin qeveritar për këtë shkak ai nuk beson se demokracia në Kosovë ka pasur sukses.

“Nuk duam të jem të veçantë, duam gjykata normale”

Kështu e vë në pikëpyetje çështjen e pavarësisë gjyqësore si dhe shpalimin e krimeve nga periudha e ndarjes së Kosovës nga Serbia. “Shumë gjatë na kanë trajtuar si të veçantë. Ne na duhen gjykata normale dhe vendore. Në Kosovë kishim UNMIKUN (misionin e KB për Kosovë), tani kemi ende EULEX-in (misionin e BE në Kosovë) kemi gjykatën e Hagës për krime lufte në ish Jugosllavinë, pse duhet të kemi edhe një gjykatë të posaçme? Kishte  të kryera krime individuale ndër serbet lokal, por me këto do të duhej te merren gjykatat vendore me ndihmën e eksperteve ndërkombëtarë”

“Nëse nuk kemi ujë nëpër shtëpi, ka topa uji kundër demonstruesve”

Edhe përkundër vështirësive dhe tezës se Kosova është në udhëkryq, Kurti rezervon optimizëm mbase jemi shtet i ri dhe kemi mundësi të mëdha. “Natyrisht, udhëkryqi nuk është kërcënim. Por mundësi për çështje të reja. Kosova serish zgjohet, ndryshimi demokratik i vërtetë vjen nga poshtë lartë dhe pikërisht kjo është duke ndodhur. Nëse jo tjetër gjë: edhe pse nuk kemi ujë të pijshëm nëpër banesa dhe shtëpi në Prishtinë, kemi topat e ujit të policisë”.

“Nëse nuk je radikal, nuk je normal”

Pavarësisht, radikalizmi i opozitës politike kosovare zgjon frikë në Evropë dhe në institucionet evropiane, që në rajonin e brishtë dhe jo të qetë në mes Serbisë, Malit të Zi, Shqipërisë dhe Maqedonisë mund të eksplodojë serish. Ndaj këtyre frikave, Kurti vendosmërisht përgjigjet me energjinë e udhëheqësit studentor, i cili në dekadën e fundit ka ndërtuar lëvizje të qendrës së majtë: ” Atje ku varfëriaë shtë  e skajshme, ku problemet politike janë të thella, është normale të jesh radikal. Nëse nuk je radikal, nuk je normal” 

http://www.rtvslo.si/svet/albin-kurti-solzivec-z-ulic-smo-vladi-vrnili-v-parlamentu/388048

Toni Gruden

Intervistë me akademikun, shkrimtarin dhe studiuesin e njohur, Rexhep Qosja

Shkelësit e Kushtetutës të japin dorëheqje, të ballafaqohen me drejtësinë

Protestat duhet të vazhdojnë deri në vendosjen e demokracisë dhe rrëzimin e Qeverisë antikushtetuese. Koalicioni PDK-LDK po e thellon përçarjen në Kosovë. Kurrë më keq nuk ka qenë situata dhe më i degraduar pushteti. Thaçi është i papërmbajtur për pushtet, Mustafa -fatkeqësi për vendin. Politikanët e opozitës japin shpresë për ndryshim. Vetëm shteti i së drejtës ua kthen shpresën qytetarëve. Akademik Rexhep Qosja komenton situatën aktuale ekskluzivisht për “Kosova Sot”

Kosova Sot”: Si e vlerësoni protestën e 9 janarit 2016?

Rexhep Qosja: Ishte protesta më e madhe, me numrin më të madh të pjesëmarrësve, që është mbajtur në Kosovë gjatë 15 vjetëve të fundit. Në të ishte shumë i madh numri i të papartishmëve. Ishte protestë me mesazhe shumë të qarta, që po u dërgoheshin pushtetarëve të shurdhër ndaj zërit të popullit!

“Kosova Sot”: A e kanë dëmtuar imazhin e kësaj proteste masive popullore disa incidente, sepse ende është e paqartë se kush i nxiti, pasi organizatorët e protestës bënin thirrje publike për përmbajtje të protestuesve nga dhuna?

Rexhep Qosja: Mbas fjalimeve të prijësve partiakë, kur edhe u shpall përfundimi i protestës, u bënë disa veprime që do të ishte më mirë të mos ishin bërë. Organizuesit e protestës, si, fjala vjen, Rexhep Selimi, kërkuan prej atyre që hidhnin kokteje molotovi dhe gurë të mos e bënin këtë, por ata nuk dëgjuan! Një mik imi më tha: Disa prej atyre djemve që hidhnin gurë e kokteje molotovi janë të lagjes sime, por asnjëri nuk është anëtar a përkrahës i ‘Vetëvendosjes’ apo i partive të tjera të opozitës: ata janë militantë të LDK-së. Po LDK-ja është e ushtruar kaherë që të bëjë të keqen e të fshehë dorën!

“Kosova Sot”: Edhe pas protestës, Qeveria nuk dha shenja tërheqjeje, por e akuzoi opozitën për dhunë dhe se qëllimshëm po nxit trazira që të vijë me dhunë në pushtet. Si e komentoni këtë qëndrim polarizues të pushtetit?

Rexhep Qosja: Sa po shoh e sa po dëgjoj, opozita po bën protesta jo për të marrë pushtetin, po kundër dy marrëveshjeve kundërkombëtare e kundërshtetërore: kundër Marrëveshjes për krijimin e Bashkësisë së Komunave Serbe dhe kundër Marrëveshjes për Demarkacionin me Malin e Zi. Dorëheqja e Qeverisë prej këtyre dy marrëveshjeve apo prej njërës prej tyre objektivisht sjell rënien e saj. Ato që po i thotë Qeveria për protestën dhe për opozitën janë gënjeshtra të tejdukshme, të formuluara me naivitet dhe me arrogancë fajtorësh! Me këtë arrogancë të saj Qeveria po e shtyn Kosovën drejt konfliktesh shumë më të rënda! Burgosjet e opozitarëve, si në kohën e Milosheviqit

“Kosova Sot”: Gjykata Kushtetuese e vërtetoi se Qeveria e shkeli Kushtetutën, por dy liderët e koalicionit as nuk kërkuan falje e as nuk hoqën dorë nga Asociacioni i Komunave Serbe. Çka fshihet pas këtij qëndrimi antikushtetues?

Rexhep Qosja: Falje! Falje! Çfarë faljesh! Ku ndodh të shkelësh Kushtetutën e shtetit, të bësh politikë kundërkushtetutare e, mandej, të kërkosh falje? Jo, kjo as nuk kërkohet e as nuk ndodh kund. Për politikë që bie ndesh me Kushtetutën ose jepet dorëheqje ose, në raste më të rënda, shkohet në burg. Nënshkruesi i Marrëveshjes për Bashkësinë e Komunave Serbe dhe bashkëpunëtorët e tij nuk mund tërhiqen edhe pse Gjykata Kushtetuese e tha se ajo marrëveshje është fryt i një politike kundërkushtetuese, se është në kundërshtim me frymën e Kushtetutës, se në një varg alinesh cenohet Kushtetuta, sepse ata bëjnë politikë jo siç e do vullneti i popullit po siç kërkojnë disa prej vendeve të Bashkimit Evropian.

“Kosova Sot”: Pushteti po përdor aparatin e dhunës për të arrestuar kundërshtarët politikë, por nuk po e bën të njëjtën gjë kundër të korruptuarve, banditëve etj. A jua kujton kjo situatë persekutimin në kohën e regjimit represiv të Serbisë millosheviqiane, me procese të montuara politike?

Rexhep Qosja: Me burgosjen e deputetëve më të shquar të opozitës dhe të një numri të madh të anëtarëve të opozitës, sidomos, të ‘Vetëvendosjes’, Qeveria po e thellon ndarjen, përçarjen, konfrontimin politik dhe jo vetëm politik, në njërën anë, kurse po e komprometon rëndë idenë e demokracisë në Kosovë, në anën tjetër. Me këto burgosje Qeveria synon dobësimin deri në shpërbërje të partive opozitare, por me këto burgosje Qeveria njëkohësisht po e komprometon rëndë veten. Këto burgosje nuk ka se si të mos na e sjellin në kujtesë dhe në ndjenja regjimin e Milosheviqit, në të cilin afër dhjetë vjet bënte pjesë e merrte mësim kryeministri i sotëm i Kosovës!.

“Kosova Sot”: A ju duket se opozita është unike, deri në rrëzimin e Qeverisë dhe krijimin e një mundësie për një qeverisje të mirë e transparente, jokorruptive dhe të ndershme, që punon për qytetarët dhe zhvillimin e vendit?

Rexhep Qosja: Opozita duket unike sot për sot, por nuk jam shumë i sigurt se do të qëndrojë si sot e bashkuar deri në fund, derisa të jetë politikisht dhe kombëtarisht e nevojshme për të qenë kështu e bashkuar, kështu e njëzëshme siç është sot. Mund ta marr me mend se prej anësh të ndryshme bëhen trysni për shpërbërje të opozitës! E ne, në veçanti dhe në përgjithësi, atyre që vijnë prej përjashta u falemi shumë më lehtë dhe shumë më përkulshëm se atyre që vijnë prej përbrenda. Është ky fati ynë historik si popull që ishim të sunduar me shekuj e ishim sundues ndonjë vit apo dhjeta vjet, kurse në Kosovë deri tani vonë sundues s’ishim asnjë vit! Në qoftë se nuk i vazhdon protestat, në qoftë se nuk e vazhdon revolucionin paqësor, demokratik derisa të bjerë Qeveria tashmë e paligjshme, opozita do të dështojë dhe do të dështojë edhe misioni i saj premtues, historik.

“Kosova Sot”: A mendoni se duhet të mbahen sivjet zgjedhje të reja, pasi Qeveria PDK-LDK e humbi legjitimitetin me keqqeverisje, antikushtetutshmëri, nepotizëm dhe korrupsion?

Rexhep Qosja: Sipas mendimit tim, menjëherë pas vendimit të Gjykatës Kushtetuese, Qeveria është dashur të jepte dorëheqje dhe mandej të krijohej Qeveri teknike, që do të përgatiste zgjedhjet e parakohshme. Por, Qeveria e sotme, pa përgjegjshmërinë që e karakterizon, pa koncept e pa ndjenjë për demokracinë, pa nderim për vullnetin e popullit dhe me shumë servilizëm kolonial ndaj faktorëve të jashtëm këtë nuk e bëri dhe nuk do ta bëjë, përpos në qoftë se do të detyrohet dhe në qoftë se ndonjë faktor ndërkombëtar më në fund do t’i thotë: ndërroje qykën se kështu siç po sillesh do t’i sjellësh Kosovës shumë të këqija!

Mustafa do ta tradhtojë edhe Thaçin

“Kosova Sot”: Si e shpjegoni që një përfaqësues politik i luftës si Hashim Thaçi është lidhur kaq ngushtë me një lider tipik komunist, hipokrit e inatçor si Isa Mustafa dhe nuk japin llogari për asnjë veprim të tyre institucional?

Rexhep Qosja: Emrat lider e komunist dhe cilësorët hipokrit e inatçor nuk janë emra dhe cilësorë, me të cilët mund të thuhet çka duhet të thuhet për karakterizimin e kryeministrit të sotëm të Kosovës. Jo. Ai është një fatkeqësi politike dhe morale në politikën e Kosovës, që në këtë politikë ka sjellë mjete të ndryshme kriminale me të cilat po i sendërton qëllimet e tij, me të cilat po i tendos deri në armiqësi marrëdhëniet politike në Kosovë! Duke u bashkuar me këtë njeri fatkeqësi të Kosovës Hashim Thaçi ka bërë një gabim të pafalshëm për Kosovën dhe një gabim, unë lejohem të them, të rrezikshëm për vetveten. Para disa vjetësh, në një artikull kam shkruar se me ardhjen e Isa Mustafës në krye të LDK-së ka depërtuar kriminaliteti në politikën e Kosovës. Dhe, kjo u pa e po shihet! Hashim Thaçit do t’i ndodhë ajo që është përsëritur më shumë herë në histori, edhe në historinë shqiptare: rënia e turpshme e komprometon ngritjen e lavdishme! Hashim Thaçi do të jetë i tradhtuar prej kryeministrit të sotëm të Kosovës siç ishin tradhtuar të gjithë ata që ishin ngritës të tij. Kryetari i Komitetit Krahinor të LKK-së, Mahmut Bakalli, e bëri këtë njeri kryetar të Lidhjes së Rinisë Socialiste të Kosovës, por kur Mahmut Bakallit i erdhën ditë të vështira, ky njeri ia ktheu shpinën dhe u bë me ata që e përmbysën Mahmut Bakallin. Ata që u shquan në pushtet pas Mahmut Bakallit e bënë këtë njeri në dy mandate kryetar të qeverisë së Prishtinës, por kur këtyre u erdhën ditë të vështira politike, kur Milosheviqi e burgosi Azem Vllasin, ky njeri, kryeministri i sotëm i Kosovës, ia ktheu shpinën edhe Azem Vllasit dhe u bë me kryetarin e ardhshëm të LKK, Rrahman Morinën, i cili e bëri anëtar të Këshillit Ekzekutiv të Kosovës, domethënë ministër, që mori pjesë në shpalljen e gjendjes së jashtëzakonshme në Kosovë dhe në angazhimin e milicisë për shuarjen e demonstratave të rinisë sonë studentore e shkollore kur u vranë e u plagosën shumë të rinj. Kur Rrahman Morina vdiq, ndoshta pse e vrau ndërgjegjja për krejt çka po bëhej në Kosovë, ky njeri, ky kryeministër i sotëm i Kosovës, kërkoi e gjeti dhurues dhe sposorues të tjerë, por edhe të gjithë këta, njërin pas tjetrit, i tradhtoi për të tradhtuar, më në fund, edhe këta të fundit: ‘Vetëvendosjen’, AAK-në dhe Nismën e për t’iu bashkuar PDK-së e Hashim Thaçit! Me logjikën e tij të palogjikë dhe të paetikë ky kryeministër do të tradhtojë edhe Hashim Thaçin! Pse jo? Tradhtia është mjeti po natyra e kryeministrit të sotëm të Kosovës! Por, Hashim Thaçi me politikën e tij shpërfillëse, në të vërtetë fyese ndaj shumë njerëzve që kanë bërë shumë për lirinë dhe pavarësinë e Kosovës, e me ngritjen e poltronëve të ndryshëm për nga dija e gjinia në pushtet ka krijuar shumë kundërshtarë dhe armiq, që do t’i ndihmojnë hapur a fshehurazi kryeministrit për ta tradhtuar edhe Hashim Thaçin!

Gjykata Speciale, e padrejtë 

“Kosova Sot”: Sivjet duhet të bëhet Gjykata Speciale, e cila pavarësisht zërave kundër, sikur e ka ngjallur një shpresë te qytetarët e zhgënjyer se do t’i marrë disa protagonistë e komplotistë të luftës, por edhe të pasluftës me bëmat e tyre, me uzurpimin, abuzimet, keqpërdorimet e tyre. A mund t’ua heqë qafe kosovarëve Gjykata Speciale të “fortët” “e “ish-komplotistët”, që janë mbi ligjin apo duhet vetë kosovarët t’i largojnë ata nga pushteti në mënyrën e tyre me ose edhe “pa ligj”?

Rexhep Qosja: Isha dhe jam kundër krijimit të Gjykatës së Veçantë për trajtimin dhe dënimin e drejtuesve të UÇK-së, domethënë të UÇK-së, të luftës sonë çlirimtare. Ku dhe kur në botë janë krijuar gjykata njëetnike a shumetnike kundër luftëtarëve që kanë mbrojtur vendin e tyre, familjet e tyre, shtëpitë e tyre prej pushtuesve dhe shfarosësve? Kurrë dhe kurrkund. Sa u përket shpërdorimeve të pushtetit, krimit të organizuar, korrupsionit, plaçkitjeve, vjedhjeve, nepotizmave e shumë të këqijave të tjera, që bëjnë e prodhojnë protagonistët e pushteteve primitive, kundërdemokratike – me të gjithë këta dhe me të gjitha këto merren prokuroritë dhe gjykatat e shtetit të së drejtës, shtetit ligjor, natyrisht, e jo gjykatat e krijuara prej të huajve!

“Kosova Sot”: Ka një monopol pushteti në partitë e mëdha, që në vend të demokracisë promovojnë autokracinë e oligarkinë kriminale. Ja shembulli: Thaçi do të bëhet president e Kadri Veseli, ish-kreu i SHIK-ut, lider i PDK-së dhe kryeministër. A ju duket kjo skemë si ajo ruse Putini -Medvedevi?

Rexhep Qosja: Nuk di për kombinimet politike që bëhen në çarshi. Dhe, nuk bëj krahasime politike e pushtetore midis Kosovës e Rusisë. Janë këto dy vende me ndryshime tepër të mëdha në madhësi, në histori dhe në mentalitetet politike, prandaj me ndryshimet e tilla i përjashtojnë gjykimet objektive për ngjashmëri midis tyre!

Kësi prishësie pushtetore nuk është parë ndonjëherë

“Kosova Sot”: Ky koalicion PDK-LDK veçmas ua ka humbur shpresën qytetarëve, sepse vetëm në një vit mbi 100 mijë qytetarë e braktisën Kosovën. Mijëra të tjerë janë të gatshëm të ikin. Si mund t’u kthehet shpresa njerëzve në këtë vend të uzurpuar nga mafia -politikanët dhe mafio-oligarkët?

Rexhep Qosja: Nuk duam të shohim, nuk duam të dëgjojmë, nuk duam të mendojmë sa duhet e si duhet për dramën që po ndodh në njëmendësinë kosovare sot! E vërteta, ndërkaq, s’mund të fshihet gjatë: numër i madh i qytetarëve janë të dëshpëruar dhe nuk kanë shpresë për jetë në Kosovë. Kjo, pashpresë, është e keqja më e madhe e Kosovës sot. Dhe, janë të dëshpëruar, dhe janë të pashpresë jo vetëm ata që jetojnë shumë keq, që nuk kanë punë, që nuk presin se do t’ua qesë pushteti dorën ndonjëherë, por dhe shumë nga ata që nuk jetojnë keq dhe nuk janë të papunë! Prishësi e papërjetuar, e papritur, e paparë pushtetore ua ka thyer iluzionet të gjithëve, të gjithëve, përpos disa naivëve, që kënaqen me gënjeshtrat dhe mashtrimet e pushtetarëve! Së shpejti i bëj tetëdhjetë vjet, në Prishtinë jetoj që gjashtëdhjetë e dy vjet, i kam përjetuar të gjitha pushtetet, të gjitha ndryshimet, të gjitha arnimet dhe çarnimet pushtetore, por kësi prishësie pushtetore si tani nuk ka pasur ndonjëherë! Për shkak të kësaj prishësie numri i atyre që do të kërkojnë mundësinë të ikin prej Kosovës do të vijë jo duke rënë po duke u shtuar. Si mund t’u kthehet dhe a mund t’u kthehet shpresa njerëzve? Mundet. Mund t’u kthehet shpresa njerëzve në qoftë se krijojmë shtet të së drejtës, në qoftë se largohen prej pushtetit bashibozukët e derisotëm, në qoftë se vijnë në pushtet të rinj – të rinj me mendime të reja, me sjellje normale, të pa frikësuar prej të diturve, prej të merituarve, prej të aftëve, prej atyre që kanë kokën të mendojnë me të, prej atyre që e duan Kosovën për popullin e saj e jo për xhepat e vet!

“Kosova Sot”: Kosova ka shumë të rinj e të reja të shkolluar, të formuar mirë, të dinjitetshëm, por asnjërit nuk i vjen radha e as mundësia të shprehë aftësitë e tij në shtetformim e në institucione, ku kriteri kryesor është servilizmi ndaj partisë. Nëse nuk i përket një grupi politik, nëse nuk je i inkriminuar me ta, nuk ke të ardhme në këtë vend. A duhet të ketë Kosova një ligj së pari për dekriminalizmin e plotë të institucioneve të shtetit?

Rexhep Qosja: Keni parë, besoj, se që sa kohë dhe se sa shumë po merret Shqipëria me çështjen e dekriminalizimit të institucioneve shtetërore, madje të atyre më të lartave. Aspak më e vogël nuk është nevoja e Kosovës për t’u marrë me dekriminalizimin e institucioneve shtetërore. Ne mund t’i quajmë si të doni padrejtësitë, shkeljet e të drejtave të njeriut, nepotizmin, punësimet me miqësi, lidhje, farefisni, me ryshfet, mitosjet me xhep e me vithe. Mund t’i quajmë primitivizëm, mund t’i quajmë mentalitet fisnor, mund t’i quajmë perversion, mund t’i quajmë prostitucion e nuk e di si krejt ndryshe, por të gjitha këto, kur më pak e kur më shumë, përmbajnë veprime e pasoja kriminale. Ligji për dekriminalizimin me të cilin do të shërohej – e nuk do të mund të shërohen tash për tash – institucionet e tashme e me të cilin do t’i mbyllej dera kriminalizimit të mëtejmë është më i nevojshëm se çdo ligj tjetër.

“Kosova Sot”: Prej pasluftës, PDKLDK e kanë pasur gjithnjë peshën qendrore në Qeveri. Për shkak se erdhëm në këtë ditë, kur sovraniteti është vënë në dyshim, integriteti territorial po rrezikohet, varfëria ka kapluar popullin, pasuria kombëtare është rrëmbyer e plaçkitur, a është koha që PDK e LDK të dalin në opozitë dhe populli t’i ndëshkojë duke hapur rrugë për opozitën e reformuar dhe alternativa eventuale të reja?

Rexhep Qosja: Koha që këto dy parti të dalin në opozitë nuk do të vijë shpejt. Elektorati ynë nuk është elektorat as gjerman, as anglez, as francez, as italian, prandaj ndërrimet e pushtetmbajtësve nuk ndodhin kollaj. Qytetërimi nuk adhuron bajraktarët, po drejtësinë, të vërtetën, demokracinë, kurse tribalizmi, mentaliteti fisnor i përkulet bajraktarit, mendon për të dhe dëshiron të jetë i sunduar prej tij! Edhe në zgjedhjet e ardhshme do të fitojnë këto dy parti! Është me rëndësi, prandaj, të shkojnë këta që e kanë sjellë Kosovën në gjendjen, në të cilën është dhe në krye të këtyre dy partive e të institucioneve shtetërore të Kosovës të vijnë të tjerë. Edhe PDK-ja natyrisht edhe LDK-ja natyrisht, megjithëse të dyja kanë pësuar shpërfytyrim të thellë politik, shoqëror dhe etik, kanë njerëz, që mund të kihet besim në vetëdijen dhe në etikën e tyre pushtetore. Janë gjatë vështrues të heshtur të një politike, që i ka sjellë dëme të mëdha politike, shoqërore, ekonomike, shtetërore, morale Kosovës, por, megjithatë, s’janë protagonistë të saj.

Jahjaga gaboi, Thaçi i papërmbajtur për pushtet

“Kosova Sot”: Si e shihni rolin e presidentes Jahjaga, e cila me disa qëndrime të saj, duket se më tepër është bërë palë me Qeverinë, kundër opozitës së bashkuar, sesa ka luajtur ndonjë rol unifikues?

Rexhep Qosja: Kryetarja Jahjaga kohë pas kohe ka shprehur disa qëndrime të drejta, parimore, kurse për disa ngjarje këtu, në Kosovë, apo jashtë Kosovës, është paraqitur më dinjitetshëm e më pranueshëm se Kuvendi e Qeveria. Në fund, në situatën e mospajtimeve të opozitës me pozitën për shkak të Marrëveshjes për Bashkësinë e Komunave Serbe dhe Marrëveshjes për Demarkacionin me Malin e Zi ka mbajtur anën që nuk është dashur ta mbajë dhe nuk është dashur ta mbajë qoftë pse e drejta nuk është në anën e Qeverisë e të Kuvendit, qoftë pse historia shqiptare do ta ndëshkojë qëndrimin e Qeverisë e të Kuvendit për ato dy marrëveshje. Kryetarja Jahjaga ka këshilltar të aftë, Arben Vllahiun, i cili ka përvojë politike, i cili e njeh mirë historinë kombëtare, të sotmen e Kosovës, politikën e faktorëve ndërkombëtarë, por këshillat e tij të drejta mund të pengohen prej trysnisë së ndërkombëtarëve, së cilës i nënshtrohet kryetarja!

“Kosova Sot”: Tash, edhe pak ditë, mbaron mandati i Jahjagës dhe Thaçi e synon Presidencën. Çfarë pasojash do të ketë emërimi i Thaçit, duke pasur parasysh konfliktualitetin që ai ka nxitur gjithnjë sa ka qenë në pushtet?

Rexhep Qosja: Shikuar formalisht, përpjekjet e Hashim Thaçit për t’u bërë kryetar i Kosovës janë të ligjshme, por mënyra si po bëhen ato përpjekje nuk janë demokratike. Nuk ma do mendja kryetarin e shtetit që shpallet kryetar në bazë të të ashtuquajturës marrëveshje midis dy partive pa u vendosur kjo në Kuvend! Hashim Thaçi po e shpreh një etje të papërmbajtur pushtetore, që është gjithnjë e më pak e mirëkuptuar në botën demokratike dhe gjithnjë e më pak frytdhënëse në njëmendësinë politike e shoqërore. Historia na mëson se ata që i provojnë të gjitha pozitat më të larta në një shtet zakonisht nuk mbahen mend për të mirë, në qoftë se do të mbahen mend! Ka kaluar njëherë e përgjithmonë koha e Sali Berishëve!

Opozita, me politikanë shpresëdhënës

“Kosova Sot”: A shihni energji pozitive te liderët e opozitës për ndryshime vërtet pozitive, apo…?

Rexhep Qosja: Me gjithë nderimin që kam për rolin e tyre në luftën çlirimtare, mund të them se nuk i kam perceptuar me ndonjë interesim të veçantë në politikë pas luftës as Ramush Haradinajn e as Fatmir Limajn. Tani edhe Ramush Haradinaj, edhe Fatmir Limaj janë duke u paraqitur me një përgatitje shumë më të dukshme, shumë më përshtypje-bërëse dhe më të drejtë. Njëherë për njëherë edhe Ramush Haradinaj edhe Fatmir Limaj po shquhen si prijës partiakë shpresëdhënës. Në partitë e tyre shoh edhe djem të tjerë, edhe gra të merituara për t’u besuar pozita të larta politike e shtetërore. Po përmend deputeten Donika Kadaj-Bujupi. Paraqitjet e saj politike janë të veçanta: ajo gjykon me pjekuri politike, ajo gjykon me përgjegjshmëri të lartë shoqërore e kombëtare, ajo i shpreh mendimet qartë, në mënyrë shumë koncize, duke e paraqitur gjithnjë vetëm atë që është thelbësore. ‘Vetëvendosja’ ka një varg djemsh, kryesisht të rinj dhe disa gra, të reja, që me aftësitë e tyre, me përgatitjen e tyre profesionale, politike, dallojnë shumë ndër njerëzit politikë në Kosovë. Albin Kurti, Visar Ymeri, Shpend Ahmeti, Glauk Konjufca, Albulena Haxhiu, Aida Durguti e shumë të tjerë e të tjera përfaqësojnë nivelin më të lartë të prirjeve e të aftësive politike e të përgjithshme ndër njerëzit e politikës në Kosovë. Prej paraqitjeve të tyre shihet qartë se ata i shquan përgjegjshmëri e lartë për fatin e Kosovës dhe për gjendjen e qytetarëve të saj. Ata janë persona politikë me jetëshkrime të pastra, me qëllime të ndershme, gjithnjë të gatshëm që interesat vetjake t’ia flijojnë të sotmes dhe të ardhmes së Kosovës dhe mirëqenies së qytetarëve.