Tek porta kryesore e Kuvendit të Republikës së Kosovës, dy persona me veshje civile të cilët po rrinin me pjesëtarë të Policisë, dhe që ne dyshojmë se janë policë, gjuajtën me vezë deputetin e Kuvendit të Republikës së Kosovës, Albin Kurtin. Në 17 shkurt persona të policisë kanë gjuajtur me shishe, për të provokuar masën. Në 19 shkurt, persona të policisë ia nisën të sulmojnë opozitën.

Është fatkeqësi kur pushteti nis të përdorë metodat protestuese të opozitës. Sepse opozita nuk përdor polici për të shtypur ata që “protestojnë” kundër saj në mbrojtje të diktaturës. (LVV)

Deputetët e partive të koalicionit qeverisës, LDK dhe PDK, nuk i kanë mbledhur nënshkrimet për ta futur në rend dite zgjedhjen e presidentit të ardhshëm të Kosovës në seancën e Kuvendit të Kosovës , që pritet të mbahet nesër.

“Jo nesër jo, kur të përcaktohet dita dhe momenti për ta fut në rend dite zgjedhjen e presidentit, ne do t’i grumbullojmë nënshkrimet. Kjo është çështja më e vogël dhe më e imta e cila mund të zgjidhet shumë lehtë. Normal që ne nuk e konsiderojmë që edhe vet zgjedhja e presidentit është çështje më e vështirë se e grumbullimit të nënshkrimeve. Deri tash jo, kur të fillojnë nënshkrimet, mblidhen shumë shpejt, pa diskutim, në momentin që fillojnë të mbledhen nënshkrimet është shumë lehtë. Sot është – po e them parapërgatitja për mbledhjen e nesërme për seancën e nesërme – dhe nuk ka të bëj me zgjedhjen e presidentit, nuk është në rend të ditës. Në momentin që ne dakordohemi se kur do të jetë seanca, atëherë nënshkrimet janë çështje krejt formale”, ka thënë ai.

Reqica ka shtuar se PDK nuk e sheh si urgjente zgjedhjen e presidentit derisa zgjedhjen e Hashim Thaçit president e ka quajtur punë të kryer.

Edhe deputetja e LDK-së, Besa Gaxherri tha se nesër do të jetë seancë e rregullt, derisa ka shtuar se grumbullimi i nënshkrimeve për propozim të presidentit është i pakuptimtë, pasi sipas saj, një gjë e tillë është e përcaktuar me procedura të rregullta kushtetuese.

Gaxherri tha, po ashtu, se zyrtarisht Thaçi duhet ta ketë edhe një kundërkandidat për ta proceduar zgjedhjen e tij president në Kuvend.

Mirëpo, Ylli Hoxha nga Lëvizja Vetëvendosje, ka thënë se institucionet aktuale e kanë humbur legjitimitetin për të marrë çfarëdo vendimi, pasi sipas tij, ato e kanë shkelur kushtetutën.

Hoxha ka theksuar se edhe në rastin e zgjedhjes së presidentit do të bëhet ajo që është bërë në vazhdim, në mënyrë që të parandalohet zgjedhja e Hashim Thaçit president.

Në opinion ishte folur që partitë e pozitës kanë filluar t’i mbledhin nënshkrimet për ta proceduar në rend dite zgjedhjen e presidentit të Kosovës në mbledhjen e së premtes më 19 shkurt 2016. /KosovaPress/

Protesta e 17 shkurtit ishte mesazhi më i fortë që mund të jepet prej një opozite paqësore. Kauzat e opozitës kanë sot mbështetjen më të madhe e më të gjerë gjithëpopullore se kurrë ndonjëherë. Keqqeverisja e koalicionit PDK-LDK-Lista Srpska,  arrin të bëjë bashkë kaq shumë protestues kundër saj.

Falënderojmë kujdestarët dhe protestuesit për sjelljen e tyre të kulturuar e civile. Por fatkeqësisht nuk ka qenë ky skenari i pushtetit.

Një ditë para protestës filluan provokimet policore ndaj opozitës. Me urdhër politik filluan arrestimet ndaj aktivistëve të opozitës, ndër ta edhe zëdhënësi i Lëvizjes VETËVENDOSJE! Frashër Krasniqi, si dhe kryetari i grupit parlamentar të këtij subjekti, Glauk Konjufca. Pushteti u përpoq ta linte fajin për këto arrestime tek EULEX, por EULEX u distancua dhe tha se nuk i kishte urdhëruar ato.

Po ashtu një ditë para protestës, zyrtarë të Policisë së Kosovës kanë ndaluar vendosjen e zërimit në sheshin “Nëna Terezë”, duke ofenduar punëtorët që po merreshin me përgatitjet logjistike. Në mbrëmjen e 16 shkurtit policia rrethoi me katër vetura policie zyrat e Lëvizjes VETËVENDOSJE!

Provokimet nga ana e pushtetit vazhduan edhe gjatë ditës së protestës. Mbështetës të opozitës që kishin ardhur të organizuar me autobus nga Shqipëria, u ndaluan në kufi. Njërit prej tyre iu ndalua arbitrarisht hyrja në Kosovë përgjithmonë, dhe një tjetër u arrestua pa asnjë shpjegim dhe ende mbahet në stacionin policor Prizren.

Në Prishtinë policia lëshonte deklarata për kinse arrestim të protestuesve me pajisje të rrezikshme apo me benzinë. Por, nuk u publikua asnjë emër i të arrestuarve. Pas protestës u mor vesh se të gjitha këto ishin inskenime.

Në Prishtinë u stacionuan forca të mëdha policore, me armatim të rëndë, autoblinda, topa uji e mjete të tjera. Në kulmet e ndërtesave që rrethonin sheshin u pozicionuan snajperë me maska, të cilët mbanin nën shënjestër protestuesit dhe qytetarët paqësorë.

Gjatë protestës, në mes të tubimit masiv, policët hynë disa herë të armatosur, pa patur asnjë nevojë. Të armatosur e të maskuar, ata e ndalën edhe një kamion të vogël që mbante zërimin e protestës. Ata u përpoqën të provokonin masën me ndërhyrjen e tyre tek hoteli Swiss Diamond, por nuk patën sukses.

Një person gjuajti me shishe ndaj policisë. Kujdestarët e identifikuan dhe e fotografuan atë person, i cili me vete mbante një revole të tipit Glock me të cilat është e pajisur policia. Ne e kemi fotografinë e tij dhe besojmë se ai është njeri i strukturave të sigurisë së pushtetit, i infiltruar në masë që të provokojë dhunë.

Deklaratat e Isa Mustafës dhe të Hashim Thaçit, janë në sinkron të plotë me këto veprime dhe me këtë skenar të dhunshëm. Ata po e humbin kontrollin, sepse po e humbin mbështetjen nga ndërkombëtarët. Mustafa e Thaçi shpresuan se do të kishte dhunë, dhe prandaj u përpoqën ta nxisin atë. Ata deri më sot e kanë mbajtur pushtetin me dhunë, duke ia hedhur fajin opozitës. Protesta e 17 shkurtit i demaskoi të gjitha veprimet e tyre.

Qytetarët e Kosovës, opinioni publik, shoqëria civile, dhe Bashkësia Ndërkombëtare e trupi diplomatik duhet të dënojnë inskenimet qeveritare që synojnë konfliktin e dhunën. Opozita dhe protestuesit dëshmuan paqe, ndërsa qeveria ka dashur dhunë dhe ka bërë skenar të detajuar për ta provokuar dhunën.

Pushteti mund të provokojë dhunë edhe në ditët në vijim, me thirrjen e seancave të parlamentit, pa dhënë një përgjigje për kërkesat e opozitës.

Prandaj ne u bëjmë thirrje pushtetarëve dhe të gjithë njerëzve vullnetmirë, që kanë fuqi mbi ta, t’i zmbrapsin ata nga provokimet e reja të situatës dhe të reflektojnë momentin e krijuar.

18 shkurt 2016

Opozita e bashkuar

Kryeministri Isa Mustafa dhe zëvendësi i tij, Hashim Thaçi pas protestës së opozitës në konferencë për media thanë se si pasojë e protestës së opozitës, në tetëvjetorin e pavarësisë, pjesa më e madhe e qytetarëve e kanë pritur këtë festë në shtëpitë e tyre. Dhanë edhe përgjigje për ultimatumin e opozitës.

“Munden këta të japin afate deri më 10 qershor 2018, derisa të mbahen zgjedhjet e rregullta. Bile nuk do ta lodhi mendjen të mendoj për afatet tyre, sepse kemi punë shumë më të mençur”, tha Mustafa.
“Sa i përket ultimatumeve, në këtë vesh hyjnë në këtë tjetrin dalin. As se kemi ndërmend t’i dëgjojmë ultimatumet revolucionare”, tha Thaçi.
Edhe Mustafa edhe Thaçi kishin një fjalor të ashpër ndaj opozitës, të cilën, megjithatë e ftuan për dialog. Madje, Thaçi i quajti qyqarë opozitarët, të cilët vetëm pak metra nga Qeveria mbajtën protestë paqësore.

“Kishin dërguar mesazhe, na pritni sot në Prishtinë, na pritni në Qeveri. Ne ishim këtu, 20 metra distancë me ta. Nuk erdhën. Kësaj radhe kishim vendosim mos t’i presim me kafe, por t’ua japim përgjigjen e merituar. E si u larguan? Me bisht nën shalë, si qyqarë”, tha Thaçi.

Edhe peticionin e opozitës, me mbi 200 mijë nënshkrime kundër Asociacionit të Komunave me shumicë serbe, Thaçi e quajti të falsifikuar. Madje paralajmëroi ngritjen e një komisioni hetimor për këtë peticion.

“Eprorët opozitarë, duhet të përgjigjen për ato falsifikime masive të peticionit”, tha Thaçi.

Më tej, Thaçi tha se çështja e demarkacionit me Malin e Zi, është ngritur vetëm për interesa personale, duke aluduar në pronën e kryetarit të Aleancës për Ardhmërinë e Kosovës, Ramush Haradinaj, në fshatin Shtedim, në Rugovë.

E shefi i Thaçit, Isa Mustafa, tha se ajo që u tha në shesh nga opozita flet për shumë të pavërteta, flet për iluzionet e tyre dhe për dëshirën e tyre që të rrënohet shteti dhe pushteti, e në mënyrë jolegale të vendoset pushteti në Kosovë..

“Askush nuk ka të drejtë ta shpallë të shkarkuar Qeverinë në lamën e këtij qyteti, sepse lamat dhe sheshet nuk janë as për të zgjedhur, as për të shkarkuar Qeverinë”, tha Mustafa.

Mustafa tha se kjo qeveri do ta vazhdojë mandatin deri më 10 qershor të vitit 2018 me legjitimitet dhe legalitet të plotë dhe me përkushtim që t’i kryej të gjitha zotimet që ua ka dhënë qytetarëve. Mustafa e Thaçi theksuan se institucionet janë stabile, legjitime, me legalitet të plotë dhe me bashkëpunim të shkëlqyer me bashkësinë ndërkombëtare. Ata thanë se do të vazhdojnë me agjendën e përbashkët për zgjedhjen e presidentit, duke respektuar afatin kushtetues.

Më shumë se 100.000 qytetarë të Republikës së Kosovës dolën sot në protestën e thirrur nga Opozita e Bashkuar, për shtet me sovranitet dhe kundër Qeverisë antikushtetuese. Pavarësisht kërcënimeve policore dhe përdorimit të kanaleve të propagandës për të frikësuar popullin, qytetarët dolën më shumë se kurrë më parë.

Pjesëmarrësit kanë ardhur prej të gjitha anëve të Kosovës, prej qyteteve e fshatrave, e masivisht prej kryeqytetit, Prishtinës. Protesta nisi në orën 14:00 te Biblioteka Kombëtare, dhe vazhdoi në formë marshimi deri te Sheshi Skënderbe. Aty qytetarëve iu drejtuan me fjalime deputetë e udhëheqës të subjekteve opozitare, Nismës për Kosovën, Aleancës për Ardhmërinë e Kosovës, dhe Lëvizjes VETËVENDOSJE!

Populli i Kosovës është ngritur në këmbë, masivisht, për t’i kundërshtuar marrëveshjet e dëmshme për Kosovën, dhe për ta kundërshtuar këtë Qeveri që me cdo kusht po i shtyn këto marrëveshje përpara. Një Qeveri që e ka shkelur 23 herë Kushtetutën e vendit, nuk ka legjitimitet e as legalitet ta udhëheqë vendin.

Marrëveshjet tashmë janë anuluar prej verdiktit popullor, dhe kësaj Qeverie i mbetet vetëm të largohet, menjëherë. Këtë po e kërkon sot populli i Kosovës, në sheshet e Prishtinës, në protestën më të madhe të pasluftës në Kosovë. Nëse Qeveria nuk e dëgjon fjalën e popullit, atëherë prej 27 shkurtit protestat do të bëhen intensive e të pandërprera. Sot populli me prezencën dhe zërin e tij e ka shkarkuar Qeverinë e Kosovës. (LVV)

Dhjetëra mijëra qytetarë morën pjesë në protestën e organizuar nga lëvizja Vetëvendosje, Aleanca për Ardhmërinë e Kosovës dhe Nisma për Kosovën, për të kërkuar rrëzimin e qeverisë dhe zgjedhje të parakohshme parlamentare. Ato i dhanë afat deri më 27 shkurt qeverisë që të largohet.

Partitë opozitare thonë se qeveria duhet të largohet në dritën e vlerësimeve të Gjykatës Kushtetuese mbi marrëveshjen e arritur me Serbinë për asociacionin e komunave me shumicë serbe në Kosovë.

“Kush e ka ndal këtë qeveri? E keni ndal ju, mos të ishit ju dëmet do të ishin më të mëdha, të përhershme dhe të pariparueshme. Andaj, ju sot me vendimin e juaj për shkarkim i obligoni të gjithë vendim marrësit. Ju sot I keni obliguar me zbatu këtë vendim menjëherë”, tha kryetari i Aleancës për Ardhmërinë e Kosovës, Ramush Haradinaj.

 “Sot, populli i Kosovës ju ka hequr legjitimitetin. Vendi duhet të shkoj në zgjedhje të parakohshme. Nuk ka kërkesë më demokratike, më institucionale se sa kërkesa për të shkuar drejt zgjedhjeve të parakohshme dhe për ti hapur rast dhe mundësi qytetarëve të Kosovës me votën e tyre, ata të vendosin nga është e drejta dhe kush duhet ti qeverisë”, tha kryetari i Nismës për Kosovën, Fatmir Limaj.

“Nuk mund të ketë normalitet institucional, nuk mund të ketë zgjedhje presidentësh e votim të vendimeve dhe ligjeve në Kosovë kur populli bashkë tashmë insiston që kjo qeveri nuk bënë të qëndroj aty as edhe një minutë të vetëm”, tha kryetari i lëvizjes Vetëvendosje, Visar Ymeri.

Që nga shtatori i vitit të kaluar, opozita ka bllokuar punën e parlamentit duke kundërshtuar këtë marrëveshje sikurse edhe atë të arritur me Malin e Zi për shënimin e kufirit.

Qeveria ka bërë thirrje për dialog politik, duke u zotuar për zbatimin e vendimit të Gjykatës Kushtetuese, e cila në muajin dhjetor tha se pjesë të marrëveshjes nuk janë në pajtim me Kushtetutën e Kosovës dhe se asociacioni do të themelohet sipas marrëveshjes së prillit të vitit 2013 për normalizimin e marrëdhënieve me Serbinë.

Kosova po shënon sot përvjetorin e tetë të pavarësisë së saj, duke u përballur me krizën më të rëndë politike. E mërkura ishte ndarë në dysh.

Paradite, në kryeqytet u mbajtën manifestime të organizuara nga qeveria, gjatë të cilave Forcat e Sigurisë së Kosovës dhe njësitë e Policisë së Kosovës parakaluan në qendër të Prishtinës.

Kosova shpalli pavarësinë e saj më 17 shkurt të vitit 2008, në bazë të planit të krye negociatorit të Kombeve të Bashkuara Martti Ahtisaari. Deri tash ajo është njohur nga mbi 100 vende të botës.

Pavarësia e saj vazhdon të kundërshtohet nga Serbia, e cila është përfshirë në bisedime për normalizimin e marrëdhënieve me Kosovën që është kusht për rrugëtimin e saj drejt integrimeve evropiane. Bisedimet i sigurua Serbisë hapjen e negociatave për anëtarësim në Bashkimin Evropian.

Por, Kosova vazhdon të mbetet e fundit në proceset integruese. Ajo nënshkroi Marrëveshjen e Stabilizim Asocimit në tetor të vitit të kaluar e cila u miratua nga Parlamenti Evropian në fillim të këtij viti.

Kosova është vendi i vetëm në Evropën juglindore që ka mbetur jashtë procesit të liberalizimit të vizave dhe qytetarët e saj nuk mund të udhëtojnë në vendet e Bashkimit Evropian pa viza.

Kosova ndërkaq është vendi me shkallën më të lartë të pranisë evropiane. (voa)

Ende nuk kanë mbërritur të gjithë. Populli masivisht po e tregon mbështetjen për kauzat e Opozitës së bashkuar.

Kosova më nuk do të durojë të qeveriset nga njerëz që e kanë shkelur Kushtetutën për ta shitur vendin.

LVV

Në Prishtinë ka nisur protesta e thirrur nga tri subjektet opozitare, Lëvizjes Vetëvendosje, Aleanca për Ardhmërinë e Kosovës dhe Nisma.

Me mijëra qytetarë janë mbledhur në drejtim të Qeverisë së Kosovës, ku do të mbahet manifestimi qendror i opozitës.

Protestuesit fillimisht janë tubuar tek Biblioteka Kombëtare, prej nga më pas kanë vazhduar për në qendër të Prishtinës, ku qytetarë të shumtë po festojnë Ditën e Pavarësisë.

Shumë qytetarë që po marrin pjesë në protestëjanë transportuar nga qytete e mjedise të ndryshme të Kosovës.

Ndërkohë, Policia e Kosovës duket e mobilizuar për të siguruar mbarëvajtjen e protestës.

Forca të mëdha të Policisë së Kosovës tashmë janë vendosur para objekteve të institucioneve të larta , Qeverisë dhe Kuvendit të Kosovës. (rel)

Kosova ka shënuar 8-vjetorin e Pavarësisë me ceremoni zyrtare në sheshin “Zahir Pajaziti”, në Prishtinë, në praninë e krerëve më të lartë shtetërorë dhe diplomatëve ndërkombëtarë, por aty munguan përfaqësuesit e opozitës.

Gjatë fjalimit para qytetarëve në ceremoninë festive, Presidentja Atifete Jahjaga u ka bërë thirrje udhëheqësve politike për unitet dhe dialog.

“Sot është festë dhe festat, zakonisht bëjnë bashkë të gjithë, në një dialog që zëvendëson moskuptimin dhe keqkuptimet, që ndryshon botëkuptimin dhe që mban gjallë kulturën e marrëveshjeve. Është koha për të harruar mëritë, për të tejkaluar dallimet. Tani është koha e ndërtimit, që varet nga vet ne”, tha Atifete Jahjaga, Presidente e Kosovës.

Kryeministri Isa Mustafa ka thënë se, qeveria e tij do të punojë me Shtetet e Bashkuara të Amerikës dhe miqtë e tjerë ndërkombëtarë, për të përmbyllur transformimin e Forcës së Sigurisë në Forca të Armatosura.

“Republika e Kosovës po shënon ditën e Pavarësisë në sheshin e komandantit të UÇK-së, Zahir Pajaziti, këtu pranë Ibrahim Rugovës, që me simbolin e hapit të tij shënon vizionin e ecjes përpara të këtij vendi, shënon rrugëtimin e vështirë por të vendosur të këtij populli, shënon miqësinë e përhershme me Shtetet e Bashkuara të Amerikës dhe orientimin euroatlantik të qytetarëve të Kosovës”, tha Isa Mustafa, kryeministër i Kosovës.

Në tetëvjetorin e Pavarësisë, Kosova është e njohur nga 111 shtete, ndërsa është bërë pjesë edhe e shumë organizatave ndërkombëtare.

Pas përmbylljes së festës zyrtare, e cila zgjati më pak se një orë, udhëheqësit e institucioneve kanë vizituar kompleksin memorial të komandantit legjendar Adem Jashari, në Prekaz, ndërsa kanë bërë homazhe edhe te varri i ish-Presidentit Ibrahim Rugova.

Kryeministri Isa Mustafa dhe zëvendëskryeministri Hashim Thaçi kanë deklaruar pas homazheve se, opozita nuk ka arsye që të protestojë e t’ua prishë festën qytetarëve.

Në ceremoni nuk kishte përfaqësues nga Shqipëria, ndërsa qytetarë të shumtë kanë udhëtuar drejt Prishtinës për festë dhe protestë. Disa prej udhëtarëve, që do t’u bashkoheshin protestës, janë ndaluar në kufi dhe janë kthyer mbrapsht.

Lëvizja Vetëvendosje thotë se, dy prej tyre janë ndaluar dhe janë shpallur persona të rrezikshëm, ndërsa policia konfirmon vetëm faktin se, ka kthyer prapa ata që kanë deklaruar se po shkojnë në protestë.

/ Top Channel

Zëvendëskryeministri i Kosovës, Hashim Thaçi, tha në një intervistë për Zërin e Amerikës se në Kosovë nuk ka krizë institucionale, por, siç tha ai, anarki opozitare. Në intervistën dhënë korrespodentit tonë në Prishtinë, Leonat Shehu, zëvendëskryeministri Thaçi, tha se zgjedhjet e reja do të mbahen në afatet kushtetuese, pas dy vjetësh, ndërsa zgjedhja e presidentit gjatë muajit shkurt. Ai mohoi zërat se kriza aktuale në Kosovë po shfrytëzohet për të zvarritur ngritjen e Gjykatës së Posaçme për krime lufte.

Zëri i Amerikës: Zoti Thaçi, Kosova po shënon tetë vjetorin e pavarësisë së saj në një kohë kur po përballet me krizën politike më të rëndë që nga shpallja e saj. Si e shihni zgjidhjen e kësaj krize?

Hashim Thaçi: Kosova po shënon tetë vjetorin e pavarësisë në një rrethanë të përparimit, kemi fituar 111 njohje ndërkombëtare, është anëtarësuar në shumë organizata rajonale, evropiane dhe ndërkombëtare në mesin e tyre edhe 29 federata sportive dhe presim që shumë shpejt Kosova të anëtarësohet në UEFA dhe FIFA, ndërsa sivjet për herë të parë do të marr pjesë edhe në lojërat olimpike në Rio De Janeiro. Kosova këtë tetë vjetor e shënon në një stabilitet shtetëror me një forcim të subjektivitetit të vet ndërkombëtar, si një vend i respektuar prej miqve dhe partnerëve të bashkësisë ndërkombëtare. Në të njëjtën kohë mund të them lirisht se ky tetë vjetor shënon edhe vitin e Kosovës evropiane sepse vetëm sa është nënshkruar marrëveshja e Stabilizim Asocimit por edhe tash kur jemi në prag të rekomandimeve për liberalizimin e vizave. Pra, kemi të bëjmë me një sukses të konsiderueshëm dhe në të njëjtën kohë shteti i ri i Kosovës përballet me sfida që i kanë edhe vendet tjera të rajonit, para se gjithash për të vazhduar trendin pozitiv të zhvillimit ekonomik, për të vazhduar thellimin e reformave në të gjitha sferat, krijimin e vendeve të punës dhe rritjen e mirëqenies së qytetarëve të saj.

Zëri i Amerikës: Sipas jush, në Kosovë nuk ka krizë?

Hashim Thaçi: Në Kosovë ka anarki opozitare, por jo krizë institucionale, ka veprime arbitrare që e cenojnë dhe rrezikojnë demokracinë dhe të arriturat e Kosovës. Por, ne jemi të vendosur si institucione legjitime, legale dhe me një mazhorancë të fuqishme të vazhdojmë reformat e nevojshme, zbatimin e plotë të kritereve të Kopenhagës edhe në ekonomi, politikë dhe legjislacion, të punojmë për fqinjësi të mirë me të gjitha vendet e rajonit, të krijojmë një ambient që çdo qytetar të ndihet mirë dhe krenar për të jetuar në Kosovë. Kosova është një vend i sigurt dhe me perspektivë të sigurt evropiane dhe se asnjë veprim anarkist ose që nuk përkon me traditën e qytetarëve të Kosovës, politikës së Kosovës dhe vizionit politik të vendit tonë nuk do të ngadhënjejë mbi vullnetin e qytetarëve, mbi institucionet legjitime, pra nuk do të mund të sfidohet as shteti e as institucionet prej asnjë ambicie që përmes rrugës të vijë në pushtet. Mund të ketë vërejtje dhe sugjerime për punën që bëhet, por ato duhet të prezantohen në institucionin më të nderuar të shtetit në Parlamentin e Kosovës. Ne e respektojmë të drejtën e njerëzve për të ngritur zërin ndaj çështjeve që janë të diskutueshme, por, në të njëjtën kohë duhet kuptuar se në pushtet arrihet përmes kutisë së votimit dhe jo përmes proceseve të dhunshme apo veprimeve arbitrare. Opozita kauzën e ka të gabuar dhe metodat i ka plotësisht të papranueshme.

Zëri i Amerikës: Opozita po kërkon mbajtjen e zgjedhjeve të parakohshme. Kur kemi parasysh që ky është vit i zgjedhjeve edhe në një pjesë të madhe të rajonit, a mund të presim që kjo të ndodhë edhe në Kosovë?

Hashim Thaçi: Opozita është duke kërkuar ardhjen në pushtet edhe pa zgjedhje, është duke kërkuar shpërbërjen e parlamentit, por se kur shpërbëhet parlamenti vendoset në përputhshmëri me Kushtetutën dhe ligjet e Kosovës dhe në afatin e rregullt kushtetues. Zgjedhjet do të organizohen në vjeshtën e vitit 2017 ato lokale ndërsa të përgjithshmet në qershor të vitit 2018. Vlerësoj që do të ishte me interes që udhëheqësit opozitar të kuptojnë, e para që të distancohen nga dhuna dhe e dyta të vihen në shërbim të përparësive të shtetit që ta forcojmë edhe më tepër dhe në asnjë rrethanë të pretendojmë për të dëmtuar pushtetin e në të njëjtën kohë janë duke e lënduar rëndë shtetin e Kosovës sepse koalicioni ka një mazhorancë të fuqishme dhe nuk është i cenueshëm politikisht prej këtyre veprimeve opozitare, por është duke u lënduar rëndë shteti i Kosovës.

Zëri i Amerikës: Zoti Thaçi, ç’të keqe do të kishte nëse Kosova i mban zgjedhjet e parakohshme?

Hashim Thaçi: Ne nuk mund të shkojmë në zgjedhje çdo herë që dikush humb garën elektorale dhe pastaj pretendon të përsërisë edhe njëherë atë proces elektoral. Zgjedhjet mbahen një herë në katër vite, mazhoranca në Kosovë është shumë e fuqishme dhe në zgjedhje shkohet nëse nuk ka mazhorancë koalicioni ose humb shumicën në parlament apo situata tjera, por në një situatë normale nuk ka arsye që të shkohet në zgjedhje të parakohshme. Përkundrazi, shteti do të funksionojë dhe do të kryej të gjitha obligimet që dalin përball me përparësitë që kemi si vend edhe në të njëjtën kohë përball bashkësisë ndërkombëtare. Ftoj të gjithë ata njerëz të distancohen prej veprimeve të tilla sepse i kanë qitur një hije të keqe shtetit tonë në këto gjashtë muajt e fundit.

Zëri i Amerikës: Kosova tash duhet të zgjedh edhe presidentin meqë skadon mandati i presidentes Atifete Jahjaga, Sipas marrëveshjes suaj me Lidhjen Demokratike të Kosovës, ky post ju takon juve. A do të jeni ju presidenti?

Hashim Thaçi: Partia Demokratike e Kosovës dhe unë do ta respektojë në tërësi marrëveshjen me Lidhjen Demokratike të Kosovës dhe partnerët tjerë të koalicionit që përbëjmë rreth 90 deputetë. Zgjedhja e Presidentit të vendit do të ndodhë në afatin e rregullt kushtetues e ligjor në një procedurë të përpiktë dhe një proces transparentë gjatë muajit shkurt.

Zëri i Amerikës: Kur është kjo datë?

Hashim Thaçi: Ende nuk është caktuar nga kryesia e parlamentit, por ne do të respektojmë në tërësi procedurat, transparencën e plotë me një president me legjitimitet të plotë qytetar dhe natyrisht në një proces të transparencës së plotë në kuptimin legal.

Zëri i Amerikës: Zoti Thaçi, kundërshtarët nga opozita dhe një pjesë nga partneri juaj i koalicionit shprehen kundër kandidaturës suaj. Sa mund ta vështirësojnë zgjedhjen tuaj ata?

Hashim Thaçi: Unë nuk jam kandidat i ndonjë individi të caktuar, jam kandidat i një marrëveshjeje të përbashkët në mes dy partive të fuqishme në vend, Partisë Demokratike dhe Lidhjes Demokratike të Kosovës dhe partnerëve tjerë të koalicionit. Unë kuptoj zërin opozitar, në të njëjtën kohë kuptoj edhe zërat që mund të dëgjohen aty, por mund të them se presidenti i ardhshëm i Kosovës do të jetë një prej presidentëve më legjitim që ka pasur ndonjëherë Republika e Kosovës duke vlerësuar lartë edhe punën e presidentit Rugova, presidentit Sejdiu, presidentit Pacolli dhe presidentes Jahjaga.

Zëri i Amerikës: Zoti Thaçi, kriza politike në Kosovë pasoi mospajtimet për rezultatet e bisedimeve me Serbinë dhe se kundërshtarët e tyre thonë se nuk e kanë ndryshuar qasjen e Beogradit, dhe në të njëjtën kohë e kanë dobësuar Kosovën. Sa realisht kanë ndikuar këto bisedime për normalizimin e marrëdhënieve?

Hashim Thaçi: Dialogu në Kosovë ka shënuar një kthesë dramatike në kuptimin e largimit të ndikimit të Serbisë në Kosovë. Në anën tjetër të afrimit të komunitetit serb në institucionet e Republikës së Kosovës. Më herët disa prej tyre kanë qenë nëpër barrikada tash janë në Parlamentin e Kosovës, në institucionet legjitime, në anën tjetër ne kemi organizuar zgjedhje për herë të parë sipas kushtetutës dhe ligjeve të Kosovës edhe në veri të vendit si ato të përgjithshme dhe lokale. Tash policia dhe doganierët e Kosovës janë në pikat kufitare me Serbinë. Kemi funksionimin e sistemit të drejtësisë, janë integruar serbët në policinë e Kosovës, po e ri integrojmë veriun përmes këtij procesi dhe po e largojmë ndikimin e plotë të Beogradit. Arsye për reagime të tilla nga opozita nuk ka pasur sepse këto reagime armiqësore ndaj komunitetit serb në Kosovë vetëm sa mund ta lëndojnë dhe dëmtojnë Kosovën e re evropiane, shumë etnike dhe të largojnë mbështetjen e bashkësisë ndërkombëtare për Kosovën. Pra, thirrjet e tyre armiqësore janë të frikshme dhe shqetësuese edhe për serbët, por në të njëjtën kohë edhe për demokracinë në tërësi në Kosovë.

Zëri i Amerikës: Zoti Thaçi, procesi i bisedimeve lidhet me emrin tuaj. Sa ndjeheni përgjegjës për krizën që ka kapluar vendin?

Hashim Thaçi: Gjitha veprimet tona kanë qenë kushtetuese dhe ligjore. Marrëveshjen që kam nënshkruar në vitin 2013 është ratifikuar në Parlamentin e Kosovës. Ka kaluar në Gjykatën Kushtetuese dhe është vlerësuar se është gjithçka në përputhje me Kushtetutën. Marrëveshjen e vitit 2013 që e kam nënshkruar ka marr pjesë edhe Aleanca për Ardhmërinë e Kosovës dhe e kanë votuar në parlament, e ka votuar edhe Lidhja Demokratike e Kosovës kështu që e vlerësoj edhe partinë e zotit Haradinaj për votimin e marrëveshjes për normalizimin e marrëdhënieve me Serbinë, në të njëjtën kohë vlerësoj lartë dhe konstruktivitetin të udhëheqësit opozitar dhe Lidhjes Demokratike të zotit Mustafa tash kryeministër aktual. Në atë kohë, unë kam arritur që të krijojë një unitet më të gjerë dhe të pranueshëm prej gjithë subjekteve politike në Kosovë ndërsa sot ata po reagojnë ndaj gjërave dhe çështjeve të cilat vet i kanë pranuar dhe vet i kanë votuar.

Zëri i Amerikës: Zoti zëvendëskryeministër, shumë veta në Kosovë por edhe jashtë saj pohojnë se kriza aktuale po shfrytëzohet për të zvarritur funksionalizimin e Gjykatës së Posaçme për krime lufte. Si i vlerësoni pohimet e tilla?

Hashim Thaçi: Unë sinjale të tilla nuk kam dhe opinione të tilla nuk kam. Kam dëgjuar opinionet e lira, por është një proces i pandalshëm. Kosova ka kryer të gjitha obligimet e veta, ne i besojmë sistemit të drejtësisë ndërkombëtare, nuk kemi asgjë për të fshehur dhe mendoj se ky proces duhet të shndërrohet në përparësi për Kosovën dhe jo të pretendohet që të paraqitet si frikë apo për të keqen e vendit tonë.

Zëri i Amerikës: Transparency International e radhiti Kosovën shume poshtë sa i përket shkallës së korrupsionit. Edhe, Këshilli i Evropës e cilësoi atë madje endemik. Ju jeni tashmë që nëntë vite në qeveri. Sa ndjeheni përgjegjës për këtë situatë?

Hashim Thaçi: Është fat që sistemi  i drejtësisë në Kosovë në kuptimin ekzekutiv është udhëhequr prej bashkësisë ndërkombëtare tash e 16 vite, njëherë prej UNMIK-ut dhe pastaj prej EULEX-it. Pavarësisht prej opinioneve të ndryshme, unë vlerësoj se EULEX-i ka bërë një punë të mirë, ka luftuar korrupsionin dhe krimin e organizuar së bashku me institucionet e vendit ndërsa tash po ndodh një proces krejt normal i bartjes së autoritetit më të fuqishëm tek institucionet e vendit. Institucionet tona kanë krijuar përvojën dhe ekspertizën e duhur, por natyrisht duhet të vazhdojmë edhe më tepër në këtë drejtim dhe do të jemi të pakompromis sepse është një prej kushteve themelore për të ardhmen evropiane të vendit.