Kategoritë: Kosova

Lajmet nga Kosova

Kosova

Zullumi qeveritar përballet me mllefin qytetar

Komento

protesta prishtineProtesta e thirrur nga Opozita e Bashkuar, u bë një protestë gjithëqytetare. Pjesëmarrja e qytetarëve ishte masive si kurrë më parë. Opozita falenderon dhe shprehë mirënjohje për të gjithë qytetarët, anëtarët e simpatizantët e subjekteve opozitare për pjesëmarrjen e tyre në këtë protestë.

Para disa ditësh Isa Mustafa tha se do ta zbatojë “Zajednicën” pavarësisht vendimit të Gjykatës Kushtetuese. Ai tha se opozita nuk ka mbështetje dhe se nuk po i dalin njerëzit në protesta.

Sot, qytetarët ia dhanë përgjigjen qeverisë Mustafa, duke dalë në protestën më të madhe të zhvilluar në Kosovë që prej pasluftës. Rreth 100.000 pjesëmarrës i kanë mbushur rrugët dhe sheshet e Prishtinës, të ardhur nga gjithë qytetet e fshatrat e Kosovës, si dhe nga vise të tjera nga trojet shqiptare dhe nga diaspora.

Organizimi i protestës ka qenë tepër korrekt. Siç u tha edhe në tubimin e sotëm, protestuesit vetë shënojnë ardhjen e një kohe të re për Kosovën, e për të gjithë, pa dallim.

Policia që prej orëve të para të ditës në disa raste ka provokuar protestuesit duke ndalur shumë autobusë e duke i penguar qytetarët të vijnë në Prishtinë.

Në përmbyllje të protestës, shumë qytetarë kanë reaguar spontanisht duke protestuar me vendosmëri ndaj ndërtesave qeveritare. Mllefi i qytetarëve që po shprehet në përballje me policinë është rezultat i insistimit të Isa Mustafës për të ruajtur Zajednicën dhe pushtetin e vet personal. Ne shprehim keqardhje për çdo incident, por nënvizojmë se shkaktari kryesor edhe i këtyre incidenteve është mos-reflektimi i qeverisë përballë reagimit kaq të fuqishëm qytetar.

Qeveria duhet ta dijë se pas gjithë zullumeve të saj, duke përfshirë edhe shkeljen e vetë Kushtetutës, është vështirë që qytetarët do të mbeten të qetë. Zemërimi i qytetarëve është i drejtë. Për t’u qetësuar qytetarët, nevojitet dorëheqja e menjëhershme e qeverisë Mustafa.

Askush dhe asgjë nuk mund ta zbehë mesazhin që dhanë qytetarët e Kosovës sot me pjesëmarrjen e tyre masive në protestën e madhështore e paqësore kundër “Zajednicës”, demarkacionit dhe qeverisë antikushtetuese.

Protestat vazhdojnë!
Lëvizja VETËVENDOSJE!
Aleanca për Ardhmërinë e Kosovës
NISMA për Kosovën

Kosova

Nesër në ora 14:00 – Protestë për shtet me sovranitet, kundër Qeverisë antikushtetuese

Komento

opozitaOpozita e bashkuar mbajti sot konferencë për media në sheshin Skenderbeu në Prishtinë.

Kryetari i Aleancës për Ardhmërinë e Kosovës, Ramush Haradinaj, u bëri thirrje qytetarëve të Kosovës që të bashkohen në protestën e nesërme. “I ftoj të gjithë qytetarët që në ora 14:00 të vijnë tek Biblioteka Kombëtare, e të marshojmë bashkë deri në sheshin Skenderbeu. Të protestojmë për anulimin e marrëveshjeve të dëmshme dhe të kërkojmë llogaridhënie nga ata që e shkelën Kushtetutën”, tha Haradinaj.

Visar Ymeri, Kryetar i VETËVENDOSJE!-s, tha se nesër është një ditë jashtëzakonisht e rëndësishme për Republikën e Kosovës. “9 janari është dita e protestës gjithëpopullore, dita e protestës së qytetarëve kundër marrëveshjeve të dëmshme dhe të rrezikshme që i ka nënshkruar Qeveria e Kosovës, dhe kundër këtyre shkelësve të Kushtetutës. Nesër, qytetarët do të bëhen bashkë për ta kërkuar sovranitetin e vendit. Republika e Kosovës nuk mund të udhëhiqet nga njerëz që me vendimet e veta tentuan ta përmbysin rendin kushtetues të vendit”, theksoi Ymeri.

Kryetari i Nismës për Kosovën, Fatmir Limaj, tha se nesër në shesh do të protestojmë masivisht, për të mos lejuar që shkelësit e Kushtetutës të vazhdojnë të qeverisin me vendin. “Është momenti kur zëri qytetar duhet të jetë i bashkuar dhe i fuqishëm, ashtu që të mos lejojë një precedent të keq në Kosovë që shkelësit e Kushtetutës të vazhdojnë të qeverisin. Nëse ata refuzojnë të japin llogari, atëherë edhe ne si qytetarë duhet të refuzojmë të na qeverisin shkelësit e Kushtetutës”, u shpreh Limaj.

Nesër në ora 14:00, do të mblidhemi tek Biblioteka Kombëtare, për të nisur kështu protestën për shtet me sovranitet dhe kundër Qeverisë antikushtetuese.

 

8 janar 2016

Lëvizja VETËVENDOSJE!

Aleanca për Ardhmërinë e Kosovës

Nisma për Kosovën

Kosova

Kosovë: Protestë ndaj vizitës së pelegrinëve serbë

Komento

policia protesta gjakoveProtestuesit thanë se vizita e tyre është e papranueshme duke pasur parasysh se Beogradi nuk ka kërkuar falje për krimet e kryera gjatë luftës në Kosovë duke përfshirë Gjakovën, që ishte një nga komunat më të prekura.

Policia e Kosovës tha se kishte marrë të gjitha masat për të siguruar që protesta të kalonte pa incidente dhe bëri të ditur se kishte arrestuar një person për prishje të rendit dhe qetësisë publike.

Çdo vit pelegrinë serbë, që thonë se janë persona të zhvendosur nga Gjakova në vitin 1999, shkojnë në këtë kishë për Krishtlindjet ortodokse.

Vitin e kaluar ish ministri për kthimin dhe komunitetet, Aleksandar Jabllanovic, i quajti “egërsira” protestuesit në Gjakovë, të cilët po përpiqeshin të pengonin disa pelegrinë serbë të vizitonin Gjakovën me rastin e Krishtlindjeve Ortodokse. Deklaratat çuan në organizimin e protestave për shkarkimin e tij, të cilat u shoqëruan me dhunë që la dhjetëra të plagosur. Gjakova është një vendet më të prekura nga lufta në Kosovë.

Rreth 1 mijë e 200 civilë të qytetit u vranë gjatë luftës, ndërsa 60 persona ende rezultojnë të zhdukur. (voa)

GJAKOVARËT NUK I DUAN NË QYTET ATA QË DIKUR I VRANË

Sanije Berisha po kundërshton që disa herë që në qytetin e saj po kthehen qytetarët serb, ata të cilët dikur sipas Berishës ja vranë djalin.

Për të është e papranueshme që në qytetin e saj serbët të festojnë krishtlindjet dhe të kthehen në këtë qytet e të bëhen sikur asnjëherë s’ka ndodhur asgjë.

Ajo, bashkë me një grup të vogël qytetarësh dolën në orën 09:00 para Kishës Ortodokse në Gjakovë.

Që në fillim kur protestuesit u mblodhën para kishës, prezent ishte edhe Policia e Kosovës. Ata larguan protestuesit nga hyrja e kishës duke i zhvendosur në një distancë më të largët. Gjatë zhvendosjes së protestuesve, policia hasi edhe në rezistencë të tyre, ku si rezultat i kësaj u arrestua një protestues.

Edhe Sanije Berisha kundërshtonte fuqishëm që të largohej nga Policia. Ajo, madje u ul në borë para kishës dhe nuk donte të largohej.

Berisha thotë se në Gjakovë serbët përsëriten Sebrenicën.

“A e dini çfarë krime kanë bo. Sebrenica e dytë është në Gjakovë. Me gjithë ato viktima dhe vjen ai këtu me na provoku neve si familjar. 17 vjeçar djalin ma kanë vra, 6 vjet nuk e kam ditë ku është edhe me ardh këta aq kollaj. S’jom veç unë, plotë nana ka këtu, ama që s’kemi përkrahje”,tha ajo.

Pas zhvendosjes së protestuesve nga hyrja e Kishës, policia vendosi një rrethojë metali për të penguar kalimin e protestuesve drejtë kishës.

Nën përcjelljen e Policisë së Kosovës, autobusi i cili barte pelegrinët serbë, hyri në vendin ku do të mbahej ceremonia, derisa protestuesit brohorisnin kundër tyre si dhe hidhnin vezë dhe gjësende të forta.

Në lidhje me këtë vizitë të pelegrinëve serb, kryetari i Listës Serbe, Sllavo Simiq u shprehë i pakënaqur që këtë vizitë e bënë nën përcjelljen e policisë derisa shtoi se Gjakova duhet të jetë qytet multietnik.

Ai në lidhje me luftën dhe krimet në Kosovë tha se fajin e kanë jo vetëm serbët por edhe shqiptarët.

Ndërsa Gjukica Stanojeviq tha se duhet të pranohet realiteti se edhe serbët janë pjesë e Gjakovës. Ai tha se serbët kërkojnë të kthehen në Gjakovë.

Ndërsa në lidhje me luftën në Kosovë ai tha se nga kjo luftë pësuan kosovarët po edhe serbët. Ai shtoi se lufta ishte fatkeqësi për të dy popujt, ku sipas tij për shkak të kësaj lufte ende ka shqiptarë dhe serbë që përballen me pasoja.

E indinjuar me këtë vizitë është shprehur edhe Lirie Haraqia, qytetare e Gjakovës që gjatë luftës kishte humbur disa pjesëtar të familjes.

“Policia e kryen ndoshta detyrën e vet por unë po iu lutna keni pak konsideratë për ne se na mbrëmë s’kemi fjetur ton natën për me mendu sot me ardhë, për me iu tregu se këtu nuk kanë më vend. Veç ta shprehim atë mllefin se na nuk mundemi kurrgjë tjetër me bo. Veç ta shprehi atë mllefin që është kah më vlon në brendësi të trupit”, tha ajo.

Pas largimit të pelegrinëve dhe përfundimit të protestës së qytetarëve drejtori i policisë në Gjakovë Kristë Gjoka, tha se gjithçka ka shkuar pa asnjë incident me përjashtim të një arrestimi.

Pas kryerjes së riteve fetare pelegrinët serb me përcjelljen e policisë së Kosovës janë larguar nga kisha ndërsa të qetë janë shpërndarë edhe protestuesit. (rtk)

Analiza, Kosova

Fjalimi i ndaluar i Albin Kurtit, në seancën e parë gjyqësore për protestën e opozitës së bashkuar në Kuvendin e Republikës

Komento

Albini-GjykatëTë nderuar aktivistë,

Më poshtë e keni fjalimin e ndaluar të Albin Kurtit. Gjykatësi Beqir Kalludra njëherë ia krijoj mundësinë të flasë për ta ndërprerë menjëherë në fjalinë e parë. Albini tha që për pesë faqe aktakuzë të prokurores nuk është korrekte që të kërkohet prej tij të përgjigjet vetëm me dy shkronja: po ose jo. Prandaj, edhe ky fjalim…
Fjalimi i ndaluar i Albin Kurtit, në seancën e parë gjyqësore për protestën e opozitës së bashkuar në Kuvendin e Republikës

Kundërshtimi i aktakuzës

Të nderuar të pranishëm,

1. Prokurorja në aktakuzën e saj thotë se ne deputetët nuk paskemi pasur autorizim për ta përdorur gazin lotsjellës. Mirëpo, as kryeministri i Kosovës nuk ka pasur autorizim nga Kuvendi për të nënshkruar Asociacionin e komunave me shumicë serbe, përkatësisht ‘Zajednicën’ e Serbisë. Në anën tjetër, kur policia e përdor gazin lotsjellës e bën këtë duke besuar që dëmi që e shkakton me gazin lotsjellës është shumë më i vogël sesa dëmi që e parandalon e të cilin e shkaktojnë protestuesit. Kjo shpeshherë nuk është e vërtetë për policinë, por, se ne kishim të drejtë e vërtetoi edhe Gjykata Kushtetuese së fundmi. Kalkulimi ynë ishte i saktë: dëmet e gazit lotsjellës janë shumë më të vogla sesa shkelja e Kushtetutës së Kosovës në 23 nene të saj nga secili prej 7 kapitujve të ‘Zajednicës’. Më tutje, pse do të duhej që dikush të jetë i autorizuar për diçka, e sidomos për përdorim të armës? Autorizimi nënkupton që një personi të caktuar i është besuar kalkulimi racional i krahasimit të dy apo më shumë dëmeve. Ne si deputetë të Kuvendit të Republikës – pra, Kuvendi është i Republikës, nuk është Republika e Kuvendit apo e deputetëve dhe aq më pak e Qeverisë apo e ministrave – kemi qenë të autorizuar ta mbrojmë republikën dhe kushtetutën, dëmtimi i të cilave përmes ‘Zajednicës’ është shumë më i gjerë e më i thellë sesa ai i gazit lotsjellës. Në sallën plenare me tavan të lartë gati 10 metra, gazi lotsjellës davaritej për më pak 30 minuta. ‘Zajednica’ nuk do të na hiqej as për 30 vjet – le të mos harrojmë që Republika Serbe në Bosnje tashmë i kaloi 20 vjet dhe është më e fuqishme se asnjëherë më parë.

Të nderuar të pranishëm,

Duhet ta bëj një sqarim këtu: unë sigurisht se nuk jam i kënaqur me Kushtetutën aktuale të Kosovës, por unë sa herë të jetë e nevojshme i bëj rezistencë atyre që duan ta ndryshojnë për të keq këtë Kushtetutë, ndërkohë që vazhdimisht angazhohem që ta ndryshoj për të mirë. Ngjashëm sikurse para 26 vjetëve kur shumica e atyre që e mbronin autonominë e Kosovës nuk ishin të kënaqur me atë autonomi dhe dëshironin republikë e pavarësi e bashkim kombëtar, por ja që e mbronin atë autonomi sepse edhe ajo po suprimohej.

Le t’i kthehemi sërish aktakuzës kundër nesh. Prokurorja vetëm në kualifikimin e veprës penale e përmend ‘armën’, mirëpo aspak në arsyetim nuk e provon që bombola e gazit lotsjellës është ‘armë’. Arma përmban elementet përbërëse dhe ka mekanizmin e saj. Këto nuk i gjejmë te bombola e gazit lotsjellës. Mandej, çdo armë e ka municionin e vet: nëse bombola e gazit lotsjellës na qenka armë atëherë cili është municioni i asaj arme? E, me gjasë, gazi lotsjellës nuk është as municion tamam, sepse edhe municioni përbëhet prej disa pjesëve si kapsula, baroti, predha etj. Mirëpo, prokurores nuk i interesojnë këto hollësi dhe ajo fare nuk merr mundin të arsyetojë. Për mua kjo është dëshmi e tendencës persekutuese me çdo çmim e pa asnjë standard.

Nëse mendoni që dikush duhet të akuzohet për përdorim të armëve pa e pasur provën materiale të saj për të vërtetuar se me të vërtetë mjeti në fjalë është armë dhe se qëllimi kryesor i saj është kryerja e sulmit fizik dhe lëndimit trupor në kuptim të Kodit Penal, atëherë kjo prokurori publike, nuk është as prokurori dhe as publike, por polici private e kundërshtarëve tanë politikë.

Arma e gazit lotsjellës është ajo me tytë dhe presion e me të cilën policia hedh me qindra bombola me gaz lotsjellës në protestat tona, me ç’rast disa që nuk shpërthejnë na mbeten neve ‘dhuratë’ për t’i përdorur. Në seancat e Kuvendit unë kisha armë vetëm në kuptimin që vetë si deputet isha armë, pra disponoja me vetveten si armë kundër ‘Zajednicës’ në protestën tonë në Kuvend si aksion politik e publik. Pra, unë kisha armë vetëm sepse unë isha aty, duke përmbushur detyrën time sipas nenit 74 (Ushtrimi i Funksionit) të Kushtetutës së Republikës së Kosovës i cili thotë me sa vijon: “Deputetët e Kuvendit të Kosovës ushtrojnë funksionin e tyre në interesin më të mirë të Republikës së Kosovës dhe në pajtim me këtë Kushtetutë, ligjet dhe rregullat e procedurës së Kuvendit.”

Në pretendimet kundër nesh ka edhe shpifje. Psh. mua askush asnjëherë nuk ma ka dhënë bombolën e gazit lotsjellës në Kuvend që ta ndez në sallën e Kuvendit. Atë e kam marrur unë vetë në protesta kur na i gjuante policia pa kursim. Në seancën e 8 tetorit 2015, deputetes Albulena Haxhiu i kam kërkuar që të më sjellë vezë të prishura dhe ajo këtë e ka bërë. Gazi lotsjellës ishte mjeti i fundit pas pipave, ujit dhe vezëve, të cilat nuk kryen punë. Gazi lotsjellës nuk është armë sepse nuk është menduar që të lëndojë dikë. Gazi lotsjellës ishte kundër atyre që po lëndonin Republikën dhe popullin e saj dhe vetë ai nuk lëndonte askë. Gazi lotsjellës synonte largimin e personave që duan të lëndojnë. Qeveria ka qenë e armatosur, sepse ‘Zajednica’ ishte arma e tyre kundër Republikës dhe Kushtetutës siç e vërtetoi edhe aktgjykimi i Gjykatës Kushtetuese, ndërkaq gazi ynë lotsjellës synonte t’i largonte nga salla e Kuvendit këta njerëz të armatosur e të rebeluar kundër Republikës.

Për më keq se kaq, prokurorja askund nuk jep shpjegim pse është përdorur gazi lotsjellës. Është e qartë se qëllim s’mund të ketë qenë lëndimi i ndokujt sepse unë dhe të gjithë ne vazhdonim të qëndronim në sallë pa maska edhe shumë kohë pas hedhjes së gazit lotsjellës. Vepra për të cilën ne akuzohemi nuk ka mundur të kryhet padashje, prandaj për ta gjykuar e dënuar atë duhet të ekzistojnë mens rea (qëllimi kriminal) dhe actus reus (veprimi kriminal). Në aktakuzë nuk gjenden këto, posaçërisht e para, pra mungon mens rea për shkak se qëllimi ishte politik dhe jo kriminal. Qëllimi ynë ishte pamundësimi i normalizimit të ‘Zajednicës’ së Serbisë. Për një shkelje të rëndë siç është ajo e Kushtetutës nëpërmjet ‘Zajednicës’ ne kemi përdorur forcë edhe më pak se proporcionale. Aksioni ynë politik ishte mbrojtje e personave të tretë, përkatësisht mbrojtje e shtetit republikan, e rendit kushtetues dhe e qytetarëve të Kosovës.

2. Sa i përket pikës së dytë të aktakuzës, pengimit të personave zyrtar në kryerjen e detyrës zyrtare, duhet të them që pikërisht ne si deputetë të opozitës ishim persona zyrtar duke respektuar detyrën tonë zyrtare. Qeveria dhe deputetët e pozitës ishin po ata njerëz të përveçëm sikurse para 25 gushtit të ‘Zajednicës’ mirëpo ata s’ishin më personat e njëjtë zyrtarë dhe as nuk po e kryenin detyrën e njëjtë zyrtare. Kur ndryshon Republika sepse i shtohet ‘Zajednica’ nuk mbetet i njëjtë as Kuvendi si punëdhënës i këtyre personave zyrtar.

‘Zajednica’ është një gjë e re para sistemit shtetëror të Kosovës dhe institucioneve të tij. ‘Zajednica’ nuk ishte asnjëherë temë në fushatat zgjedhore dhe as çështje debati në Kuvend. Vetëm kur e pamë në televizion më 25 gusht 2015 se ajo është nënshkruar tashmë në Bruksel nga Mustafa me Vuçiqin. Pra, e kemi një njeri, qytetar republike që quhet Isa Mustafa, e i cili e vuri nënshkrimin për ‘Zajednicën’ e Serbisë në Kosovë. Në anën tjetër, ne i kemi mbi 205.000 nënshkrime të qytetarëve kundër asaj ‘Zajednice’ dhe kundër atij nënshkrimi të vetëm. Ne nuk mund të lejojmë që një nënshkrim t’i mposht 205.000 nënshkrime. Aksioni ynë ishte politik dhe publik. Kurrfarë procesi demokratik nuk i parapriu nënshkrimit në Bruksel – madje, më 25 gusht të vitit të kaluar Kuvendi ishte në pushim. Kur ne u kthyem në Kuvend, ne ishim të njëtit njerëz, mirëpo nuk ishim të njëjtit deputetë, sepse mandati ynë si deputetë ishte tjetërsuar: ne nuk ishim më deputetë të Republikës, por deputetë të asaj që mbetet nga Republika atëherë kur Republikës i shtohet ‘Zajednica’. Përveç peticionit, dhjetëra mijëra qytetarë kanë marrur pjesë në Prishtinë dhe shumë komuna tjera të Kosovës, në manifestime e protesta të ndryshme. Në anën tjetër, nuk ka pasur asnjë tubim me qytetarë nga qeveria për ‘Zajednicën’. Ama bash asnjë. Qeveria nuk është përpjekur që të arsyetojë ose justifikojë me qytetarët e për qytetarët nënshkrimin e saj.

Ne kemi qenë në Kuvend si persona zyrtar në detyrën tonë zyrtare, në kulmin e zbatimit të nenit 74 të Kushtetutës. Pa na e hequr Kuvendi me shumicë votash imunitetin, policia nuk është dashur të na hetojë e arrestojë, prokuroria të na akuzojë dhe gjykata të na gjykojë. Por, jo vetëm kaq. Deri te kjo ditë e shqyrtimit kryesor, procesi ka kaluar nëpër shkelje të shumta të të drejtave të njeriut të deputetëve dhe aktivistëve opozitarë. Lehtësia me të cilët policia na ndjek dhe arreston e mandej na rrah fizikisht dhe gjykatat na i japin nga 30 ditë paraburgim është e frikshme. Në rastin tim po i theksoj dy situata. Së pari, kidnapimin nga Policia e Kosovës natën e 12 tetorit 2015 për çfarë kam bërë Kallëzim Penal, mirëpo tash e gati tre muaj askush nga prokuroria nuk më ka kontaktuar. Së dyti, arrestimin nga forcat elitare anti-terror me 28 nëntor 2015, kur u thye selia e Lëvizjes VETËVENDOSJE! në Prishtinë në një operacion që përbëhej nga qindra policë të cilët rrahën e arrestuan 97 aktivistë. Ne kemi bërë 80 kallëzime penale për dhunën policore, ndaj të cilave Policia e Kosovës reagoi menjëherë se ajo i paska 166 policë të lënduar në protestat e muajve të fundit, duke pranuar kështu hakmarrjen ndaj nesh me 28 nëntor. Po ashtu, edhe Amnesty International dhe Qendra Kosovare për Rehabilitimin e të Mbijetuarve të Torturës kanë reaguar me komunikata zyrtare kundër kësaj ndërhyrjeje brutale.

Ne si deputetë nuk e kemi vënë në pikëpyetje ligjin si të tillë dhe as tërësinë e ligjeve në Republikën e Kosovës. Ne as që kemi menduar se cilat ligje po i shkelim me aksionin tonë politik sepse preokupimi ynë emergjent ka qenë Republika dhe Kushtetuta, demokracia dhe sovraniteti, të drejtat dhe liritë e qytetarëve, që përbëjnë themelin dhe burimin, thelbin dhe kuptimin e ligjeve, të korpusit të ligjeve, të secilit ligj, madje përfshirë këtu edhe vetë ligjet të cilat prokurorja thotë t’i kemi shkelur.

Organi i ndjekjes, Prokuroria, qysh në fillim të aktakuzës së saj tregon dhe vërteton faktin se ne veprimet i kemi ndërmarrë në cilësi të deputetëve. Pra, në cilësi zyrtare nën mandatin përfaqësues. Kjo do të thotë se ne po përndjekemi në cilësinë e deputetit! Si mund të quhet kjo ndryshe përveçse persekutim politik?! Se ky rast është politik e vërtetojnë edhe dëshmitarët e propozuar të prokurorisë, ku që të gjithë i përkasin pozitës, pra pushtetit.

Nuk e di nëse Prokurorja e ka lexuar aktvendimin e Gjykatës Kushtetuese të 23 dhjetorit të vitit 2015. Nëse Prokurorja e mban të njëjtën aktakuzë kundër nesh edhe pas dijenisë për këtë aktgjykim të Gjykatës Kushtetuese, atëherë kemi të bëjmë me dashakeqësi të skajshme të prokurores ose me një botëkuptim autoritarist të saj. Për këtë të dytën do të flas më vonë gjatë këtij procesi.

Prishtinë, 6 janar 2016

Intervista, Kosova

Kësaj Qeverie po i vjen fundi

Komento
albin kurtiIsh-kryetari i Lëvizjes Vetëvendosje!, aktualisht deputet në Kuvendin e Kosovës, Albin Kurti, ka thënë se Qeveria e drejtuar nga Isa Mustafa ka dy rrugë: dorëheqjen ose rrëzimin.
Në këtë intervistë për “Epokën e re”, Kurti ka thënë se kjo Qeveri kuislinge e ka më mirë të dorëhiqet sesa të rrëzohet. Ai ka treguar arsyet pse Qeveria Mustafa duhet të bjerë. “Aktgjykimi i Gjykatës Kushtetuese ka konstatuar se asnjëri prej shtatë kapitujve të Marrëveshjes Mustafa – Vuçiq të 25 gushtit 2015 nuk është në përputhje me Kushtetutën dhe se janë shkelur gjithsej 23 nene të Kushtetutës. Prandaj, aktgjykimi i këtillë shënon vdekjen e ‘Zajednicës’. ‘Zajednica’ ka vdekur, mirëpo kjo Qeveri po aspiron ta ringjallë ‘Zajendicën’ kundërkushtetuese porsi një zombi. Kjo është arsyeja pse kjo Qeveri duhet të bjerë. Ajo nuk e pranon gabimin dhe ajo nuk ndjen as pendesë e as keqardhje. Arsyeja tjetër pse kjo Qeveri duhet të shkojë është insistimi i saj në Marrëveshjen e Demarkacionit me Malin e Zi. Nuk e shkarkoi komisionin përkatës dhe tash premton komisione të reja, ndërkohë që i gëzohet cilido deklarim ndërkombëtar që përkrah humbjen e 9 000 hektarëve të Kosovës”, ka deklaruar Kurti.
Ai ka thënë se kësaj Qeverie po i vjen fundi, duke përjashtuar mundësinë e një Qeverie kalimtare. “S’ka rrugë tjetër. 9 janari është protesta e parë që do të vazhdojë për aq sa do të jetë e nevojshme. Pra, deri në largimin e kësaj Qeverie represive e shfrytëzuese përbrenda shtetit dhe koncesioniste e kapitulluese ndaj shteteve të tjera jashtë. Durimit të qytetarëve po i vjen fundi. Pra, kësaj Qeverie po i vjen fundi. Ne nuk kemi nevojë edhe për një Qeveri tjetër kalimtare sepse Qeveria Thaçi – Mustafa është Qeveri kalimtare. Pas largimit të kësaj Qeverie, e cila është kuislinge politikisht dhe compradore ekonomikisht, duhet të shkojmë menjëherë në zgjedhje të reja parlamentare. Nuk mund të ketë Republikë përderisa interesat private ndodhen mbi të mirën publike. Pra, nuk mund të ketë Republikë të Kosovës përderisa kjo Qeveri është mbi Kosovën”, është shprehur Kurti.
Se sa janë gjasat që tri partitë opozitare të shkojnë në zgjedhje të reja me një listë të përbashkët, Kurti thotë se një gjë është e mundshme. “Është e mundshme, por ende është herët të flitet për këtë çështje. Tash për tash ne jemi të përqendruar te pjesëmarrja qytetare në protesta e jo te parashikimet elektorale. Opozita e bashkuar duhet të fitojë duke e larguar këtë Qeveri para çfarëdo fitoreje tjetër, qoftë ajo edhe elektorale”, ka deklaruar Kurti, duke shtuar se mundësia e fitores së opozitës së bashkuar në vitin 2016 është shumë reale. “E mbani mend qysh në vitet e shkuara, shpesh na thuhej se jemi ende të vegjël krahasuar me PDK-në e LDK-në. Mirëpo, viti që shkoi ishte viti i fuqizimit tonë si asnjëherë më parë. Në vitin e kaluar Lëvizja jonë ishte subjekti që përcaktonte diskursin publik e politik në Kosovë dhe ishim aktivë çdo orë të secilës ditë. Mund të themi se viti 2015 e dëshmoi fjalën e urtë popullore, se ‘i vogli rritet, kurse i rrituri plaket’. Pikërisht kjo ka ndodhur, Lëvizja jonë është rritur, ndërsa PDK-ja e LDK-ja janë plakur. Dhe këta dy pleq u bënë bashkë kundër këtij të riu të rritur. Rezultati i kësaj ndeshjeje dihet. Koha e dëshmon”, ka thënë ish-kryetari Lëvizjes Vetëvendosje!, Albin Kurti.
Kurti në këtë intervistë ka folur edhe për mundësinë e zgjedhjes së Hashim Thaçit president. Kurti ka thënë se muaji prill është aq larg pasi, sipas tij, ky regjim është kaq i dobët saqë qysh tash muaji prill ngjan si një prill i thyer. “Mustafa dëshiron ta zgjedhë Thaçin për president të Kosovës në mënyrë që ai për vete të mbetet kryeministër. Mirëpo, sa deputetë të LDK-së do ta ndiqnin atë në këtë aventurë personale mund të mos e marrim vesh kurrë, për shkak se shumëçka tregon se Qeveria e tij do të bjerë më herët. Merreni me mend se çfarë i bëri Mustafa LDK-së: para një viti ua kërkoi votën deputetëve të LDK-së për Kadri Veselin kryeparlamentar, tash po ua kërkon votën për Thaçin president! Tani që po e arrin moshën e pensionimit, i ka mbetur vetëm edhe ta marrë librezën e PDK-së”, ka thënë Kurti.

“Epoka e re”: Z. Kurti, Kosova kaloi një vit me plot sfida dhe përballje si asnjëherë më parë në mes të pozitës dhe opozitës. Ndodhën arrestime të deputetëve të opozitës. A mendoni se edhe 2016-ta do të jetë një vit i sfidave apo ky vit do të sjellë ndryshime?
Kurti: Konsensusi i koalicionit PDK-LDK-Srpska është moçal që ia sjell malarien popullit të Kosovës. Ballafaqimi me ta bëhet lumë që rrjedh prej qytetarësh duke ua shpëtuar atyre edhe jetën, edhe Republikën. Viti 2015 ishte vit i opozitës së bashkuar, prej 3 shkurtit kur u shkarkua Jabllanoviqi e deri më 23 dhjetor kur vdiq ‘Zajednica’. Me protesta brenda e jashtë Kuvendit u kritikua e u kundërshtua, u denoncua e u kontestua ‘Zajednica’, derisa edhe vetë Gjykata e kapur Kushtetuese shpalli vdekjen e saj. Viti 2015 ishte përgatitje për vitin 2016. Viti 2016 do të nisë me pamundësimin e ringjalljes së ‘Zajednicës’, me të cilën kjo Qeveri e ka lidhur fatin e vet. Viti 2016 do të nisë me mbrojtjen e rreth 9 000 hektarëve tokë të Kosovës, të cilat Qeveria ka pranuar t’ia dhurojë Malit të Zi. Ne nuk kemi as tokë për të falur e as shtet për të gjymtuar. Ne kemi Republikë për të mbrojtur dhe Qeveri për ta rrëzuar. Detyra para nesh është e vështirë, mirëpo me nder e kënaqësi e kemi pranuar atë.

“Epoka e re”: Tri partitë opozitare kanë nisur përgatitjet për protestën e 9 janarit. Çfarë synon opozita nëpërmjet kësaj proteste?
Kurti: Opozita e bashkuar e synon atë që e thotë: mbrojtjen e Republikës së Kosovës nga tradhtarët që kanë bërë ‘Zajednicë’ me Serbinë, kurse Malit të Zi ia bënë peshqesh 9 000 hektarë. Kjo Qeveri kuislinge duhet të shkojë. Ajo i ka dy rrugë: dorëheqjen ose rrëzimin. Ne themi se më mirë është që ajo të dorëhiqet sesa të rrëzohet. Dhe, më mirë qysh nesër, sesa pasnesër. Me dy partitë e tjera opozitare, AAK-në dhe Nismën, jemi të vendosur të mos ndalemi për synimin që na ka bashkuar. Të shtunën, më 9 janar, do të bëjmë grumbullim paqësor fillestar te Biblioteka Kombëtare e Kosovës në orën 14:00, mandej kemi marsh paqësor nëpër rrugën ‘Nëna Terezë’, për ta mbajtur në fund protestën paqësore te Sheshi ‘Skënderbeu’, para ndërtesës së Qeverisë. Protesta e së shtunës është protestë për demokraci dhe sovranitet në shtetin e Kosovës, për drejtësi e liri për qytetarët e Kosovës.

“Epoka e re”: Ju jeni në arrest shtëpiak deri më 17 shkurt, në  një datë që ka domethënie, se është përvjetori i pavarësisë së Kosovës, por edhe arrestimi juaj ndodhi më 28 nëntor, edhe kjo një datë që ka domethënie për të gjithë shqiptarët. Është kjo rastësi apo e mirëmenduar, pasi në opinion është folur se ka qenë plani juaj të arrestoheni më 28 nëntor dhe lirimi juaj do të ndodhë më 17 shkurt?
Kurti: Sa më shumë që veprojnë policia, prokuroria dhe gjyqësia kundër opozitës aq më shumë duket mosveprimi i tyre ndaj korrupsionit qeveritar, kriminelëve serbë të luftës, krimit të organizuar dhe strukturave shtetërore paralele të Serbisë. Kur ne themi se Kosova është shtet i kapur atëherë ne pikë së pari mendojmë në kapjen e policisë, prokurorisë dhe gjyqësorit. Arrestimi im më 28 nëntor u bë për shkak të atyre që më arrestuan, pra për shkak të Policisë së Kosovës. Ata nuk më patën arrestuar në protestën e 18 nëntorit, edhe pse më panë aty. Ata më patën liruar tri orë pas kidnapimit më 12 tetor. Pra, Policia e Kosovës duhet të përgjigjet pse vendosi të më arrestojë pikërisht më 28 nëntor, madje duke përdorur edhe njësitet anti-terror. Në fjalimin tim më 28 nëntor nuk ka pasur asnjë thirrje për dhunë a terror që ata t’i mobilizojnë ato forca kundër meje mu në festën kombëtare të 28 nëntorit. Qartazi, policët e Kosovës, prej kordonëve të tyre në seancat e Kuvendit e deri te mësymja ndaj neve, aktivistëve e deputetëve opozitarë, nuk janë as policë të Kosovës e as mekanizëm shtetëror, por truproja të Qeverisë dhe bandë e regjimit. Ndërkaq, më datën 17 dhjetor, derisa unë isha në Burgun e Sigurisë së Lartë në Gërdoc (Dyz), Gjykatësi i Gjykatës Themelore, Beqir Kalludra, ma vazhdoi paraburgimin edhe për dy muaj, pra deri më 17 shkurt 2016.  Nuk e di pse ai u ngut të ma vazhdojë paraburgimin më 17 dhjetor, përderisa paraburgimi i atëhershëm vlente deri më 28 dhjetor!? Dhe, nuk e di pse këtë nuk e bëri më 16 apo 18 dhjetor, por pikërisht më 17 dhjetor dhe, për pasojë, ky paraburgim përfundon më 17 shkurt 2016, në përvjetorin e tetë të shpalljes së pavarësisë?! Rrjedhimisht, në pyetjen tuaj duhet të përgjigjet Policia e Kosovës (dhe kryeministri e ministri i Brendshëm sepse pa dijeninë e tyre nuk besoj të jenë përdorur forcat elitare anti-terror kundër meje), si dhe Gjykata Themelore, përkatësisht gjykatësi Beqir Kalludra.

“Epoka e re”: A do të merrni pjesë në protestën e 9 janarit?
Kurti: Se çka është më mirë dhe më e dobishme të bëj, e vlerësoj më vonë dhe bashkë me strukturat e Lëvizjes Vetëvendosje!, si dhe në koordinim me opozitën e bashkuar në përgjithësi. Jetojmë në një kohë intensive. Një ditë në muajin janar të këtij viti mund të vlejë sa një vit në kohë të tjera.

“Epoka e re”: Z. Kurti, pse qytetarët kanë arsye t’i përgjigjen kësaj proteste, pasi Gjykata Kushtetuese ka dhënë një aktgjykim për Asociacionin e komunave me shumicë serbe, po ashtu Qeveria ka bërë me dije se do të jetë e gatshme për të formuar një komision për Demarkacionin, ku do t’i dërgonte edhe opozita përfaqësuesit e saj. Edhe pas kësaj, mendoni se duhet të protestohet?
Kurti: Aktgjykimi i Gjykatës Kushtetuese ka konstatuar se asnjëri prej shtatë kapitujve të Marrëveshjes Mustafa – Vuçiq të 25 gushtit 2015 nuk është në përputhje me Kushtetutën dhe se janë shkelur gjithsej 23 nene të Kushtetutës. Prandaj, aktgjykimi i këtillë shënon vdekjen e ‘Zajednicës’. ‘Zajednica’ ka vdekur, mirëpo kjo Qeveri po aspiron ta ringjallë ‘Zajendicën’ kundërkushtetuese porsi një zombi. Kjo është arsyeja pse kjo Qeveri duhet të bjerë. Ajo nuk e pranon gabimin dhe ajo nuk ndjen as pendesë e as keqardhje. Arsyeja tjetër pse kjo Qeveri duhet të shkojë është insistimi i saj në Marrëveshjen e Demarkacionit me Malin e Zi. Nuk e shkarkuan komisionin përkatës dhe tash premtojnë komisione të reja, ndërkohë që i gëzohen cilido deklarim ndërkombëtar që përkrah humbjen e 9 000 hektarëve të Kosovës. Shumë saktë e ka thënë Prof. Zejnullah Gruda: ‘Problemi i demarkacionit s’është problem i pronave private, por i ndarjes së sovraniteteve’. Natyrisht që ka edhe pafund arsye të tjera në fushën e drejtësisë, sigurisë dhe atë socio-ekonomike, që u thonë qytetarëve se kjo Qeveri duhet të shkojë. Dhe të gjitha këto arsye janë më së të mjaftueshme që qytetarët masivisht të dalin në protestën e 9 janarit, pa dallim moshe a gjinie, pa dallim rajoni a partie.

“Epoka e re”: Çfarë nëse protesta e 9 janarit nuk e largon këtë qeverisje? Cila do të jetë rruga tjetër e opozitës, zgjedhjet e parakohshme apo një qeveri teknike-kalimtare?
Kurti: Nuk mund të fitojë autoritarizmi mbi demokracinë, arbitrariteti mbi kushtetushmërinë, uzurpimi mbi sovranitetin. S’ka rrugë tjetër. 9 janari është protesta e parë që do të vazhdojë për aq sa do të jetë e nevojshme. Pra, deri në largimin e kësaj Qeverie represive e shfrytëzuese përbrenda shtetit dhe koncesioniste e kapitulluese ndaj shteteve të tjera jashtë. Durimit të qytetarëve po i vjen fundi. Pra, kësaj Qeverie po i vjen fundi. Ne nuk kemi nevojë për edhe një Qeveri tjetër kalimtare sepse Qeveria Thaçi – Mustafa është Qeveri kalimtare. Pas largimit të kësaj Qeverie, e cila është kuislinge politikisht dhe compradore ekonomikisht, duhet të shkojmë menjëherë në zgjedhje të reja parlamentare. Nuk mund të ketë Republikë përderisa interesat private ndodhen mbi të mirën publike. Pra, nuk mund të ketë Republikë të Kosovës përderisa kjo Qeveri është mbi Kosovën.

“Epoka e re”: Z. Kurti, a mund të shkojnë në një listë të përbashkët LV-ja, AAK-ja dhe Nisma? Sa do të ishin gjasat që këto parti së bashku të dalin fitimtare në zgjedhjet, kurdo që vendosen ato të mbahen?
Kurti: Është e mundshme, por ende është herët të flitet për këtë çështje. Tash për tash ne jemi të përqendruar te pjesëmarrja qytetare në protesta e jo te parashikimet elektorale. Opozita e bashkuar duhet të fitojë duke e larguar këtë Qeveri para çfarëdo fitoreje tjetër, qoftë ajo edhe elektorale. Mundësia e fitores sonë në vitin 2016, në të cilin porsa hymë, është shumë reale. E mbani mend qysh në vitet e shkuara, shpesh na thuhej se jemi ende të vegjël krahasuar me PDK-në e LDK-në. Mirëpo, viti që shkoi ishte viti i fuqizimit tonë si asnjëherë më parë. Në vitin e kaluar Lëvizja jonë ishte subjekti që përcaktonte diskursin publik e politik në Kosovë dhe ishim aktivë çdo orë të secilës ditë. Mund të themi që viti 2015 e dëshmoi fjalën e urtë popullore se ‘i vogli rritet, kurse i rrituri plaket’. Pikërisht kjo ka ndodhur, Lëvizja jonë është rritur, ndërsa PDK-ja e LDK-ja janë plakur. Dhe, këta dy pleq u bënë bashkë kundër këtij të riu të rritur. Rezultati i kësaj ndeshjeje dihet. Koha e dëshmon.

“Epoka e re”: Koalicioni qeverisës PDK – LDK në prill do të bëjë përpjekje ta zgjedhë kandidatin për president, në këtë rast z. Thaçi, ashtu si e kanë marrëveshjen. Me këtë rrjedhë të situatës politike që ka vazhduar, PDK-ja e LDK-ja a do të mund ta zgjedhin Thaçin president?
Kurti: Prilli është aq larg dhe ky regjim është kaq i dobët saqë qysh tash muaji prill ngjan si një prill i thyer. Mustafa dëshiron ta zgjedhë Thaçin për president të Kosovës në mënyrë që ai për vete të mbetet kryeministër. Mirëpo, sa deputetë të LDK-së do ta ndiqnin atë në këtë aventurë personale mund të mos e marrim vesh kurrë, për shkak se shumëçka tregon se Qeveria e tij do të bjerë më herët. Merreni me mend se çfarë i bëri Mustafa LDK-së: para një viti ua kërkoi votën deputetëve të LDK-së për Kadri Veselin kryeparlamentar, ndërsa tash po ua kërkon votën për Thaçin president! Tani që po e arrin moshën e pensionimit, i ka mbetur vetëm edhe ta marrë librezën e PDK-së.

Kosova

Kësaj Qeverie po i vjen fundi

Komento
albin kurtiIsh-kryetari i Lëvizjes Vetëvendosje!, aktualisht deputet në Kuvendin e Kosovës, Albin Kurti, ka thënë se Qeveria e drejtuar nga Isa Mustafa ka dy rrugë: dorëheqjen ose rrëzimin.
Në këtë intervistë për “Epokën e re”, Kurti ka thënë se kjo Qeveri kuislinge e ka më mirë të dorëhiqet sesa të rrëzohet. Ai ka treguar arsyet pse Qeveria Mustafa duhet të bjerë. “Aktgjykimi i Gjykatës Kushtetuese ka konstatuar se asnjëri prej shtatë kapitujve të Marrëveshjes Mustafa – Vuçiq të 25 gushtit 2015 nuk është në përputhje me Kushtetutën dhe se janë shkelur gjithsej 23 nene të Kushtetutës. Prandaj, aktgjykimi i këtillë shënon vdekjen e ‘Zajednicës’. ‘Zajednica’ ka vdekur, mirëpo kjo Qeveri po aspiron ta ringjallë ‘Zajendicën’ kundërkushtetuese porsi një zombi. Kjo është arsyeja pse kjo Qeveri duhet të bjerë. Ajo nuk e pranon gabimin dhe ajo nuk ndjen as pendesë e as keqardhje. Arsyeja tjetër pse kjo Qeveri duhet të shkojë është insistimi i saj në Marrëveshjen e Demarkacionit me Malin e Zi. Nuk e shkarkoi komisionin përkatës dhe tash premton komisione të reja, ndërkohë që i gëzohet cilido deklarim ndërkombëtar që përkrah humbjen e 9 000 hektarëve të Kosovës”, ka deklaruar Kurti.
Ai ka thënë se kësaj Qeverie po i vjen fundi, duke përjashtuar mundësinë e një Qeverie kalimtare. “S’ka rrugë tjetër. 9 janari është protesta e parë që do të vazhdojë për aq sa do të jetë e nevojshme. Pra, deri në largimin e kësaj Qeverie represive e shfrytëzuese përbrenda shtetit dhe koncesioniste e kapitulluese ndaj shteteve të tjera jashtë. Durimit të qytetarëve po i vjen fundi. Pra, kësaj Qeverie po i vjen fundi. Ne nuk kemi nevojë edhe për një Qeveri tjetër kalimtare sepse Qeveria Thaçi – Mustafa është Qeveri kalimtare. Pas largimit të kësaj Qeverie, e cila është kuislinge politikisht dhe compradore ekonomikisht, duhet të shkojmë menjëherë në zgjedhje të reja parlamentare. Nuk mund të ketë Republikë përderisa interesat private ndodhen mbi të mirën publike. Pra, nuk mund të ketë Republikë të Kosovës përderisa kjo Qeveri është mbi Kosovën”, është shprehur Kurti.
Se sa janë gjasat që tri partitë opozitare të shkojnë në zgjedhje të reja me një listë të përbashkët, Kurti thotë se një gjë është e mundshme. “Është e mundshme, por ende është herët të flitet për këtë çështje. Tash për tash ne jemi të përqendruar te pjesëmarrja qytetare në protesta e jo te parashikimet elektorale. Opozita e bashkuar duhet të fitojë duke e larguar këtë Qeveri para çfarëdo fitoreje tjetër, qoftë ajo edhe elektorale”, ka deklaruar Kurti, duke shtuar se mundësia e fitores së opozitës së bashkuar në vitin 2016 është shumë reale. “E mbani mend qysh në vitet e shkuara, shpesh na thuhej se jemi ende të vegjël krahasuar me PDK-në e LDK-në. Mirëpo, viti që shkoi ishte viti i fuqizimit tonë si asnjëherë më parë. Në vitin e kaluar Lëvizja jonë ishte subjekti që përcaktonte diskursin publik e politik në Kosovë dhe ishim aktivë çdo orë të secilës ditë. Mund të themi se viti 2015 e dëshmoi fjalën e urtë popullore, se ‘i vogli rritet, kurse i rrituri plaket’. Pikërisht kjo ka ndodhur, Lëvizja jonë është rritur, ndërsa PDK-ja e LDK-ja janë plakur. Dhe këta dy pleq u bënë bashkë kundër këtij të riu të rritur. Rezultati i kësaj ndeshjeje dihet. Koha e dëshmon”, ka thënë ish-kryetari Lëvizjes Vetëvendosje!, Albin Kurti.
Kurti në këtë intervistë ka folur edhe për mundësinë e zgjedhjes së Hashim Thaçit president. Kurti ka thënë se muaji prill është aq larg pasi, sipas tij, ky regjim është kaq i dobët saqë qysh tash muaji prill ngjan si një prill i thyer. “Mustafa dëshiron ta zgjedhë Thaçin për president të Kosovës në mënyrë që ai për vete të mbetet kryeministër. Mirëpo, sa deputetë të LDK-së do ta ndiqnin atë në këtë aventurë personale mund të mos e marrim vesh kurrë, për shkak se shumëçka tregon se Qeveria e tij do të bjerë më herët. Merreni me mend se çfarë i bëri Mustafa LDK-së: para një viti ua kërkoi votën deputetëve të LDK-së për Kadri Veselin kryeparlamentar, tash po ua kërkon votën për Thaçin president! Tani që po e arrin moshën e pensionimit, i ka mbetur vetëm edhe ta marrë librezën e PDK-së”, ka thënë Kurti.        
(Intervistën e plotë mund ta lexoni në numrin e sotëm të gazetës “Epoka e re”)
Kosova

Deklaratë Zyrtare nga Stupcat

Komento

stupcaAudiencë e dashur, popull i ynë

Është fat dhe nderë Historik të jetosh në kohën që e jetojmë ne, kohën kur u kurorëzua përpjekja e shumë gjeneratave, prindërve, gjyshërve e stërgjyshërve tanë, LIRIA.

Mundësi për të frymuar, punuar, kontribuar e për të ndërtuar shtet, shtëpi, adresë, ardhmëri për fëmijët tanë për një të nesërme të ndritur .

Si çdo njeri që e do këtë vend, edhe ne Stupcat për vite me radhë u munduam që me humorin tonë t’ju shohim të buzëqeshur dhe të lumtur, ndoshta për pak minuta me satirën tonë që të prekim e të thumbojmë të metat tona duke dashur të rehabilitojmë e të filtrojmë shoqërinë tonë, gjithmonë duke qenë afër popullit me personazhet tona .

Skeçi i fundit “Plani Strategjik” na gëzoj shumë për bujën dhe pluhurin që ngriti nëpër rrjete sociale dhe ato Mediatike. Jo për shikueshmërinë, po për zgjimin e ndërgjegjes së fjetur.

Nuk ka shoqëri normale që nuk do të përulej para dëshmorëve dhe heronjve të vet, siç përulemi edhe ne stupcat me respektin më të madh.

Nuk ka njeri normal që nuk do të ndjente dhembje për gjymtyrët e humbura të luftëtarëve të vet. Do ishte mallkim, sikurse është mallkim që nën emrin dhe petkun e luftës sonë të shenjtë të fshihen profiterë dhe matrapazë të caktuar siç ishin personazhet në skeçin tonë.

Nuk mund të futen në një thes heronjtë dhe hajnat .

Kjo shtëpi, ky shtet duhet të ndërtohen mbi të drejtën e të vërtetën.

ZOTI E BEKOFTË KOSOVËN, LAVDI DËSHMORËVE!

Analiza, Kosova

Oficeri i UÇK-së: Mirë e kanë Stupcat

Komento

Komandanti Hafir Hoxha, kishte hequr dorë nga statusi i veteranit, pikërisht për shkak të parregullsive të shumta që ishin bërë gjatë procedurave të njohjes së statusit.

STUPCAT mirë e kan , ja pse

1. Këtë çka e tregojnë nuk e kanë shpikur vet por e kanë dëgjua nga populli dhe nga ish luftëtarët dhe pjesëtarët e UÇK-së.

2. Shumica e milionerëve të sotëm në Kosovë janë ata që e kanë menagjue fondin e 3% dhe atë Vendlindja thërret e që kurrë nuk dhanë llogari sa ishin ato fonde si dhe ku u shpenzuan .

3. Shumica e milionereve të sotëm janë ish udhëheqës të UÇK-së e që para luftës së vitit 1998 nuk kishin asnjë lloj pasurie .

4. Shumica e milionerëve të sotëm janë lider politik që bashkë me ish “komandantët” e UÇK -së e kanë privatizuar ( vjedhur) tërë pasurin e Kosovës, industrinë, fabrikat, teknologjinë, kooperativat bujqësie dhe tokat e punës, ndërmarrjet banesore dhe objektet afariste .

5. Tërë këta milionerë të Kosovës sot i kontrollojnë Universitetet , Akademinë e Shkencave, Media , Gjykatat , Policinë dhe janë mbi ligjin , e kushdo që ren keqpërdorim të tyre dhe ankohet ndaj tyre i bjen se ankohet tek ta !

6. Të gjithë këta milioner sot e kontrollojnë Importin/ eksportin ( doganat) i kontrollojnë edhe ato pak ndërmarrje publike shoqërore , këta i kontrollojnë ( e shit blejnë votat dhe funksionet politike ) këta e vendosin se kush do te fiton në zgjedhje ” të lira” këta e vendosin se kush do te jetë delegat dhe funksionar edhe nga partitë e tyre pa marrë parasysh sa vota ka !?

7. Të gjithë këta lider politik dhe të ish UÇK-së e din fort mirë ose munden ti zbardhin shumë shpejtë të gjitha vrasjet misterioze që kanë ndodhur gjatë dhe pas luftës , por nuk dëshirojnë sepse këta kanë gisht në to .

8. Të gjitha këto që i përmenda i din qytetarët , e din populli por sja vlen as me folë, as me u ankue sepse ski kujtë i tregon as ku ankohesh !!!Mbetet vetëm me bërë humor më këto gjera siç po bëjnë Stupcat e logjike që po ata hajna kujt është didikue ky humor i vërtet dhe i hedhur do të reagojnë në format e tyre që ata e din fort mirë dhe kanë eksperiencë që tu a mbyllur gojën Stupcave dhe dëshmitarëve dhe kritikëve të kësaj gjendje .

9. Me këto skeçe aspak nuk njolloset UÇK-ja, askush atë nuk mundet ta njillos as ta mposhtë sepse ajo ishte e popullit , ishte popull , ishte e shenjtë dhe gjaku i dëshmorëve herdo kurdo frymën do të javë zë atyre që i keqpërdorën dëshmorët , përfituan nga gjaku i tyre dhe sot krimet dhe marrëzirat e tyre tentojnë ti mbulojnë me emblemën e UÇK-së , këtë luftëtari , pjesëtari i UÇK-së nuk do ta lejon . LAVDI DËSHMORËVE . 

Kosova

Debat: Skeçi me UÇK-në, propagandë apo realitet

Komento

Stupcat-uckMënyra se si është portretizuar UÇK-ja në një skeç humoristik të prezantuar nga aktorët kosovar Stupcat ka nxitur reagime të shumta pro et contra, njofton agjencia e lajmeve INA.

Sekretari i përgjithshëm i OVL të UÇK-së, Faton Klinaku, thotë se, humori nuk guxon  të shpif dhe të tallet me vlerat e kombit shqiptar.

“Vlerën e UÇK-së janë munduar ta humbin që nga paslufta e këndej, me arrestime, me montime të proceseve gjyqësore politike, etiketime e shpifje – si nga vendorët e po ashtu edhe ndërkombëtaret. Por, kot e kanë sepse ai lum gjaku që është derdhur për këtë gjysmë lirie, që ata po e përqeshin, nuk do të shkojë huq”, është shprehur ai.

Ndaj kësaj satire ka reaguar edhe Besarta Lushtaku, vajza e komandantit të UCK-së, Sami Lushtakut.

“Turp ju qoftë, këta që luftuan ja çliruan b… E tash ju bëni këso hajgare, se sipas jush e ditën këta a kanë me jetu. Se n’luftë bash gjithkush s’ka pas guxim mi dal armikut ballë. Ju mas pakti mundeni me fol për luftëtaret se e paskit shitë vetën lehtë të Vetona e Surroja , e lufta nuk ka çmim. Çdo gjë ka kufi!”, është shprehur ajo.

Analistja Kimete Berisha thotë se humori në fjalë është propagantë e tmerrshme kundër Ushtrisë Çlirimtare të Kosovës.

“Veç Serbia dhe krimineli Sllobodan Millosheviç ua kalon Stupcave dhe Grupit Koha, në luftë të përgjakshme dhe propagandë të tmerrshme kundër Ushtrisë Çlirimtare të Kosovës.

Aleaten e NATO-s, UÇK-në e portretizojnë si kriminale, si primitive, katundare, si një grup paramilitar, që edhe gjatë luftës e kanë vrarë njëri-tjetrin për petulla.

Jeni të sëmurë prej mendve, urrejtja juaj është patologjike. Nuk doni ta merrni parasysh faktin se UÇK u demilitarizua më 21 Qershor 1999, prandaj, ata ushtarë që pas këtij viti kanë keqpërdorur dhe kanë bërë krime, ata e kanë bërë atë punë në emrin e tyre, e jo të UÇK-së”, është shprehur ajo.

Pronari i Grupit “Koha” dhe Publicisti Veton Surroi, ka reaguar për skeçin e Stupcave.

“Lëvizjet jo demokratike mbërrijnë fundin kur i prek satira. Doni t’i arrestoni Stupcat. Dërgoni një njësit antiterrorist për ta kapur aktorin protagonist të këtij skeci, Vedatin”, është shprehur ai.

Pas shumë reagimeve, për skeqin e stupcave ka ardhur edhe një reagim nga aktori dhe regjisori, Shkumbin Istrefi.

“Skeçi i Stupcave dhe reagimet ndaj tij vërtetojnë qe jetojmë në një shoqëri për të cilën UÇK nuk ka luftuar. Nuk ka shqiptar i cili nuk e çmon kontributin dhe sakrificën e UCK-se për lirinë të cilën e gëzojmë, liri e cila rrezikon të na ngulfatet nga tentimi i krijimit të temave tabu.

Për mua ky skeç nuk është asgjë më shumë se një revolte ndaj sjelljes së individëve të fuqishëm prej 1999 – 2015, sjellje e cila idealin për të cilin janë sakrifikuar shume djem e vajza të UCK-së (e poashtu edhe popull i cili nuk ka luftuar në front por ka vuajtur pasojat e luftës) e ka vënë në rrezik që të zhbëhet. Jemi në shekullin 21, jemi shumë prapa botës”, është shprehur Istrefi.

Xhezair Shaqiri, i njohur si komandant Hoxha, është shprehur se humori i aktorëve kosovar nuk fletë për idealistët, por për profiterët e luftës dhe spiunët.

“Mënyra se si është portretizuar UÇK-ja në një skeç humoristik të realizuar nga Stupcat në asnjë mënyrë nuk ofendon UÇK, por kritikon disa spiunë të UDB që janë infiltruar në radhët e UÇK dhe disa politikan të sodit që kanë qëndruar shumë anash rrezikut të betejave dhe kanë bërë pasuri marramendëse në kurriz të luftës dhe popullit”, thekson ai. (INA)