Serbia sikur në shumë sektor të tjerë solli probleme të shumta edhe në ekonomi, por mbeti importuesi kryesor i mallrave në Kosovës që nga pas lufta e deri në 2015. Ndër sfidat e kryesore për Doganën e Kosovës mbetet siguria në kufi, sidomos pas sulmeve në Paris, luftimi i kontrabandës, evazionit fiskal, si dhe mbledhja e të hyrave apo arritja e projeksionit.

Asociacioni i Komunave me shumicë serbe është në përputhje me Kushtetutën e Republikës së Kosovës.

Kështu e ka kuptuar interpretimin ligjor të Gjykatës për Asociacionin i pari i Shteteve të Bashkuara të Amerikës në Kosovë, Greg Delawie.

Ambasadori Delawie sqaron se Gjykata i ka dhënë Qeverisë udhëzime specifike se si mund të hartohet statuti i Asociacionit, në mënyrë që i njëjti të jetë në përputhje me Kushtetutën.

“Po dëgjoj se njerëzit po thonë që Gjykata ka thënë se kjo ide nuk është në përputhje me Kushtetutën. Por mendoj se nëse e lexoni me vëmendje e shihni se Gjykata thotë se: (a) një organ i tillë mund të krijohet, dhe (b) kjo është mënyra se si e krijoni në mënyrë që të jetë në përputhje me Kushtetutën e Kosovës”.

Këto komente ambasadori amerikan i ka bërë gjatë një interviste ekskluzive për gazetën “Zëri”, e cila do të botohet në dy vazhdime, ku mes tjerash ka folur edhe për mbajtjen e zgjedhjeve të ardhshme në vend, të cilat, sipas tij, janë të parapara për vitin 2018.

Gjatë kësaj interviste ai ka folur edhe për arrestimin e deputetëve të opozitës dhe këmbëngul se çdo zyrtar shtetëror, që ka aktakuzë për korrupsion, duhet të largohet nga pozita, të paktën derisa të përfundojë procesi gjyqësor. Në vazhdimin e dytë të intervistës, e cila do të botohet pas numrit festiv të Vitit të Ri, ambasadori amerikan flet edhe për Gjykatën Speciale dhe kush mund të jenë të arrestuarit nga kjo e fundit, për dialogun me Serbinë dhe për numrin e madh të kosovarëve që i janë bashkangjitur ISIS-it.

Fillojmë me bllokadën politike. Në një anë e kemi opozitën që thotë se nuk do ta pranojnë këtë marrëveshje, kurse në anën tjetër e kemi Qeverinë. Cila mund të jetë zgjidhja?

Delawie: Mendoj se duhet t’ia fillojmë duke thënë se Kuvendi i tashëm është rezultat i zgjedhjeve të vitit 2014, të cilat gjerësisht janë vlerësuar si të lira dhe të drejta nga OSBE-ja, nga Qeveria amerikane dhe nga vëzhguesit ndërkombëtarë. Për mua kjo do të thotë që Kuvendi ka legjitimitet demokratik.

Kur ishte këtu para 3-4 javëve sekretari Kerry e bëri shumë të qartë pikëpamjen tonë se kuvendet duhet të jenë vende të dialogut, vende të debatit, vende të mospajtimeve, por jo vende të dhunës. Prandaj, mendoj se është shumë me rëndësi që ata që e pengojnë rolin e Kuvendit, duke përdorur dhunën, duhet ta rimendojnë qëndrimin e tyre dhe të mendojnë se cili është interesi i Kosovës në afat të gjatë. Sipas mendimit tim, është me rëndësi që Kosova të ketë Kuvend funksional, i cili mund të përkujdeset për disa prej problemeve me të cilat përballet Kosova sot dhe ma merr mendja se të gjithë e pranojmë këtë.

Shumë prej tyre mund të zgjidhen ose të paktën të përmirësohen duke vënë në jetë ligjet, të cilat mund t’i miratojë Kuvendi. E di se presidentja është përpjekur të ndërmjetësojë një diskutim ndërmjet Qeverisë dhe opozitës. E di se koalicioni qeveritar ka bërë oferta për diskutim me opozitën dhe deri tash këto oferta janë refuzuar, që është për të ardhur keq. Mendoj se problemet e njëmendta të Kosovës mund të zgjidhen me debat e dialog në Kuvend.

Opozita këto ditë po kërkon zgjedhje sepse nuk duan as të dëgjojnë për dialog, nuk duan të ulen me partitë në koalicion dhe të diskutojnë. Në këtë çast e kemi edhe vendimin e Gjykatës Kushtetuese të Kosovës, sipas të cilit Marrëveshja për themelimin e Asociacionit të Komunave me shumicë serbe nuk është plotësisht në përputhje me Kushtetutën?

Delawie: E di se këtë e ka thënë opozita. Po ashtu e di se në një demokraci parlamentare, partitë që i kanë numrat në kuvend, ato që e kanë shumicën kanë të drejtë të vendosin rreth politikave qeveritare. Pra, Qeveria e përfaqësuar nga shumica në Kuvend ka vendosur të hyjë në këtë marrëveshje me Serbinë rreth Asociacionit të Komunave me shumicë serbe dhe kjo është e drejtë e tyre. Ato e kanë shumicën në Kuvend dhe ato kanë të drejtë të vendosin rreth politikave të vendit. Nëse njerëzit nuk janë të kënaqur me politikat e Qeverisë, ata janë të lirë të bëjnë fushatë kundër tyre gjatë zgjedhjeve. Sa kam njohuri unë, zgjedhjet e ardhshme në Kosovë, me orar, janë të parapara në vitin 2018, pra ka mjaft kohë për përgatitje.

Sa i përket vendimit të Gjykatës, e kemi lexuar aktgjykimin me shumë vëmendje. Ishte i gjatë dhe ligjor dhe çka e kam kuptuar nga vendimi i saj është se të kesh Asociacion të Komunave me shumicë serbe është në përputhje me Kushtetutën e Kosovës. Gjykata i ka dhënë Qeverisë udhëzime specifike se si mund të hartohet statuti për këtë Asociacion në mënyrë që të jetë në përputhje me Kushtetutën e Kosovës dhe aty, po ashtu, thuhet se duan ta shohin statutin kur të hartohet. Pra, po dëgjoj se njerëzit po thonë që Gjykata ka thënë se kjo ide nuk është në përputhje me Kushtetutën, por mendoj se nëse e lexoni me vëmendje e shihni se Gjykata thotë se: (a) një organ i tillë mund të krijohet, dhe (b) kjo është mënyra se si e krijoni në mënyrë që të jetë në përputhje me Kushtetutën e Kosovës.

Ka thirrje për protestë të madhe më, 9 janar 2016. Çka pritni? Opozita qartazi është e palëkundur në kërkesat e tyre dhe e shohim se as nuk duan ta pranojnë këtë marrëveshje. Pra, a është zgjidhje arrestimi i deputetëve të opozitës, duke pasur parasysh se janë të gatshëm t’i thërrasin njerëzit për të dalë në rrugë?

Delawie: Në çdo vend demokratik protestat janë pjesë e rëndësishme e dialogut politik. Natyrisht që ka protesta edhe në Shtetet e Bashkuara të Amerikës, si dhe në vendet e tjera evropiane. Mendoj se e rëndësishme rreth protestave është që të jenë të qeta. Shenja thirrjeje, pankarta e gjërat e tilla janë në rregull, por është më se e sigurt që do t’i shkuraroja protestuesit nga përdorimi i koktejeve të molotovit ose mënyrave të tjera të dhunës, që janë negative për demokracinë e Kosovës. Sa i përket arrestimit të njerëzve të opozitës, të jem i sinqertë ajo që më shqetëson është kur njerëzit mendojnë se meqenëse janë deputetë ata janë mbi ligjin dhe që nuk duhet t’u përmbahen rregullave të njëjta si çdo qytetar tjetër i Kosovës. Nëse e shkel ligjin, pa marrë parasysh kush je, atëherë duhet t’i nënshtrohesh të njëjtit sundim të ligjit, të të njëjtës drejtësi si çdo person tjetër.

Opozitarët po i përmendin shumë të korruptuar të tjerë në Kuvend, që nuk janë arrestuar. Çdo ditë raportohen skandale në medie. Ne personalisht i kemi raportuar disa dhe ata ende janë në politikë. Ju e keni përmendur korrupsionin, z. Tom Yazdgerdi, si dhe sekretari Kerry e kanë thënë që duhet ta luftojmë korrupsionin. Jam në gazetari prej vitit 2001 dhe kam shkruar mijëra artikuj me fakte e argumente dhe ende i kemi këta njerëz në politikë. Nuk po flas vetëm për Qeverinë, por edhe nga partitë opozitare. Si do ta luftojmë korrupsionin kur kemi ndikim politik në sistemin e drejtësisë? Kemi njerëz që janë milionerë, kurse zyrtarisht e kanë vetëm një pagë mujore prej të themi 1000€. Kush duhet ta luftojë dhe si mund ta luftojmë korrupsionin kur në pozitat kryesore i kemi të korruptuarit?

Delawie: Natyrisht që korrupsioni është problem. Qysh se kam ardhur këtu, para katër muajve e ca, e kam thënë se prioriteti numër një ndër tri prioritetet e mia kryesore është ta ndihmojmë Kosovën për përmirësimin e sundimit të ligjit. Pra, kësaj po i qasemi në disa mënyra dhe do të përpiqem të përgjigjem ndaj të gjitha pikave që i përmendët ju. Përballja me korrupsionin duhet të bëhet në nivel institucional. Pra, po punojmë me Policinë, me prokurorët, me gjykatësit dhe kemi hartuar programe gjatë viteve të fundit për të punuar me të gjithë ata. Në vitin 2015 i kemi shpenzuar rreth 15 milionë dollarë, më së shumti përmes USAID-it, në programet për të ndihmuar në përmirësimin e sektorit të sundimit të ligjit në Kosovë. Janë disa mënyra se si e bëjmë këtë.

Njëra prej tyre ka të bëjë me parandalimin e korrupsionit, kurse mënyra tjetër ka të bëjë me atë se si të trajtohen njerëzit, të cilët përpiqen të kryejnë krim të korrupsionit. Për t’u marrë me të parën, kemi njërin ndër projektet më të mëdha, i cili mëton t’u ndihmojë komunave për zbatimin e mënyrës elektronike të prokurimit. Kjo do të thotë se nëse komuna duhet të blejë ndonjë shërbim apo mall, atëherë tenderi do të postohej në rrjet.

Thënë shkurt, kërkesa për mallra apo shërbime do të postohej online dhe do të kishte transparencë se cilat ndërmarrje kanë konkurruar në atë tender, çmimi që ato ofrojnë dhe gjërat e ngjashme. Pra, do ta bënte më të dukshme nëse diçka ka shkuar keq gjatë prokurimit. Pra, po punojmë në këtë me komunat dhe po punojmë ngushtë me Bankën Botërore, e cila po e zbaton të njëjtin projekt në nivel kombëtar, me qeverinë qendrore. Pra, prokurimi elektronik e bën shumë më të vështirë që zyrtarët ta marrin ajkën nga prokurimi sepse mundëson transparencë, të gjithë e dinë çka po ndodh, të gjithë e shohin se kush sa ka ofruar dhe kush e ka fituar kontratën në fund. Po ashtu, po punojmë edhe në disa gjëra tjera në këtë fushë, si p.sh. po japim kontributin tonë duke ndihmuar në mënyra të ndryshme për zvogëlimin e lëndëve të mbetura në gjykata. Pastaj, e kemi edhe çështjen se çka të bëhet me zyrtarët e korruptuar kur ndaj tyre është ngritur aktakuzë.

Po përpiqemi të ndihmojmë në forcimin e aftësimit të prokurorëve për të punuar në këto raste për të mbledhur dëshmi që mund të përdoren në gjykatë, si dhe kemi seminare dhe projekte edukative për gjyqtarët dhe gjyqësorin. Ne mendojmë se çdo zyrtar publik, ndaj të cilit është ngritur aktakuzë për korrupsion, duhet që të largohet nga ajo zyrë, të paktën përkohësisht derisa procesi gjyqësor të përfundojë.

Dhe këtë e kemi bërë të qartë. Nuk ka mënyrë të lehtë për t’u marrë me këtë çështje dhe nëse e kemi cakun që ta kemi një shoqëri të pastër nga korrupsioni, atëherë kjo do të ishte e mrekullueshme, por kjo nuk do të ndodhë shpejt. As SHBA-ja nuk është shoqëri e tillë, p.sh. në njërin nga shtetet më të mëdha federale të SHBA-së, katër nga shtatë guvernatorët e fundit janë burgosur për shkelje të ndërlidhura me korrupsion. Por, më e rëndësishmja për një shoqëri është se çka bën për parandalimin e korrupsionit, çka bën për t’u marrë me korrupsionin kur ndodh sepse e di se do të ketë raste të korrupsionit.

Kosovarët nuk e kanë të lehtë ta pranojnë suksesin e para pak ditëve të Vuçiqit në Serbi me arrestimin e 79 vetave për korrupsion. Pra, njerëzit po pyesin: A ka ndodhur diçka e ngjashme këtu në Kosovë që prej pasluftës?

Delawie: Unë kam ardhur këtu para katër muajve dhe është shumë herët për mua që t’i përgjigjem kësaj pyetjeje. Natyrisht SHBA-ja e ka mbështetur Kosovën qe një kohë të gjatë dhe kjo është njëra ndër çështjet tona madhore, por unë vetëm po e ritheksoj këtë çështje gjatë mandatit tim këtu. Mund t’ju them se gjatë këtyre muajve prejse kam ardhur, ne i kemi ridrejtuar disa prej programeve nga fushat e tjera ashtu që të mundë të përqendrohemi më shumë në përpjekjet kundër korrupsionit sepse korrupsioni pengon demokracinë, pengon ekonominë… Nëse i shqyrtoni anketat e opinionit publik (e me siguri i dini më mirë se unë për shkak të profesionit tuaj), atëherë e shihni se korrupsioni është ndër tri shqetësimet kryesore për kosovarët. Në vendin e parë dhe të dytë janë papunësia dhe ekonomia.

Pra, si arrihet përparim në zvogëlimin e papunësisë? Duhet të krijoni vende pune. Si i krijoni vendet e punës? Duhet të tërhiqni investime. Si i tërhiqni investimet? Dy nga pengesat kryesore për investimet janë: numri i lëndëve në gjykata dhe ne po përpiqemi të ndihmojmë rreth kësaj, si dhe korrupsioni. E ardhmja e Kosovës në një masë të madhe varet nga mënyra se si merreni me këtë çështje. Dhe më besoni, po ta kisha një shkop magjik, do ta përdorja menjëherë për ta zgjidhur këtë problem, por nuk kam. Çka ne mund të bëjmë si shtet mik i Kosovës, shpresoj si miku më i mirë i Kosovës, është ta ndihmojmë atë që të vërë në jetë masa institucionale me të cilat mund të arrihet përparim dhe të arrihen rezultate në terren. Masat institucionale, prokurimi elektronik dhe gjërat e tilla janë natyrisht të mira, por nëse dëshironi ta ndryshoni kulturën, atëherë me siguri është me rëndësi që disa njerëz të arrestohen.

Kam biseduar me z. Tom Yazdgerdi lidhur me gjeneratën e re në politikë. Ende i kemi të njëjtit udhëheqës politikë që po votohen qysh prej përfundimit të luftës. Kemi shumë të rinj e të reja që kthehen pas shkollimit jashtë, por nuk ka vend për ta në asnjërën parti politike. Pra, ka të bëjë edhe me ndryshimin e mentalitetit dhe të njerëzve brenda politikës. A mendoni se është koha që gjeneratës së re t’i jepet hapësira në politikë?

Delawie: Nuk mendoj se është aq shumë me rëndësi se çka mendoj unë, por çka mendojnë votuesit kosovarë. Është diçka tjetër për të thënë në mënyrë hipotetike se më shumë të rinj duhet të hyjnë në Qeveri, por u takon votuesve që ta bëjnë këtë. Nuk mendoj se kam diçka tjetër për të thënë për këtë. /Zëri/

Viti 2016 nis me protesta nga ana e opozitës në Kosovë, kësaj here edhe me kërkesën për dorëheqjen e kryeministrit Isa Mustafa, si dhe zëvendësit të tij Hashim Thaçi.

Në një intervistë për Top Channel, kryetari i Lëvizjes Vetëvendosje, Visar Ymeri ka arsyetuar veprimet e opozitës brenda Kuvendit të Kosovës, të cilat – siç thotë, – janë në mbrojtje të Republikës nga dy marrëveshje të dëmshme për vendin.

Ymeri bëri të ditur se, për sa kohë që qeveritarët qëndrojnë në pozicionet e tyre, këto dy marrëveshje do të kundërshtohen edhe me metoda të tjera, përveç atyre që janë parë deri më tani, duke nisur me protestën e paralajmëruar të 9 janarit.

“Do të ketë protestë me metoda, që i kemi parë deri më tani, por edhe me metoda të tjera, të cilat nuk i kemi përdorur. Protesta e 9 janarit është jashtzakonisht e rëndësishme, sepse do të duhej të ishte goditja përfundimtare ndaj këtyre marrëveshjeve dhe, në anën tjetër, do të niste një proces të ri të të protestuarit kundër kësaj qeverie, të përbërë nga shkelës të Kushtetutës. Këta e kanë mundësinë e dorëheqjes nga pozicionet e tyre, kanë arsye të bollshme për të dhënë dorëheqje, veçanërisht për shkak të këtyre shkeljeve ndaj Kushtetutës, mirëpo nëse nuk e bëjnë një gjë të tillë, atëherë natyrisht që qytetarët e Republikës do t’i detyrojnë këta të largohen nga pushteti”, tha Visar Ymeri, kryetar i Lëvizjes Vetëvendosje.

Ymeri tha se, Kosova është kthyer në një mjedis antidemokratik, ku nuk janë marrë parasysh debatet e shumta dhe, si pasojë, protesta mbetet metoda e vetme e kundërshtimit.

Kreu i Vetëvendosjes deklaroi gjithashtu se, Kosova nuk do të lejojë që të qeveriset nga njerëz të cilët shpërfillin Kushtetutën, pasi kjo do të çonte në “bosnjëzimin” e vendit, ndaj – sipas tij, – duhet të shkohet në zgjedhje të parakohshme. Ai u shpreh i bindur se, nuk do të lejohet themelimi i Asociacionit të Komuave me shumicë serbe, veçanërisht tani që ekziston një situatë tjetër pas vendimit të Gjykatës Kushtetuese.

“Tashmë, pas aktgjykimit, natyrisht që kemi edhe një përmasë të re të kësaj situate. Është vlerësuar që kryeministri dhe zëvendëskryeministri i Kosovës, me veprimet dhe nënshkrimet e tyre kanë shkelur Kushtetutën e Republikës së Kosovës. Për hir të demokracisë dhe sovranitetit në Kosovë, nuk duhet të lejojmë që ata, të cilët janë konstatuar si shkelës të Kushtetutës, të vazhdojnë të mbesin në pozicionet e njëjta. Pra, largimi i kësaj qeverie nga pushteti është kusht i domosdoshëm për t’i hapur rrugë një procesi demokratik, që do të duhej të ndodhte në Kosovë”, tha më tej Visar Ymeri.

Alternativa – sipas Ymerit, – është e qartë: Kosova të ndërtohet si shtet i pavarur dhe sovran. Ai shtoi se, institucionet qendrore të Kosovës duhet të nisin një proces dialogu të hapur, demokratik, me të gjithë qytetarët, përfshirë minoritetet, e veçanërisht me serbët, të cilët refuzojnë të integrohen në shoqëri dhe jetën politike në Kosovë.

Ndërsa lidhur me arrestimin e deputetëve dhe aktivistëve opozitarë, Ymeri i cilësoi ato si përpjekje të pushtetit për të frikësuar qytetarët, por që – sipas tij, – kjo pati efekt të kundërt, duke irrituar edhe më shumë qytetarët.

/ Top Channel

Sa më shumë bëhen deklarata për afrimin e Kosovës me Bashkimin Europian dhe vlerat e shoqërisë europiane, aq më e largët duket kjo në këndvështrimin e ekspertëve, kur vlerësohet angazhimi i autoriteteve kosovare në këtë drejtim, por edhe konsiderata e BE-së për Kosovën.

Viti 2015 nuk i takon vetëm pamjeve me gaz lotsjellës dhe konfrontimeve në politikën e brendshme të Kosovës.

Politika e jashtme, veçanërisht ecuria e Kosovës drejt BE-së përmes zgjidhjes së ngërçit me Serbinë, mbetet një fushë tjetër, në të cilën qeveria e Kosovës ka ngecur. Kjo, pavarësisht kompromiseve të mëdha, duke nisur nga ndryshimi i Kushtetutës së Kosovës për krijimin e Gjykatës Speciale, që do të gjykojë krimet e supozuara të UÇK-së, dhe marrëveshjeve politike me Serbinë.

Grupi për Studime Juridike dhe Politike në Kosovë, si organizatë e shoqërisë civile ka bërë jo pak hulumtime për politiken e jashtme të Kosovës dhe raportin e saj me ndërkombëtarët, por në vitin 2015, bilanci – sipas Fisnik Korenicës, – është krejtësisht negativ.

“Kosova bëri një luftë të jashtëzakonshme, edhe të brendshme politike, për t’i kaluar amendamentet kushtetuese për Gjykatën Speciale dhe në fund të fundit, deri më sot, Kosova nuk ka marrë asgjë praktike nga Bashkimi Europian, që do të garantonte jo vetëm rrugën europiane për Kosovën, por që do të hiqte edhe izolimin aktual ndaj qytetarëve të Kosovës, si të vetmit në Ballkanin Perëndimor që nuk lëvizin dot pa viza”, tha Fisnik Korenica, nga Grupi për Studime Politike dhe Juridike.

Janë të paktën tri momente, në të cilat Bashkimi Europian – sipas Korenicës, – e ka anashkaluar Kosovën. Nënshkrimi i marrëveshjes së Stabilizim-Asociimit, ndonëse vlerësohet si arritja kryesore nga qeveria, nuk garanton rrugë të qartë europiane, sidomos kur bëhet fjalë për aplikimin e Kosovës për anëtarësim në BE. Liberalizimi i vizave është një tjetër çështje, për të cilën Komisioni Europian është treguar shumë rigoroz me Kosovën dhe, e treta, por jo më pak e rëndësishme, është kushtëzimi që BE-ja do të duhej t’ia bënte Serbisë përmes “kapitullit 35”.

“Kapitulli i 35-të nuk është asgjë më shumë sesa një kërkesë për t’i zbatuar marrëveshjet në Bruksel. Në asnjë moment nuk vendos premisa për t’i kërkuar Serbisë, që të vendosë juridikisht me Kosovën edhe përmes heqjes dorë prej shtetësisë sonë, por gjithashtu ‘35’-shi i Serbisë garanton ecurinë shumë të shpejtë të saj në fazat e anëtarësimit. Kur ajo të bëhet anëtare e BE-së do të ketë ‘veto’ për ta bllokuar Kosovën. As heqja dorë nga vetoja për Kosovën nuk është kushtëzuar në ‘kapitullin 35’”, tha Fisnik Korenica.

Përmbajtja e “kapitulli të 35-të”, në raport me shtetet që aspirojnë anëtarësimin, flet për çështje jo edhe aq shumë të rëndësishme, por për Serbinë dhe Kosovën në këtë rast është jetike. Për qeverinë e Kosovës ishte edhe shpresa e madhe për ndërrim faqeje në raport me BE-në, pa u kushtëzuar nga Serbia.

“Ne presim që në kapitullin e 5-të, Serbia të kushtëzohet”, tha Isa Mustafa më 16 tetor 2015.

Jo e tëra ndërlidhet me qasjen e BE-së ndaj Kosovës. Qeveria po kështu ka qenë pasive në punën e saj për ta kushtëzuar rrugën e Serbisë drejt BE-së, përmes kapitullit të 35-të.

“Deri më sot, qeveria e Kosovës nuk ka ndonjë qëndrim zyrtar dhe nuk ka bërë kërkesë, që në raport me kapitullin e 35-të të përcaktojë parimet, që duhet të jenë në atë kapitull, për shkak të këtij pasiviteti ka dështuar qeveria t’i imponojë”, tha Fisnik Korenica.

Anëtarësimi në organizatat ndërkombëtare dhe procesi i njohjes së pavarësisë janë dy çështje të tjera, në të cilat Kosova ka bërë hapa simbolikë. Vetëm tri shtete e kanë pranuar Kosovën në vitin 2015. Po për pak vota, mes tyre edhe tri abstenime nga shtete që e kanë njohur Kosovën, ekzekutivi kosovar – përkatësisht Ministria e Jashtme, si prijëse e anëtarësimit të Kosovës në UNESCO, – dështoi ta fitojë betejën përballë Serbisë.

Anëtarësimi në UNESCO është vetëm njëra nga betejat e rëndësishme, që Kosova ka para vetes në vitet që vijnë, në luftën e saj diplomatike me Serbinë, një shtet fqinj ky i shndërruar tashmë në pengesë kryesore, për çdo nismë që ndërmerr Kosova drejt forcimit të subjektivitetit të saj ndërkombëtar.

/ Top Channel

Kryeministri i Kosovës Isa Mustafa për DW mbi: azilkërkuesit, mosliberalizimin e vizave, gjendjen e rëndë ekonomike, protestat dhe gazin lotësjellës, dialogun me Serbinë…

 

Deutsche Welle: Zoti Kryeministër, Ju këto ditë keni deklaruar se nuk do të udhëtoni jashtë vendit pa liberalizimin e vizave. Çfarë nënkupton konkretisht kjo deklaratë, pasi Ju si kryeministër keni dhe detyrimet tuaja ndërkombëtare?

Isa Mustafa: Ne kemi punuar shumë në plotësimin e kritereve dhe më pas rekomandimeve për libralizimin e vizave. Ëshë bërë një punë e madhe prej vitit 2012 deri më sot. Në shtator të këtij viti është dhënë një vlerësim i komisionit vlerësues dhe është thënë se nga 95 kritere sa ka pasur Kosova, janë plotësuar 87. Ndërsa pjesa tjetër është plotësuar pjesërisht dhe janë dhënë sugjerime se si të plotësohen ato. Ne kemi punuar shumë në këtë drejtim. Tani thuhet se duhen plotësuar edhe disa kritere të tjera, që ne i konsiderojmë si plotësisht të padrejta, sepse janë dyfishuar kriteret për Kosovën në krahasim me vendet e tjera. Ne jemi tani në një situatë shumë të pakëndshme ndaj qytetarëve, sepse ne kemi bërë përpjekje maksimale që të përmbushim të gjitha kërkesat e faktorit ndërkombëtar, duke përfshirë edhe dialogun me Serbinë, që është një proces shumë i rëndë për ne. Serbisë tani për dialogun i është dhënë mirënjohje dhe është hapur kapitulli 35 për rolin konstruktiv në procesin e saj në dialog. Ndërsa ne të cilët praktikisht po bartim të gjithë peshën e dialogut, sepse të gjitha ngjarjet po ndodhin në territorin tonë dhe jo në territorin e Serbisë, po largohemi edhe më shumë, sepse na thonë: punoni ju edhe më shumë e të shohim a po ua liberalizojmë vizat apo jo. Ndërkaq Serbinë po e çojnë përpara. Në këto kushte ne jemi në një situatë shumë të rëndë. Ne nuk mund të shetisim nëpër Evropë për të dialoguar për Kosovën, përderisa qytetarët tanë janë të izoluar. Kjo do të ishte jo etike. Ndaj ne kërkojmë një përgjigje të qartë të BE, se çfarë do të ndodhë me liberalizimin e vizave.

DW: Por zoti kryeministër Ju keni edhe detyrime ndërkombëtare. Këtu e keni fjalën se nuk do të udhëtoni vetëm për vazhdimin e dialogut, apo në përgjithësi nuk do të udhëtoni jashtë?

Isa Mustafa: Jo, e kam fjalën për udhëtime zyrtare jashtë vendit, sepse neve nuk na takon të udhëtojmë shumë jashtë vendit, përderisa qytetarët tanë janë të mbyllur. Qytetarët nuk janë fajtorë, sepse ata po bëjnë punën e tyre si duhet. Janë kthyer dhe po kthehen edhe ata që kanë dalë jashtë vendit kohët e fundit. Procesi i shpërnguljeve është ndalur. Kemi qytetarë shumë të disiplinuar, që i zbatojnë rregullat evropiane dhe vendore.

DW: A do të thotë kjo se dialogu me Serbinë nuk do të vazhdojë deri sa nuk bëhet liberalizimi i vizave?

Isa Mustafa: Ne do të bëjmë përpjekje të marrim një përgjigje nga Bashkimi Evropian se çfarë do të ndodhë me vizat. Ndryshe do ta kemi shumë vështirë që të marrim pjesë në proceset e mëtutjeshme.

DW: Kur jemi tek dialogu, Gjykata Kushtetuese ka shpallur vendimin e saj për Asociacionin e komunave me shumicë serbe, ku thuhet se një pjesë e kësaj marrëveshjeje nuk është në përputhje me Kushtetutën e vendit. Çfarë do të thotë kjo për Ju?

Isa Mustafa: Ne e kemi paraparë edhe në Marrëveshje që para se Marrëveshja të shndërrohet në statut, të trajtohet në Gjykatën Kushtetuese. Këtë e ka kërkuar presidentja, si ndërmjetësuese në dialogun mes pozitës dhe opozitës. Ajo ka kërkuar që Gjykata Kushtetuese ta vlerësojë këtë Marrëveshje. Dhe ajo ka thënë se disa pika nuk janë në përputhshmëri të plotë me frymën e Kushtetutës.

DW: Çfarë do të bëhet tani me këto pjesë të Marrëveshjes: a do të dialogohet sërish, apo thjesht do të merren parasysh me rastin e miratimit të statutit?

Isa Mustafa: Kjo që ka thënë Gjykata Kushtetuese ka lidhje me statutin, sepse Gjykata Kushtetuese ka thënë se Asociacioni mund të themelohet. Ai është bërë normë juridike pasi është sanksionuar me ligjin për ratifikimin e Marrëveshjeve ndërkombëtarë për normalizimin e raporteve mes Kosovës dhe Serbisë në vitin 2013. Do të thotë sa i përket Asociacionit, nuk ka lënë asnjë mëdyshje se ai duhet të themelohet. Mirëpo ka thënë se ai duhet të themelohet në harmoni me Kartën Evropiane të Qeverisjes Lokale dhe duhet të kihen parasysh të gjitha dispozitat e Kushtetutës. Tani ne në procesin e hartimit të statutit do të kemi kujdes që çdo gjë të jetë në përputhje me Kushtetutën. Pra nuk ka dialogim apo rinegociim të Marrëveshjes.

DW: Opozita e ka interpretuar këtë vendim ndryshe: Qeveria dhe kryeministri kanë nënshkruar një marrëveshje që është në kundërshtim me Kushtetutën. Ata kanë kërkuar edhe zgjedhje të jashtëzakonshme, me shpjegimin se Qeveria ka shkelur Kushtetutën dhe ka dështuar. Do të ketë zgjedhje të reja vitin e ardhshëm?

Isa Mustafa: Zgjedhje nuk ka deri në vitin 2018 dhe Marrëveshja nuk është në kundërshtim me Kushtetutën. Gjykata Kushtetuese ka konstatuar se disa pika të Marrëveshjes nuk janë në përputhshmëri të plotë me frymën e Kushtetutës dhe ne do t’i kemi parasysh këto gjëra që në hapat e mëtutjeshëm të themelimit të Asociacionit, çdo gjë të jetë në përputhje me Kushtetutën. Marrëveshja nuk është akt juritik por politik. Statuti është akt juridik dhe ne aty duhet të kemi parasysh të gjitha sugjerimet e Gjykatës Kushtetuese.

DW: Do të thotë zgjedhje të reja parlamentare nuk do të ketë. Por vitin e ardhshëm duhet të zgjidhet një president i ri. I keni siguruar Ju votat e domosdoshme për zgjedhjen e presidentit?

Isa Mustafa: Unë jam i bindur që po. Ne kemi vota të mjafueshme për zgjedhjen e presidentit.

DW: Por edhe nga partia juaj ka pasur zëra se nuk do ta votojnë zotin Hashim Thaçi për president?

Isa Mustafa: Ka zëra, është një numër shumë i kufizuar i deputëtëve nga grupi parlamentar i LDK, por ata nuk e rrezikojnë fare zgjedhjen e zhotit Thaçi për president.

DW: Pra Ju do ta respektoni deri në fund marrëveshjen?

Isa Mustafa: Gjithsesi.

DW: Por sa i qëndrueshëm është koalicioni PDK-LDK, sepse kohët e fundit ka pasur fërkime dhe mospajtime serioze mes jush, të cilat mund ta dëmtojnë apo dhe prishin koliacionin qeverisës?

Isa Mustafa: Mund të them se mospajtime serioze nuk ka pasur, e fërkime po. Por fërkimet ndodhin edhe brenda një subjekti politik dhe grupi parlamentar, sepse njerëzit kanë mendime dhe ide të ndryshme. Por koalicioni ka qenë dhe është shumë i qëndrueshëm. Dhe kemi arritur që shumë nga synimet tona t’i realizojmë.

DW: Zoti kryeministër, për një vend demokratik siç është, apo siç pretendon të jetë Kosova, me siguri që nuk është në rregull që gati gjysma e opozitës të jetë në burg apo në arrest shtëpie. Si do ta zgjidhni këtë problem?

Isa Mustafa: Këto zhvillime janë tërësisht të pavolitshme. Nuk janë zhvillime të mira. Askush nuk ka pritur që do të kemi zhvilime të tilla, sepse askush nuk e ka pritur se do të kemi një kulturë të tillë politike në Kosovë. Në 16 vitet e fundit nuk kemi hasur në sjellje dhe kulturë të tillë. Ne jemi angazhuar për shtet juridik dhe ligjor. Ndërsa shteti juridik nuk i dallon njerëzit – në deputetë apo njerëz normalë. Por i dallon vetëm nga ajo se a e shkel dikush ligjin apo jo. Për fat të keq ka deputetë, që kanë hedhur gaz lotësjellës. Ndërsa ligji, e jo ne si qeveri, e ka cilësuar gazin lotësjellës si armë. Dhe secili që përdor armë të tillë, me të cilën rrezikon jetën e të tjerëve, sepse është fjala për ambiente të mbyllura dhe për përdorim të paautorizuar të këtyre mjeteve duhet të përgjigjet para ligjit. Ne nuk e kemi kërkuar këtë si qeveri, por organet e ligjit e ushtrojnë detyrën e tyre. Kjo është një sjellje që duhet të përfundojë shpejt. Ne kemi ofruar dhe jemi të gatshëm për dialog, por edhe dialogu i ka kufijtë e vet, sepse nuk mund të tërhiqemi nga themelimi i Asociacionit për arsye se po kërkon opozita. Ne nuk të tërhiqemi nga zbatimi i ligjit.

DW: Pra Ju jeni të gatshëm për dialog me opozitën, por nuk do të tërhiqeni nga marrëveshjet e nënshkruara në Bruksel?

Isa Mustafa: Nuk mund të tërhiqemi, sepse këto janë marrëveshje ndërkombëtare. Por ato gjithmonë do t’i zbatojmë në kuadër të ligjit dhe rendit. Ka me siguri shumë gjëra për të cilat kemi nevojë të kemi debat me opozitën në Kuvend. Opozita ka tentuar që me Asociacionitndhe demarkacionin të provojë të fitojë mbështetjen e qytetarëve, por nuk e ka marrë këtë përkrahje në asnjë moment. Çështja e Asociacionit dhe demarkacionit nuk janë problemet më të mëdha, sepse ato janë të zgjidhshme. Problemi ynë më i madh është zhvillimi ekonomik, ndërtimi i shtetit ligjor, integrimi euroatlantik i vendit. Këto janë çështje madhore që duhet të shkojnë përpara dhe ne nuk duhet ta ngulfasim veten me dy çështje, të cilat nuk paraqesin rrezik për Kosovën, sepse kërkush nuk mund t’ia marrë Kosovës asnjë pёllëmbë të tokës, në qoftë se ajo tokë ka qenë dhe vërtetohet se është e Kosovës.

DW: Një çështje tjetër që e pret Kosovën në vitin 2016 është Gjykata Speciale. Janë arritur të gjitha marrëveshjet për themelimin dhe funksionalizimin e saj?

Isa Mustafa: Ne e kemi kryer punën më të madhe sa i përket funksionimit të Gjykatës speciale. Ne e kemi aprovuar ligjin për dhomat e veçanta dhe procedura e tjera të domosdoshme. Ka mbetur që të ratifikohet marrëveshja me Holandën, si vend nikoqir i një pjese të Gjykatës, e cila do të ketë dy seli: një në Kosovë dhe tjetrën në Holandë. Ne kemi arritur në nivelin teknik edhe marrëveshjen me Holandën dhe ka mbetur që të procedohet ajo. Por kur do të fillojë të veprojë nuk mund të themi sepse kjo ka të bëjë me përgatitjen e stafit, përzgjedhjen e gjykatësve etj.

DW: A do të operacionalizohet funksionimi i saj në vitin 2016, sepse kjo ka qenë gjithmonë një prej kërkesave të bashkësisë ndërkombëtare?

Isa Mustafa: Gjithsesi, sepse është premtuar që të fillojë punën në vitin 2015. Por proceset janë shtyrë. Tani për tani nuk ka informacione se ajo mund të prolongohet më shumë se në vitin 2016.

DW: Sa reale janë vlerësimet e disa qarqeve ndërkombëtare, të cilat thonë se protestat që janë zhvilluar dhe po zhvillohen në Kosovë, në disa muajt e fundit kanë lidhje me Gjykatën Speciale për krime lufte?

Isa Mustafa: Ne nuk mund të argumentojmë këtë në Kosovë. Por ajo mund të jetë një prej shkaqeve, sepse sa i përket Asociacionit dhe demarkacionit dhe gjithë kësaj zhurme dhe dëmi që i është bërë Kosovës, shihet se këto nuk janë kauza të qëndrueshme. Nuk ka asnjë shkas që të hidhet gaz lotësjellës në Kuvend për çështje, të cilat mund të zgjidhen dhe kanë një përgjigje shumë të saktë. Kjo është një çështje tjetër, por nuk më takon mua që të them nëse vërtetë ky është shkaku, sepse nuk kam argument.

DW: Por me siguri që keni argumente për raportet me Serbinë. Si do të zhvillohen këto raporte në të ardhmen, kur dihet se Serbia është ajo e cila ka përfituar nga dialogu më shumë. Kosova e ka nënshkruar Marrëveshjen për Stabilizim-Asociim, por ka mbetur pa anëtarësim në UNESCO dhe pa liberalizim të vizave. Pra si do t’i ndërtoni këto raporte, pasi keni vendosur të mos vazhdoni dialogun me Serbinë, pa liberalizimin e vizave?

Isa Mustafa: Nuk shoh asnjë arsye që tani ne të mbyllemi, por neve as MSA nuk na vlen pa liberalizimin e vizave. MSA hap mundësi për zhvillim ekonomik dhe si do të bashkëpunojë ekonomia jonë me atë të BE, nëse ne nuk mund të udhëtojmë pa viza. Sa i përket Serbisë, ne kemi definuar disa çështje teknike, të cilat duhet t’i debatojmë, siç janë çështja e transportit ajror, çështja e e transportit hekurudhor. Por edhe gjërat që na kanë mbetur të përfundojmë, siç është zhbërja e strukturave paralele serbe në Kosovë. Përderisa ne po bisedojmë me Serbinë dhe Vuçiqit po ia rrahin krahët për bashkëpunim dhe sjellje konstruktive, Vuçiq ende vazhdon të emërojë struktura paralele serbe në Kosovë…

DW: … pikërisht ky është një prej argumenteve të opozitës, e cila thotë se Serbia po përfiton dhe Kosova vetëm ka humbur nga ky dialog. Në çfarë forme do ta vazhdoni dialogun?

Isa Mustafa: Ne do të kërkojmë me çdo kusht që të gjitha marrëveshjet të zbatohen dhe të zhbëhen strukturat paralele, në mënyrë që të vazhdohet me dialog.

DW: Një prej kërkesave të bashkësisë ndërkombëtare është luftimi i korrupsionit të nivelit të lartë. Nuk dua të bëj krahasime, por Serbia para ca kohësh ka arrestuar dhjetra persona të nivelit të lartë politik dhe ekonomik. Pse Kosova nuk bën arrestime të tilla? Ka frikë, mungesë të vullnetit politik, apo çfarë është në pyetje?

Isa Mustafa: Ne e kemi biseduar këtë çështje me Prokurorinë e shtetit dhe gjykatat, është biseduar më shumë në kuadër të kërkesave për liberalizimin e vizave, sepse kjo është shtruar si kriter për liberalizim. Prokuria është duke punuar dhe ka një listë të rasteve të korrupsionit, të cilat ata i konsiderojnë si raste shumë serioze. Por duhet të themi se me këto çështje deri tani kryesisht është marrë Eulexi dhe jo organet vendore. Me përmbylljen e misionit të Eulexit këto raste do të kalojnë tek organet vendore, por ende nuk është saktësuar se kur do të përfundojë ky mision. Negociatat për rolin e Eulexit në Kosovë ende po vazhdojnë. Por mund të them se ekziston gatishmëri e Prokurorisë dhe gjykatave që t’i trajtojnë këto raste. Mendoj se edhe tek ne do të nxirren para drejtësisë të gjithë ata, të cilët janë të korruptuar apo e kanë shkelur ligjin. Kjo çështje do t’i referohet edhe BE-së në kuadër të procesit të liberlizimit të vizave.

DW: Zoti kryeministër, a mund të thuhet se keni dështuar në politikën ekonomike? Në prag të zgjedhjeve Ju keni premtuar punësimin e dhjetra e qindra mijëra njerëzve, ndërsa deri tani keni realizuar vetëm një pjesë të vogël?

Isa Mustafa: Mendoj se kemi arritur suksese evidente, sa i përket zhvillimit ekonomik. Këto suksese shihen edhe tek punësimi. Kemi punësuar rreth 16.000 persona, pa llogaritur edhe 2.500 persona, sa janë punësuar në bujqësi përmes subvencioneve dhe granteve që kemi dhënë – të cilat kapin shumë prej 43 milionë euro gjatë këtij viti. Kemi bërë reforma fiskale, të cilat e lehtësojnë bërjen e biznesit në Kosovë. Kemi nënshkruar marrëveshjen për ndërtimin e termocentralit Kosova e Re, që është investimi më i madh në Kosovë pas luftës, me një shumë prej rreth një miliardë euro. Kemi përfunduar punën e autostradës energjetike me Shqipërinë, e cila në anën tonë është gati por duhet të përfundohet në anën e Shqipërisë, që do të ndodhë deri në prill. Kemi prolonguar deri më 31 maj projektin e Brezovicës, sepse duhet të mobilizohen mjetet e ofruara si garancion për fillimin e projektit, që janë rreth 162 milionë euro. Kemi siguruar rreth 160 milionë për rrugën hekurudhore, që na lidhë me shtatë vende të rajonit dhe BE. Mendoj se këto janë rezultate të jashtëzakonshme, por ka qenë e pamundur që në vitin e parë të pritet që të punësojmë 30.000 apo 40.000 njerëz. Por unë mendoj se me këtë trend do ta realizojmë atë që kemi premtuar për këtë legjislacion – që të punësojmë deri në 120.000 persona.

DW: Në këtë aspekt me siguri që një rol shumë të rëndësishëm mund ta kenë edhe investimet e jashtme. Në këtë kuadër, si i vlerësoni raportet ekonomike dhe politike me Gjermaninë, gjatë vitit 2015?

Isa Mustafa: Unë mendoj se kemi raporte të shkëlqyeshme me Gjermaninë. Kohët e fundit kemi pasur bisedime edhe me dy lande gjermane: Baden Vyrtenberg dhe Bavarinë. Kemi biseduar për mundësinë e investimeve direkte nga këto lande dhe kemi biseduar për mundësinë e shkollimit profesional të njerëzve tanë atje. Poashtu kemi biseduar edhe për punësimet sezonale. Kemi edhe orientime edhe ndaj landeve të tjera. Ka mbetur çështje e hapur, ajo e rekonstruktimit të termocentralit Kosova A. Por ende nuk kemi ndonjë përgjigje konkrete. Kemi një mbështhetje shumë të madhe të Bankës gjermane për zhvillim dhe të qeverisë gjermane në të gjitha fushat e zhvillimit ekonomik.

DW: Si e shpjegoni faktin që Gjermania si një prej vendeve më të fuqishme ekonomike në botë, ende nuk ka marrë asnjë projekt të madh ekonomik në Kosovë? Kjo temë është ngritur edhe nga vetё kancelarja Merkel gjatë takimit tuaj të fundit në Berlin.

Isa Mustafa: Nga ai takim ka mbetur të ndiqet projekti i rekonstruimit të Kosovës A. pas takimit kemi biseduar edhe një herë me përfaqësuesit e firmës së interesuar për këtë punë (Belfinger). Por ende nuk kemi një përgjigje të sakt,ё për mënyrën e financimit dhe statusit të Kosova A, pas rekonstruimit të saj. Ne jemi të gatshëm që të vazhdojmë konsultimet, por natyrisht që ne jemi të gatshëm të shikojmë edhe mundësi të tjera për futjen e ekonomisë gjermane në Kosovë – në miniera dhe minerale si dhe fushat tjera ku ekonomia gjermane ka treguar interes.

DW: Po si i vlerësoni raportet politike me Gjermaninë?

Isa Mustafa: Mendoj se roli i Gjermanisë ka qenë vendimtar në procesin e dialogut dhe normalizimit të raporteve me Serbinë. Gjermania ka pasur një qëndrim shumë parimor. Ndikimi i Gjermanisë do të jetë vendimtar edhe në proceset e tjera me Serbinë. Por Gjermania ka ushtruar një rol shumë të rëndësishëm edhe në procesin e normalizimit dhe bashkëpunimit mes gjashtë vendeve të Ballkanit Perëndimor, me iniciativën e Berlinit nga vet kancelarja Merkel. Ne kemi pasur sivjet edhe takimin e dytë në Vjenë. Kjo ka dhënë dy fryte shumë të rëndësishme: Një, relaksimi i marrëdhënieve mes vendeve në rajon. Dhe dy, ka hapur mundësinë e lidhjes së infrastrukturës dhe komunikimit mes këtyre vendeve. (dw)

Deputeti i Lëvizjes Vetëvendosje, Albin Kurti, ka zgjedhur një batutë për ta përshkruar kryeministrin Isa Mustafa.

“Kryeministri Mustafa nuk arrin ta menaxhojë as ‘Facebook’-un e vet, e lëre më ta menaxhojë Kosovën”, deklaroi ish-kreu i Vetëvendosjes në një intervistë për emisionin “Interaktiv” të KTV-së nga shtëpia e vet, ku po vuan arrestin.

“Mustafa është shumë qesharak, po të mos ishte kaq i dëmshëm. Prandaj unë mendoj që ne nuk duhet ta marrim Mustafën më seriozisht nga sa ai e merr vetveten. Tash, kur ka vdekur ‘Zajednica’, ai po përpiqet ta ringjallë atë, që edhe vetë të ndihet sa më gjallë. Nuk ka më kurrfarë kuptimi që ai të jetë kryeministër i Republikës së Kosovës”, vijoi Kurti.

Në intervistë ligjvënësi opozitar rrëfeu edhe momentet e arrestimit të tij më 28 nëntor, duke thënë se polica e trajtoi si të ishte një terrorist: “Ishte policia atë ditë që kishte mbushur rrugët me policë me uniforma, civilë dhe nuk dalloheshin. Natyrisht në momentin kur je në protestë e kanë të vështirë të arrestojnë dhe isha i ndërgjegjshëm se mund të kishte ndonjë ndërhyrje të policisë. Por nuk e prisja që do të angazhonin forcat anti-terror. Angazhuan një mijë policë dhe ata ishin në ndjekje të një terroristi që nuk ekzistonte. Mësymja e tyre ndaj nesh ishte hakmarrje ndaj protestave të opozitës brenda dhe jashtë Kuvendit. Prandaj i angazhuan forcat anti-terror, por arsyeja tjetër për këtë është se aq shumë është në panik pushteti aktual, saqë synojnë ta ndajnë dhe ta zhdukin opozitën”. (shekulli)

Deputetëve të Lëvizjes VETËVENDOSJE! Aida Dërgutit dhe Glauk Konjufcës iu është caktuar masa e arrestit shtëpiak deri më 14 janar 2016.

Qeveria e Republikës së Kosovës, përmes sistemit të drejtësisë që e ka kapur, po tenton ta ndalë opozitën duke përndjekur, rrahur, arrestuar e dënuar deputetët dhe aktivistët opozitarë.

Tash edhe Gjykata Kushtetuese ka thënë që janë shkelur 23 nene të Kushtetutës me marrëveshjen për “Zajednicën”. Kjo veçse ia shton legjitimitetin secilit aktivitet të deritashëm opozitar në kundërshtim të marrëveshjeve të dëmshme për Kosovën. Pas këtij vendimi të Gjykatës Kushtetuese, Qeveria shkelëse e Kushtetutës duhet të largohet menjëherë.

Vala e protestave që nis në janar do ta detyrojë Qeverinë të largohet, nëse nuk jep dorëheqje paraprakisht.

30 dhjetor 2015
Lëvizja VETËVENDOSJE!

Kryeministri i Kosovës, Isa Mustafa e ka përjashtuar çdo mundësi që ai të jap dorëheqje pas presioneve të shtuara të opozitës.

Në një konferencë përmbyllëse të punës së Qeverisë së Kosovës për këtë vit, Mustafa ka deklaruar se qeveria që ai drejton është e ndërtuar mbi bazën e një koalicioni të gjerë që përfaqëson shumicën në Kuvend dhe se opozita, sipas tij, nuk ka të drejtë t’i kërkojë dorëheqjen.

“Mendoj se dorëheqje duhet të jap opozita. Jo dorëheqje nga Kuvendi, por dorëheqje nga dhuna dhe hedhja e gazit lotsjellës në Kuvend. Duhet të hiqet dorë nga këso veprime, sepse në një vend demokratik askush nuk ka të drejtë të shkel ligjin dhe që të përdorë armët dhe mjetet e dhunës për të imponuar një vullnet politik”.

“Nuk e kemi ndërmend të japim dorëheqje e as të shkojmë në zgjedhje, sepse zgjedhjet do të mbahen në vitin 2018. Kemi një koalicion të fortë e stabil”, ka deklaruar Mustafa.

Kërkesa e opozitës për dorëheqjen e Mustafës mbështetet edhe në aktgjykimin e shpallur të Gjykatës Kushtetuese në lidhje me parimet e marrëveshjes me Serbinë për Asociacionin e komunave të banuara me shumicë serbe.

Aty thuhet se disa parime të kësaj marrëveshjeje nuk janë në tërësi në harmoni me Kushtetutën.

Por, sipas Mustafës, kjo nuk përbën shkelje, ngase palët në dialog, Prishtina, Beogradi dhe ndërmjetësuesi Bashkimi Evropian, janë pajtuar që Gjykata Kushtetuese e Kosovës të jetë interpretuese e parimeve.

“Suksesi më i madh i kësaj marrëveshjeje është se ka pranuar si Brukseli ashtu edhe Serbia që Gjykata Kushtetuese e Kosovës të jetë arbitri dhe interpretuesi i Kushtetutës në këtë marrëveshje. Konsideroj që interpretimet që i ka dhënë Gjykata Kushtetuese janë shumë të mira dhe kontribuojnë që në vazhdim, gjatë hartimit të statutit çdo gjë të përputhet me Kushtetutën. Marrëveshja nuk është akt juridik, por statuti”, ka theksuar Mustafa.

Mustafa ka folur edhe për prioritetet e qeverisjes së tij për vitin e ardhshëm.

Ndër tjera, ai ka premtuar edhe vazhdimin e proceseve integruese, zbatimin e Marrëveshjes së Stabilizim Asocimit me Bashkimin Evropian si dhe finalizimin e procesit të liberalizimit të vizave.

“Tani mbetet vetëm çështje e vullnetit politik të Bashkimit Evropian për të dhënë rekomandimin pozitiv për liberalizimin e vizave. Unë kam besim që këtë do ta bëjë dhe po ashtu jam i bindur që ne gjatë vitit 2016 do të arrijmë që të udhëtojmë pa viza në vendet e Bashkimit Evropian”, ka thënë Mustafa.

Kosovën gjatë vitit 2015 e njohën vetëm tri shtete të reja.

Por sipas, kryeministrit Mustafa, tani numri i njohjeve është në nivelin ku nuk priten më seri të një pas njëshme njohjesh.

Kurse prioritet, ka nënvizuar ai, po i kushtohet lobimit te pesë vendet anëtare të Bashkimit Evropian të cilat ende nuk e kanë njohur Kosovën, duke veçuar sidomos Greqinë. (rel)

Në Kosovë, Instituti Demokratik tha se parlamenti ka dështuar të përmbushë punën e tij ndërsa kritikoi qeverinë për ndërhyrje në punën e parlamentit. Në një raport të këtij instituti thuhet se zhvillimet e fundit në parlament ishin të rënda dhe kanë rrezikuar funksionimin e shtetit. Qeveria dhe partitë opozitare vazhdojnë të kritikojnë njëra tjetrën për zhvillimet e fundit në Kosovë, e cila që nga shtatori po përballet me një krizë të rëndë politike. (voa)