Kryeministri i Kosovës, Albin Kurti, ka deklaruar se marrëdhëniet me SHBA nuk qëndrojnë “të varura nga një pe që mund të shkëputet”.

Ai tha në seancën e sotme të Kuvendit se Kosova nuk ka humbur asnjë fond nga projektet e MCC-së për energjinë, dhe se frika dhe paniku për prishje të marrëdhënieve me SHBA janë të pavenda.

Në seancën plenare të Kuvendit, ku po debatohet për projektin e gazsjellësit, Kurti tha se nëse viti i ka 52 javë, ai takohet 52 herë në vit me ambasadorin amerikan në Kosovë.

“Nuk na kanë humbur asnjë fonde dhe s’ka dëmtim të raporteve me SHBA-në. Frika dhe paniku i tillë janë të pavend, s’ka nevojë askush t’i ketë dhe t’i shpreh publikisht t’i përcjell te të tjerët. Unë së paku një herë në javë e takoj ambasadorin amerikan. Sot kam takim po ashtu, nëse viti i ka 52 javë, unë e takoj 52 herë në vit. Rregullisht jemi në kontaktet me gjitha temat. Nuk është as aleanca dhe as partneriteti me SHBA dhe sigurinë kombëtare në njërën anë dhe as ai ekonomik dhe zhvillimor në anën tjetër i varur në pe. Nuk qëndron partneriteti jonë i varur për një pe që tash mund të shkëputet shumë shpejt. Prandaj ju lus të gjithë të keni më shumë besim në aleancën dhe partneritetit me SHBA-në”, tha Kurti.

Lidhur me debatin për gazsjellësin, kreu qeveritar tha se tre juristë që ishin më energjikët për debatin për energjinë, morën leksion nga ministrja e Ekonomisë, Artane Rizvanolli, të cilën e quajti edhe profesoreshë.

“Sot ka marrë një leksion të mirë profesoresha e ekonomisë, kjo është shpresëdhënëse për emancipimin. Më energjikët për debatin për energjinë ishin tre juristë dhe ishte shumë bukur si tre studentë të juridikut morën një leksion nga profesoresha e ekonomisë. Jo vetëm që morën leksionin, por kërkuan t’i zgjatet fjala asaj. Mund ta parashikoj si përfundon kjo, në fund të semestrit tre studentë të juridikut do ta admirojnë profesorin e ekonomisë”, shtoi ai.

Kuvendi i Kosovës ka shkruar në pauzë deri në orën 15:00

Kurti: Bashkëpunimi rajonal energjetik, në radhë të parë me Shqipërinë 

Qeveria e Kosovës ka prezantuar grupin punues për Strategji të Energjisë 2022-2031, me ç’rast kryeministri Albin Kurti ka thënë se sektori i energjisë është sektori prioritar për Qeverinë e Kosovës sektor ky që prek çdo aspekt të jetës së qytetarëve tanë.

Kryeministri Kurti tha se gjatë 20 viteve të fundit në vend nuk ka pasur asnjë vendim në të mirë të qytetarëve për këtë sektor, prandaj siç u shpreh ai me anë të kësaj strategjie do të sigurohet furnizim i rregullt të energjisë për amvisëri ashtu edhe për biznese, për të pasur zhvillim ekonomik dhe punësim.

Kurti: Ne duhet të ofrojmë siguri të furnizimit si për amvisërit ashtu edhe për bizneset

“Gjatë 20 viteve të fundit sektori i energjisë në vend nuk ka pasur pothuajse asnjë vendim në të mirë të qytetarëve që është bazuar në studime, analiza shumë dimensionale e të dhëna faktike. Ne duhet të ofrojmë siguri të furnizimit si për amvisëritë ashtu edhe për bizneset, në mënyrë që të kemi një jetë normale për qytetarët si konsumator si dhe zhvillim ekonomik, industrial e punësim në vend. Strategjia e energjisë 2022-2031, është strategjia e parë e energjisë në Kosovë, e cila përpos që do të bazohet në të dhëna dhe do përpilohet nga ana e ekspertëve, është duke u hartuar përmes proceseve demokratike e transparente”, u shpreh Kurti.

Me këtë strategji të energjisë, Kurti tha se prioritet do të jetë bashkëpunimi me Shqipërinë.

Kurti: Bashkëpunim në radhë të parë me Shqipërinë

“Për këtë arsye ne kemi marrë përsipër detyrën e rëndësishme e zhvillimit të një strategjie kombëtare të energjisë dhe identifikimin e planeve të veprimit në mënyrë që sektori jonë I energjisë të niset për një tranzicion të drejt energjetik, do ët ruaj sigurinë e furnizimit, do të promovoj energjinë e pastër dhe bashkëpunimin rajonal, në radhë të parë me Shqipërinë, por edhe me vendet e tjera”, theksoi ai.

Ministrja e Ekonomisë, Artane Rizvanolli tha se me këtë strategji dhjetë vjeçare do të ketë rol në tranzicionin energjetik për de-karbonizim dhe energji të pastër.

Këtë dokument e ka quajtur të rëndësishëm jo vetëm për sektorin e energjisë, por edhe për sektorin e ekonomisë dhe për shtetin e Kosovës.

Rizvanolli: Vizioni që na udhëheq gjatë hartimit të kësaj strategjie- rruga drejt dekarbonizimit

“Jemi të angazhuar që së bashku me ju të zhvillojmë një strategji që do të siguroj tranzicion energjetik për vendin tonë, por gjithashtu tranzicion energjetik i cili siguron edhe drejtësi sociale për qytetarët tonë. Vizioni që na udhëheq gjatë hartimit të kësaj strategjie është rruga afatgjate drejt de karbonizimit deri në vitin 2050. Ndërkohë që ne ruajmë sigurinë e energjetike dhe përballueshmërinë për konsumatorët, duke rritur përdorimin e energjisë së pastër dhe sigurojmë integrim rajonal të energjisë në mënyrë ekonomikisht të qëndrueshme”, theksoi Rizvanolli.

Pjesë e hartimit të kësaj strategjie, përveç ekspertëve të fushës do të jenë edhe ata nga shoqëria civile.

rtk